Ɛfɛsɩs Nɩaa 2 - WƖA TENIŊ

Wɩa to Kirisito lɛ a leŋ la kɛŋ mɩɩsɩŋ

¹ Ma fa naga arɩ ma sʋba nɛ a tɩŋ ma wʋcheelee arɩ ma wʋbɔŋŋɔɔ wɩaa.

² Ma faa ŋaa wʋbɔŋŋɔɔ nɛ a ŋɩŋaa dʋnɩa deeŋ tʋɔtɔrɛ wɩaa, a tuto Sɩtaanɩ. Sɩtaanɩ nɛ ŋaa jɩŋ-bɔŋŋɔɔ kala kuoro, ʋ nɩɩ beŋ nɩalɩŋ sɩ bɩ Wɩa niiŋ wɩaa ka to.

³ La ma kala fa nagɛ ba nɛ a tuto la tʋɔtɔrɛ wʋŋaalaa harɩŋ a ŋɩŋaa wʋlɔrʋnʋŋ, a bɩbɩɩnɛ wʋbɔŋŋɔɔ. La fa sɩɩ ŋaa wɩaa deemba, Wɩa fa na baanɩŋ nɛ la nyuŋ, arɩ ʋ fa sɩ na baanɩŋ nɩalɩŋ nyuŋ ŋɩɩ.

⁴ Ama Wɩa chola nɛ kɩŋkɛŋ, a faasa fɩfá la nenige,

⁵ a leŋ la dɩ Kirisito kala kɛŋ mɩɩsɩŋ. La wʋbɔŋŋɔɔ fa leŋe la sʋʋ nɛ. Wɩa lahɔrɩmɔ lɛ nɛ ʋ laama ta.

⁶ La dɩ Kirisito Yesu sɩ ŋaa kʋbala ŋɩɩ, Wɩa chɩsɛla sʋʋ-la lɛ la wʋbɔŋŋɔɔ fa sɩ ŋaa la sʋʋ lɛ nɛ, arɩ ʋ sɩ chɩsɛ Kirisito sʋʋŋ lɛ ŋɩɩ, a leŋ la dɩ Kirisito Yesu kala hɔŋ Wɩa kuorii-la tʋɔŋ Wɩa jaŋ lɛ.

⁷ Wɩa ŋaa ŋɩɩ, dɩ ʋ wuo dagɛla ʋ lahɔrɩmɔ sɩ bɩ magɩa kɛnɛ nɛ, arɩ ŋɩɩ ʋ sɩɩ fá nɩaa nenige a kaa mʋ maachie kala. Ʋ to Kirisito lɛ a dagɛ ʋ zile sɩ yʋga ŋɩɩ la lɛ.

⁸ Wɩa lahɔrɩmɔ nɛ tɩɩ ʋ laama ta, a tɩŋ ma sɩ laa ʋ wɩaa dii. Ʋ bɩ naga ma tɩtɩa doluŋ lɛ nɛ tɩɩ Wɩa laama ta, ʋ ŋaa ŋɩɩ pɩma chɔgɩta nɛ.

⁹ Ʋ bɩ naga ma tɩntɩŋ-zɔŋŋɔɔ wɩaa nɛ tɩɩ ʋ laama ta. Ŋɩɩ wɩaa nʋʋkala bɩ maga dɩ ʋ bibigisi ʋ tɩtɩa lɛ.

¹⁰ Wɩa nɛ ŋaala. Ʋ ŋaala dɩ la dɩ Kirisito Yesu ŋaa kʋbala nɛ a ŋɩŋaa wʋzɔŋŋɔɔ. Ʋ ŋaa wʋzɔŋŋɔɔ deemba bil la lɛ faa faa kala nɛ dɩ la ŋɩŋaaba.

Nuhuobiinee kala ŋaa kʋbala nɛ Kirisito teeŋ

¹¹ Ma nɩalɩŋ sɩ bɩ Juu tɩŋŋaa ŋaa, má sɩ́ yʋ arɩ Juu tɩmma-la fa sɩ keri ba penee kɛŋ ma nɩalɩŋ sɩ bɩ ma penee keri yɩyɩrɛ peŋ-puru tɩmma nɛ. Ama nuhuobiine nɛ keri ba penee.

¹² Ma bɩra sɩ́ yʋ arɩ bʋa kʋbala lɛ ma fa bɩ Kirisito jɩŋ. Ma dɩ Iziral tɩŋŋaa fa bɩ wɩɩ pɛ, ma fa nagɛ nʋhʋɔra nɛ. Wɩa fa sɩ bil nii-la ʋ dɩ ʋ nɩaa pɛgɛ arɩ ʋ jaŋ ŋaa wɩalɩŋ nɩaa lɛ, ma-na fa bɩ ba lɛ pɛ. Ma fa bɩ kʋŋkala ka yɩɛlɛ, ma fa hɛ dʋnɩa lɛ nɛ a bɩ Wɩa jɩŋ.

¹³ Ma dɩ Wɩa pɛgɛ fa bolie nɛ, ama lɛɛlɛ ma dɩ Kirisito sɩ ŋaa kʋbala ŋɩɩ, ʋ joŋ ʋ chalɩŋ jaasɛ ma wɩaa nɛ, a kɛŋ ma dɩ Wɩa kʋ kpagɛ dɔŋɔ.

¹⁴ Kirisito tɩtɩa nɛ leŋe la sɩŋ, ʋ nɛ kɛŋ nɩalɩŋ sɩ ŋaa Juu tɩŋŋaa arɩ nɩalɩŋ sɩ bɩ Juu tɩŋŋaa ŋaa kala hɛ dɔŋɔ lɛ ba kʋ ŋaa kʋbala. Ʋ sɩ sʋʋ daagɛsɛ nyuŋ nɛ giri dʋndɔnnɩɩ-la fa sɩ hɛ la pɛgɛ ta.

¹⁵ Ʋ sɩ sʋba ŋɩɩ, ʋ leŋe wɩalɩŋ Mosis fa sɩ bile dɩ nɩaa tuto arɩ wɩalɩŋ ʋ sɩ daga bɩra bɩ doluŋ kɛnɛ. Ʋ ŋaa ŋɩɩ dɩ nɩalɩŋ sɩ ŋaa Juu tɩŋŋaa arɩ nɩalɩŋ sɩ bɩ Juu tɩŋŋaa ŋaa kala to ʋ lɛ nɛ a bɩrɩmɛ nɩfalɩa a sɩŋ.

¹⁶ Kirisito sɩ sʋʋ daagɛsɛ nyuŋ ŋɩɩ, ʋ leŋe ba dʋndɔnnʋ-la dɛrɛ nɛ. Ʋ sɩ ŋaa ŋɩɩ, ʋ leŋe ba kala balɩa to ʋ lɛ nɛ a ŋaa kʋbala, ʋ kɛŋ ba dɩ Wɩa hɛ dɔŋɔ lɛ ba sɩŋ.

¹⁷ Kirisito nɛ kɔ a bʋl Wɩa wʋzɔmɔ-la sɩ kɛŋ fɩɛlɩŋ kʋkɔ a pɩ nɩalɩŋ arɩ Wɩa pɛgɛ fa sɩ bolie, arɩ nɩalɩŋ ma fa sɩ kpagɛ Wɩa kala.

¹⁸ Kirisito lɛ nɛ la nɩalɩŋ sɩ ŋaa Juu tɩŋŋaa arɩ la nɩalɩŋ sɩ bɩ Juu tɩŋŋaa ŋaa kala to a kɛŋ Wɩa Dɩŋ-zɔŋ-la, a jaŋ wuo mʋ la Nyɩmma Wɩa teeŋ.

¹⁹ Ma saa bɩra bɩ nʋhʋɔraa ŋaa, ma bɩ jʋjʋʋlʋ ma ŋaa. Ma dɩ Wɩa nɩaa kala ŋaa kʋbala nɛ a ŋaa Wɩa dɩa nɩaa.

²⁰ Ma nagɛ tie-biee Wɩa sɩ kaa sɩsaa ʋ dɩa nɛ. Wɩa nanzɔɔba arɩ Wɩa wʋlaabʋllaa nɛ ŋaa dɩa-la gentine. Kirisito Yesu tɩtɩa nɛ ŋaa tie-bii-duo-la ba sɩ kaa bil dɩa-la gentine.

²¹ Ʋ nɛ chagɛ dɩa-la kala bil ʋ kʋ ŋaa Wɩa dɩɩ-balɩŋ sɩ bɩ disiniŋ kɛnɛ, La Tɩɩna Yesu dɩa-la.

²² Ma dɩ Kirisito sɩ ŋaa kʋbala ŋɩɩ, ma dɩ Wɩa nɩaa dɔnsʋŋ kala nɛ ʋ kaa saa Wɩa dɩa deeŋ, ʋ Dɩŋ-zɔmʋŋ jʋjʋʋ.