Ɛfɛsɩs Nɩaa 6 - WƖA TENIŊ

Pɔɔl bʋl hambiisiŋ arɩ ba nyɩmmaba arɩ ba naamba wɩaa

¹ Hambiisiŋ, ʋ maga dɩ ma tuto ma nyɩmmaba arɩ ma naamba niiŋ. Ŋɩɩ nɩɩ to Wɩa wombiiŋ.

² Má zizil ma nyɩmmaba arɩ ma naamba arɩ ba sɩ bʋl ŋɩɩ Wɩa teniŋ tʋɔŋ. Wɩalɩŋ Wɩa sɩ dagɛ nɩaa dɩ ba tuto tʋɔŋ, wɩɩŋ deeŋ nɛ kɛŋ time.

³ Dɩ ma nɩɩ zil ma naamba arɩ ma nyɩmmaba, Wɩa jaŋ pɛ ma lɛ dɩ ma na dɩ-zɔmʋŋ, a kɛŋ mɩɩ-duduoŋ dʋnɩa deeŋ lɛ.

⁴ Ma nyɩmmaba, má sɩ́ ma biiriŋ walɩmʋ kɩŋkɛŋ dɩ ba baanɩŋ sisii ma nyuŋ. Má bemba a dagɛba woruŋ Yesu Kirisito wombiiŋ lɛ.

Pɔɔl bʋl yosuŋ arɩ ba tɩŋŋaa wɩaa

⁵ Ma yosuŋ, má tuto nɩalɩŋ sɩ tɩɩma niiŋ. Má zizilba a fɩfába. Má kɛŋ wʋtɩtɩɩ a tutoba arɩ ŋɩɩ ma sɩ jaŋ to Kirisito.

⁶ Má sɩ́ leŋe dɩ ma tɩŋŋaa bemma aŋ ka ma-na tɩtɩŋ woruŋ, a sɩ́ chɛ dɩ ma tɩŋ dɩ ba bɛsɛ ma lɛ. Ama má tɩŋ arɩ ma tɩmaa pɩ Kirisito nɛ a kɛŋ tʋɔ-bala, a ŋɩŋaa wɩalɩŋ Wɩa sɩ cho.

⁷ Má kɛŋ tʋɔtɔrʋŋ tɩtɩŋ ma tɩntɩŋŋaa, a nagɛ ma tɩma pɩpɩ Kirisito nɛ, nuhuobiine dee ma tɩmaa pa.

⁸ Ma jɩŋ dɩ nʋʋ nɛ tɩŋ tɩntɩŋ zɔŋ, La Tɩɩna Wɩa jaŋ joŋ kʋzɔŋ a timu, dɩ tɩɩna ŋaa yomo koo ʋ tɩɩ ʋ tɩtɩa nɛ.

⁹ Ma nɩalɩŋ ma sɩ kɛŋ yosuŋ, má kɛmba woruŋ, má sɩ́ ba walɩmʋ. Ma jɩŋ arɩ ma kala tɩɩna ŋaa kʋbala nɛ a hɛ Wɩa-jaŋ. La kala ŋaa kʋbala nɛ ʋ teeŋ. Ʋ bɩ la kaa pɔrɛ.

Kɩalɩŋ Wɩa sɩ joŋo pɩla dɩ la kaa yuo Sɩtaanɩ

¹⁰ Wɩɩ-la mɩ sɩɩ chɛ mɩ bʋl, ʋ wʋkaanɩŋ nɛ ŋ-la: Má leŋ dɩ La Tɩɩna dol-bal-la hɛ ma lɛ dɩ ma kɛŋ doluŋ woruŋ.

¹¹ Má paa ma bayuori kɩalɩŋ Wɩa sɩ joŋo pɩma laalɛ, ŋɩɩ nɛ ma jaŋ wuo pɔ dɩ Sɩtaanɩ sɩ́ wuo kɛŋ ʋ badɛ wɩaa nyɩsɛma.

¹² Ama la bɩ naga nɩalɩŋ sɩɩ yuo nuhuobiinee. Laa yuo Sɩtaanɩ arɩ ʋ harɩ-tooroo nɛ, arɩ kʋŋkala sɩ kɛŋ doluŋ nɩalɩŋ sɩ hɛ birimiŋ tʋɔŋ teeŋ. Dʋnɩa deeŋ arɩ dol-bɔmɔ-la kala sɩ hɛ wɩa-nyuŋ, ba nɛ laa yuo.

¹³ Ŋɩɩ wɩaa, má laalɛ laalɩyuori kɩaa Wɩa sɩ joŋo pɩma, dɩ tapʋlɩɩ-la wʋbɔŋŋɔɔ sɩɩ chɛ dɩ ba ŋaa ma lɛ, dɩ ma wuo kɛŋ ma tɩtɩa hɛ dɔŋɔ chɩna gbɛrɛ.

¹⁴ Má chɩŋ kpaŋ kpaŋ, má leŋ dɩ wʋtɩtɩɩ-la ma sɩ nɩa nagɛ ma laalɩyuori damɛrɛ a vɔɔ ma tɩŋa lɛ, a leŋ dɩ tʋɔpʋla nagɛ ma hɔɔŋ-bɔɩ-tɔɔrɩ-gɛrɩŋ a tɔ ma harɩŋ arɩ ma sɩpaaŋ kala,

¹⁵ a leŋ dɩ ma sɩ kɛŋ ma tɩtɩa hɛ dɔŋɔ ŋɩɩ dɩ ma bʋl Yesu wʋzɔmɔ-la sɩɩ pɩ fɩɛlɩŋ nagɛ ma laalɩyuori nɛntɛŋŋɛɛ ma hɛ.

¹⁶ Ʋ ŋɩɩ harɩŋ lɛ, má leŋ dɩ ma Wɩa laa diiniŋ dol a nagɛ hɔɔ-la laalɩyuoroo sɩ kaa kɛrɛ ba bɔyɛ. Dɩ ma nɛ ŋaa ŋɩɩ, ma jaŋ wuo kɛrɛ laa ma dʋndɔmɔ hɛŋŋɛɛ kala sɩɩ chol nyiŋgeliŋ dɩ ba dɩsɛ.

¹⁷ Wɩa sɩ laama ta ŋɩɩ, ʋ maga dɩ ʋ nagɛ hɔɔŋ nyuŋ-chu-gbaŋkogo nɛ ma joŋo chu, aŋ joŋ Wɩa Dɩŋ-zɔmʋŋ tokobiiŋ a kori. Tokobii-la nɛ ŋaa Wɩa niiŋ wɩaa.

¹⁸ Má chʋchʋɔlɛ Wɩa bʋa na-kala lɛ ʋ Dɩŋ-zɔŋ-la doluŋ lɛ, a sʋsʋlʋ wɩɩ-wɩɩkala lɛ. Ma sɩɩ ŋaa ŋɩɩ, má pɔ woruŋ a sɩ́ doŋ dɩɛgʋ, aŋ pɛsɛ, a chʋɔlɛ Wɩa pɩpɩ Wɩa nɩaa ma.

¹⁹ Má sʋl Wɩa pɩ mɩ ma dɩ mɩ nɛ suri mɩ niiŋ dɩ Wɩa dagɛmɛ wɩɩ-la mɩ sɩ jaŋ bʋl, a sɩ́ nʋʋkala fá, aŋ bʋl Yesu wʋzɔmɔ-la fa sɩ faa a pɩ nɩaa.

²⁰ Mɩ sɩɩ bʋl Kirisito wʋzɔmɔ-la aa pɩ nɩaa ŋɩɩ, ŋɩɩ nɛ tɩɩ ba kɛmmɛ kaa hɛ chɔrʋmɔɔ. Má sʋl Wɩa pɩmɛ dɩ mɩ wuo bʋl Wɩa wɩaa arɩ nyuduoŋ, arɩ ŋɩɩ sɩ maga dɩ mɩ bʋl ŋɩɩ.

Wʋkaanɩŋ

²¹ Takɩkas sɩ ŋaa la naambii-choolii a bɩra ŋaa La Tɩɩna Yesu tɩntɩnnɩ-tɩtɩɩ, ʋ jaŋ kɔ ma teeŋ a bʋl mɩ wɩaa pɩma, dɩ ma jɩŋ ŋɩɩ mɩ hɔnʋŋ sɩ naga arɩ tɩntɩmɩɩ-la mɩ sɩɩ tɩŋ.

²² Wɩɩ-la wɩaa mɩ sɩɩ tɩmʋ nɛ ŋɩɩ, dɩ ʋ leŋ dɩ ma jɩŋ ŋɩɩ la hɔnʋŋ sɩ naga, dɩ ma nyuŋ nyaasɛ.

²³ La Nyɩmma Wɩa arɩ La Tɩɩna Yesu Kirisito jaŋ leŋ dɩ la naambiiri-la kala sɩ laa Yesu wɩaa dii hɔŋ arɩ fɩɛlɩŋ, a kɛŋ wʋtɩtɩɩ, a cho dɔŋɔ.

²⁴ Nɩalɩŋ sɩ cho La Tɩɩna Yesu Kirisito a kaa mʋ deeŋ deeŋ, Wɩa jaŋ fá nɩaa deemba kala nenige.