Ɛfɛsɩs Nɩaa 4 - WƖA TENIŊ

La ŋaa kʋbala nɛ Kirisito teeŋ

¹ Ba kɛŋ mɩ-na Pɔɔl tɔ dɩa a tɩŋ La Tɩɩna Yesu wɩaa nɛ. Ma nɩalɩŋ Wɩa sɩ yɩra, mɩɩ sʋlma dɩ ma leŋ dɩ ma wʋŋaalaa joŋ wombiiŋ arɩ Wɩa sɩɩ chɛ ŋɩɩ.

² Má leŋ dɩ ma sɩaa tuu tinteeŋ, a pɛ kɛŋ ma tɩtɩa muuri, a kɛŋ kenyiri, a joŋ wɩaa chɩchɛ dɔŋɔ, a tɩŋ ma sɩ cho dɔŋɔ wɩaa.

³ Má hɛ doluŋ aŋ kɛŋ nii-maga-la Wɩa Dɩŋ-zɔŋ-la sɩ pɩma. Má kɛŋ dɔŋɔ woruŋ a fɩɛla hɔŋ sɔm.

⁴ La kala ŋaa kʋbala nɛ a tɩŋ Kirisito wɩaa. Wɩa Dɩŋ-zɔŋ-la sɩ hɛ la lɛ, ma ŋaa kʋbala nɛ. Wɩa sɩ yɩrɛla ŋɩɩ, la kala ka yɩɛlɛ wʋbala nɛ.

⁵ La kala Tɩɩna ŋaa kʋbala nɛ. Wɩalɩŋ la sɩ laa dii ma ŋaa kʋbala nɛ. Wɩɩchʋɔlɛ lɩɩ-bala nɛ la kala fo.

⁶ Wɩɩ-bala dʋndʋŋ nɛ hɛ nɩmɛ, a ŋaa la kala Nyɩmma. Ʋ nɛ kɩɩ kʋŋkala. Ʋ kɛŋ la kʋŋkala tɩtɩŋ nɛ, a hɛ la kala tʋɔŋ lɛ.

⁷ Kirisito joŋ kɩaa dii zile la kʋŋkala lɛ nɛ a magɛ ŋɩɩ ʋ sɩɩ chɛ.

⁸ Ba ŋmʋnsɛ Wɩa teniŋ sɛmɛ dɔŋɔ a bʋl, “Ʋ sɩɩ jɩl Wɩa-jaŋ, ʋ pɛ kɛsɛ nɩalɩŋ ʋ sɩ yuo dii nɛ, aŋ joŋ kɩaa dii zile nɩaa lɛ.”

⁹ Dɩ ba nɛ sɩ ʋ jɩl Wɩa-jaŋ nɛ, ŋɩɩ daga arɩ ʋ laa sɩpaaŋ lɩɩ Wɩa-jaŋ nɛ a kʋ tuu tinteeŋ.

¹⁰ Nɩɩ-la tɩtɩa sɩ kʋ tuu tinteeŋ, ʋ nɛ bɩra jɩl Wɩa-jaŋ ŋɩɩ a kieli lere-la kala sɩ hɛ wɩa-nyuŋ, dɩ ʋ wuo hɛ lee-kala.

¹¹ Kirisito lɩɩsɛ nɩaa dɔnsʋŋ ba ŋaa ʋ nanzɔɔba, dɔnsʋŋ ma ŋaa Wɩa wʋlaabʋllaa, a leŋ dɔnsʋŋ ma gɔllɔ bʋl Wɩa wɩaa a pɩpɩ nɩaa, dɔnsʋŋ ma bibeŋ nɩalɩŋ sɩ laa ʋ wɩaa dii, ka dɔnsʋŋ ma dɩdagɛ nɩalɩŋ sɩ laa ʋ-na Yesu wɩaa dii.

¹² Ʋ pɩla doluŋ deeŋ dɩ Wɩa nɩaa wuo kaa tɩŋ Wɩa tɩntɩŋŋaa, a wuo pɛ nɩalɩŋ sɩ laa Yesu wɩaa dii aa hilimi lɛ dɩ ba waa wɩalɩŋ lɛ.

¹³ Ʋ pɛ la lɛ ŋɩɩ a kaa mʋ yi bʋa-la lɛ la kala sɩ jaŋ wuo kʋ chɩŋ wɩalɩŋ la sɩ laa dii lɛ, a wuo kʋ jɩŋ Wɩa Bie sɩ nagɛ ŋɩɩ, a kʋ ŋaa nɩduoru Wɩa wɩaa lɛ, a wuo kʋ nagɛ Kirisito sɩ nagɛ ŋɩɩ wɩɩkala lɛ.

¹⁴ Ŋɩɩ-na la bɩra bɩ jaŋ ŋaa hambiisi Wɩa wɩaa lɛ, dɩ wʋwogusu-la nɩaa dɔnsʋŋ sɩɩ dagʋ a mʋ tɩgɛ Wɩa wɩaa lɛ kɛnla begili. La bɩ jaŋ to nɩalɩŋ sɩɩ nyɩɛ wɩaa, a kɛŋ badɛrɩŋ nyɩnyɩsɛ nɩaa, dɩ ba joŋ wɩalɩŋ ba sɩ laa dii ta.

¹⁵ Ama ʋ maga dɩ la cho dɔŋɔ a bʋl wʋtɩtɩɩ pɩpɩ dɔŋɔ bʋa na-kala. Dɩ la nɩɩ ŋaa ŋɩɩ, la jaŋ wuo waa Wɩa wɩaa lɛ a kʋ nagɛ Kirisito sɩ nagɛ ŋɩɩ. Nɩalɩŋ sɩ laa Yesu wɩaa dii aa hilimi nagɛ nuhuobiine nandaasɩŋ nɛ. Kirisito nɛ ŋaa ba nyuŋ.

¹⁶ Ʋ sɩ ŋaa la kala nyuŋ ŋɩɩ, dɩ nandaasɩ-la kala nɛ mɛrɛ dɔŋɔ lɛ a tɩtɩŋ ba tɩntɩŋŋaa woruŋ, yara-la jaŋ waa a tɩŋ ba sɩ cho dɔŋɔ.

Mɩɩ-falɩɩ-la la sɩ kɛnɛ Kirisito teeŋ

¹⁷ La Tɩɩna yɩrɩŋ lɛ mɩɩ chɛ dɩ mɩ bʋl wɩɩ nɛ pɩma arɩ sɩɩfɩɛsɩŋ. Má sɩ́ leŋe dɩ ma wʋŋaalaa nagɛ nɩalɩŋ sɩ bɩ Wɩa jɩŋ. Wɩalɩŋ kala ba sɩɩ bɩɩnʋ ŋaa wʋpɛɩba nɛ.

¹⁸ Birimiŋ tɔ ba wʋjɩmɩŋ nɛ. Ba bɩ jaŋ wuo na mɩɩsɩ-la Wɩa sɩ joŋo pɩ nɩaa, bɛɛ wɩaa ba bɩ wɩɩkala jɩŋ, ba dɩgɩlaa ma bɩ wɩaa ka nɩɩ.

¹⁹ Ba joŋ hɩɩsɩŋ chɔmɔ nyʋa nɛ, aŋ joŋ ba tɩtɩa hɛ wʋlɩɩlɩŋ ŋaanɩŋ lɛ, a hɩhɩɛnɛ dɩ ba gɔllɔɔ ŋaa disiŋ-na kala, a bɩ chɛ ba leŋ.

²⁰ Ama wɩaa deemba dee ma gʋnnɛ Kirisito wɩaa lɛ.

²¹ Ma nɩɩ Yesu wɩaa nɛ, ba dagɛma wʋtɩtɩɩ-la kala sɩ mʋ tɩgɛ Yesu lɛ.

²² Ŋɩɩ wɩaa, má joŋ ma bumbuŋ mɛlɛ-la ta. Mɛlɛ-la fa nyɩsɛma nɛ a cheima.

²³ Má leŋ dɩ Wɩa kɛŋ ma tʋɔbɩɩnaa kala bɩrɩmɛ dɩ ba ŋaa kʋfalɩa.

²⁴ Má leŋ dɩ tʋɔbɩɩŋ falɩa-la nagɛ gɛrɩŋ ma sɩ laala. Wɩa ŋaama dɩ ma nagʋ nɛ a kɛŋ tʋɔpʋla ʋ sɩpaaŋ a sɩ́ disiniŋ kɛŋ.

²⁵ Ŋɩɩ wɩaa, má bɩra sɩ́ wɩaa nyɩnyɩa. Má leŋ dɩ nʋʋkala bʋl wʋtɩtɩɩ a pɩ ʋ dɔŋɔ tɩɩna, bɛɛ wɩaa la kala nagɛ nandaasɩŋ nɛ a kʋ mɛrɛ dɔŋɔ lɛ a ŋaa kʋbala.

²⁶ Dɩ ma nɛ na baanɩŋ, má sɩ́ leŋe dɩ ma baaŋ-la leŋ dɩ ma ŋaa wʋbɔŋ. Má sɩ́ baanɩŋ na ŋɩɩ dɩ wɩa tuu jʋʋ.

²⁷ Má sɩ́ leŋe dɩ Sɩtaanɩ na wombiiŋ a nyɩsɛma dɩ ma ŋaa wʋbɔŋ.

²⁸ Nɩɩ-la kala fa sɩɩ gaa, ʋ maga dɩ ʋ leŋ gaarɩŋ, aŋ kɛŋ ʋ nɩsaa faasa tɩŋ tɩntɩŋ-zɔŋŋɔɔ a wuo na kʋ-la kala ʋ sɩɩ chɛ ʋ tɩtɩa lɛ, aŋ wuo pɛ summoo ma lɛ.

²⁹ Má sɩ́ leŋe dɩ wʋbɔŋ kala lɩɩ ma niiŋ lɛ. Má bʋl wʋzɔmɔ-la sɩɩ jʋʋ nɩaa dɩgɩlaa bʋa-la lɛ sɩ maga, a leŋ dɩ wɩalɩŋ ma sɩɩ bʋl pɛ nɩalɩŋ sɩɩ jegili ba lɛ.

³⁰ Má sɩ́ leŋe dɩ Wɩa Dɩŋ-zɔmʋŋ tʋɔŋ chei. Ʋ nɛ Wɩa joŋo hɛ ma lɛ, ʋ ŋaa magɩlɩŋ ma lɛ a dagɛ arɩ Wɩa jaŋ laama ta tapʋlɩɩ-la Kirisito sɩ́ jaŋ mɩɩra kɔ.

³¹ Dɩ nʋʋ nɛ ŋaa wɩɩ jʋʋ ma lɛ, má sɩ́ joŋo hɛ ma tʋɔŋ lɛ. Má sɩ́ tɛrʋ, má sɩ́ baanɩŋ na. Má sɩ́ goŋ ŋaa nɩaa nyuŋ. Má sɩ́ nɩaa yɩrɩŋ chichei. Má sɩ́ nʋʋkala bɛrʋ.

³² Ama má kɛŋ zile dɔŋɔ lɛ, a fɩfá dɔŋɔ nenige. Má joŋ wɩaa chɩchɛ dɔŋɔ, arɩ Wɩa sɩ to Kirisito lɛ a joŋ ma wʋbɔŋŋɔɔ kala chɛma ŋɩɩ.