ƐSƖTA 4 - WƖA TENIŊ

Modikaaya sʋl Ɛsɩta dɩ ʋ pɛ ba lɛ

¹ Modikaaya sɩ nɩɩ teŋ-la ba sɩ ŋmʋnsa wɩaa, ʋ kɛŋ ʋ gɛnnɩŋ kɩɛsɛ aŋ ŋaa tʋɔrʋŋ bʋgɛ, a laalɛ tʋɔ-chei gɛrɩŋ a faasaa ŋmoo niiŋ.

² Ʋ ŋaa ŋɩɩ a wuo mʋ kuoro dɩa boi-baalɩŋ dʋndʋŋa nɛ, bɛɛ wɩaa ba bɩ jaŋ sɛɩ dɩ nʋʋkala sɩ laalɛ tʋɔ-chei-gɛrɩŋ jʋʋ kuoro kaala.

³ Lee-la na-kala kuoro tɩndaarɩ-la sɩ yie ba karɩmɛ, Juu tɩmma-la sɩ hɛ nɩmɛ kala tʋɔŋ yie chei nɛ ba yiyel a bɩ kɩaa ka dii. Ba jesiŋ kala laalɛ tʋɔ-chei gɛnnɩŋ aŋ bʋgɛ tʋɔrʋŋ.

⁴ Ɛsɩta ketiee arɩ baferisi-la sɩɩ benu sɩ kʋ bʋl wɩɩ-la Modikaaya sɩ ŋaa pʋ, ʋ tʋɔŋ faasa chei. Ŋɩɩ nɛ ʋ tɩa gɛnnɩŋ dɩ ba kaa mʋ pʋ dɩ ʋ laalɛ aŋ wuri tʋɔ-chei gɛnnɩ-la, ama Modikaaya vɩa.

⁵ Ŋɩɩ nɛ Ɛsɩta yɩrɛ bafere-la dɔŋɔ ba sɩɩ yɩrɛ Hatak kuoro sɩ leŋe ʋ bibenu dɩ ʋ lɩɩ pɩɛsɛ Modikaaya na wɩɩ-la sɩɩ walɩmʋ.

⁶ Hatak lɩɩ na Modikaaya kuoro dɩa boiŋ niiŋ.

⁷ Modikaaya bʋl wɩalɩŋ kala sɩ ŋaa a pʋ, aŋ dagɛ moribiee niiŋ ma Hamaŋ sɩ daga arɩ ʋ jaŋ joŋo time hɛ kuoro dɩa moribiee lɛ, dɩ ba nɛ kpʋ Juu tɩŋŋaa kala sɩ hɛ kuoro Zɛzɛs tinteeŋ lɛ,

⁸ aŋ joŋ teŋ-la ba sɩ ŋmʋnsa a pa wombiiŋ dɩ ba kpʋ Juu tɩŋŋaa kala Susa lɛ dɔŋɔ pɩ Hatak dɩ ʋ kaa jʋʋ pɩ Ɛsɩta aŋ bʋl wɩɩ-la a pʋ aŋ sʋlʋ dɩ ʋ jʋʋ sʋl kuoro dɩ ʋ fa ʋ dɩ ʋ nɩaa nenige.

⁹ Hatak mɩɩra jʋʋ bʋl wɩalɩŋ kala Modikaaya sɩ bʋla a pɩ Ɛsɩta.

¹⁰ Ŋɩɩ nɛ Ɛsɩta bʋl, “Mʋ bʋla pɩ Modikaaya,

¹¹ wɩɩ nɛ ba bʋla bil a mʋ tɩgɛ dɩ nʋʋ nɩɩ chɛ dɩ ʋ na Kuoro lɛ, ʋ nɩhɩasɩŋ arɩ ʋ nɩaa kala jɩŋ wɩɩŋ deeŋ lɛ. Dɩ nʋʋ nɛ jʋa dɩ ʋ na kuoro ka kuoro bɩ tɩɩna yɩra, ba jaŋ kpʋ. Wɩɩ-la sɩ jaŋ laa tɩɩna ta nɛ dɩ kuoro nɛ kɛŋ ʋ sɛlɩmɛ dantɩga a liesi tɩɩna. Mɩ ma tapʋlaa Mara arɩ fii nɛ ŋ-la kuoro ha sɩ bɩ mɩ yɩra.”

¹² Hatak sɩ mʋ bʋl wɩɩ-la Ɛsɩta sɩ bʋla a pɩ Modikaaya,

¹³ Modikaaya bɩra tɩŋ ʋ mʋ bʋla pɩ Ɛsɩta, “Sɩ́ bɩɩna bʋl ŋ sɩ hɛ kuoro dɩa lɛ wɩaa dɩ ba nɩɩ kpʋ Juu tɩŋŋaa ŋ jaŋ fori.

¹⁴ Dɩ ŋ nɛ bɩ sii bʋla laala ta lɛlɛ, Wɩa jaŋ wuo to wombiiŋ a laala ta, ama ŋ dɩ ŋ nyɩmma dɩa nɩaa jaŋ sʋʋ. Ŋ bɩ pɔ wɩɩŋ deeŋ wɩaa nɛ tɩɩ ŋ ŋaa kuoro habidiire dɩ ŋ laa ŋ nɩaa ta.”

¹⁵ Ŋɩɩ nɛ Ɛsɩta tɩŋ tɩndaarɩŋ pɩ Modikaaya a bʋl,

¹⁶ “Kɛŋ Juu tɩmma-la kala sɩ hɛ Susa tinteeŋ lɛ hɛ dɔŋɔ a bʋla pɩba dɩ ba vɔɔ niiŋ wɩɩhɛyɛ arɩ tɩtaŋɩŋ kala tapʋlaa batori a sʋl Wɩa pɩmɛ. Mɩ dɩ mɩ ketiee ma jaŋ ŋaa ŋɩɩ tɩtɩa. Ʋ ŋɩɩ harɩŋ mɩ jaŋ jʋʋ kuoro teeŋ, dɩ ʋ nɛ paala magɛ dɩ mɩ sʋʋ ma, mɩ jaŋ sʋʋ.”

¹⁷ Ŋɩɩ nɛ Modikaaya ŋaa wɩalɩŋ kala Ɛsɩta sɩ dagʋ.