ƐSƖTA 6 - WƖA TENIŊ

Kuoro zil Modikaaya

¹ Tapʋlɩɩ-la tɩtaŋɩŋ kuoro walɩmɛ doŋ pɩnɩŋ lɔl aŋ leŋ ba joŋ teŋ-la lɛ ba sɩ ŋmʋnsɛ wɩalɩŋ kala ʋ sɩ dii kuoruŋ a ŋaa a hɛ, a kaa kʋ lɩɩ karɩma pʋ.

² Teŋ-la tʋɔŋ nɛ ba na arɩ Modikaaya wuoli Bigata arɩ Tɛrɛs bʋbʋɔŋ, tɩntɩnna-la balɩa fa sɩɩ pɔ kuoro boiŋ niiŋ, sɩ vʋʋra dɩ ba kpʋ kuoro Zɛzɛs.

³ Ŋɩɩ nɛ kuoro pɩɛsɛ, “Modikaaya sɩ ŋaa wɩɩŋ deeŋ, bɛɛ kʋŋ wʋzɔŋ nɛ ma joŋo siilu?” Ŋɩɩ nɛ kuoro dɩa tɩntɩnna-la bʋla pʋ, “Ba bɩ wɩɩkala ŋaa pʋ.”

⁴ Ŋɩɩ nɛ kuoro pɩɛsɛ, “Mɩ tɩntɩnnɩ hɩa bɛɛ ba nɛ hɛ daha.” Bʋa la lɛ dɩ Hamaŋ kʋ jʋʋ dɩ ʋ bʋla pɩ kuoro dɩ ʋ leŋ ba kɛŋ Modikaaya ka mʋ lieŋi jebii-duduoŋ-la lɛ ʋ sɩ saa.

⁵ Ŋɩɩ nɛ kuoro-dɩa tɩntɩnna-la bʋl, “Hamaŋ nɛ chɩŋ kaala tʋɔŋ.” Ŋɩɩ nɛ Kuoro bʋl, “Ma kɛnʋ ka kɔ.”

⁶ Hamaŋ sɩ kʋ jʋʋ, kuoro pɩɛsʋ, “Bɛɛ kʋŋ nɛ maga dɩ mɩ joŋo dii zile nɩɩ-la mɩ sɩ cho dɩ mɩ dii zile ʋ lɛ?” Hamaŋ bɩɩnɛ ʋ tʋɔŋ lɛ, “Kʋbɛɛ nɛ saa bɩra hɛ nɩmɛ kuoro chɩchɛ ʋ ŋaa Zile ʋ lɛ, dɩ mɩ dee?”

⁷ Ŋɩɩ nɛ ʋ bʋla pɩ kuoro, “Nɩɩ-la ŋ sɩɩ chɛ dɩ ŋ ŋaa zile ʋ lɛ,

⁸ leŋ dɩ ba joŋ ŋ kuoru gɛnnɩ-la ŋ sɩɩ laalʋ dɔŋɔ, a kɛŋ ŋ janɩ-la ŋ sɩɩ jɩl dɔŋɔ, a joŋ ŋ kuoru nyu-bɛlɛ a bɛ jaaba-la nyuŋ.

⁹ Leŋ dɩ ŋ nɩhɩasɩ-la dɔŋɔ joŋ kuoru gɛrɩ-la a laalɛ nɩɩ-la ŋ sɩɩ chɛ dɩ ŋ zil dɩ ʋ jɩl jɔɔ-la. Ka nɩhɩaŋ-la laa jaaba-la sɩpaaŋ a bʋbʋl, ‘Má na nɩɩ-la kuoro sɩɩ zil nɛ ŋ-la.’ ” Ʋ ŋaa ŋɩɩ a kɛnʋ ba gɔllɛ jaŋ kala.

¹⁰ Ŋɩɩ nɛ kuoro bʋla pɩ Hamaŋ, “Guu mʋ ŋaa ŋɩɩ ŋ sɩ bʋla. Joŋ kuori-gɛrɩ-la arɩ jɔɔ-la a kaa mʋ pɩ Modikaaya Juu tɩɩna la sɩ hɔŋ kuoro dɩa boiŋ niiŋ. Sɩ́ wɩalɩŋ kʋŋkala ŋ sɩ daga vɩa.”

¹¹ Ŋɩɩ nɛ Hamaŋ joŋ kuoru-gɛrɩŋ a laalɛ Modikaaya, a leŋ ʋ jɩl jaaba ʋ kɛnʋ gɔllɛ jaŋ-la kala, aŋ bʋbʋl, “Má na nɩɩ-la kuoro sɩ zile.”

¹² Hamaŋ sɩ ŋaa ŋɩɩ dɛrɛ, Modikaaya mɩɩra mʋ hɔŋ kuoro-dɩa boiŋ niiŋ, ka hɩɩsɩŋ kɛŋ Hamaŋ ʋ kɛŋ nyuŋ gʋrɛ a fá mʋ dɩa.

¹³ Hamaŋ mʋ a bʋl wɩɩ-la kala sɩ ŋaa ʋ lɛ a pɩ ʋ haala Zɛrɛs arɩ ʋ nandɔnsʋŋ. Ŋɩɩ nɛ ʋ haala arɩ ʋ nandɔsʋ-la sɩ dagʋ bʋla pʋ, “Dɩ Modikaaya nɛ ŋaa Juu tɩɩna, ŋ wʋwalɩmaa dɩ-suomuŋ nɛ ŋ-la, ŋ lɛlɛ nɛ.”

¹⁴ Ba fa ha sɩɩ bʋl wɩaa ŋɩɩ, dɩ kuoro tɩntɩnnaa kʋ jʋʋ kɛŋ Hamaŋ a lɛrɛ mʋ Ɛsɩta kʋdiile-la ʋ sɩ ŋaa dɩ-diiliŋ.