MOSIS BƖRA WULLI WƖA WOMBIIŊ 9 - WƖA TENIŊ

Iziral tɩŋŋaa sɩ kɛŋ tʋɔpʋla dee bɩ tɩɩ La TƖƖNA joŋ tintee-la pɩba

¹ Iziral tɩmma, má jegile nɩɩ, jɩnɩŋ ma jaŋ chol Jɔdaŋ fuo-la a mʋ yuo laa tinteyee nɩaa sɩ yʋga kɩɩma aŋ dolie kɩɩma ma tinteeŋ. Nɩalɩŋ saa kɛrɩsɩŋ sɩ jɩla tɩgɛ wɩa-nyuŋ nɛ a golli ba tasɩŋ.

² Nɩalɩŋ waayi nɛ woruŋ aŋ dol ma, ba nɛ baa yɩrɛ Anakɩ tɩŋŋaa ŋɩɩ. Ma nɩɩ ba wɩaa nɛ arɩ nʋʋ tuo a jaŋ wuo yuo diiba.

³ Jɩnɩŋ, má jɩŋ arɩ ma TƖƖNA Wɩa nɛ laa ma sɩpaaŋ dɩ ʋ yuo dii nɩalɩŋ a nagɛ nyiniŋ sɩɩ dii kɩaa ŋɩɩ, dɩ ma kiri ba kala ta dɩ ba lɩɩ tintee-la lɛ arɩ ma TƖƖNA sɩ bʋl ŋɩɩ.

⁴ Dɩ ma TƖƖNA Wɩa nɛ yuo kiri nɩalɩŋ, má sɩ́ bɩɩna arɩ ma sɩ ŋaa tʋɔpʋl tɩmma nɛ tɩɩ ʋ joŋ tinteeŋ deeŋ pɩma. Ama nɩalɩŋ tʋɔbɔmʋŋ nɛ tɩɩ La TƖƖNA chɩchɛ dɩ ʋ kiriba ta tintee-la lɛ.

⁵ Ma tʋɔpʋla arɩ ma wʋtɩtɩɩ wɩaa dee bɩ tɩɩ ma TƖƖNA Wɩa kiri nɩalɩŋ ŋɩɩ. Ba paala ŋaa tinteye nɩaa sɩ ŋaa nɩbɔmɔ nɛ. Aŋ ka ʋ chɩchɛ dɩ nii-la ʋ sɩ hɛ pɩ ma naabalɩmaba Abɩraham, Aɩzɩk arɩ Jekɔb dɩ ʋ chɩŋ.

⁶ Má jɩŋ arɩ ma tʋɔpʋla wɩaa dee bɩ tɩɩ ma TƖƖNA Wɩa joŋ tintee-zɔmʋŋ deeŋ a pɩma. Ma paala ŋaa nyu-duo tɩmma nɛ.

Sɛlɩmɛ nɛ-bie-la ba sɩ libe

⁷ Má sɩ́ yʋ, ŋɩɩ ma sɩ leŋe ma TƖƖNA Wɩa baanɩŋ faasa sii ma nyuŋ tintee-hɩlɩɩ-la lɛ, a chɩŋ bʋa-la lɛ ma sɩ lɩɩ Ijipiti tinteeŋ lɛ a kʋ yi daha, ma vɩa ma TƖƖNA niiŋ nɛ.

⁸ Peel-la ba sɩɩ yɩrɛ Sɩnaɩ leriŋ, ma leŋe La TƖƖNA chaasa na baanɩŋ nɛ ma nyuŋ a magɛ dɩ ʋ cheima.

⁹ Mɩ sɩ jɩl peel-la nyuŋ dɩ mɩ laa tabɩɩ-taalɩa-la balɩa, La TƖƖNA sɩ tuuri ʋ niiri-la ʋ sɩ hɛ ma dɩ ʋ pɛgɛ wɩaa hɛ, mɩ hɛ nɩmɛ wɩɩhɛyɛ arɩ tɩtaŋɩŋ tapʋlaa mahɩŋ balɩa nɛ. Mɩ bɩ kʋŋkala die, mɩ bɩ lɩɩ ma nyʋa.

¹⁰ Ŋɩɩ nɛ La TƖƖNA joŋ tabɩɩ-taalɩ-la balɩa lɛ ʋ sɩ kɛŋ ʋ tɩtɩa neniiŋ tuuri ʋ niiŋ wɩaa hɛ a pɩmɛ. Tapʋlɩɩ-la ma sɩ kʋ hilimi peel-la bʋbʋɔŋ, wɩalɩŋ tɩtɩa La TƖƖNA fa sɩ hɛ nyiniŋ tʋtʋɔbaanɩŋ aŋ bʋla pɩma nɛ ŋɩɩ.

¹¹ Tapʋlɩa-la mahɩŋ balɩa chɛ-dɛrɩŋ nɛ La TƖƖNA joŋ tabɩɩ-taalɩ-la balɩa lɛ ʋ sɩ tuuri ʋ niiri-la sɩ hɛ ma dɩ ʋ pɛgɛ a pɩmɛ.

¹² Ŋɩɩ nɛ La TƖƖNA bʋla pɩmɛ, “Lɩɩ peel-la nyuŋ a tuu lɩma, bɛɛ wɩaa nɩalɩŋ ŋ sɩ kaa lɩɩ Ijipiti tinteeŋ lɛ yeŋŋe nɛ a ŋaa wʋbɔŋ. Ba vɩa wɩalɩŋ mɩ sɩ dagɛba nɛ, aŋ libi vene a pɩ ba tɩtɩa.”

¹³ Ŋɩɩ nɛ La TƖƖNA bɩra bʋla pɩmɛ, “Mɩ jɩŋ nɩaa deemba nɛ, ba ŋaa nyu-duo tɩmma nɛ woruŋ.

¹⁴ Mʋ́ aŋ lemmi, mɩ na baanɩŋ nɛ woruŋ ba nyuŋ. Mɩ jaŋ cheiba, dɩ ba yɩrɩŋ lɛl dʋnɩa lɛ aŋ to ŋ lɛ a leŋ dɩ ŋ ŋaa tinteeŋ sɩ kɛŋ yɩrɩŋ a yʋga kɩɩba a dolie kɩɩba ma.”

¹⁵ Ŋɩɩ nɛ mɩ lɩɩ peel-la nyuŋ a kʋʋ tuu a kori tabɩɩ-taalɩ-la balɩa lɛ Wɩa niiri-la sɩ hɛ, niiri-la sɩ hɛ ma dɩ ʋ pɛgɛ, ka peel-la kala tɔ arɩ nyiŋgeliŋ.

¹⁶ Mɩ sɩ kʋ tuu, mɩ na dɩ ma vɩa wɩalɩŋ ma TƖƖNA Wɩa sɩ dagɛma nɛ, aŋ ŋaa wʋbɔŋ a kɛŋ sɛlɩmɛ a libi nɛ-bie. Ma guu vɩa wɩalɩŋ La TƖƖNA sɩ dagɛma nɛ.

¹⁷ Ŋɩɩ nɛ mɩ joŋ tabɩɩ-taalɩa-la balɩa mɩ sɩ koro a yaga yɛrɛ ma sɩpaaŋ.

¹⁸ Ŋɩɩ nɛ mɩ bɩra gbieni La TƖƖNA sɩpaaŋ wɩɩhɛyɛ arɩ tɩtaŋɩŋ kala tapʋlaa mahɩŋ balɩa, mɩ bɩ kʋŋkala die mɩ bɩ lɩɩ ma nyʋa. Mɩ ŋaa wɩaa deemba kala a tɩŋ ma sɩ ŋaa wʋbɔmɔ-la wɩaa nɛ, a leŋ La TƖƖNA chaasa na baanɩŋ ma nyuŋ.

¹⁹ Fawʋllʋŋ fa kɛmmɛ nɛ a tɩŋ La TƖƖNA sɩ faasa na baanɩŋ ma nyuŋ a magɛ dɩ ʋ cheima. Ama La TƖƖNA bɩra jegile nɩɩ mɩ sʋla nɛ.

²⁰ La TƖƖNA fa na baanɩŋ nɛ woruŋ Arɔŋ ma nyuŋ bʋa-la lɛ, a chɩchɛ dɩ ʋ kpʋʋ. Ŋɩɩ nɛ mɩ sʋla laa ʋ ma.

²¹ Ŋɩɩ nɛ mɩ joŋ ma wʋbɔŋ kʋ-la ma sɩ libe ʋ nagɛ nɛ-bie a hɛ nyiniŋ lɛ ʋ dii. Ŋɩɩ nɛ mɩ lɩɩsɛ a ŋmoo yɛrɛ a nɔŋ ʋ bɩɩ nʋgʋgʋ, mɩ paa hɛ lɩɩ-la sɩ pɛllɛ lɩɩ peeliŋ nyuŋ a tutuu lɛ.

²² Ma bɩra leŋe La TƖƖNA na baanɩŋ nɛ ma nyuŋ leree deemba lɛ: Tabɩra, Masa arɩ Kɩbʋrɔf Hataava lɛ.

²³ La TƖƖNA sɩ sɩ ma lɩɩ Kadɛs Banɩa lɛ a mʋ tintee-la ʋ sɩ jaŋ joŋo pɩma dɩ ʋ ŋaa ma kʋŋ, ma vɩa nɛ. Ma bɩ wɩalɩŋ ma TƖƖNA Wɩa sɩ daga to, ma bɩ ʋ laa dii.

²⁴ Mɩ sɩ jɩmma faafaa kala, ma paala bɩ La TƖƖNA niiŋ wɩaa ka nɩɩ.

²⁵ Mɩ gbieni La TƖƖNA sɩpaaŋ wɩɩhɛyɛ arɩ tɩtaŋɩŋ kala tapʋlaa mahɩŋ balɩa nɛ, bɛɛ wɩaa La TƖƖNA fa sɩ ʋʋ chɛ dɩ ʋ cheima nɛ.

²⁶ Mɩ sʋllʋ a bʋl, “Mɩ Tɩɩna Wɩɩjarɩbakɔ, sɩ́ ŋ nɩaa ŋ tɩtɩa sɩ lɩɩsa chei. Ŋ nɛ laaba arɩ ŋ doluŋ Ijipiti tɩŋŋaa nɩsɩŋ lɛ a kɛmba kaa lɩɩ Ijipiti tinteeŋ lɛ.

²⁷ Liisi ŋ tɩntɩnnaa Abɩraham, Aɩzɩk arɩ Jekɔb wɩaa, aŋ sɩ́ nɩaa deemba nyuduoŋ, ba wʋbɔŋŋɔɔ arɩ ba wʋcheelee wɩaa beŋ.

²⁸ Dɩ ŋɩɩ dee, Ijipiti tɩŋŋaa jaŋ bʋl arɩ ŋ bɩ wuo kɛŋ ŋ nɩaa kaa yi tintee-la ŋ sɩ sɩ ŋ jaŋ joŋo pɩba, a tɩŋ ŋ sɩ bɛrɛba wɩaa. Ba jaŋ bʋl ŋɩɩ nɛ tɩɩ ŋ kɛmba kʋ lɩɩ dɩ ŋ kpʋba ta tintee-hɩlɩŋ deeŋ lɛ.

²⁹ Ba ŋaa ŋ nɩaa nɛ, ŋ nɛ tɩɩba, ŋ nɛ kɛmba arɩ ŋ dol-balɩŋ a kaa lɩɩ Ijipiti tinteeŋ lɛ.”