MOSIS BƖRA WULLI WƖA WOMBIIŊ 20 - WƖA TENIŊ

Laalɩŋ Wɩaa

¹ Dɩ laalɩŋ nɛ sii ma dɩ ma dʋndɔŋŋɔɔ pɛgɛ, dɩ ma nɛ na ba janɩŋ arɩ ba janɩŋ torukoba arɩ ba laalɩyuoroo dɩ ba yʋga kɩɩma, má sɩ́ leŋe dɩ fawʋllʋŋ kɛmma, bɛɛ wɩaa ma TƖƖNA Wɩa sɩ kɛmma kaa lɩɩ Ijipiti tinteeŋ lɛ chɩŋ ma harɩŋ nɛ.

² Dɩ ma nɛ kɛŋ ma tɩtɩa hɛ dɔŋɔ dɩ ma mʋ laalɩŋ, Wɩɩsʋllɩ sɩpaalaara maga dɩ ʋ kʋ lɩɩ chɩŋ ma laalɩyuoroo sɩpaaŋ nɛ a bʋl wɩaa pɩba.

³ Ʋ jaŋ bʋl, “Iziral tɩmma, má jegile nɩɩ, jɩnɩŋ maa mʋ laalɩŋ nɛ dɩ ma yuo ma dʋndɔŋŋɔɔ. Má sɩ́ ba fá, má sɩ́ leŋe dɩ ma bɔyɛ joŋ, má sɩ́ leŋe dɩ ma nandaasɩŋ yʋɔrɛ, má sɩ́ chel ba sɩpaaŋ.

⁴ Ma Tɩɩna Wɩa nɛ kɛmma vɩvɛŋ, ʋ jaŋ yuo dii ma dʋndɔŋŋɔɔ a pɩma.”

⁵ Laalɩyuori-hɩasɩŋ ma jaŋ pɩɛsɛ laalɩyuoro-la, “Ma kʋŋ hɛ nɩmɛ a saa dɩɩ-falɩɩ aŋ ha bɩ suroo? Ʋ tɩɩna mɩɩra mʋ dɩa, dɩ ŋɩɩ dee ʋ jaŋ wuo sʋʋ laalɩŋ lɛ ka dɩ nɩwogo mɩɩra mʋ suri dɩa-la.

⁶ Ma kʋŋ hɛ nɩmɛ a chɔnsɛ tɩɩsɩŋ baga, aŋ ha bɩ ba nɛnɛɛ die? Ʋ tɩɩna mɩɩra mʋ dɩa, dɩ ŋɩɩ dee ʋ jaŋ wuo sʋʋ laalɩŋ lɛ, ka dɩ nʋʋ dɔŋ mɩɩra dii tɩɩnɛnɛ-la.

⁷ Ma kʋŋ hɛ nɩmɛ a sʋgɛ haala aŋ ha bɩ jaa? Ʋ tɩɩna mɩɩra mʋ dɩa, dɩ ŋɩɩ dee ʋ jaŋ wuo sʋʋ laalɩŋ lɛ, ka dɩ nʋʋ dɔŋ jaa haal-la.”

⁸ Laalɩyuori-hɩasɩ-la jaŋ bɩra pɩɛsɛ, “Ma kʋŋ hɛ nɩmɛ ʋ nandaasɩŋ yʋɔrɛ koo fawʋllʋŋ kɛnʋ? Ʋ tɩɩna mɩɩra mʋ dɩa, dɩ ŋɩɩ dee ʋ naambiiri-la ma nandaasɩŋ jaŋ yʋɔrɛ.”

⁹ Dɩ laalɩyuori-hɩasɩ-la nɛ bʋl wɩalɩŋ pɩ laalɩyuoro-la a dɛrɛ, ba jaŋ lɩɩsɛ sɩpaalaaraa dɩ ba bibeŋ laalɩyuoro-la.

¹⁰ Dɩ ma nɩɩ mʋ dɩ ma yuo taŋ na-kala, má laa sɩpaaŋ leŋ dɩ ba jɩŋ arɩ maa kɔ dɩ ma yuoba nɛ.

¹¹ Dɩ ba nɛ sɛyɛ arɩ ma wuoba nɛ, má bɩra sɩ́ ba yuo. Má kɛsɛ ba kala dɩ ba ŋaa ma yosi a tɩŋ yoŋ-tɩntɩŋŋaa a pɩpɩma.

¹² Dɩ taŋ-la nɩaa nɛ bɩ sɛyɛ arɩ ma wuoba nɛ, a chɩchɛ dɩ ma yuo laal-la, má leŋ dɩ ma laalɩyuoroo golli taŋ-la chu a yuoba.

¹³ Dɩ ma TƖƖNA Wɩa nɛ pɛ ma lɛ dɩ ma yuo diiba, má kpʋ baala-la kala sɩ hɛ taŋ-la lɛ.

¹⁴ Ama, má kɛsɛ ba haalaa, ba biiriŋ arɩ ba pʋsʋŋ, a paa kʋŋ na-kala sɩ hɛ taŋ-la lɛ dɩ ba ŋaa ma kɩaa. Ma Tɩɩna Wɩa nɛ joŋ ma dʋndɔmɔ-la kɩaa pɩma. Ma jaŋ wuo kaa ŋaa wɩɩ-la kala ma sɩɩ chɛ.

¹⁵ Wɩɩ-la ma sɩ jaŋ joŋo ŋaa tasɩ-la sɩ bɩ ma kpaga lɛ nɛ ŋɩɩ. Tasɩ-la sɩ kpagɛma lɛ dee.

¹⁶ Ama tabala-la sɩ hɛ tintee-la ma TƖƖNA Wɩa sɩ jaŋ joŋo pɩma dɩ ʋ ŋaa ma kʋŋ lɛ, má kpʋ kʋŋ na-kala sɩɩ wiesu a hɛ nɩmɛ.

¹⁷ Ʋ maga dɩ má kpʋ tinteyee deemba nɩaa kala: Hiti tɩŋŋaa, Amɔrɩ tɩŋŋaa, Kɛnaŋ tɩŋŋaa, Pɛrɛs tɩŋŋaa, Hivi tɩŋŋaa arɩ Jebus tɩŋŋaa arɩ ma TƖƖNA Wɩa sɩ dagɛma ŋɩɩ.

¹⁸ Dɩ ma nɛ bɩ ba kpʋa, ba jaŋ dagɛma dɩ ma to ba lɛ a ŋɩŋaa wɩalɩŋ sɩɩ kɩsʋ aa kpaarɛ ba vesiŋ a ŋaa wʋbɔŋ ma TƖƖNA Wɩa lɛ.

¹⁹ Dɩ ma nɛ mʋ yuo taŋ kala, dɩ yuosu-la nɛ diene magɛ ɛɛ ma, má sɩ́ tɩɩsɩ-la sɩɩ nɛŋ taŋ-la lɛ keru, bɛɛ wɩaa ma jaŋ wuo dii ba nɛnɛɛ. Tɩɩsɩ-la-na bɩ nuhuobiine ŋaa dɩ ma yuyuoba.

²⁰ Ma jaŋ wuo keri tɩɩsɩ-la nɛnɛɛ ma sɩ bɩ dii, a kaa ŋaa lusuŋ-cholluŋ a jʋʋ taŋ-la a yuo diiba.