ƐSƖTA 8 - WƖA TENIŊ

Kuoro pɩ Juu tɩŋŋaa wombiiŋ dɩ ba sɩ sɛɩ

¹ Tapʋlɩɩ-la tɩtɩa nɛ kuoro Zɛzɛs laa Juu tɩŋŋaa dʋndɔŋ-la Hamaŋ kɩaa kala a pɩ Ɛsɩta. Ŋɩɩ nɛ Ɛsɩta bʋla pɩ kuoro arɩ Modikaaya ŋaa ʋ naambii nɛ. Kuoro leŋ Modikaaya ŋaa ʋ tɩntɩnnɩ-hɩasɩŋ dɔŋɔ.

² Kuoro joŋ nenii-pɩrɩ-la ʋ fa sɩ joŋo pɩ Hemaŋ a pɩ Modikaaya. Ɛsɩta joŋ Modikaaya hɛ ʋ bibeŋ Hamaŋ dʋa-la ba sɩ kaa laa.

³ Ŋɩɩ nɛ Ɛsɩta bɩra sii mʋ dɩ ʋ bʋl wɩaa kuoro teeŋ. Bʋa deeŋ-na lɛ ʋ mʋ kpirimi ʋ naadʋsʋŋ nyuŋ nɛ a sʋlʋ aŋ yiyel a bʋl, “Mɩɩ sʋlʋŋ kuoro giri wʋbɔŋ-la Hamaŋ Agag tɩɩna-la fa sɩ bɩɩna dɩ ʋ ŋaa, a kpʋ Juu tɩŋŋaa kala.”

⁴ Kuoro bɩra kɛŋ ʋ sɛlɩmɛ dantɩga-la sɩ hɛ ʋ nɩsɩŋ lɛ a liesi Ɛsɩta, ʋ sii chɩŋ kuoro sɩpaaŋ.

⁵ Ŋɩɩ nɛ aŋ bʋl, “Kuoro dɩ ŋ tʋɔŋ nɛ jaŋ tɔrɛ, dɩ ŋ nɛ chaasa chomi, mɩɩ sʋlʋŋ ŋmʋnsɛ tenniŋ a tɩa dɩ ba kaa gɔllɛ kpaa ŋ tinteeŋ nɩaa kala a giri wʋbɔŋ-la Hamɛdata nanʋala Hamaŋ, Agag tɩɩna-la sɩ ŋmʋnsɛ pɩ ŋ tinteeŋ nɩaa dɩ ba kpʋ Juu tɩmma-la kala sɩ hɛ ŋ tinteeŋ lɛ ta.

⁶ Mɩ sɛnɛ jaŋ wuo bibeŋ ŋ-la ka dɩ ba kpʋ mɩ naambiiriŋ kala? Mɩ jaŋ wuo ŋaa ŋɩɩ.”

⁷ Ŋɩɩ nɛ kuoro Zɛzɛs mɩɩra bʋla pɩ Ɛsɩta arɩ Modikaaya Juu tɩɩna-la, “Mɩ paala leŋ ba lieŋi Hamaŋ nɛ ka mɩ laa ʋ dʋa pɩ Ɛsɩta, a tɩŋ wʋbɔŋ-la ʋ sɩ bɩɩna a tɩgɛ Juu tɩŋŋaa kala wɩaa.

⁸ Mɩ pɩŋ wombiiŋ nɛ lɛɛlɛ dɩ ŋ chɩŋ Juu tɩŋŋaa kala naasɩŋ lɛ a ŋmʋnsɛ teniŋ dɔŋɔ mɩ-na kuoro yɩrɩŋ lɛ sɩ jaŋ leŋ dɩ ba sɩ́ Juu tɩŋŋaa kpʋ, a kɛŋ mɩ nenii-pɩrɩ-la mɩ sɩ kaa magɩlɛ tenniŋ a magɩlɛ dɩ nʋʋkala sɩ́ wuo kaa bɩrɩmɛ.”

⁹ Chɛŋ tori-la ba sɩɩ yɩrɛ Sɩvaŋ ʋ tapʋlaa mara arɩ batori chɛɛŋ ba yɩrɛ nɩalɩŋ sɩɩ ŋmʋnsɛ kuoro tenniŋ kala hɛ dɔŋɔ. Ba to Modikaaya niiŋ lɛ a ŋmʋnsɛ wɩalɩŋ kala ʋ sɩ daga a pɩ Juu tɩŋŋaa, kuoru-biisiŋ, kuoro tinteeŋ nɩhɩasɩŋ arɩ ʋ tɩntɩnnɩ hɩasɩ-la kala sɩ hɛ ʋ tinteeŋ tasɩ-la zɔlɔ arɩ mara arɩ balɩpɛ lɛ, a chɩŋ taŋ-la ba sɩɩ yɩrɛ Indɩa lɛ a kaa mʋ yi taŋ-la ba sɩɩ yɩrɛ Kus. Taŋ-la kala nɩaa sɩɩ bʋl yikoro-la nɛ ba kaa ŋmʋnsɛ teniŋ pɩba.

¹⁰ Modikaaya ŋmʋnsɛ tenni-la kuoru Zɛzɛs yɩrɩŋ lɛ nɛ a joŋ nenii-pɩrɩ-la kuoro sɩ kaa magɩlɛ ʋ tenniŋ a magɩlɛ, dɩ tɩndaaraa laa tenni-la a jɩl kuoro janɩ-la sɩ faasa fá, a kaa gɔllɔ kpaa.

¹¹ Tenni-la lɛ Kuoro pɩ wombiiŋ nɛ dɩ Juu tɩŋŋaa sɩ hɛ ʋ tinteeŋ tasɩ-la kala lɛ wuo kʋ hɛ dɔŋɔ lɛ a pɔ ba tɩtɩa. Dɩ nʋʋ koo dɩ taŋ nɩaa nɛ sii kɔ dɩ ba kpʋ ba dɩ ba haalaa arɩ ba biiriŋ, dɩ ba wuo kpʋ ba dʋndɔmɔ-la kala aŋ paa ba dʋa.

¹² Tapʋlɩɩ-la kuoro sɩ daga dɩ Juu tɩmma-la kala sɩ hɛ ʋ tinteeŋ tasɩŋ kala lɛ kʋ hɛ dɔŋɔ a pɔ ba tɩtɩa nɛ, chɛŋ-fii arɩ balɩa-la ba sɩɩ yɩrɛ Adaa tapʋlaa fii arɩ batori chɛɛŋ.

¹³ Teŋ-la ŋaa nii nɛ kuoro bil dɩ ba karɩma pɩ ʋ tinteeŋ taŋ na-kala nɩaa dɩ ba jɩŋ, dɩ Juu tɩŋŋaa wuo kɛŋ ba tɩtɩa hɛ dɔŋɔ a ŋaa siri dɩ tapʋlɩɩ-la nɛ yie dɩ ba yuo ba dʋndɔŋŋɔɔ.

¹⁴ Kuoro ŋaa tɩndaara-la laa tenni-la a jɩl kuoro janɩ-la sɩ faasa fá woruŋ a kaa lɩɩ. Ka ba heeli wɩɩ-la kuoro bile ba tabalɩŋ Susa ma lɛ.

¹⁵ Ŋɩɩ nɛ Modikaaya lɩɩ kuoro teeŋ a laalɛ kuoru-gɛrɩŋ sɩ nagɛ diibelimbine a tagɩsɛ kʋpulluŋ, a chu kuoru nyunchuulo ba sɩ kɛŋ sɛlɩmɛ ŋaa, a ha bɩra laalɛ gɛrɩŋ dɔŋɔ ma sɩ ŋaa gɛrɩpɛ vachalɩŋ gɛrɩ-fʋfʋlʋŋ a daŋ. Ka Susa nɩaa tʋɔŋ kala tɔrɛ ba jʋjʋɔsɛ.

¹⁶ Fawʋllʋŋ bɩra bɩ Juu tɩmma-la sɩ hɛ nɩmɛ kɛnɛ, ka ba yaraa fɩɛlɛ ba tʋɔŋ tɔrɛ ba jʋjʋɔsɛ.

¹⁷ Tintee-na kala arɩ taŋ na-kala lɛ tɩndaara-la sɩ kɛŋ nii-la kuoro sɩ bile teniŋ a mʋ karɩma pɩba, Juu tɩmma-la sɩ hɛ nɩmɛ tʋɔŋ yie tɔrɛ nɛ, tapʋlɩɩ-la ŋaa tapʋl-zɔŋ ba gbigbieli. Nɩwogusuŋ dɔnsʋŋ yʋgɛ a joŋ ba tɩtɩa arɩ ba ma ŋaa Juu tɩmma, bɛɛ wɩaa fawʋllʋŋ kɛmba nɛ a tɩŋ Juu tɩmma-la wɩaa.