MOSIS BƖRA WULLI WƖA WOMBIIŊ 18 - WƖA TENIŊ

Wɩɩsʋlʋŋ kɩalɩŋ sɩ ŋaa Levi doho nɩaa arɩ Wɩɩsʋllɩ sɩpaalaaraa kɩaa

¹ Levi doho nɩalɩŋ sɩ ŋaa Wɩɩsʋllɩ sɩpaalaaraa arɩ Levi doho nɩaa kala bɩ maga dɩ ba kɛŋ tinteeŋ kpaal Iziral tinteeŋ kala lɛ. Ba kpaalɩŋ nɛ kɩalɩŋ Iziral tɩŋŋaa sɩ kaa kɔ dɩ ba ŋaa Wɩɩsʋlʋŋ a pɩ La TƖƖNA.

² A tɩŋ ba sɩ bɩ tinteeŋ kpaal kala kɛnɛ ba naambiiriŋ tʋɔŋ, La TƖƖNA nɛ jaŋ pɩba kʋŋkala ba sɩɩ chɛ, arɩ ʋ fa sɩ bʋl ŋɩɩ pɩba.

³ Dɩ nʋʋ nɛ kpʋ nɛ-bele koo piesu dɩ ʋ ŋaa Wɩɩsʋlʋŋ, Wɩɩsʋllɩ sɩpaalaaraa nɛ jaŋ tɩɩ vaaŋ, talaŋa arɩ tʋɔŋ kɩaa.

⁴ Má joŋ ma baga kʋdii falaa ma a pɩba: Mɩaa, tɩɩnɛnɛɛ sɩnɩŋ, nʋʋŋ arɩ ma pie-pʋŋ-bumbumba-la ma sɩ kɛ.

⁵ Ma doho doho kala tʋɔŋ, Levi doho nɩaa arɩ ba doho nɩaa kala nɛ ma TƖƖNA Wɩa lɩɩsɛ dɩ ba nɛ ŋaa Wɩɩsʋllɩ sɩpaalaaraa a kaa mʋ wuu.

⁶ Dɩ Levi tɩɩna nɛ lɩɩ ma Iziral tɩŋŋaa tasɩ-la kʋŋ ʋ sɩ hɛ lɛ, a mʋ lee-la La TƖƖNA sɩ jaŋ lɩɩsɛ dɩ ma zizilu,

⁷ ʋ jaŋ wuo tɩŋ tɩntɩŋŋaa ʋ Tɩɩna Wɩa yɩrɩŋ lɛ nɩmɛ arɩ ʋ Levi doho nɩalɩŋ dɔnsʋŋ sɩɩ tɩŋ La TƖƖNA sɩpaaŋ ŋɩɩ lee-la.

⁸ Ʋ dɩ ʋ dɔnsʋ-la kala kpaalɩŋ jaŋ magɛ dɔŋɔ. Kpaalɩŋ deeŋ-na bɩ ʋ nyɩmma dʋa kpaalɩŋ ʋ sɩ laa lɛ pɛ.

Wɩalɩŋ sɩɩ kɩsʋ

⁹ Dɩ ma nɛ mʋ jʋʋ tintee-la ma TƖƖNA Wɩa sɩ sɩ ʋ jaŋ joŋo pɩma, má sɩ́ tinteye-la sɩ hɛ lee-la nɩaa lɛ to a ŋaa wɩaa deemba sɩɩ kɩsʋ.

¹⁰ Ma pɔ má sɩ́ ma bii-kala, baal koo haal kaa kpʋ a nyɩgɛ koruŋ nyuŋ a pɩ vene kala. Má sɩ́ vʋgʋ, a sɩ́ chichiribi wɩaa ŋaa, hɩllɩŋ,

¹¹ koo a didii koruŋ-barɩŋ, aa yɩrɛ lɛlɛɛ koo kantɔŋŋɔɔ.

¹² La TƖƖNA bɛrɛ nɩalɩŋ sɩɩ ŋaa wʋkɩsaa deemba nɛ. Wɩalɩŋ wɩaa nɛ tɩɩ ma TƖƖNA Wɩa kikiri tinteye-la nɩaa sɩ hɛ tintee-la lɛ ŋɩɩ.

¹³ Ʋ bɩ maga dɩ ma kɛŋ wʋcheeli kala ma TƖƖNA Wɩa sɩpaaŋ.

Wɩa wʋlaabʋlla

¹⁴ Tinteye-la ma sɩɩ mʋ dɩ ma yuo kiri aŋ laa ba tinteeŋ, ba nɩaa ka to vʋgʋraa arɩ chichiribee niiŋ nɛ. Ma TƖƖNA Wɩa bɩ chɛ dɩ ma-na tuto wɩalɩŋ.

¹⁵ Ma TƖƖNA Wɩa jaŋ lɩɩsɛ nʋʋ ma naambiiriŋ tʋɔŋ a pɩma dɩ ʋ ŋaa ʋ wʋlaabʋlla a nagɛ mɩ-na Mosis. Ʋ maga dɩ má jegile nɩnɩɩ ʋ teeŋ.

¹⁶ Tapʋlɩɩ-la ma sɩ hilimi peel-la ba sɩɩ yɩrɛ Sɩnaɩ bʋbʋɔŋ, ma sɩ, “La bɩra bɩ chɛ dɩ la nɩɩ La TƖƖNA Wɩa yikoro, koo dɩ la na ʋ nyiŋ-bal-la, dɩ la nɛ na ŋɩɩ la jaŋ sʋʋ.”

¹⁷ Ŋɩɩ nɛ La TƖƖNA bʋla pɩmɛ, “Wɩɩ-la ba sɩ bʋla ŋaa wʋzɔŋ nɛ.

¹⁸ Mɩ jaŋ lɩɩsɛ nʋʋ ba naambiiriŋ tʋɔŋ dɩ ʋ ŋaa mɩ wʋlaabʋllʋ dɩ ʋ nagɛ ŋ-na Mosis, a joŋ mɩ wɩaa hɛ ʋ niiŋ lɛ, dɩ ʋ bʋl wɩalɩŋ kala mɩ sɩ dagʋ a pɩba.

¹⁹ Dɩ nʋʋkala nɛ vɩa dɩ ʋ jegile nɩɩ wɩalɩŋ mɩ wʋlaabʋllʋ-la sɩ jaŋ bʋl mɩ yɩrɩŋ lɛ, mɩ-na tɩtɩa nɛ jaŋ dɔgɩsɛ tɩɩna.

²⁰ Ama dɩ mɩ wʋlaabʋllʋ kala nɛ bʋl wɩɩ mɩ yɩrɩŋ lɛ, ka mɩ dee bɩ ʋ hɛ, koo dɩ vene dɔŋ yɩrɩŋ lɛ nɛ ʋ ŋaa ŋɩɩ, ʋ maga dɩ ma kpʋʋ nɛ.”

²¹ Ma jaŋ wuo pɩɛsɛ dɔŋɔ a bʋl, “Ɛɛ nɛ la jaŋ ŋaa jɩŋ arɩ La TƖƖNA Wɩa dee bɩ ʋ hɛ ʋ bʋbʋl wɩɩ-la?”

²² Dɩ Wɩa wʋlaabʋllʋ nɛ bʋl wɩɩ La TƖƖNA yɩrɩŋ lɛ, ka wɩɩ-la ʋ sɩ bʋla bɩ kʋ ŋaa wʋtɩtɩɩ, ŋɩɩ-na La TƖƖNA dee bɩ ʋ hɛ, ʋ bʋl wɩɩ-la ʋ tɩtɩa doluŋ lɛ nɛ, má sɩ́ ʋ fa.