Ɛfɛsɩs Nɩaa 5 - WƖA TENIŊ

Má hɛ Kirisito pʋlʋmʋŋ tʋɔŋ

¹ Ma ŋaa Wɩa bii-chooloo nɛ, ŋɩɩ wɩaa, má chichesi Wɩa wʋŋaalaa.

² Má cho dɔŋɔ arɩ Kirisito sɩ chola ŋɩɩ a sʋʋ la wɩaa. Ʋ joŋ ʋ tɩtɩa a pɩ Wɩa nɛ, ba kpʋʋ arɩ ba sɩ yie kpʋ pʋsʋŋ a nyɩga pɩ Wɩa ŋɩɩ, ʋ sʋɔra sɩŋ.

³ Ma sɩ ŋaa Wɩa nɩaa ŋɩɩ, ʋ maga dɩ ma lɩɩsɛ ma tɩtɩa wʋlɩɩlɩŋ lɛ, a bɩra lɩɩsɛ ma tɩtɩa disiŋ kala lɛ, a sɩ́ tʋɔ-luŋuŋ kɛŋ.

⁴ Má sɩ́ wʋlɩɩlɩŋ arɩ wʋtɔɔnʋŋ ma bʋbʋl. Má sɩ́ sɩsɩɩ-tɔɔnʋŋ ma sɩɩ. Ʋ bɩ maga dɩ Wɩa nɩaa ŋɩŋaa wɩaa deemba. Ama ʋ maga dɩ ma lʋlɔllɛ Wɩa nɛ bʋa na-kala lɛ.

⁵ Ʋ maga dɩ ma jɩŋ woruŋ, arɩ nɩalɩŋ sɩɩ ŋaa wʋlɩɩlɩŋ koo nɩalɩŋ sɩɩ ŋaa disiniŋ, arɩ nɩalɩŋ sɩ kɛŋ tʋɔ-luŋuŋ [tʋɔ-luŋuŋ nagɛ vʋɩ-kpaarɩŋ nɛ], nɩaa deemba kʋŋkala bɩ jaŋ dii kɩalɩŋ Wɩa sɩ ŋaa bil ʋ nɩaa lɛ, ʋ-na Wɩa arɩ Kirisito kuorii-la tʋɔŋ.

⁶ Má sɩ́ leŋe dɩ nʋʋkala kɛŋ wʋnyɩɛrɩŋ a nyɩsɛma. Wɩaa deemba nɛ leŋe Wɩa baanɩŋ sisii nɩalɩŋ sɩ bɩ ʋ niiŋ ka to nyuŋ.

⁷ Ŋɩɩ wɩaa, má lɩɩsɛ ma tɩtɩa nɩdosunuŋ deemba lɛ.

⁸ Bʋa kʋbala lɛ ma ma fa hɛ birimiŋ tʋɔŋ nɛ, ama La Tɩɩna Yesu leŋe ma lɛɛlɛ hɛ pʋlʋmʋŋ tʋɔŋ nɛ. Ŋɩɩ wɩaa, má leŋ dɩ ma wʋŋaalaa nagɛ nɩalɩŋ sɩ hɛ pʋlʋmʋŋ tʋɔŋ.

⁹ Pʋlʋmʋŋ tʋɔŋ nɛ nɩaa ŋɩŋaa wʋzɔŋŋɔɔ, tʋɔpʋl wɩaa arɩ wʋtɩtɩɩba.

¹⁰ Ʋ maga dɩ ma gʋnnɛ wɩalɩŋ ma sɩ jaŋ ŋaa dɩ La Tɩɩna Yesu tʋɔŋ tɔrɛ nɛ.

¹¹ Má lɩɩsɛ ma tɩtɩa birimiŋ tʋɔŋ wɩalɩŋ nɩaa sɩɩ ŋaa lɛ. Má joŋ ba bʋbʋɔŋ ta, a leŋ dɩ nɩaa jɩŋ wɩalɩŋ ba sɩɩ ŋaa bɩ zɔŋ.

¹² Ʋ paala kɛŋ hɩɩsɩŋ nɛ dɩ la bʋl wɩalɩŋ ba sɩ lʋaraa ŋaa.

¹³ Kʋŋ na-kala lɛ nɛ dɩ pʋlʋmʋŋ chaana hɛ, ba yie na kʋ-la nagɩsɩŋ kala nɛ.

¹⁴ Ŋɩɩ wɩaa nɛ tɩɩ ba bʋl, “Ma nɩalɩŋ sɩ pɩŋ doŋ a nagɛ ma sʋba, má sii doŋ lɛ. Kirisito jaŋ chaana hɛ ma lɛ.”

¹⁵ Ŋɩɩ wɩaa, má pɔ ma tɩtɩa lɛ arɩ ma wʋŋaalaa lɛ. Má sɩ́ nɩyaaraa nagʋ. Má ŋaa wɩaa a nagɛ nɩalɩŋ sɩ kɛŋ wʋjɩmɩŋ.

¹⁶ Tapʋlaa deemba wʋbɔŋŋɔɔ ŋaanɩŋ pʋrɩga nɛ. Ŋɩɩ wɩaa bʋa na-kala lɛ dɩ ma nɛ na wombiiŋ, má ŋaa wʋzɔŋŋɔɔ aa bʋl wʋzɔŋŋɔɔ.

¹⁷ Má sɩ́ nɩyaara ŋaa, má hɛ doluŋ a jɩŋ wɩalɩŋ sɩɩ tɔrɛ La Tɩɩna Wɩa tʋɔŋ a ŋɩŋaaba.

¹⁸ Má sɩ́ sɩnɩŋ nyʋa bubugi, dɩ ma nɛ nyʋa sɩnɩŋ bubugi, ŋɩɩ jaŋ cheima. Ama má leŋ dɩ Wɩa Dɩŋ-zɔmʋŋ hɛ ma lɛ a tɩtɩŋ.

¹⁹ Dɩ ma nɛ kʋ hilimi a bʋl Wɩa wɩaa pɩpɩ dɔŋɔ, má yɩyɩɩ Wɩa yɩɩlaa a dɩdɛnnɛ Wɩa, a yɩɩ yɩɩla-la dɔnsʋŋ ma sɩɩ dagɛ Kirisito wɩaa. Má yɩɩ Wɩa yɩɩlaa a dɩdɛnnɛ La Tɩɩna Kirisito arɩ ma tʋɔŋ kala.

²⁰ Bʋa na-kala lɛ arɩ wɩɩ-na kala lɛ, má lɔllɛ la Nyɩmma Wɩa, La Tɩɩna Yesu Kirisito yɩrɩŋ lɛ.

Haalaa arɩ ba balaba mɛlɛ sɩ maga dɩ ʋ nagɛ ŋɩɩ

²¹ La sɩɩ zil La Tɩɩna Kirisito ŋɩɩ, ʋ maga dɩ la tuto dɔŋɔba niiŋ wɩaa nɛ.

²² Haalaa, má tuto ma balaba niiŋ arɩ ma sɩɩ to Kirisito ŋɩɩ,

²³ bɛɛ wɩaa baalaa nɛ kɛŋ doluŋ ba haalaa nyuŋ arɩ Kirisito sɩ kɛŋ doluŋ ŋɩɩ nɩalɩŋ sɩ laa ʋ wɩaa dii aa hilimi nyuŋ. Nɩalɩŋ sɩ laa Yesu wɩaa dii aa hilimi nɛ ŋaa ʋ yaraa, ka ʋ ŋaa ba Laataara.

²⁴ Nɩalɩŋ sɩ laa Yesu wɩaa dii aa hilimi sɩɩ to Kirisito niiŋ wɩaa ŋɩɩ, ŋɩɩ tɩtɩa nɛ haalaa ma maga dɩ ba tuto ba balaba niiŋ wɩaa.

²⁵ Baalaa, má cho ma haalaa, arɩ Kirisito sɩ cho nɩalɩŋ sɩ laa Wɩa wɩaa dii aa hilimi ŋɩɩ, ʋ sʋʋ ba wɩaa,

²⁶ a pɩɩsɛ ba disiniŋ ta, a fo ba wʋbɔŋŋɔɔ kala ma ta arɩ lɩɩŋ, a tɩŋ Wɩa niiŋ wɩalɩŋ ba sɩ nɩa wɩaa.

²⁷ Ʋ ŋaa ŋɩɩ dɩ nɩalɩŋ sɩ laa ʋ wɩaa dii aa hilimi, dɩ ba wuo zɔŋ kɩŋkɛŋ, a sɩ́ disiŋ koo wʋcheeli kala kɛŋ, dɩ wʋbɔŋ kala sɩ́ ba lɛ lagɩsʋ, a sɩ́ nyɔɔ kala kɛŋ.

²⁸ Yesu sɩ cho nɩalɩŋ sɩ laa ʋ wɩaa dii aa hilimi ŋɩɩ, ŋɩɩ tɩtɩa nɛ ʋ maga dɩ baalaa cho ba haalaa, arɩ ba sɩ cho ba tɩtɩa ŋɩɩ. Baal-la kala sɩ cho ʋ haala, ʋ cho ʋ tɩtɩa nɛ.

²⁹ Nʋʋkala bɩ ʋ tɩtɩa bɛrɛ, ama ʋ cho ʋ tɩtɩa nɛ a bibeŋ ʋ tɩtɩa nyuŋ woruŋ, arɩ Kirisito sɩɩ beŋ nɩalɩŋ sɩ laa ʋ wɩaa dii aa hilimi nyuŋ ŋɩɩ.

³⁰ Kirisito yie ŋaa ŋɩɩ, bɛɛ wɩaa la ŋaa ʋ nandaasɩŋ nɛ a mɛrɛ ʋ yaraa lɛ.

³¹ Ba ŋmʋnsɛ Wɩa teniŋ tʋɔŋ a bʋl, “Ŋɩɩ wɩaa nɛ tɩɩ baala yie leŋ ʋ nyɩmma arɩ ʋ naaŋ, ka ʋ dɩ ʋ haala mɛrɛ dɔŋɔ lɛ a kɛŋ chal-bala.”

³² Wʋkpuŋkpere deeŋ ŋaa wʋbal nɛ a faa. Mɩ saa jɩma arɩ wɩɩŋ deeŋ mʋʋ tɩgɛ Kirisito arɩ nɩalɩŋ sɩ laa ʋ wɩaa dii aa hilimi lɛ nɛ.

³³ Ʋ saa nagɛ ŋɩɩ nɛ ma ma lɛ. Ʋ maga dɩ nʋʋkala cho ʋ haala arɩ ʋ sɩ cho ʋ tɩtɩa ŋɩɩ, ʋ maga dɩ haala ma zil ʋ bala.