MOSIS BƖRA WULLI WƖA WOMBIIŊ 23 - WƖA TENIŊ

Nɩalɩŋ sɩ bɩ maga dɩ ba guoli La TƖƖNA nɩaa tʋɔŋ

¹ Dɩ nʋʋ nɛ ba feri koo dɩ ʋ peniŋ nɛ ba kere ta, ʋ bɩ maga dɩ ʋ guoli La TƖƖNA nɩaa tʋɔŋ.

² Dɩ nʋʋ nɛ ŋaa mɛŋgaa-bii, ʋ bɩ maga dɩ ʋ guoli La TƖƖNA nɩaa tʋɔŋ, a chɩŋ ʋ tɩtɩa lɛ a kaa mʋ ʋ doho doho fii sɩ jaŋ to ʋ harɩŋ kɔ.

³ Amɔŋ tɩɩna kala koo Mʋab tɩɩna koo ba doho nʋʋkala bɩ maga dɩ ʋ guoli La TƖƖNA nɩaa tʋɔŋ, a chɩŋ ba lɛ a kaa mʋ ba doho doho fii sɩ jaŋ to ba harɩŋ kɔ,

⁴ bɛɛ wɩaa, bʋa-la lɛ ma fa sɩ lɩɩ Ijipiti lɛ a kʋkɔ, ba vɔmma lɩɩŋ arɩ kʋdiilee nɛ aŋ mʋ kpal Balam sɩ ŋaa Bioo nanʋala a lɩɩ taŋ-la ba sɩɩ yɩrɛ Pɛtɔ a hɛ Mesopotemia lɛ, dɩ ʋ kalɩbɛ hɛ ma lɛ.

⁵ Ama ma TƖƖNA Wɩa sɩ choma wɩaa nɛ tɩɩ ʋ bɩ jegile nɩɩ Balam teeŋ, aŋ leŋ ŋmɩaŋ-la mɩɩra wasɛma.

⁶ Má mɩɩsɩŋ kala lɛ, má pɔ ma dɩ ba sɩ́ wɩɩ pɛ.

⁷ Ma pɔ má sɩ́ Ɛdɔm tɩŋŋaa bɛrʋ, ba ŋaa ma naambiiriŋ nɛ. Má sɩ́ Ijipiti tɩŋŋaa ma bɛrʋ, bɛɛ wɩaa ma fa ŋaa nʋhʋɔraa nɛ ba tinteeŋ lɛ.

⁸ Ba doho doho tʋmbʋ-tori ha sɩ jaŋ to ba harɩŋ kɔ jaŋ wuo guoli La TƖƖNA nɩaa tʋɔŋ.

Wɩalɩŋ sɩ jaŋ leŋ dɩ ma dɩhɔnʋŋ kɛŋ disiniŋ

⁹ Dɩ ma nɛ ŋmoo buguŋ dɩ ma yuo ma dʋndɔŋŋɔɔ, má lɩɩsɛ ma tɩtɩa wɩalɩŋ sɩ kɛŋ disiniŋ lɛ.

¹⁰ Dɩ ma baala-la kʋŋ nɛ pɩŋ tɩtaŋɩŋ a duoso fɩɩ bafɩɩrɩŋ, ŋɩɩ leŋe ʋ kɛŋ disiniŋ nɛ. Ʋ maga dɩ ʋ lɩɩ ma dɩhɔnʋŋ tʋɔŋ lɛ.

¹¹ Dɩ dɩdaanɩŋ nɛ kʋ yi, ʋ maga dɩ ʋ fo lɩɩŋ, dɩ wɩɩ-muluŋ nɛ jʋa, ʋ mɩɩra kʋ jʋʋ ma dɩhɔnʋŋ.

¹² Ʋ maga dɩ má lɩɩ dɩhɔnʋŋ lɛ nɛ a chɛ lee ma sɩ jaŋ mʋ a fɩfɩɩ fɩɩrɩŋ aŋ nyɩnyɛ bɩnɩŋ.

¹³ Ma kʋŋkala maga dɩ ʋ pɛ kɛŋ kʋŋ ʋ sɩ jaŋ kaa lu bʋa a nyɛ bɩnɩŋ a fɩɩ fɩɩrɩŋ hɛ aŋ gbaa tɔ nɛ.

¹⁴ Má leŋ dɩ ma dɩhɔnʋŋ zɔŋ ma TƖƖNA Wɩa sɩaa lɛ, bɛɛ wɩaa ʋ hɛ ma tʋɔŋ nɛ ma dɩ-hɔnɩɩ-la lɛ, a pʋpɔma, a leŋ ma yuo didii ma dʋndɔŋŋɔɔ. Ma pɔ dɩ má sɩ́ wɩɩkala sɩ kɛŋ disiniŋ ŋaa dɩ ŋɩɩ leŋ dɩ ʋ mɩɩrɛ ma harɩŋ.

Wombie-la dɔnsʋŋ Iziral tɩŋŋaa sɩ jaŋ tuto

¹⁵ Dɩ nʋʋ yomo nɛ fá kɔ ŋ teeŋ a chɩchɛ dɩ ŋ laaʋ ta, sɩ́ ʋ kaa mɩɩra mʋ pa ʋ tɩɩna.

¹⁶ Leŋ dɩ ʋ hɛ ma tʋɔŋ lee na-kala ʋ sɩ cho arɩ taŋ na-kala ʋ sɩ lɩɩsa lɛ, sɩ́ ʋ dɔgʋsʋ.

¹⁷ Iziral tɩɩna kala, baal koo haal bɩ maga dɩ ʋ jʋʋ vene kala, dɩ bachɔrʋŋ koo hachɔrʋŋ wɩaa nɛ ŋaa ʋ tɩntɩmɩŋ.

¹⁸ Ma pɔ má sɩ́ haal koo baal sɩ ŋaa wʋchɔrʋŋ a dʋa kʋŋ kaa kʋ jʋʋ ma TƖƖNA Wɩa dɩa a lɩɩsɛ niiŋ, bɛɛ wɩaa ma TƖƖNA Wɩa ka kɩsɛ wʋdosunu-la nɛ.

¹⁹ Dɩ ma kʋŋ nɛ joŋ moribiee koo kʋdiilee koo kʋŋ na-kala a chɩŋ ŋ naambii Iziral tɩɩna, sɩ́ lɩɩŋ kaa daŋ.

²⁰ Ŋ jaŋ wuo kɛŋ lɩɩŋ daŋ a pɩ nʋhʋɔraa, ama ŋ naambie-na, ŋ bɩ ŋɩɩ wuo ŋaa. Dɩ ma nɛ bɩ lɩɩŋ kaa daŋa pɩ ma naambiiriŋ, ma TƖƖNA Wɩa jaŋ pɛ ma lɛ tɩntɩmɩɩ-kala ma sɩ jaŋ tɩtɩŋ tintee-la ma sɩ jaŋ jʋʋ dɩ ʋ ŋaa ma kʋŋ lɛ.

²¹ Dɩ ma kʋŋ nɛ ta niiŋ ma TƖƖNA Wɩa teeŋ, sɩ́ leŋe dɩ ʋ dieni ka ŋ lɩɩsɛ nii-la. Ma Tɩɩna Wɩa jaŋ chɩchɛ dɩ ŋ lɩɩsɛ nii-la, dɩ ŋɩɩ dee ʋ jaŋ ŋaa wʋbɔŋ ŋ lɛ.

²² Dɩ ŋ nɛ paala bɩ niiŋ ta, ŋ bɩ wɩɩkala cheye.

²³ Wɩɩkala ŋ sɩ suri ŋ niiŋ a bʋl La TƖƖNA teeŋ, ʋ maga dɩ ŋ ŋaa nɛ, bɛɛ wɩaa ŋ tʋɔtɔrʋŋ lɛ nɛ ŋ ta nii-la ŋ Tɩɩna Wɩa teeŋ.

²⁴ Dɩ ŋ nɛ jʋʋ ŋ dɔŋɔ tɩɩna tɩɩnɛnɛɛ baga, ŋ jaŋ wuo dii a magɛ ŋɩɩ kala ŋ sɩɩ chɛ, ama ʋ bɩ maga dɩ ŋ tɔrɛ a hɛ ŋ lʋaga lɛ.

²⁵ Dɩ ŋ nɛ jʋʋ ŋ dɔŋɔ tɩɩna kuori-mɩaa baga, ŋ jaŋ wuo kɛŋ ŋ nɩsɩŋ a kɩɩlɛ mʋa a chaŋ, ama ʋ bɩ maga dɩ ŋ kɛŋ sɩa jʋʋ a ta.