ƐSƖTA 2 - WƖA TENIŊ

Ba lɩɩsɛ Ɛsɩta ʋ ŋaa kuoro habidiire

¹ Ʋ ŋɩɩ harɩŋ nɛ bʋa kʋbala lɛ kuoro Zɛzɛs baanɩŋ fɩɛlɛ, ka ʋ ha kɛŋ wɩɩ-la ʋ habidiire Vasiti sɩ ŋaa arɩ nii-la ʋ-na kuoro sɩ bile a tɩgɛ ʋ lɛ wɩaa bɩbɩɩnɛ.

² Ŋɩɩ nɛ nɩalɩŋ sɩ tɩma pɩpɩ kuoro tapʋlɩɩ kala bʋl, “Kuoro, leŋ dɩ la chɛ hatol-zɔŋŋɔɔ ha sɩ bɩ baalaa jɩŋ a kaa kʋ pɩŋ.

³ Ŋ jaŋ wuo lɩɩsɛ nɩhɩasɩŋ ŋ tinteeŋ tasɩ-la kala lɛ dɩ ba nɛ chaarɛ hatol zɔmɔ-la kaa kɔ la tabalɩŋ Susa, lee-la ŋ haalaa sɩ hɛ, dɩ ŋ tɩntɩnna ba sɩɩ yɩrɛ Hagaɩ bafere-la bibemba, aa pɩba nʋʋ-zɔmɔ-la ba sɩ jaŋ tɩtɩsɛ. Ʋ tɩntɩmɩŋ nɛ folo ŋɩɩ.

⁴ Kuoro, hatolo-la nyuŋ ŋ tʋɔŋ sɩ faasa tɔrɛ leŋ dɩ ʋ nɛ laa Vasiti nyuŋ, a ŋaa ŋ habidiire.” Wɩɩŋ deeŋ sɩma pɩ kuoro ʋ kaa tɩŋ.

⁵ Bʋa deeŋ lɛ, dɩ Juu tɩŋŋaa baal kʋbala hɛ Susa lɛ baa yɩrɛ Modikaaya. Ʋ ŋaa Bɛnjamɩŋ doho nʋʋ nɛ, ʋ nyɩmma nɛ Jaa, ʋ naabalɩma ma nɛ Sɩmɛɩ, Kɩs nanʋala.

⁶ Modikaaya ma fa hɛ nɩalɩŋ Babɩlɔŋ kuoro ba sɩɩ yɩrɛ Nebukadineza sɩ yuo kɛsɛ Jerusalɛm lɛ a kaa mʋ Babɩlɔŋ tʋɔŋ nɛ, a pɛ Juda kuoro Jehoyachiŋ lɛ.

⁷ Modikaaya fa kɛŋ naambii nɛ baa yɩrɛ Hadasa, ʋ nyɩmma arɩ ʋ naaŋ sʋba nɛ aŋ ka Modikaaya dɩɛsʋ. Hadasa yɩrɩŋ dɔŋɔ nɛ Ɛsɩta ʋ zɔmɔ nɛ woruŋ. Ʋ dɩɛsʋ a nagɛ ʋ tɩtɩa tol-lʋlʋŋ nɛ.

⁸ Kuoro sɩ pa wombiiŋ dɩ ba chɛ hatol-zɔŋŋɔɔ kɔ ŋɩɩ, ba kɛsɛ hatoloo yʋgɛ woruŋ Ɛsɩta hɛ ba tʋɔŋ ba kaa mʋ Sʋsa kuoro dɩa. Ba joŋ Hagaɩ nɩɩ-la sɩɩ beŋ haalaa dɩa hɛ ʋ bibemba. Ba kɛŋ Ɛsɩta ma kaa kʋ hɛ Hagaɩ nɩsɩŋ lɛ nɛ ʋ bibenu.

⁹ Hagaɩ tʋɔŋ fa tɔrɛ Ɛsɩta nyuŋ nɛ woruŋ. Ʋ pʋ nʋʋ-zɔŋŋɔɔ ʋ tɩtɩsɛ, a pʋpʋ kʋdiilee ma woruŋ. Hagaɩ tʋɔsɛ ketiee balɩpɛ kuoro dɩa lɛ a kɛmba kaa mʋ hɛ dɩɩ-zɔŋ lɛ ba tɩma pɩpɩ Ɛsɩta.

¹⁰ Ɛsɩta fa bɩ ʋ dɩ-lɩɩlɩŋ arɩ ʋ doho daga pɩ nʋʋkala. Modikaaya nɛ fa sɩ ʋ sɩ lee-la ʋ sɩ lɩa arɩ ʋ doho daga pɩ nʋʋkala.

¹¹ Tapʋlɩɩ-na kala, Modikaaya yie mʋ kaala-la nɛ a daasɛ Ɛsɩta dɩ ʋ na wɩalɩŋ sɩɩ ŋaa ʋ lɛ arɩ ŋɩɩ ʋ sɩ naga.

¹² Ka dɩ hantolibie-na jʋʋ kuoro Zɛzɛs dɩa, ʋ maga dɩ ʋ tɩsɛ hazɔŋŋɔɔ nʋʋŋ jɩ-piliŋ nɛ. Ʋ jaŋ tɩsɛ olif nʋʋŋ arɩ tɩɩ-kel zɔŋ-la ba sɩɩ yɩrɛ Mɛɛ chɛnsɩŋ balɩdʋ, a bɩra fo chɛnfɛŋ-sʋɔrʋsʋŋ a tɩsɛ tʋlaalɩɩba arɩ nʋʋ-sʋɔrʋsʋŋ ma chɛnsɩŋ balɩdʋ.

¹³ Dɩ ʋ nɩɩ jʋʋ kuoro dɩa, ʋ jaŋ wuo joŋ gɛrɩ-la kala koo kpɩɛrɛ-la kala ʋ sɩɩ chɛ haalaa dɩa-la lɛ a laalɛ.

¹⁴ Ʋ jaŋ jʋʋ kuoro teeŋ dɩdaanɩŋ, aŋ mɩɩra kʋ lɩɩ chʋchʋɔŋ a mʋ lee-la haala-la sɩ hɛ. Kuoro kɛŋ bafere kʋbala nɛ baa yɩrɛ Saasɩgas ʋ nɩɩ beŋ haala-la ʋ sɩ bile aŋ bɩ jaa. Dɩ haal-la nɛ kʋ lɩɩ, ʋ bɩra bɩ kuoro teeŋ wuo mɩɩraa mʋ, see dɩ kuoro nɛ cho tɩɩna a yɩrʋ.

¹⁵ Bʋa-la sɩ yie dɩ Ɛsɩta (Modikaaya nyɩŋ-bie ba sɩɩ yɩrɛ Abɩhɛɛl tolo-la ʋ sɩ dɩɛsa a nagɛ ʋ tɩtɩa tol-lʋlʋŋ) jʋʋ kuoro dɩa, ʋ bɩ kʋlaalɩɩ kala dɔŋ wɩaa pɩɛsa, see kuoro bafere-la ba sɩɩ yɩrɛ Hagaɩ nɩɩ-la sɩɩ beŋ haalaa dɩa sɩ dagʋ kɩalɩŋ ʋ laalɛ. Nʋʋkala sɩ na Ɛsɩta, ʋ tʋɔŋ tɔrɛ ʋ nyuŋ nɛ.

¹⁶ Kuoro Zɛzɛs sɩ dii kuoruŋ ʋ jɩsɩŋ balɩpɛ lɛ nɛ, ba kɛŋ Ɛsɩta jʋʋ pʋ ʋ kuoru dɩa lɛ. Chɛŋ-fii-la ba sɩɩ yɩrɛ Tɛbɛf tʋɔŋ.

¹⁷ Kuoro Zɛzɛs sɩ na Ɛsɩta, ʋ chou a kɩɩ hatolie-la kala ha sɩ bɩ baalaa jɩŋ. Ʋ sɩ chou a kɩɩ hatolie-la kala ŋɩɩ, ʋ joŋ kuoru nyunchuulo, a chuu ʋ laa Vasiti nyuŋ a ŋaa ʋ habidiire.

¹⁸ Kuoro tɩŋ Ɛsɩta wɩaa a leŋ ba ŋaa kʋdiilee, ʋ yɩrɛ ʋ nɩhɩasɩŋ arɩ ʋ tɩntɩnnaa kala ba kʋ dii. Ŋɩɩ nɛ aŋ leŋ tapʋlɩɩ-la ŋaa chɛ-wiesii a pɩ ʋ tinteeŋ nɩaa kala, aŋ joŋ kɩaa sɩ kɛŋ yɩrɩŋ ŋaa chɔgɩta pɩ nɩaa.

Ba vʋʋra dɩ ba kpʋ kuoro, Modikaaya nɩɩ a bʋl

¹⁹ Ba sɩ bɩra yɩrɛ hatolie-la kala kʋ hilimi lɩamɩŋ lɛ, dɩ Ɛsɩta naambie Modikaaya lɛɛlɛ ŋaa kuoro dɩa tɩntɩnnɩ-hɩaŋ a hɔŋ kuoro boi-baalɩŋ.

²⁰ Modikaaya fa sɩ dɩɛsɛ Ɛsɩta a bʋla pʋ arɩ ʋ pʋpɔ dɩ ʋ sɩ́ ʋ doho arɩ ʋ dɩ-lɩɩlɩŋ daga pɩ nʋʋkala ŋɩɩ, ʋ kɛŋ ŋɩɩ Modikaaya sɩ dagʋ a tɩtɩŋ.

²¹ Bʋa-la lɛ Modikaaya sɩ hɔŋ kuoro boi-baalɩŋ niiŋ ŋɩɩ, kuoro tɩntɩnna kʋbala ba balɩa sɩɩ pɔ kuoro dɩɩsɩŋ, ba yɩraa nɛ Bɩgɩtana arɩ Teres na baanɩŋ kuoro Zɛzɛs nyuŋ a vʋʋrɛ dɩ ba kpʋ.

²² Ŋɩɩ nɛ Modikaaya nɩɩ wɩɩ-la a bʋla pɩ Ɛsɩta kuoro habidiire. Ʋ ma bʋl wɩɩ-la Modikaaya sɩ nɩa a pɩ kuoro.

²³ Kuoro Zɛzɛs to wɩɩ-la naasɩŋ a na dɩ ʋ ŋaa wʋtɩtɩɩ, ʋ ŋaa ba lieŋi ʋ tɩntɩnna-la balɩa. Ka ʋ leŋ ba ŋmʋnsɛ wɩɩ-la kala hɛ ba wʋŋaalaa teniŋ tʋɔŋ ʋ sɩɩŋ lɛ.