MOSIS BƖRA WULLI WƖA WOMBIIŊ 31 - WƖA TENIŊ

Josua nɛ jaŋ laa Mosis nyuŋ

¹ Ŋɩɩ nɛ Mosis ha bʋl wɩaa deemba a pɩ Iziral tɩŋŋaa,

² “Lɛɛlɛ mɩ ŋaa jɩsɩŋ zɔlɔ arɩ mara nɛ, mɩ bɩra bɩ jaŋ wuo laa ma sɩpaaŋ. La TƖƖNA bʋla pɩmɛ nɛ arɩ mɩ bɩ jaŋ chol Jɔdaŋ fuo-la.

³ Ma Tɩɩna Wɩa tɩtɩa nɛ jaŋ laa ma sɩpaaŋ a kɛmma chol. Ʋ jaŋ chei tinteye-la kala sɩ hɛ ma sɩpaaŋ, ka dɩ ma laa ba tinteeŋ a tɩɩ. Josua nɛ jaŋ ŋaa ma sɩpaalaara, arɩ La TƖƖNA sɩ bʋl ŋɩɩ.

⁴ La TƖƖNA jaŋ cheiba arɩ ʋ fa sɩ chei kuoro Sɩhɔŋ arɩ kuoro Ɔgɩ ŋɩɩ. Ba fa ŋaa Amɔrɩ tɩŋŋaa kuoroo nɛ. Ʋ cheiba arɩ ba tinteeŋ kala nɛ.

⁵ La TƖƖNA jaŋ joŋ tinteye-la a hɛ ma nɩsɩŋ lɛ dɩ ma joŋ wɩalɩŋ kala mɩ sɩ dagɛma a ŋaa ba lɛ.

⁶ Má nyɩrɛ bɔyɛ a kɛŋ tʋɔ-doluŋ. Má sɩ́ leŋe dɩ fawʋllʋŋ kɛmma koo ma chichel a tɩŋ ba wɩaa, ma TƖƖNA Wɩa jaŋ hɛ ma teeŋ a kɛmma mʋ. Ʋ bɩ jaŋ kɔ dɩ ʋ vɩama ta koo ʋ lɩɩ ma harɩŋ da.”

⁷ Ŋɩɩ nɛ Mosis yɩrɛ Josua Iziral tɩŋŋaa kala sɩpaaŋ a bʋla pʋ, “Nyɩrɛ ŋ bɔyɛ a kɛŋ tʋɔ-doluŋ, ŋ nɛ jaŋ kɛŋ nɩaa deemba a mʋ tintee-la La TƖƖNA sɩ hɛ niiŋ pɩ ba naabalɩmaba arɩ ʋ jaŋ joŋo pɩba a kɛŋ tintee-la kpaa pɩba dɩ ʋ ŋaa ba kʋŋ.

⁸ La TƖƖNA tɩtɩa jaŋ hɛ ŋ teeŋ a laa ŋ sɩpaaŋ. Ʋ bɩ jaŋ kɔ dɩ ʋ vɩaŋ ta koo ʋ lɩɩ ŋ harɩŋ da. Sɩ́ leŋe dɩ fawʋllʋŋ kɛnɩŋ koo dɩ ŋ nandaasɩŋ yʋɔrɛ.”

Wɩa wombiiŋ teniŋ karɩmɩŋ wɩaa

⁹ Ŋɩɩ nɛ Mosis ŋmʋnsɛ Wɩa wombie-la a joŋo pɩ Wɩɩsʋllɩ sɩpaalaaraa, Levi biiri-la sɩɩ chʋŋ La TƖƖNA niiriŋ daga-la a pɛ Iziral tɩŋŋaa sɩpaalaaraa kala lɛ.

¹⁰ Ŋɩɩ nɛ Mosis bʋla pɩba, “Jɩ-pɛɩ na-kala dɩdɛrɩŋ, jɩna-la ma sɩ yie giri chɩŋŋaa ta, bʋa-la lɛ ma sɩɩ gbieli lɛŋŋɛɛ gbiele,

¹¹ dɩ Iziral tɩŋŋaa kala nɛ kʋ hɛ dɔŋɔ ma TƖƖNA Wɩa sɩpaaŋ, lee-la ʋ sɩ jaŋ dagɛ lɛ, ma jaŋ karɩmɛ La TƖƖNA niiŋ wɩaa deemba ba sɩpaaŋ dɩ ba nɩɩ.

¹² Má yɩrɛ baalaa arɩ haalaa, hambiisiŋ arɩ nɩwogusu-la kala sɩ hɛ ma tasɩŋ lɛ kʋ hilimi, dɩ ba nɩɩ wɩalɩŋ, a jɩŋ ŋɩɩ ba sɩ jaŋ zizil ma TƖƖNA Wɩa, a fɩɛlɛ ba sɩaa a to wɩalɩŋ kala ʋ wombiiŋ sɩ daga.

¹³ Ba biiri-la sɩ bɩ wombiee deemba jɩŋ, maga dɩ ba nɩɩba nɛ a gʋnnɛ ŋɩɩ ba sɩ jaŋ fɩfá ma TƖƖNA Wɩa ba mɩɩsɩŋ kala lɛ tintee-la ma sɩ jaŋ chol Jɔdaŋ fuo-la a laa tɩɩ lɛ.”

Iziral tɩŋŋaa jaŋ vɩa Wɩa niiŋ

¹⁴ Ŋɩɩ nɛ La TƖƖNA bʋla pɩ Mosis, “Bʋa-la lɛ ŋ sɩ jaŋ sʋʋ yie nɛ, yɩrɛ Josua dɩ ma kɔ lɛbɩ-la lɛ mɩ sɩ yie kɔ Iziral tɩŋŋaa teeŋ, dɩ mɩ lɩɩsʋ dɩ ʋ laa Iziral tɩŋŋaa sɩpaaŋ.” Ŋɩɩ nɛ Mosis arɩ Josua kɔ lɛbɩ-la leriŋ.

¹⁵ Ŋɩɩ nɛ La TƖƖNA to duoŋ-bɩlɩmbaanɩŋ sɩ nagɛ jebiiŋ tʋɔŋ a kʋ tʋʋ chɩŋ lɛbɩ-la boiŋ niiŋ,

¹⁶ aŋ bɩra bʋla pɩ Mosis, “Ŋ jaŋ sʋʋ a mʋ ŋ nyɩmmaba teeŋ. Ŋ sʋʋŋ harɩŋ lɛ, nɩaa deemba jaŋ vɩamɛ aŋ suomo ŋɩŋaa wʋlɩɩlɩŋ, aa kpaarɛ vesiŋ tintee-la ba sɩɩ mʋ lɛ, a chei nii-la mɩ sɩ bile mɩ dɩ ba pɛgɛ.

¹⁷ Dɩ ŋɩɩ nɛ kʋ ŋaa, mɩ baanɩŋ jaŋ sii ba nyuŋ dɩ mɩ vɩaba, a joŋ harɩŋ yɩaba dɩ ba chei. Wʋlɔrʋnʋŋ arɩ wʋwalɩmaa jaŋ jʋʋba. Bʋa-la lɛ ba jaŋ bʋl, ‘La Wɩa sɩ tuo la teeŋ nɛ tɩɩ wʋlɔrʋnʋŋ deemba kala ŋɩŋaa la lɛ ŋɩɩ.’

¹⁸ Mɩ jaŋ joŋ mɩ harɩŋ yɩaba, a tɩŋ ba sɩ vɩamɛ aŋ ŋaa wʋbɔŋŋɔɔ a kpʋkpaarɛ vesiŋ wɩaa.

¹⁹ Ŋmʋnsɛ yɩɩlɩŋ deeŋ bil, a dagɛ Iziral tɩŋŋaa, a leŋ dɩ ba yɩyɩɩ dɩ ʋ ŋaa magɩl a pɩma.

²⁰ Dɩ mɩ nɛ kɛmba mʋ tintee-la sɩ sɩma a kɛŋ kɩaa woruŋ, tintee-la mɩ sɩ hɛ niiŋ pɩ ba naabalɩmaba dɩ mɩ joŋo pɩba, ba jaŋ na kʋdiilee a magɛ ŋɩɩ kala ba sɩɩ chɛ a didii ba tʋɔtɔrʋŋ, ama ba jaŋ vɩa mɩ niiŋ aŋ kpʋkpaarɛ vesiŋ a chei nii-la mɩ sɩ bile mɩ dɩ ba pɛgɛ.

²¹ Dɩ wʋlɔrʋnʋŋ arɩ wʋwalɩmaa nɛ jʋʋba, yɩɩlɩŋ deeŋ nɛ jaŋ liliisiba, bɛɛ wɩaa ba dɩ ba doho nɩaa kala bɩ jaŋ yʋ yɩɩl-la. Mɩ paala jɩŋ ba tʋɔbɩɩnaa kala nɛ aŋ-na kɛmba kaa kɔ tintee-la mɩ sɩ hɛ niiŋ dɩ mɩ joŋo pɩba.”

²² Tapʋlɩɩ-la tɩtɩa, Mosis ŋmʋnsɛ yɩɩl-la bil a dagɛ Iziral tɩŋŋaa.

²³ Ŋɩɩ nɛ aŋ ka La TƖƖNA bʋla pɩ Nuŋ nanʋala Josua, “Nyɩrɛ bɔyɛ a kɛŋ tʋɔ-doluŋ, bɛɛ wɩaa ŋ nɛ jaŋ kɛŋ Iziral tɩŋŋaa kaa mʋ tintee-la mɩ sɩ hɛ niiŋ dɩ mɩ joŋo pɩba. Mɩ jaŋ chɩŋ ŋ harɩŋ.”

²⁴ Ŋɩɩ nɛ Mosis ŋmʋnsɛ Wɩa wombie-la kala a hɛ teniŋ lɛ.

²⁵ Ʋ sɩ ŋmʋnsa dɛrɛ, ʋ bʋla pɩ Levi doho nɩalɩŋ sɩɩ chʋŋ Wɩa niiriŋ daga-la,

²⁶ “Má laa Wɩa wombiee teniŋ deeŋ a joŋo bil ma TƖƖNA Wɩa niiriŋ daga-la sɛmɛ dɩ ʋ hɛ nɩmɛ a ŋaa magɩl a pɩma.

²⁷ Mɩ jɩma ma ŋaa nyu-duo tɩmma nɛ a bɩ dagɩŋ ka nɩɩ. Mɩ ha sɩ hɛ mɩ mɩɩsɩŋ lɛ ka ma vɩa La TƖƖNA niiŋ ŋ-la, ɛɛ nɛ ʋ jaŋ nagɛ dɩ mɩ nɛ sʋba?

²⁸ Má yɩrɛ ma doho doho nɩhɩasɩŋ arɩ tɩntɩnnɩ-hɩasɩŋ kala dɩ ba kɔ mɩ sɩpaaŋ dɩ mɩ bʋl wɩaa deemba a pɩba, aŋ yɩrɛ wɩa-nyuŋ arɩ tinteeŋ dɩ ba ŋaa la pɛ-naaraa.

²⁹ Mɩ jɩma mɩ sʋʋŋ harɩŋ lɛ, ma jaŋ ŋaa wʋbɔŋŋɔɔ aŋ vɩa wombii-la mɩ sɩ dagɛma. Bʋa dɔŋ jaŋ kɔ, wʋlɔrʋnʋŋ jaŋ ŋaa ma lɛ a tɩŋ wʋbɔmɔ-la ma sɩ jaŋ ŋaa La TƖƖNA sɩɩŋ lɛ, dɩ ʋ na baanɩŋ ma nyuŋ.”

Yɩɩl-la Mosis sɩ yɩa

³⁰ Ŋɩɩ nɛ Mosis karɩmɛ yɩɩl-la kala a pɩ Iziral tɩŋŋaa kala, ka ba jijegili.