Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

ƐSƖTA 3 - WƖA TENIŊ


Hamaŋ chɛ wombiiŋ dɩ ʋ kpʋ Juu tɩŋŋaa kala

1 Wɩaa deemba sɩ bala, bʋa kʋbala lɛ kuoro Zɛzɛs joŋ ʋ tɩntɩnnɩ-hɩasɩŋ ma kala hɩasɩŋ a pɩ baal kʋbala ba sɩɩ yɩrɛ Hamaŋ, ʋ nyɩmma nɛ Hamɛdata a ŋaa Agag doho nʋʋ.

2 Ŋɩɩ nɛ kuoro bʋla pɩ ʋ tɩntɩnnɩ-hɩasɩ-la kala sɩɩ hɔŋ kuoro dɩa boi-baalɩŋ dɩ ba kpirime zizil Hamaŋ. Ba kala sɛɩ a kpikpirimi, ka Modikaaya-na vɩa.

3 Kuoro tɩntɩnnɩ hɩasɩ-la dɔnsʋŋ sɩɩ hɔŋ kuoro dɩa boi-baalɩŋ pɩɛsɛ Modikaaya, “Bɛɛ nɛ tɩɩ ŋ vɩa dɩ ŋ to nii-la kuoro sɩ bile?”

4 Tapʋlɩɩ na-kala ba yie bʋla pɩ Modikaaya wɩɩ-la ʋ sɩɩ ŋaa, ka ʋ bɩ kaa tɩtɩŋ. Ŋɩɩ nɛ ba bʋl wɩɩ-la pɩ Hamaŋ dɩ ba naa, ʋ jaŋ sɛɩ Modikaaya sɩ kɛŋ ʋ mɛlɛ-la, bɛɛ wɩaa Modikaaya bʋla pɩba arɩ ʋ na ŋaa Juu tɩɩna nɛ.

5 Hamaŋ sɩ na dɩ Modikaaya bɩ sɛɩ dɩ ʋ kpirimi ʋ sɩpaaŋ koo ʋ zilu, ʋ na baanɩŋ woruŋ.

6 Hamaŋ sɩ kʋ jɩŋ dɩ Modikaaya ŋaa Juu tɩɩna nɛ, ʋ beŋ dɩ ʋ nɛ kpʋ ʋ dʋndʋŋa, ŋɩɩ ha bɩ magɛ. Ʋ lɛɛlɛ chɩchɛ wombiiŋ dɩ ʋ kpʋ Juu tɩŋŋaa kala sɩ hɔŋ kuoro Zɛzɛs tinteeŋ lɛ.

7 Kuoro Zɛzɛs sɩ dii kuoruŋ, jɩsɩŋ fii arɩ balɩa tʋɔŋ chɛŋ bumbuŋ-la ba sɩɩ yɩrɛ Nɩsaŋ tʋɔŋ nɛ, Hamaŋ bʋl dɩ ba tɔnsɛ dɩ ʋ na tapʋlɩɩ-la arɩ chɛnɛ-la sɩ maga dɩ ʋ ŋaa wɩɩ-la ʋ sɩ bɩɩna dɩ ʋ ŋaa. Ŋɩɩ nɛ ba lɩɩsɛ chɛŋ-fii arɩ balɩa-la ba sɩɩ yɩrɛ Adaa, ʋ tʋɔŋ tapʋlaa fii arɩ batori chɛɛŋ.

8 Ŋɩɩ nɛ Hamaŋ sii mʋ kuoro Zɛzɛs teeŋ a bʋla pʋ, “Nɩa kʋbala ba nɛ gɔllɔ hɔŋ ŋ tinteeŋ kala lɛ, ŋ nɩaa tʋɔŋ. Ba naabarɩŋ arɩ ŋ nɩaa naabarɩŋ bɩ dɔŋɔ naga. Ba-na bɩ ŋ niiŋ wɩaa kaa tɩtɩŋ. Kuoro, ŋ bɩ maga dɩ ŋ leŋ dɩ ba hɔŋ ŋ nɩaa tʋɔŋ.

9 Kuoro dɩ ŋ tʋɔŋ nɛ jaŋ tɔrɛ, pɩ wombiiŋ dɩ ba kpʋ nɩalɩŋ. Dɩ ŋ nɛ ŋaa ŋɩɩ, mɩ jaŋ wuo na warɩpʋla bʋɩ-fii a hɛ ŋ kuoru dɩa moribiee lɛ dɩ ba kaa wasɛ la tinteeŋ.”

10 Ŋɩɩ nɛ kuoro Zɛzɛs lɩɩsɛ ʋ nenii-pɩrɩ-la ʋ sɩ kaa magɩlɛ ʋ teniŋ a pɩ Agag doho nɩaa Hamɛdata nanʋala Hamaŋ, jʋʋ tɩŋŋaa dʋndɔŋ-la,

11 aŋ bʋla pʋ, “Nɩalɩŋ arɩ ba moribiee kala hɛ ŋ nɩsɩŋ lɛ nɛ, ŋaa ba ŋɩɩ kala ŋ sɩɩ chɛ.”

12 Chɛŋ-bumbuŋ-la ba sɩɩ yɩrɛ Nɩsaŋ tapʋlaa fii arɩ batori chɛɛŋ, Hamaŋ yɩrɛ nɩalɩŋ sɩɩ ŋmʋnsɛ kuoro teniŋ, dɩ ba kɛŋ ba tinteeŋ yikoro na-kala a ŋmʋnsɛ tenniŋ a pɩ ba tinteeŋ sɩpaalaaraa arɩ ʋ tɩntɩnnɩ-hɩasɩŋ. Ŋɩɩ nɛ ba ŋmʋnsɛ tenni-la kuoro yɩrɩŋ lɛ a kɛŋ nenii-pɩrɩ-la kuoro sɩ kaa magɩlɛ ʋ tenniŋ a magɩlɛ.

13 Ba joŋ tenni-la pɩ tɩndaaraa ba kaa gɔllɔ kpaa ba tinteeŋ tasɩŋ kala. Ŋ la nɛ ba bʋl a hɛ tenni-la lɛ: Chɛnɛ-la ba sɩɩ yɩrɛ Adaa tapʋlaa fii arɩ batori chɛɛŋ, má kpʋ Juu tɩmma-la kala sɩ hɛ tintee-la lɛ baalaa arɩ haalaa, nɩhɩasɩŋ arɩ hambiisiŋ aŋ paa ba kɩaa kala.

14 Ba fa maga ba kɛŋ wɩalɩŋ sɩ hɛ tenni-la tʋɔŋ gɔllɔ heele bʋla pɩ tinteeŋ nɩaa kala nɛ dɩ nʋʋkala nɩɩ a ŋaa siri gbɛrɛ tapʋlɩɩ-la.

15 Ŋɩɩ nɛ kuoro pɩ wombiiŋ tɩndaaraa gɔllɔ bʋl wɩɩ-la pɩ ba tinteeŋ nɩaa kala, ʋ leŋ ba heele pɩ ba tabalɩŋ Sʋsa nɩaa ma kala. Ka ʋ dɩ Hamaŋ hɔnɔ nyʋnyʋa kɩaa, ka Susa kala hosi.

©Ghana Institute of Linguistics Literacy and Bible Translation 1984, 2014

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ