MOSIS BƖRA WULLI WƖA WOMBIIŊ 28 - WƖA TENIŊ

La TƖƖNA jaŋ pɛ nɩalɩŋ sɩ sɛɩ ʋ niiŋ lɛ

¹ Dɩ ma nɛ fɩɛlɛ ma sɩaa a to ma TƖƖNA Wɩa niiŋ arɩ ʋ wɩalɩŋ kala mɩ sɩ dagɛma jɩnɩŋ, ma TƖƖNA Wɩa jaŋ leŋ dɩ ma kɩɩ tinteye-la kala nɩaa sɩ hɛ tinteeŋ lɛ.

² Dɩ ma nɛ sɛɩ ma TƖƖNA Wɩa, ʋ jaŋ pɛ ma lɛ arɩ wɩaa deemba:

³ Ʋ jaŋ wasɛ ma tasɩŋ arɩ ma bagɩsɩŋ kala.

⁴ Ʋ jaŋ pɛ ma lɛ dɩ ma lʋl biiriŋ a yʋgɛ, a leŋ dɩ kʋdiilee pʋrɩgɛ ma tinteeŋ lɛ, dɩ ma nɛsɩŋ, piesee arɩ bʋʋnaa ma pʋŋ.

⁵ Ʋ jaŋ wasɛ ma baga kʋpɛrɛɛ arɩ kʋdiile-la ma sɩ jaŋ kɛŋ kɩalɩŋ ŋaa.

⁶ Ʋ jaŋ pɛ ma lɛ wɩɩ na-kala ma sɩɩ ŋaa lɛ.

⁷ La TƖƖNA jaŋ pɛ ma lɛ dɩ ma yuo dii ma dʋndɔmɔ-la sɩ jaŋ kɔ a yuyuoma. Ba jaŋ to dɩ-bala kɔ ma lɛ aŋ mɩɩra fá pɩsɛ dɩ ba laa ba tɩtɩa.

⁸ La TƖƖNA jaŋ pɛ ma lɛ a leŋ dɩ ma virisiŋ su a leŋ dɩ ma tɩntɩmɩɩ-kala wasɛ. Ma TƖƖNA Wɩa jaŋ pɛ ma lɛ tintee-la lɛ ʋ sɩ jaŋ joŋo pɩma lɛ.

⁹ Dɩ ma nɛ to ma TƖƖNA Wɩa wombiee, a ŋaa wɩalɩŋ kala ʋ sɩ daga, ʋ jaŋ leŋ dɩ ma ŋaa ʋ nɩaa sɩ bɩ disiniŋ kɛnɛ arɩ ʋ sɩ hɛ niiŋ ŋɩɩ a pɩma.

¹⁰ Dʋnɩa nɩaa kala jaŋ na La TƖƖNA sɩ lɩɩsɛma ma ŋaa ʋ nɩaa ŋɩɩ dɩ ba fɩfáma.

¹¹ La TƖƖNA jaŋ pɩma dʋa a yʋgɛ tintee-la ʋ sɩ hɛ niiŋ a pɩ ma naabalɩmaba arɩ ʋ jaŋ joŋo pɩma lɛ. Ma jaŋ lʋl biiriŋ woruŋ, a kɛŋ nɛsɩŋ arɩ kʋdiilee yʋgɛ.

¹² La TƖƖNA jaŋ suri duonuŋ a leŋ dɩ ʋ nɩɩ ʋ bʋa lɛ a pɩma tintee-la lɛ, aŋ pɛ ma lɛ ma tɩntɩmɩɩ-kala lɛ. Tinteyee jaŋ yʋgɛ a chɩŋ kɩaa ma teeŋ, ama ma-na bɩ jaŋ chɩŋ kʋŋ nʋʋkala teeŋ.

¹³ La TƖƖNA jaŋ leŋ dɩ ma ŋaa sɩpaalaara, ma bɩ jaŋ ŋaa harɩ-tooro. Dɩ ma nɛ jegile a nɩɩ ma TƖƖNA Wɩa wɩalɩŋ mɩ sɩ joŋo dagɛma jɩnɩŋ, a fɩɛlɛ ma sɩaa a toba, ma jaŋ laa sɩpaaŋ wɩɩkala lɛ, ma bɩ jaŋ to harɩŋ.

¹⁴ Ma pɔ má sɩ́ harɩŋ joŋo yɩa wɩalɩŋ kʋŋkala mɩ sɩ joŋo dagɛma jɩnɩŋ, a sɩ́ begile mʋ nadiiŋ koo nagʋa, a mʋ tuto vesiŋ a kpʋkpaarɛba.

Ŋmɩaŋ-la sɩ jaŋ dii nɩalɩŋ sɩ bɩ La TƖƖNA niiŋ ka to

¹⁵ Dɩ ma nɛ bɩ ma sɩaa fɩɛla a jegile nɩɩ ma TƖƖNA Wɩa niiŋ a to ʋ wombiee arɩ ʋ wɩalɩŋ kala mɩ sɩ joŋo dagɛma jɩnɩŋ, ŋmɩaŋ deemba nɛ jaŋ diima:

¹⁶ La TƖƖNA jaŋ kalɩba hɛ ma tasɩŋ arɩ ma bagɩsɩŋ lɛ.

¹⁷ Ʋ jaŋ kalɩba hɛ ma baga kʋpɛrɛɛ arɩ kʋdiile-la ma sɩ jaŋ kɛŋ kɩalɩŋ ŋaa lɛ.

¹⁸ Ʋ ŋmɩaŋ jaŋ diima, ʋ bɩ jaŋ leŋ ma lʋl biiriŋ yʋgɛ, a leŋ dɩ kʋdiilee nyaa ma tinteeŋ lɛ, ma nɛsɩŋ, piesee arɩ bʋʋnaa ma bɩ jaŋ pʋŋ.

¹⁹ La TƖƖNA jaŋ kalɩba hɛ wɩɩ na-kala ma sɩɩ ŋaa lɛ.

²⁰ Dɩ ma nɛ vɩa La TƖƖNA, ʋ jaŋ leŋ dɩ ma wɩɩkala vʋgʋmɛ, dɩ wʋwalɩmaa jʋʋma dɩ ma to ŋɩɩ lɛ a kala guu chei, a tɩŋ wʋbɔŋ-la ma sɩ ŋaa lɛ.

²¹ La TƖƖNA jaŋ joŋ nyanyal bɔŋŋɔɔ a hɛ ma lɛ dɩ ma kala sʋʋ dɛrɛ tintee-la ma sɩɩ jʋʋ dɩ ma tɩɩ lɛ.

²² La TƖƖNA jaŋ joŋ nyanyalɩa-la sɩ jaŋ leŋ dɩ ma yʋɔlɛ a hɛ ma lɛ, ʋ jaŋ joŋ yarɩ-lɩŋŋaa hɛ ma lɛ a leŋ dɩ ma yaraa ŋmɛrɛ aŋ leŋ dɩ leriŋ faasa lɩŋ, dɩ hɩlɩŋ chɩŋ dɩ ma baga kɩaa ŋmaamɛ. Wʋbɔŋŋɔɔ deemba jaŋ ŋaa ma lɛ ŋɩɩ deeŋ deeŋ dɩ ma sʋʋ dɛrɛ.

²³ Ma jaŋ lɛ, duonuŋ bɩ jaŋ nɩɩ, dɩ ma tinteeŋ dol a nagɛ hɔɔŋ.

²⁴ La TƖƖNA fa sɩ jaŋ leŋ dɩ duonuŋ nɩɩ, ʋ jaŋ mɩɩra leŋ dɩ kʋŋkɔlʋŋ arɩ hagɩla lɩɩ wɩa-nyuŋ a kʋ tɔma dɩ ma sʋʋ.

²⁵ La TƖƖNA jaŋ leŋ dɩ ma dʋndɔŋŋɔɔ yuo diima. Ma jaŋ to dɩ-bala a mʋ dɩ ma yuoba, ama ba jaŋ kirima dɩ ma fá pɩsɛ a chɩchɛ dɩ ma laa ma tɩtɩa. Dʋnɩa nɩaa kala jaŋ na wɩɩ-la sɩ ŋaa ma lɛ dɩ fawʋllʋŋ faasa kɛmba.

²⁶ Ma jaŋ sʋʋ dɩ zaaraa arɩ baga kɩaa didii ma kʋsʋʋnʋŋ, ka nʋʋkala jaŋ tuo dɩ ʋ kiriba.

²⁷ La TƖƖNA jaŋ joŋ mɔpʋllʋ-la doho ʋ fa sɩ joŋo hɛ Ijipiti tɩŋŋaa lɛ a hɛ ma lɛ dɩ ma yaraa kala ŋaa naawɩɩlaa a tɩtɩsɛ. Daaluno kala tuo sɩ jaŋ wuo vaarɛma.

²⁸ La TƖƖNA jaŋ joŋ nyɩnyɛrɩŋ arɩ nyʋlʋmʋŋ a hɛ ma lɛ dɩ ma tʋɔŋ kala vʋgʋmɛ.

²⁹ Ma jaŋ gɔllɔ laarɛ wɩɩhɛyɛ a nagɛ nyʋlɩma, aŋ bɩ jaŋ na wɛnɩŋ. Ma wɩɩkala bɩ jaŋ kɔ dɩ ʋ wasa. Tapʋlɩɩ-kala nɩaa jaŋ dʋdɔgɩsɛma a kɛŋ ma kɩaa lɩlaa, aŋ ka nʋʋ tuo dɩ ʋ laama ta.

³⁰ Ma jaŋ sʋgɛ haala dɩ ma jaa, ka dɩ nʋʋ kɛŋ haal-la pɩŋ. Ma jaŋ saa dɩa aŋ bɩ jaŋ jʋʋ. Ma jaŋ pɛrɛ girep tɩɩsɩŋ baga aŋ bɩ jaŋ dii ʋ nɛnɛɛ.

³¹ Nʋʋ jaŋ kɛŋ ma nɛŋ kpʋ ma sɩɩŋ lɛ, ama ma bɩ jaŋ chaŋ ʋ nammɩa. Ba jaŋ kɛŋ ma kakumo laa ma teeŋ, a kaa viiri. Ba jaŋ laa ma piesee a pɩ ma dʋndɔŋŋɔɔ, ka nʋʋ tuo sɩ jaŋ laaba pɩma.

³² Ba jaŋ kɛŋ ma biiriŋ laa pɩ tintee-wogusuŋ nɩaa, ma jaŋ bibeŋ dɩ ma tʋɔŋ wʋwɩɩ, ka ma bɩ wɩɩkala wuo ŋaa.

³³ Nɩwogusu-la ma sɩ paala bɩ jɩŋ nɛ jaŋ dii ma baga kɩalɩŋ kala ma sɩ suolo na, ka dɩ ba dɔgɩsɛma ŋɩɩ ma mɩɩsɩŋ kala lɛ.

³⁴ Wɩalɩŋ ma sɩ jaŋ na jaŋ leŋ dɩ ma nyaasɛ.

³⁵ La TƖƖNA jaŋ leŋ dɩ mɔpʋllʋŋ sɩɩ wɩɩ kɩŋkɛŋ ŋmɛrɛ ma naadʋsʋŋ arɩ ma naasɩŋ lɛ ma sɩ bɩ jaŋ wuo tɩɩbɛ. Ba jaŋ ŋmɛrɛ a chɩŋ ma naachɛyɛɛ lɛ a kaa jɩl ma nyu-gbaŋa.

³⁶ La TƖƖNA jaŋ kiri ma dɩ ma kuoro kala a mʋ hɛ tintee-wogo lɛ ma dɩ ma nyɩmmaba ha sɩ bɩ jɩŋ. Nɩmɛ ma jaŋ kpaarɛ vesiŋ ba sɩ kɛŋ daasɩŋ arɩ tabɩaa a ŋaa.

³⁷ Tintee-wogusu-la lɛ La TƖƖNA sɩ jaŋ kirima mʋ hɛ, ʋ jaŋ ŋaa nɩalɩŋ wʋkpuŋkpere dɩ ba mʋmɔmma aŋ sisieri ma lɛ.

³⁸ Ma jaŋ duu kɩaa a yʋgɛ ma bagɩsɩŋ lɛ, ama kɩalɩŋ ma sɩ jaŋ ŋaa bɩ jaŋ yʋgɛ, bɛɛ wɩaa hɔbɔ jaŋ diiba.

³⁹ Ma jaŋ pɛrɛ girep tɩɩsɩŋ bagɩsɩŋ a yʋgɛ, a wasa hɛba, ama ma bɩ jaŋ tɔrɛ tɩɩnɛnɛ-la koo a nyʋa ba sɩnɩŋ, bɛɛ wɩaa nanchʋɔlaa jaŋ dii tɩɩsɩ-la kala.

⁴⁰ Olif tɩɩsɩŋ jaŋ yʋgɛ ma tinteeŋ lɛ, ama ma bɩ jaŋ na nʋʋŋ a dii, bɛɛ wɩaa ba nɛnɛɛ kala jaŋ yuoro ta.

⁴¹ Ma jaŋ kɛŋ hambolibiisiŋ arɩ hantolibiisiŋ, ama ma bɩ jaŋ tɩɩba, bɛɛ wɩaa ba jaŋ yuo kɛsɛba dɩ ba ŋaa yosi.

⁴² Hɔbɩ-laalɩŋ jaŋ dii ma tinteeŋ tɩɩsɩŋ arɩ ma bagɩsɩŋ kɩaa kala.

⁴³ Nʋhʋɔra-la sɩ hɛ ma tʋɔŋ nɛ jaŋ kɛŋ nyuŋ kɩɩma, ka dɩ ma-na mɩɩra hɛ naasɩŋ bʋbʋɔŋ.

⁴⁴ Ba nɛ jaŋ mɩɩra joŋ kɩaa a chɩchɩmma, ma-na bɩ jaŋ wuo joŋ kʋŋkala a chɩmba. Ba nɛ jaŋ mɩɩra ŋaa ma sɩpaalaaraa, ka dɩ ma tuto ba harɩŋ.

⁴⁵ Ŋmɩaŋ deemba kala jaŋ diima. Ba jaŋ kire to ma harɩŋ a yuo diima dɩ ma kala mʋ dɛrɛ, bɛɛ wɩaa ma vɩa dɩ ma sɛɩ ma TƖƖNA Wɩa niiŋ a to ʋ wombiee arɩ wɩalɩŋ kala ʋ sɩ dagɛma nɛ.

⁴⁶ Wɩaa deemba jaŋ ŋaa magɩl ma dɩ ma doho nɩaa kala teeŋ aa chagɩlɛma a kaa mʋ wuu,

⁴⁷ a tɩŋ ma TƖƖNA Wɩa sɩ joŋ dʋa-la kala a pɩma, ka ma vɩa dɩ ma tutou arɩ tʋɔtɔrʋŋ.

⁴⁸ Ŋɩɩ wɩaa, ma jaŋ kɛŋ losuŋ, lɩɩnyʋasʋŋ, yarɩ-biree, a nyaabɛ, aŋ pɛ tɩma pɩpɩ ma dʋndɔmɔ-la ma TƖƖNA Wɩa sɩ joŋo hɛ ma lɛ. La TƖƖNA jaŋ leŋ dɩ ma chaasa na hɛɛŋ ŋɩɩ a mʋ sʋʋ.

⁴⁹ La TƖƖNA jaŋ kɛŋ tinteeŋ nɩaa yikoro ma sɩ bɩ nɩɩ a lɩɩ dʋnɩa lee sɩ bolie a kʋ hɛ ma lɛ dɩ ba yuoma a nagɛ kachuuŋ sɩ yie kʋ tuu jiŋŋee lɛ ŋɩɩ.

⁵⁰ Ba ŋaa tintee nɩaa sɩ bɔmɔ nɛ a kɛŋ fawʋllʋŋ, ba bɩ nɩhɩasɩŋ ka zil a bɩ hambiisiŋ ma nenige ka fá.

⁵¹ Ba jaŋ kpʋ ma pʋsʋŋ a chei ma tinteeŋ kʋpɛrɛɛ kala ŋɩɩ dɩ losuŋ kpʋma dɩ ma sʋʋ. Ba bɩ jaŋ leŋ dɩ ma kɛŋ mɩaa, tɩɩnɛnɛɛ sɩ-falɩŋ koo nʋʋ. Ba bɩ jaŋ leŋ dɩ ma nɛsɩŋ koo piesee koo bʋʋnaa kʋŋkala kɛŋ bii ŋɩɩ deeŋ deeŋ, dɩ ma kala sʋʋ dɛrɛ.

⁵² Ba jaŋ kʋ gollo chu ma tinteeŋ tasɩŋ kala a yuo dii tasɩ-la ma sɩ saa kɛrɩ-duoruŋ sɩ leŋie a golli a joŋ ma yɩɛlaa hɛ dɩ ba kala tel. Ba jaŋ kʋ gollo chu tintee-la ma TƖƖNA Wɩa sɩ jaŋ joŋo pɩma tasɩŋ kala, a pɔ ma sɩ́ kʋŋkala kaa kʋ jʋʋ koo a kaa lɩɩ,

⁵³ a tɩŋ hɛɛ-la ma dʋndɔŋŋɔɔ sɩ jaŋ joŋ hɛ ma lɛ bʋa-la lɛ ba sɩ jaŋ gollo chu ma tasɩŋ a pɔ ma sɩ́ kʋŋ kaa jʋʋ koo a kaa lɩɩ ŋɩɩ, ma jaŋ gʋra kɛsɛ ma biiri-la ma TƖƖNA Wɩa sɩ joŋo pɩma a chɩchaŋ.

⁵⁴ Baal-la sɩ hɛ ma tʋɔŋ a ŋaa sɩɩ-fɩɛlɛ tɩɩna ma a bɩ nɩaa ka gbesi, ʋ paala bɩ jaŋ fá ʋ naambie nenige koo ʋ hachooluŋ koo ʋ biiriŋ.

⁵⁵ Dɩ ʋ nɛ kpʋ biiri-la kʋŋ, ʋ bɩ jaŋ yʋ aŋ chɔgɔ pɩ ʋ hachoolii-la koo ʋ naambii, bɛɛ wɩaa ba dʋndɔŋŋɔɔ sɩ kʋ gollo chuba dɩ ba yuo diiba ŋɩɩ, kʋ-la kala ʋ sɩ kɛnɛ nɛ ŋɩɩ.

⁵⁶ Ma tʋɔŋ haal-la sɩaa sɩ fɩɛla a bɩ ʋ nɩaa ka gbesi, a bɩ chɛ dɩ ʋ jʋʋ nʋʋ wɩɩ lɛ, ʋ jaŋ ŋaa wɩalɩŋ tɩtɩa ʋ bala sɩ ŋaa,

⁵⁷ a tɩŋ ba dʋndɔŋŋɔɔ sɩ gollo chu ba tasɩŋ hɛɛ-la jʋʋba wɩaa, ʋ jaŋ lʋara chaŋ ʋ bii-mulo arɩ biriŋ kala aŋ vɔŋ ʋ bala arɩ ʋ biiriŋ.

⁵⁸ Dɩ ma nɛ bɩ ma sɩaa fɩɛla a to Wɩa niiŋ arɩ ʋ wɩalɩŋ kala ba sɩ ŋmʋnsa a hɛ teniŋ deeŋ lɛ, a bɩ ma TƖƖNA Wɩa yɩrɩ-bal-la sɩ kɛŋ fawʋllʋŋ kaa tɩtɩŋ,

⁵⁹ La TƖƖNA Wɩa jaŋ joŋ nyanyal bɔŋŋɔɔ arɩ wʋlɔrʋnʋŋ a hɛ ma dɩ ma doho nɩaa lɛ dɩ ma na hɛɛŋ a dieni kɩŋkɛŋ. Nyanyalɩa-la bɩ jaŋ kɛŋ daaluno kala.

⁶⁰ Ʋ jaŋ joŋ nyanyalɩa-la kala ʋ fa sɩ joŋo hɛ Ijipiti tɩŋŋaa lɛ a hɛ ma lɛ.

⁶¹ La TƖƖNA bɩra jaŋ joŋ nyanyalaa arɩ wʋlɔrʋnʋ-la doho ba sɩ bɩ ŋmʋnsa hɛ Wɩa wombiee teniŋ deeŋ tʋɔŋ, a hɛ ma lɛ dɩ ma kala sʋʋ a dɛrɛ.

⁶² Ma fa yʋga nɛ woruŋ arɩ chɛnwʋlaa sɩ hɛ wɩa-nyuŋ, ama ma kala jaŋ dɛrɛ aŋ ka nɩaa baŋmɛnɛ, a tɩŋ ma sɩ vɩa ma TƖƖNA Wɩa niiŋ wɩaa.

⁶³ La TƖƖNA tʋɔŋ sɩ tɔrɔ ʋ ŋaa ma pʋŋ a kɛŋ dʋa ŋɩɩ, ŋɩɩ tɩtɩa nɛ ʋ tʋɔŋ jaŋ tɔrɛ dɩ ʋ cheima. Ba jaŋ kirima tintee-la ma sɩɩ jʋʋ dɩ ma tɩɩ lɛ.

⁶⁴ La TƖƖNA jaŋ kɛmma pɩsa hɛ dʋnɩa tinteyee kala lɛ. Nɩmɛ nɛ ma jaŋ kpaarɛ vesiŋ ba sɩ kɛŋ daaŋ arɩ tabɩaa a ŋaa, vesi-la ma dɩ ma naabalɩmaba sɩ bɩ jɩŋ.

⁶⁵ Tinteye-la lɛ, ma bɩ jaŋ kɛŋ lee ma sɩ jaŋ hɔnɔ wiesi. La TƖƖNA bɩ jaŋ leŋ dɩ ma tʋɔŋ pɩŋ dɩ-bala a tɩŋ tʋɔ-cheeŋ arɩ wʋwalɩmaa wɩaa.

⁶⁶ Ma wɩɩkala jaŋ ŋaa logo logo dɩ fawʋllʋŋ jʋʋma tɩtaŋɩŋ arɩ wɩɩhɛyɛ kala, dɩ ma chɩl ma mɩɩsɩŋ wɩaa.

⁶⁷ Chʋchʋɔŋ ma jaŋ bʋl, ‘Dɩ dɩdaanɩŋ nɛ fa.’ Dɩdaanɩŋ ma, ma jaŋ bɩra bʋl, ‘Dɩ chʋchʋɔŋ nɛ fa,’ a tɩŋ wɩalɩŋ ma sɩɩ na arɩ fawʋllɩɩ-la sɩ jʋʋma wɩaa.

⁶⁸ La TƖƖNA jaŋ leŋ dɩ lɩɩŋ daborusuŋ paama mɩɩra mʋ Ijipiti tinteeŋ, lee-la mɩ sɩ sɩ ma bɩra sɩ́ mɩɩra mʋ. Nɩmɛ ma jaŋ chɩchɛ dɩ ma joŋ ma tɩtɩa a yalla pɩ ma dʋndɔŋŋɔɔ a ŋaa yosi, ka nʋʋ tuo sɩ jaŋ yɔɔma.”