MOSIS BƖRA WULLI WƖA WOMBIIŊ 19 - WƖA TENIŊ

Tasɩ-la ma sɩ jaŋ fá mʋ yuyuori

¹ Dɩ ma TƖƖNA Wɩa nɛ chei tinteye-la nɩaa tinteeŋ ʋ sɩ sɩ ʋ jaŋ joŋo pɩma, dɩ ma kiriba ta aŋ laa ba tasɩŋ arɩ ba dɩɩsɩŋ a hɔŋ,

² má lɩɩsɛ tabalaa batori a pɩ ma tɩtɩa, dɩ ba hɛ tintee-la ma TƖƖNA Wɩa sɩ jaŋ joŋo pɩma tʋtʋɔbaanɩŋ.

³ Má kɛŋ tintee-la ma TƖƖNA Wɩa sɩ joŋo pɩma dɩ ʋ ŋaa ma kʋŋ kaa kpaa leree batori, dɩ lere-la kʋŋkala kɛŋ taŋ ba sɩ jaŋ fá mʋ yuyuori. Má bil wombiee a mʋmʋ tasɩ-la, dɩ nʋʋkala nɛ kpʋ nʋʋ, ʋ jaŋ wuo fá mʋ tasɩ-la dɔŋɔ.

⁴ Dɩ nʋʋ nɛ bɩ sɛnɛ aŋ kpʋ nʋʋ sɩ tuo ʋ dʋndɔŋ, ʋ jaŋ wuo fá mʋ tasɩ-la a laa ʋ mɩɩsɩŋ.

⁵ La joŋ arɩ nʋʋ arɩ ʋ dɔŋɔ tɩɩna nɛ sii mʋ gɩrɩŋ dɩ ba keri daasɩŋ. Ʋ sɩɩ keri ŋɩɩ, dɩ saaŋ fogi a yagɛ ʋ dɔŋɔ tɩɩna-la kpʋ. Baal-la jaŋ wuo fá mʋ tasɩ-la dɔŋɔ a laa ʋ mɩɩsɩŋ.

⁶ Dɩ ŋɩɩ dee, nɩɩ-la ʋ sɩ kpʋa naambile sɩ jaŋ dii ʋ dʋa nɛ na wɩɩ-la sɩ ŋaa, ʋ jaŋ na baanɩŋ a kire to nɩɩ-la sɩ kpʋ ʋ naambie harɩŋ. Dɩ taŋ-la ʋ sɩ jaŋ mʋ yuori nɛ bolie, ʋ jaŋ kire kɛnʋ a kpʋʋ, ka ʋ fa bɩ maga dɩ ʋ kpʋʋ, bɛɛ wɩaa ʋ bɩ sɛnɛ.

⁷ Wɩɩ-la sɩ tɩɩ mɩ bʋl ma lɩɩsɛ tabalaa batori a pɩ ma tɩtɩa a fá mʋ yuyuori nɛ ŋɩɩ.

⁸ Dɩ ma TƖƖNA Wɩa nɛ leŋe dɩ ma tinteeŋ jallɛ, arɩ ʋ sɩ hɛ niiŋ a pɩ ma naabalɩmaba ŋɩɩ, a joŋ tintee-la kala pɩma arɩ ʋ sɩ hɛ niiŋ ŋɩɩ,

⁹ a tɩŋ ma sɩ fɩɛlɛ ma sɩaa a to wombie-la kala mɩ sɩ joŋo dagɛma jɩnɩŋ, a cho ma TƖƖNA Wɩa a tuto ʋ wombiee bʋa na-kala, ʋ maga dɩ má bɩra lɩɩsɛ tasɩŋ batori nɛ a pɛ.

¹⁰ Má ŋaa ŋɩɩ tintee-la ma TƖƖNA Wɩa sɩ jaŋ joŋo pɩma dɩ ʋ ŋaa ma kʋŋ lɛ, dɩ nʋʋ sɩ bɩ wɩɩ cheye chalɩŋ sɩ́ tintee-la lɛ jaasʋ, dɩ ma laa cheeriŋ.

¹¹ Ama dɩ nʋʋ nɛ bɛrɛ ʋ dɔŋɔ tɩɩna, a maachie sii lʋara ŋmobu kpʋ, aŋ fá mʋ tasɩŋ deemba dɔŋɔ,

¹² ʋ taŋ nɩhɩasɩŋ maga dɩ ba leŋ dɩ ba mʋ kɛnʋ mɩɩra kɔ ba jaŋ nɛ, dɩ ba joŋu hɛ nɩɩ-la ʋ sɩ kpʋa naambile sɩ jaŋ dii ʋ dʋa nɩsɩŋ lɛ dɩ ʋ kpʋʋ.

¹³ Má sɩ́ nɩɩ-la nenige fá. Má ŋaa ŋɩɩ a leŋ dɩ nɩalɩŋ sɩ bɩ wɩɩ cheye chalɩŋ sɩ́ jaasʋ Iziral tinteeŋ lɛ, ka dɩ wɩaa wuo vɛŋ woruŋ a pɩma.

¹⁴ Tintee-la ma TƖƖNA Wɩa sɩ jaŋ joŋo pɩma lɛ, má sɩ́ tinteeŋ bʋɔsʋ-la ma naabalɩmaba sɩ laa sɩpaaŋ bil kaa vʋgʋmɛ a gʋrɛ dɔŋɔ.

Pɛ-naaraa wɩaa

¹⁵ Dɩ nʋʋ nɛ ba bʋl arɩ ʋ ŋaa wɩɩ nɛ a chei, nɩbala dʋndʋŋ bɩ jaŋ wuo pɛ na arɩ wɩɩ-la ŋaa wʋtɩtɩɩ nɛ. Nɩaa balɩa koo nɩaa batori nɛ jaŋ wuo pɛ na ka dɩ wɩɩ-la na chɩŋ.

¹⁶ Dɩ nʋʋ nɛ sɩ ʋ pɛ na wɩɩ a nyɩɛ wɩaa pɩ nʋʋ arɩ ʋ ŋaa wɩɩ nɛ a chei,

¹⁷ ʋ dɩ nɩɩ-la ʋ sɩ nyɩɛ wɩaa pa maga dɩ ba mʋ La TƖƖNA sɩpaaŋ nɛ, Wɩɩsʋllɩ sɩpaalaaraa arɩ sarɩya diire-la sɩ hɛ nɩmɛ bʋa-la lɛ teeŋ.

¹⁸ Sarɩya diire-la maga dɩ ba beŋ wɩɩ-la tʋɔŋ nɛ woruŋ. Dɩ ba nɛ kʋ na arɩ nɩɩ-la sɩ sɩ ʋ pɛ na wɩɩ-la nɛ ŋaa wʋnyɩɛrʋ, a nyɩɛ wɩaa pɩpɩ ʋ naambile,

¹⁹ ʋ maga dɩ ba joŋ wɩɩ-la ba fa sɩ jaŋ joŋo ŋaa ʋ naambile lɛ, a ŋaa ʋ lɛ. Ʋ maga dɩ má giri wʋbɔŋ-la ta nɛ ma tʋɔŋ.

²⁰ Dɩ nɩkaana-la nɛ nɩɩ wɩɩ-la ma sɩ ŋaa, fawʋllʋŋ jaŋ jʋʋba, ba bɩra bɩ jaŋ ŋaa wʋbɔmʋŋ deeŋ doho ma tʋɔŋ.

²¹ Má sɩ́ nʋʋkala nenige fá. Dɩ nʋʋ nɛ kpʋ ʋ dɔŋɔ, má kpʋʋ ma, dɩ nʋʋ nɛ pʋrɛ ʋ dɔŋɔ sɩɩŋ, má pʋrɛ ʋ ma sɩɩŋ, dɩ nʋʋ nɛ ŋmoo ʋ dɔŋɔ nyɩlɩŋ churi, má ŋmoo ʋ ma nyɩlɩŋ churi, dɩ nʋʋ nɛ bori ʋ dɔŋɔ nɩsɩŋ, má bori ʋ ma nɩsɩŋ, dɩ nʋʋ nɛ bori ʋ dɔŋɔ naaŋ, má bori ʋ ma naaŋ.