ƐSƖTA 5 - WƖA TENIŊ

Ɛsɩta sɩɩ chɛ wɩɩ-la kuoro teeŋ

¹ Tapʋl-tori chɛɛŋ, Ɛsɩta sii laalɛ ʋ kuoru-gɛnnɩŋ a mʋ jʋʋ kuoro zawʋra, ʋ jʋa dɩ kuoro hɔŋ ʋ kuoru kpasa nyuŋ a chaasɛ boiŋ niiŋ.

² Kuoro sɩ na ʋ habidiire Ɛsɩta, dɩ ʋ kʋ jʋʋ chɩŋ ʋ sɩpaaŋ, ʋ tʋɔŋ tɔrɛ, ʋ kɛŋ ʋ kuoru dantɩga ba sɩ kɛŋ sɛlɩmɛ ŋaa a liesi Ɛsɩta. Ɛsɩta mʋ yiu a digi dantɩga-la niiŋ lɛ.

³ Ŋɩɩ nɛ kuoro pɩɛsɛ, “Mɩ habidiire Ɛsɩta, bɛɛ nɛ ŋ chɩchɛ daha? Bʋl, dɩ ʋ nɛ maga dɩ mɩ kɛŋ mɩ tinteeŋ kala kpaa leree balɩa dɩ ŋ kɛŋ dɔŋɔ ma, mɩ jaŋ ŋaa ŋɩɩ pɩŋ.”

⁴ Ɛsɩta bʋl, “Kuoro, dɩ ŋ tʋɔŋ nɛ jaŋ tɔrɛ, mɩ jaŋ ŋaa kʋdiilee jɩnɩŋ dɩ ŋ kɛŋ Hamaŋ kɔ dɩ ma kʋ dii kɩalɩŋ aŋ gbieli.”

⁵ Ŋɩɩ nɛ kuoro bʋla pɩ ʋ tɩntɩnnaa, “Má mʋ lɩma a kɛŋ Hamaŋ kɔ dɩ la mʋ Ɛsɩta yɩra-la.” Kuoro arɩ Hemaŋ mʋ Ɛsɩta kʋdiile-la dɩ-diiliŋ.

⁶ Ba sɩ hɔnɔ nyʋnyʋa tɩɩ-nɛnɛ sɩnɩŋ, kuoro bɩra pɩɛsɛ Ɛsɩta, “Bɛɛ nɛ ŋ chɛ dɩ mɩ ŋaa pɩŋ? Dɩ ŋ nɛ paalaa chɛ dɩ mɩ kɛŋ mɩ tinteeŋ a kpaa leree balɩa, dɩ ŋ kɛŋ dɔŋɔ ma, mɩ jaŋ ŋaa ŋɩɩ.”

⁷ Ŋɩɩ nɛ Ɛsɩta bʋl, wɩɩ-la mɩ sɩ chɛ nɛ ŋ-la:

⁸ Dɩ ŋ nɛ sɛnɛ chomi a cho dɩ ŋ ŋaa wɩɩ-la mɩ sɩɩ chɛ, ŋɩɩ na ŋ dɩ Hamaŋ chie bɩra kɔ daha a dii kʋdiilee, bʋa-la lɛ nɛ mɩ jaŋ dagɛ kʋla mɩ sɩɩ chɛ.

Hamaŋ vʋʋra dɩ ʋ kpʋ Modikaaya

⁹ Hamaŋ sii kʋdiile-la leriŋ tapʋlɩɩ-la ʋ tʋɔŋ kala tɔrɛ woruŋ. Ama ʋ sɩ mʋ na dɩ Modikaaya chɩŋ kuoro dɩa boiŋ niiŋ aŋ bɩ ʋ chʋɔla ʋ baanɩŋ faasa sii.

¹⁰ Ama Hamaŋ kɛŋ ʋ tɩtɩa, ʋ bɩ wɩɩkala bʋla aŋ mʋ dɩa. Ʋ sɩ mʋa, ʋ yɩrɛ ʋ nandɔnsʋŋ hɛ dɔŋɔ arɩ ʋ haala Zeresi,

¹¹ a suomo bigisi ʋ tɩtɩa lɛ a pɩpɩba, ʋ dʋa sɩ magɛ ŋɩɩ arɩ ŋɩɩ ʋ biiriŋ sɩ maga arɩ ŋɩɩ kuoro sɩ zilu a pʋ hɩasɩŋ a leŋ ʋ tɩntɩnnɩ-hɩasɩŋ arɩ sɩpaalaaraa kala zizilu.

¹² Hamaŋ bɩra bʋl, “Ŋɩɩ ma dʋndʋŋa dee Ɛsɩta yɩrɛ mɩ dɩ kuoro dʋndʋŋa nɛ la mʋ dii kɩaa, aŋ ka ʋ ha bɩra bʋl la chie kɔ.

¹³ Wɩaa deemba kʋŋkala bɩ mɩ tʋɔŋ tɔrɔ a tɩŋ mɩ sɩ yie na Modikaaya Juu tɩɩna-la dɩ ʋ hɔŋ kuoro dɩa boiŋ niiŋ.”

¹⁴ Ŋɩɩ nɛ ʋ haala Zɛrɛsɩ arɩ ʋ nandɔsʋ-la kala bʋla pʋ, “Leŋ dɩ ba saa kɛrɛ dɩ ʋ leŋiŋ ŋaa na-kieliŋ mahɩŋ batori arɩ fii arɩ banɔŋ, aŋ bʋla pɩ kuoro dɩ ʋ leŋ dɩ ba chie lieŋi Modikaaya jebii-la lɛ chʋchʋɔŋ. Ka ŋ dɩ kuoro mʋ Ɛsɩta kʋdiile-la dɩ-diiliŋ.” Hamaŋ na wɩɩ-la dɩ ʋ zɔmɔ, ʋ leŋ ba saa jebii-la.