ƐSƖTA 9 - WƖA TENIŊ

Juu tɩŋŋaa yuo dii ba dʋndɔŋŋɔɔ

¹ Chɛŋ fii arɩ balɩa-la ba sɩɩ yɩrɛ Adaa tapʋlaa fii arɩ batori chɛɛŋ, tapʋlɩɩ-la kuoro sɩ daga dɩ Juu tɩŋŋaa yuo ba dʋndɔŋŋɔɔ sɩ yie, Juu tɩŋŋaa dʋndɔŋŋɔɔ fa kɛŋ yɩɛlaa arɩ ba jaŋ wuo yuo dii Juu tɩŋŋaa, ama Juu tɩŋŋaa wuo yuo dii nɩalɩŋ kala sɩ bɛrɛba.

² Kuoro Zɛzɛs tinteeŋ tasɩ-la kala lɛ, Juu tɩŋŋaa hilimi a ŋaa siri dɩ ba yuo ba dʋndɔŋŋɔɔ. Fawʋllʋŋ kɛŋ nɩwogusu-la ba kʋŋkala bɩ wuo lɩɩ cheŋ Juu tɩmma-la.

³ Kuoro tinteeŋ sɩpaalaaraa, ʋ kuoru-biisiŋ arɩ ʋ tɩntɩnnɩ-hɩasɩŋ kala sii chɩŋ Juu tɩŋŋaa harɩŋ, bɛɛ wɩaa ba faa fa Modikaaya nɛ.

⁴ Modikaaya lɛɛlɛ kʋ ŋaa nɩbal kuoro dɩa lɛ, ʋ yɩrɩŋ teeli tintee-la kala kuoro sɩɩ beŋ, ʋ doluŋ faasa pʋŋa pɛ.

⁵ Ŋɩɩ nɛ Juu tɩŋŋaa paa ba tokobiee a kpʋ ba dʋndɔŋŋɔɔ ŋɩɩ kala ba sɩɩ chɛ.

⁶ Tabalɩŋ Susa lɛ Juu tɩŋŋaa kpʋ nɩaa zɔɔ-banɔŋ nɛ.

⁷ Ba kpʋ Pasandata ma nɛ, Dalɩfɔŋ arɩ Asɩpata.

⁸ Porata, Adalɩa arɩ Arɩdata.

⁹ Pamasɩta, Arɩsaɩ, Arɩdaɩ arɩ Vazata.

¹⁰ Hamɛdata nanʋala Hamaŋ Juu tɩŋŋaa dʋndɔŋ-la fa kɛŋ biiriŋ fii nɛ, ba kpʋ ba ma kala. Ama ba fa bɩ nɩalɩŋ dʋa paa.

¹¹ Tapʋlɩɩ-la tɩtɩa nɛ ba dagɛ nɩalɩŋ Juu tɩŋŋaa sɩ kpʋa Susa lɛ niiŋ a pɩ kuoro.

¹² Ŋɩɩ nɛ kuoro bʋla pɩ ʋ habidiire Ɛsɩta, “Susa dʋndʋŋa lɛ Juu tɩŋŋaa kpʋ nɩaa zɔɔ-banɔŋ nɛ, a pɛ Hamaŋ biiriŋ fii lɛ. Dɩ nɩaa nɛ magɛ ŋ-la dɩ ba kpʋ daha dʋndʋŋa, nɩaa magɛ ɛɛ nɛ ba jaŋ kpʋ mɩ tinteeŋ kala lɛ? Wɩɩ dɔŋ nɛ bɩra hɛ nɩmɛ ŋ chɛ dɩ mɩ ŋaa? Bʋl, mɩ jaŋ ŋaa.”

¹³ Ɛsɩta bʋl, “Kuoro dɩ ʋ nɛ jaŋ tɔrɛ ŋ tʋɔŋ, chie bɩra pɩ Juu tɩmma-la sɩ hɛ Susa lɛ wombiiŋ dɩ ba yuo laa ba tɩtɩa arɩ ba sɩ ŋaa ŋɩɩ jɩnɩŋ. Leŋ dɩ ba paa Hamaŋ biiri-la fii ba sɩ kpʋa kʋsʋʋnʋŋ a sagɛ lee-la nʋʋkala sɩ jaŋ nɩnaba.”

¹⁴ Ŋɩɩ nɛ kuoro pa wombiiŋ ba ŋaa wɩɩ-la Ɛsɩta sɩɩ chɛ a paa Hamaŋ biiri-la fii kʋsʋʋnʋŋ sagɛ Susa lɛ.

¹⁵ Chɛnɛ-la ba sɩɩ yɩrɛ Adaa tapʋlaa fii arɩ banɛsɛ chɛɛŋ, Juu tɩmma-la sɩ hɛ Susa lɛ bɩra sii hɛ dɔŋɔ lɛ a kpʋ nɩaa zɔɔ-batori ama ba bɩ ba dʋa paa.

¹⁶ Juu tɩŋŋaa nɩkaanaa-la ma sɩ hɛ kuoro Zɛzɛs tinteeŋ tasɩŋ dɔnsʋŋ lɛ, sii hɛ dɔŋɔ dɩ ba yuo laa ba tɩtɩa, a ma kpʋ ba dʋndɔŋŋɔɔ bʋɩ mahɩŋ batori arɩ fii arɩ banɔŋ, aŋ bɩ ba dʋa paa.

¹⁷ Chɛnɛ-la ba sɩɩ yɩrɛ Adaa tapʋlaa fii arɩ batori chɛɛŋ nɛ ba ŋaa wɩɩŋ deeŋ. Ʋ taŋ sɩ pʋla chɛnɛ-la tɩtɩa tapʋlaa fii arɩ banɛsɛ chɛɛŋ Juu tɩmma-la sii wiesi a dii kʋdiilee aŋ gbieli.

Ba gbieli gbiele-la ba sɩ tɔnsɔ dɩ ba kpʋ Juu tɩŋŋaa

¹⁸ Juu tɩmma-la sɩ hɛ Susa lɛ ma kʋ hɛ dɔŋɔ lɛ Adaa chɛnɛ-la tapʋl fii arɩ batori arɩ tapʋl fii arɩ banɛsɛ chɛɛŋ nɛ, aŋ ma sii wiesi tapʋl fii arɩ banɔŋ chɛɛŋ a dii kʋdiilee aŋ gbieli.

¹⁹ Ŋ-la nɛ tɩɩ Juu tɩmma-la sɩ hɛ tabiisiŋ lɛ joŋ chɛnɛ-la ba sɩɩ yɩrɛ Adaa tapʋlaa fii arɩ banɛsɛ chɛɛŋ ʋ ŋaa tʋɔŋ tɔrɛ tapʋlɩɩ ba yie dii kɩaa aŋ gbigbieli aŋ pɛ ŋaa kʋdiilee pɩpɩ dɔŋɔ.

²⁰ Ŋɩɩ nɛ Modikaaya ŋmʋnsɛ wɩalɩŋ kala sɩ ŋaa a hɛ teniŋ tʋɔŋ a bil, aŋ joŋ tenni-la dɔnsʋŋ a kpaa Juu tɩmma-la kala sɩ hɛ kuoro Zɛzɛs tinteeŋ lere-la sɩ bolie arɩ lere-la sɩ kpaga kala,

²¹ a bʋla pɩba: Dɩ ba vɛnɛ gbigbieli chɛnɛ la ba sɩɩ yɩrɛ Adaa tapʋlaa fii arɩ banɛsɛ arɩ tapʋl fii arɩ banɔŋ chɛɛŋ jɩna-na kala.

²² Tapʋlɩa-la lɛ nɛ la Juu tɩŋŋaa yuo dii la dʋndɔŋŋɔɔ. Ʋ maga dɩ ma liisi arɩ chɛnɛ deeŋ tʋɔŋ nɛ ma tʋɔ-cheeŋ bɩrɩmɛ tʋɔtɔrʋŋ, ma yele ma bɩrɩmɛ gbiele. Má joŋ tapʋlɩa-la dɩ ba ŋaa tʋɔtɔrɛ tapʋlɩa dɩ ma ŋaa kʋdiilee a dii aŋ gbigbieli aŋ ŋaa kʋdiile-la a pɩpɩ ma dɔnsʋŋ tɩŋŋaa arɩ summo.

²³ Ŋɩɩ nɛ Juu tɩŋŋaa sɛɩ ŋɩɩ Modikaaya sɩ daga a lɩɩsɛ tapʋlɩa-la balɩa ba ŋaa gbiele tapʋlɩa, ba vɛnɛ gbigbieli jɩna-na kala.

²⁴ Hamɛdata nanʋala Hamaŋ Agag tɩɩna-la sɩ ŋaa Juu tɩŋŋaa kala dʋndɔmɔ fa bɩɩna dɩ ʋ kpʋ Juu tɩŋŋaa kala nɛ. Ʋ fa leŋe ba tɔnsɛ nɛ dɩ ʋ jɩŋ tapʋlɩɩ-la tɩtɩa ʋ sɩ jaŋ kpʋba.

²⁵ Ama Ɛsɩta sɩ sii mʋ kuoro Zɛzɛs teeŋ a sʋlʋ dɩ ʋ laa ʋ dɩ ʋ nɩaa ta, kuoro ŋmʋnsɛ teniŋ a pa wombiiŋ dɩ ba leŋ dɩ wʋbɔŋ-la Hamaŋ fa sɩ bɩɩna dɩ ʋ ŋaa Juu tɩŋŋaa lɛ, mɩɩra nyʋa Hemaŋ tɩtɩa nyuŋ lɛ, dɩ ba kɛsɛ ʋ dɩ ʋ biiriŋ fii a lieŋi ba jebii-la ʋ sɩ saa lɛ.

²⁶ Teŋ-la Modikaaya sɩ ŋmʋnsa bʋla arɩ Juu tɩŋŋaa maga dɩ ba gbieli nɛ tapʋlaa deemba balɩa a tɩŋ wɩɩ-la sɩ ŋaa ba Juu tɩŋŋaa lɛ wɩaa. Bʋa-la lɛ ba sɩɩ gbieli gbiele-la nɛ baa yɩrɛ Purim.

²⁷ Juu tɩŋŋaa sɛɩ ŋɩɩ Modikaaya sɩ daga a lɩɩsɛ tapʋlɩa-la balɩa ba dɩ ba doho nɩaa arɩ nʋʋ na-kala sɩ kʋ pɛ ba lɛ sɩ jaŋ ŋaa kʋdiilee dii aŋ gbigbieli gbiele-la jɩna-na kala.

²⁸ Juu tɩŋŋaa doho sɩ hɛ lee na-kala arɩ ba dɩa nɩaa maga dɩ ba liliisi gbiele-la wɩaa a gbieli Purim gbiele-la tapʋlɩa-la balɩa jɩna-na kala.

²⁹ Ŋɩɩ nɛ Abɩhɛɛl tolo Ɛsɩta sɩ ŋaa kuoro habidiire chɩchɛ dɩ nɩaa jɩŋ arɩ teŋ-la Modikaaya sɩ ŋmʋnsa a tɩgɛ Purim gbiele ŋaa sɩɩfɩaŋ teŋ nɛ. Ʋ ma bɩra ŋmʋnsɛ teniŋ dɔŋɔ a tɩgɛ gbiele-la lɛ.

³⁰ Modikaaya joŋ tenni-la kpaa Juu tɩŋŋaa sɩ hɛ kuoro Zɛzɛs tinteeŋ tasɩ-la zɔlɔ arɩ mara arɩ balɩpɛ kala lɛ a chʋɔlɛ ba arɩ Wɩa jaŋ leŋ ba hɔŋ woruŋ arɩ yarɩfɩɛlaa.

³¹ Ma dɩ ma doho nɩaa kala maga dɩ ma liliisi Purim gbiele-la wɩaa nɛ bʋa na-kala lɛ arɩ ŋɩɩ mɩ dɩ Modikaaya sɩ bʋla. Ʋ bɩra maga dɩ ma to wɩalɩŋ kala la sɩ dagɛma, dɩ ma vɔɔ niiŋ aŋ yiyel nɛ.

³² Wɩalɩŋ kala Maŋgaazɩa Ɛsɩta sɩ ŋmʋnsɛ teŋ-la bʋl a mʋ tɩgɛ gbiele-la ba sɩɩ yɩrɛ Purim lɛ chaasa chɩŋ woruŋ. Ba joŋo ŋmʋnsɛ hɛ ba jaŋ wɩaa teniŋ tʋɔŋ a bil.