MOSIS BƖRA WULLI WƖA WOMBIIŊ 3 - WƖA TENIŊ

Iziral tɩŋŋaa yuo dii Basaŋ kuoro Ɔgɩ

¹ La sɩ yuo dii kuoro Sɩhɔŋ arɩ ʋ nɩaa a dɛrɛ, ŋɩɩ nɛ la mɩɩrɛ a to Basaŋ tinteeŋ dɩɩrɩŋ mʋmʋ. Basaŋ tɩŋŋaa kuoro Ɔgɩ arɩ ʋ laalɩyuoroo kala kʋ lɩɩ dɩ ba yuola Ɛdɩrɛ lɛ.

² Ŋɩɩ nɛ La TƖƖNA bʋla pɩmɛ, “Sɩ́ leŋe dɩ ŋ bɔyɛ joŋ a tɩŋ kuoro Ɔgɩ wɩaa. Mɩ joŋ ʋ dɩ ʋ nɩaa arɩ ba tinteeŋ kala hɛ ŋ nɩsɩŋ lɛ nɛ. Wɩɩ-la ŋ fa sɩ joŋo ŋaa Amɔrɩ tɩŋŋaa kuoro Sɩhɔŋ fa sɩ hɛ Hɛsɩbɔŋ lɛ, joŋ ŋɩɩ tɩtɩa ŋaa Basaŋ tɩŋŋaa kuoro Ɔgɩ ma lɛ.”

³ Ŋɩɩ nɛ La TƖƖNA Wɩa joŋ Basaŋ tɩŋŋaa kuoro Ɔgɩ arɩ ʋ laalɩyuoroo kala a hɛ la nɩsɩŋ lɛ, la kpʋ ba kala, ba kʋbala ma bɩ ka.

⁴ Kuoro Ɔgɩ fa sɩɩ beŋ tabala-la mahɩŋ batori sɩ hɛ Agɔb lɛ Basaŋ tinteeŋ, ba kala nɛ la yuo dii, ba kʋbala ma bɩ ka.

⁵ Tabalaa deemba kala ba fa saa kɛrɩsɩŋ sɩ leŋie nɛ a golli, a hɛ boiŋ niiree a kɛŋ borusuŋ arɩ daadoloo a tʋtɔ. Tabiisiŋ ma fa yʋga nɩmɛ ba sɩ bɩ kɛrɩsɩŋ saa golli.

⁶ La chei ba tasɩŋ kala nɛ a kpʋ baalaa, haalaa arɩ hambiisiŋ, arɩ la sɩ ŋaa ŋɩɩ Amɔrɩ tɩŋŋaa kuoro Sɩhɔŋ lɛ.

⁷ Ba pʋsʋŋ arɩ ba dʋa dʋndʋŋa nɛ la fa paa ba ŋaa la kɩaa.

⁸ Bʋa-la lɛ, la laa Amɔrɩ tɩŋŋaa kuoroo deemba balɩa tinteeŋ Jɔdaŋ fuo-la wɩɩpɔsʋŋ, a chɩŋ Anɔŋ fuonaa-la wɩɩpɔsʋŋ nadiiŋ, a kɛŋ ŋɩɩ mʋʋ yi peel-la ba sɩɩ yɩrɛ Hɛmɔŋ wɩɩpɔsʋŋ nagʋa.

⁹ (Sɩdɔŋ tɩŋŋaa kɛŋ peel-la yɩyɩrɛ Sirioŋ nɛ, ka Amɔrɩ tɩŋŋaa ma yɩyɩrɛ Sɛnɩ.)

¹⁰ La yuo dii tasɩ-la kala sɩ hɛ peelee nyuŋ nɛ, a yuo dii Gɩlɩad arɩ Basaŋ tinteyee kala a kaa mʋʋ yi Salɩka arɩ Ɛdɩrɛ. Kuoro Ɔgɩ nɛ faa beŋ Basaŋ tinteeŋ tasɩ-la kala.

¹¹ (Kuoro Ɔgɩ nɛ fa ŋaa Refem doho nɩaa nɩwaayiile-la nɩkaanɩŋ. Hɔɔŋ nɛ ba fa kaa ŋaa ʋ kʋpɩnɩŋ. Ʋ duomuŋ ŋaa naakieliŋ bʋnɛsɛ arɩ kpaa magɛ dɔŋɔ, ʋ jalɩŋ ma ŋaa naakieliŋ bʋlɩa. Ʋ kʋpɩnɩɩ-la ha hɛ Amɔŋ tɩŋŋaa tabal-la ba sɩɩ yɩrɛ Raba lɛ.)

Doho doho-la sɩ hɔŋ Jɔdaŋ fuo-la wɩɩpɔsʋŋ

¹² Bʋa-la lɛ la sɩ yuo dii tinteeŋ deeŋ, mɩ joŋ taŋ-la ba sɩɩ yɩrɛ Arʋa, wɩɩpɔsʋŋ nagʋa a kpagɛ Anɔŋ fuo-la arɩ Gɩlɩad tintee-la peelee sɩ yʋga kpaa magɛ dɔŋɔ a pɛ tasɩ-la kala sɩ hɛ nɩmɛ a pɩ Rubiŋ arɩ Gad doho nɩaa nɛ.

¹³ Gɩlɩad tintee-kaaŋ-la arɩ Basaŋ tinteeŋ lee-la kuoro Ɔgɩ fa sɩɩ beŋ, mɩ joŋ ba kala a pɩ Manasɛ doho nɩaa kpaa magɛ dɔŋɔ-la nɛ. (Basaŋ tinteeŋ sɛmɛ-la ba sɩɩ yɩrɛ Agɔb, Refem tɩŋŋaa nɛ fa tɩɩʋ.)

¹⁴ Jaa sɩ ŋaa Manasɛ doho nʋʋ nɛ fa joŋ Basaŋ tinteeŋ sɛmɛ-la ba sɩɩ yɩrɛ Agɔb kala, a kaa mʋʋ yi Gesu tɩŋŋaa arɩ Maakɩ tɩŋŋaa tinteeŋ bʋa. Ʋ fa joŋ ʋ tɩtɩa yɩrɩŋ nɛ a hɛ pɩ tabiisi-la, arɩ jɩnɩŋ kala ba haa yɩrɛ tabiisi-la Jaa tabiisiŋ nɛ.

¹⁵ Mɩ joŋ Gɩlɩad tinteeŋ a pɩ Maakɩ ma nɛ, ʋ ŋaa Manasɛ doho nʋʋ nɛ.

¹⁶ Mɩ joŋ tintee-la sɩ chɩŋ Gɩlɩad lɛ a kaa mʋ Anɔŋ fuo-la a pɩ Rubiŋ arɩ Gad doho nɩaa nɛ. Anɔŋ fuo-la tʋtʋɔbaanɩŋ nɛ ŋaa ba wɩɩpɔsʋŋ nadiiŋ dɩɩrɩŋ bʋa, ba wɩɩjʋʋlʋŋ nagʋa dɩɩrɩŋ bʋa ma nɛ ŋaa Jabɔk fuo-la. Jabɔk fuo-la nɛ ŋaa Amɔŋ tɩŋŋaa ma bʋa.

¹⁷ Tintee-la wɩɩjʋʋlʋŋ dɩɩrɩŋ bʋa nɛ, a lɩɩ Jɔdaŋ fuo-la lɛ a kaa mʋ Galilii mʋga-la a kɛŋ ŋɩɩ mʋ to Mʋgʋ-sʋʋ-la sɩ hɛ wɩɩpɔsʋŋ nadiiŋ a kaa mʋ yi Pisiga peel-la sɩ hɛ wɩɩpɔsʋŋ dɩɩrɩŋ.

¹⁸ Bʋa-la lɛ mɩ bʋla pɩma, “Ma Tɩɩna Wɩa joŋ tinteeŋ deeŋ a pɩma nɛ ʋ ŋaa ma kʋŋ. Ama ma baala-la kala sɩ jaŋ wuo mʋ laalɩŋ, má paa ma laalɩyuori kɩaa a laa ma naambiiriŋ Iziral tɩŋŋaa sɩpaaŋ a chol Jɔdaŋ fuo-la.

¹⁹ Ama ma haalaa, ma biiriŋ arɩ ma pʋsʋŋ, má lemba dɩ ba hɛ tasɩ-la mɩ sɩ joŋo pɩma lɛ. Mɩ jɩma, ma kɛŋ pʋsʋŋ nɛ woruŋ.

²⁰ Dɩ ma nɛ chol Jɔdaŋ fuo-la, a pɛ ma naambiiriŋ Iziral tɩŋŋaa lɛ dɩ ma yuo laa tintee-la La TƖƖNA Wɩa sɩ joŋo pɩba dɩ ba hɔŋ nɩmɛ, ma jaŋ wuo mɩɩra mʋ a hɔŋ lere-la mɩ sɩ joŋo pɩma.”

La TƖƖNA sɩ Mosis bɩ jaŋ chol Jɔdaŋ fuo-la

²¹ Bʋa-la lɛ mɩ bʋla pɩ Josua, “Ŋ tɩtɩa na wɩɩ-la La TƖƖNA Wɩa sɩ ŋaa kuoro Sɩhɔŋ arɩ kuoro Ɔgɩ lɛ nɛ. Ŋɩɩ tɩtɩa nɛ La TƖƖNA jaŋ ŋaa tasɩ-la kala sɩ hɛ lee-la ma sɩɩ mʋ kuoroo lɛ.

²² Má sɩ́ leŋe dɩ fawʋllʋŋ kɛmma, ma TƖƖNA Wɩa tɩtɩa nɛ jaŋ yuoba a pɩma.”

²³ Bʋa-la lɛ mɩ sʋl La TƖƖNA nɛ woruŋ, a bʋl,

²⁴ “Mɩ Tɩɩna Wɩɩjarɩbakɔ, ŋ dagɛmɛ ŋ doluŋ sɩ magɛ ŋɩɩ nɛ, veŋ bɛɛ ma nɛ hɛ wɩa-nyuŋ koo tinteeŋ a jaŋ wuo pagɩsɩŋ a ŋaa wʋduoru-la ŋ sɩɩ ŋaa?

²⁵ La TƖƖNA, leŋ dɩ mɩ chol Jɔdaŋ fuo-la a na tintee-la sɩ sɩma woruŋ aŋ na tintee-sɩŋ-la peelee sɩ yʋga arɩ Lɛbanɔŋ peelee.”

²⁶ Ama a tɩŋ ma wɩaa, La TƖƖNA na baanɩŋ nɛ mɩ nyuŋ, a bɩ jegile nɩɩ mɩ teeŋ, aŋ bʋla pɩmɛ, “Ʋ maga nɛ, bɩra sɩ́ wɩɩ-la bʋl mɩ teeŋ.

²⁷ Jɩl Pisiga peel-la nyuŋ, a beŋ wɩɩpɔsʋŋ, wɩɩjʋʋlʋŋ, wɩɩpɔsʋŋ nagʋa arɩ wɩɩpɔsʋŋ nadiiŋ dɩɩrɩŋ a na tintee-la kala, bɛɛ wɩaa mɩ bɩ jaŋ jʋʋ nɩmɛ.

²⁸ Ama dagɛ Josua wɩalɩŋ ʋ sɩ jaŋ ŋaa, a pʋ doluŋ a leŋ dɩ ʋ nyuŋ nyaasɛ, bɛɛ wɩaa ʋ nɛ jaŋ laa Iziral tɩŋŋaa sɩpaaŋ a kɛŋ ba chol Jɔdaŋ fuo-la dɩ ba yuo laa tintee-la ŋ sɩ jɩl peeliŋ a na.”

²⁹ Ŋɩɩ nɛ la hɔŋ Bɛf Pio fuonaa-la lɛ.