Ɛfɛsɩs Nɩaa 3 - WƖA TENIŊ

Pɔɔl bʋl Wɩa wʋzɔmɔ-la a pɩ nɩalɩŋ sɩ bɩ Juu tɩŋŋaa ŋaa

¹ Ba kɛŋ mɩ-na Pɔɔl tɔ dɩa a tɩŋ Kirisito Yesu wɩaa nɛ. Mɩ bɩra hɛ sarɩka lɛ a tɩŋ ma ma nɩalɩŋ sɩ bɩ Juu tɩŋŋaa ŋaa wɩaa nɛ. Ŋɩɩ wɩaa nɛ tɩɩ mɩ yie sʋl Wɩa pɩpɩma.

² Mɩ jɩma arɩ ma ma nɩɩ ŋɩɩ Wɩa sɩ lɩɩsɛmɛ ʋ lahɔrɩmɔ lɛ dɩ mɩ tɩŋ tɩntɩmɩŋ deeŋ ma teeŋ nɛ.

³ Teŋ-la mɩ fa sɩ ŋmʋnsa pɩpɩma mɩ bʋl wɩaa mʋa, a dagɛ ŋɩɩ Wɩa sɩ kɛŋ wɩalɩŋ fa sɩ faa a kaa dagɛmɛ nɛ.

⁴ Dɩ ma nɛ karɩmɛ teŋ-la, ma jaŋ na ŋɩɩ Wɩa sɩ leŋe mɩ jɩŋ wɩalɩŋ fa sɩ faa a tɩgɛ Kirisito lɛ.

⁵ Wɩa fa bɩ leŋe nʋʋkala jɩŋ wɩaa deemba, ama lɛɛlɛ ʋ to ʋ Dɩŋ-zɔmʋŋ lɛ nɛ a joŋ wɩalɩŋ dagɛ ʋ nanzɔɔba-la sɩ kɛŋ tʋɔpʋla arɩ ʋ wʋlaabʋllaa.

⁶ Wɩalɩŋ nɛ ŋ-la: Wɩa to Kirisito Yesu wʋzɔmɔ-la lɛ nɛ a leŋ nɩalɩŋ sɩ bɩ Juu tɩŋŋaa ŋaa ma kɛŋ toruŋ kɩalɩŋ Wɩa sɩ hɛ niiŋ arɩ ʋ jaŋ joŋo pɩ Juu tɩŋŋaa lɛ. Lɛɛlɛ ba kala pɛ Kirisito yaraa lɛ nɛ a tɩŋ Wɩa wʋzɔmɔ-la wɩaa. Ba ma jaŋ pɛ dii kɩalɩŋ Wɩa sɩ to Kirisito Yesu lɛ a bʋl dɩ ʋ jaŋ joŋo pɩla.

⁷ Wɩa leŋe mɩ ŋaa ʋ tɩntɩnnʋ nɛ, dɩ mɩ bʋl Yesu wʋzɔmɔ-la a pɩ nɩaa. Ʋ lahɔrɩmɔ lɛ nɛ ʋ dii zile mɩ lɛ a joŋ ʋ doluŋ pɩmɛ mɩ kaa tɩtɩŋ.

⁸ Wɩa nɩaa kala tʋɔŋ, mɩ nɛ ŋaa ba kʋbie, aŋ ka ʋ lɩɩsɛmɛ ʋ lahɔrɩmɔ lɛ dɩ mɩ bʋl ʋ wʋzɔmɔ-la wɩaa a pɩ nɩalɩŋ sɩ bɩ Juu tɩŋŋaa ŋaa, dɩ ba jɩŋ Kirisito dʋa-la sɩ bɩ dɩdɛrɩ kɛnɛ wɩaa,

⁹ a bɩra leŋ dɩ nʋʋkala jɩŋ ŋɩɩ Wɩa sɩ jaŋ to a ŋaa ʋ wɩalɩŋ kala sɩ faa. Wɩa nɛ Nɩɩ-la sɩ ta kʋŋkala, ʋ fa joŋ wɩalɩŋ faa faafaa kala nɛ.

¹⁰ Wɩa ka chɛ dɩ ʋ to nɩalɩŋ sɩ laa Yesu wɩaa dii aa hilimi lɛ, a leŋ Wɩa bii-zɔŋŋɔɔ arɩ Wɩa bii-bɔŋŋɔɔ kala sɩ hɛ wɩa-nyuŋ kʋ jɩŋ Wɩa sɩ kɛŋ wʋjɩmɩŋ ŋɩɩ kɩŋkɛŋ.

¹¹ Wɩa fa bɩɩnɛ wɩɩŋ deeŋ faafaa kala nɛ a lɛɛlɛ to La Tɩɩna Yesu Kirisito lɛ a leŋ wɩalɩŋ sɛnɛ kʋ ŋaa wʋtɩtɩɩ.

¹² La sɩ laa ʋ wɩaa dii ŋɩɩ, la bɩ jaŋ fɩfá fawʋllʋŋ. La jaŋ kɛŋ nyuduoŋ a mʋ ʋ sɩpaaŋ.

¹³ Mɩ saa sʋlma dɩ má sɩ́ leŋe dɩ ma tʋɔŋ chei a tɩŋ mɩ sɩɩ na hɛɛŋ ŋɩɩ wɩaa. Mɩ sɩɩ na hɛɛ-la jaŋ leŋ dɩ ma laa yɩrɩŋ.

Pɔɔl bɩra sʋl Wɩa a pɩ Ɛfɛsɩs nɩaa

¹⁴ Dɩ mɩ nɛ bɩɩnɛ wɩalɩŋ Wɩa sɩ ŋaa pɩla, mɩ yie tuu kpirimi la Nyɩmma Wɩa sɩpaaŋ nɛ.

¹⁵ Ʋ nɛ hɛ doho kala yɩrɩŋ, kɩalɩŋ kala sɩ hɛ Wɩa-jaŋ arɩ kɩalɩŋ kala sɩ hɛ tinteeŋ lɛ.

¹⁶ Ʋ sɩ kɛŋ yɩrɩŋ kɩŋkɛŋ ŋɩɩ, mɩɩ sʋlʋ dɩ ʋ leŋ dɩ ʋ Dɩŋ-zɔmʋŋ pɩma doluŋ ma tʋɔŋ lɛ.

¹⁷ Mɩ bɩra sʋlʋ dɩ ma wuo laa Kirisito wɩaa dii woruŋ, dɩ ʋ hɛ ma tʋɔŋ lɛ a leŋ dɩ ma chɩŋ kpaŋ kpaŋ a cho nɩaa.

¹⁸ Mɩ bɩraa sʋlʋ dɩ ʋ pɩma doluŋ, dɩ ma dɩ ʋ nɩaa kala wuo jɩŋ ŋɩɩ Kirisito sɩ faasa choma kɩŋkɛŋ kɩŋkɛŋ.

¹⁹ Ama nʋʋkala bɩ jaŋ wuo jɩŋ Kirisito chono-la sɩ magɛ ŋɩɩ. Ʋ nɛ kɩɩ wɩalɩŋ kala la sɩ wuo jɩŋ. Mɩɩ sʋl Wɩa dɩ ʋ leŋ dɩ ma nagɛ ŋɩɩ Wɩa sɩ naga.

²⁰ Ʋ dol-la ʋ sɩ kaa tɩtɩŋ la lɛ, mɩɩ sʋlʋ dɩ ʋ leŋ dɩ dol-la faasa tɩtɩŋ la tʋɔŋ lɛ. Ʋ nɛ jaŋ wuo ŋaa wɩaa yʋga kɩɩ wɩalɩŋ kala la sɩ sʋlʋ chɩchɛ arɩ wɩalɩŋ kala la sɩɩ bɩɩnʋ.

²¹ Má leŋ dɩ la nɩalɩŋ kala sɩ laa Yesu wɩaa dii aa hilimi to Kirisito Yesu lɛ, a leŋ dɩ ʋ yɩrɩŋ yɩrɛ a lɩɩ lɛɛlɛ a kaa mʋ wuu. Amɩɩ.