ƐSƖTA 7 - WƖA TENIŊ

Ba lieŋi Hamaŋ

¹ Ŋɩɩ nɛ kuoro arɩ Hamaŋ arɩ kuoro habidiire Ɛsɩta hɔŋ dɩ ba dii kʋdiilee

² ba sɩ hɔnɔ a nyʋnyʋa kʋnyʋalaa lɩamɩŋ lɛ nɛ kuoro bɩra pɩɛsɛ, “Ɛsɩta, bɛɛ nɛ ŋ chɩchɛ? Bʋl mɩ jaŋ ŋaa pɩŋ. Dɩ ʋ nɛ paala magɛ dɩ mɩ kɛŋ mɩ tinteeŋ kaa kpaa leree balɩa, dɩ ŋ joŋ dɔŋɔ ma, mɩ jaŋ ŋaa ŋɩɩ pɩŋ.”

³ Ɛsɩta bʋl, “Kuoro dɩ ŋ tʋɔŋ nɛ tɔrɛ mɩ nyuŋ, ŋ cho dɩ ŋ pɛ mɩ lɛ, laa mɩ dɩ mɩ nɩaa mɩɩsɩŋ pɩla. Wɩɩ-la kala mɩ sɩɩ chɛ dɩ ŋ ŋaa pɩmɛ nɛ ŋɩɩ.

⁴ Mɩ dɩ mɩ nɩaa kala nɛ ba joŋo yallɛ dɩ ba kpʋ. Dɩ ba nɛ fa kɛsɛ la yallɛ arɩ yosuŋ mɩ fa bɩ jaŋ walɩmɩŋ. Ama baa chɛ dɩ ba kpʋla nɛ.”

⁵ Ŋɩɩ nɛ kuoru Zɛzɛs pɩɛsɛ Ɛsɩta, “Kʋbɛɛ nɩɩ chɛ dɩ ʋ ŋaa wʋdoho deeŋ? Nɩɩ nɛ tɩɩna hɛ?”

⁶ Ɛsɩta bʋl, “La dʋndɔmɔ nɛ ŋaa Hamaŋ, babɔmʋŋ deeŋ. Ŋɩɩ nɛ fawʋllʋŋ kɛŋ Hamaŋ kuoro arɩ Ɛsɩta sɩpaaŋ.”

⁷ Ŋɩɩ nɛ kuoro na baanɩŋ a guu sii, aŋ leŋ ʋ tɩɩnɛnɛɛ sɩŋ-la ʋ fa sɩɩ nyʋa ta aŋ mʋ jʋʋ lɩga-la ba sɩ lɩga golli ʋ kuori dɩa. Ŋɩɩ lɛ nɛ Hamaŋ jɩŋ arɩ kuoro jaŋ ŋaaʋ wʋbɔŋ. Hamaŋ mɩɩra ka harɩŋ a sʋsʋl kuoro habidiire Ɛsɩta dɩ ʋ laa ʋ mɩɩsɩŋ pʋ.

⁸ Kuoro sɩ mɩɩra lɩɩ lɩga-la lɛ a kʋ jʋʋ dɩa-la lɛ ba fa sɩ hɔnɔ dii kɩaa, dɩ Hamaŋ tuu kpirimi Ɛsɩta sɩpaaŋ a sʋsʋlʋ dɩ ʋ fá ʋ nenige. Ŋɩɩ nɛ kuoro kpɩa a bʋl, “Baala deeŋ paala chɩchɛ dɩ ʋ gurigi mɩ habidiire nɛ mɩ kuoru dɩa lɛ koo?” Kuoro sɩ bʋl wɩɩŋ deeŋ dɩdɛrɛ, dɩ ʋ tɩntɩnnaa guu tɔ Hamaŋ sɩaa.

⁹ Ŋɩɩ nɛ kuoro baferisi-la sɩ tɩma pʋpʋ tapʋlɩɩ kala dɔŋɔ ba sɩɩ yɩrɛ Habona bʋl, “Hamaŋ paala leŋ ba saa kɛrɛ nɛ ʋ leŋiŋ ŋaa na-kieliŋ mahɩŋ batori arɩ fii arɩ banɔŋ dɩ ʋ lieŋi Modikaaya nɩɩ-la sɩ laa ŋ mɩɩsɩŋ ta.” Ŋɩɩ nɛ kuoro bʋl, “Má kɛŋ Hamaŋ a lieŋi ʋ tɩtɩa jebii-la lɛ.

¹⁰ Lɩma lɩma dɩ ba kɛŋ Hamaŋ a lieŋu jebii-la ʋ sɩ saa dɩ ʋ lieŋi Modikaaya lɛ, ka kuoro baanɩŋ na fɩɛlɛ.”