MOSIS BƖRA WULLI WƖA WOMBIIŊ 16 - WƖA TENIŊ

La TƖƖNA dɩɩsɩŋ kiele bal gbiele

¹ Chɛnɛ-la ba sɩɩ yɩrɛ Abib tʋɔŋ, má gbieli ma TƖƖNA Wɩa dɩɩsɩŋ kiele bal gbiele, bɛɛ wɩaa chɛnɛ-la tʋɔŋ tɩtaŋɩŋ nɛ ʋ kɛmma kaa kʋ lɩɩ Ijipiti tinteeŋ lɛ.

² Má lɩɩsɛ piese koo nɛŋ a kaa mʋ lee-la ma TƖƖNA Wɩa sɩ jaŋ lɩɩsɛ dɩ ma zizilu a kpʋ a ŋaa ma TƖƖNA dɩɩsɩŋ kiele bal gbiele-la kʋdiilee.

³ Dɩ ma nɩɩ dii gbiele-la kʋdiilee, má sɩ́ boroboro-la sɩ kɛŋ sɩbʋrʋŋ dii. Má dii boroboro-la sɩ bɩ sɩbʋrʋŋ kɛnɛ ŋɩɩ tapʋlaa balɩpɛ, dɩ ʋ liliisima hɛɛ-la ma sɩ na bʋa-la lɛ ma sɩɩ chɛ lɩma lɩma dɩ ma lɩɩ Ijipiti tinteeŋ lɛ.

⁴ Má sɩ́ leŋe dɩ sɩbʋrʋŋ hɛ ma teeŋ tapʋlaa balɩpɛ. Má pʋpɔ dɩ pʋsʋ-la ma sɩ kpʋa chɛ-bumbuŋ-la dɩdaanɩŋ nammɩa sɩ chɩna chʋa.

⁵ Má sɩ́ La TƖƖNA dɩɩsɩŋ kiele bal gbiele-la pʋna kpʋ taŋ kala ma sɩ cho lɛ, tasɩ-la ma TƖƖNA Wɩa sɩ joŋo pɩma lɛ,

⁶ see lee-la ʋ sɩ jaŋ dagɛma dɩ ma mʋ a zizilu. Nɩmɛ nɛ ma jaŋ kpʋ pʋsʋ-la wɩɩ-mul-jʋʋlʋŋ, bʋa-la tɩtɩa lɛ ma sɩ lɩɩ Ijipiti tinteeŋ lɛ.

⁷ Má wasɛ nammɩa-la a chaŋ lee-la ma TƖƖNA Wɩa sɩ jaŋ dagɛma. Dɩ taŋ nɛ pʋla chʋchʋɔŋ, má mɩɩra mʋ ma dɩɩsɩŋ.

⁸ Má dii boroboro-la sɩ bɩ sɩbʋrʋŋ kɛnɛ tapʋlaa balɩdʋ, ama tapʋl-pɛɩ chɛɛŋ má sɩ́ tɩntɩmɩɩ kala tɩŋ, má hilimi a zil ma TƖƖNA Wɩa.

Baga kɩaa ŋaanɩŋ gbiele

⁹ Má chɩŋ tapʋlɩɩ-la ma sɩ suomo a kʋkʋŋ ma mɩaa a dɩɩsɛ yɔɔsʋŋ balɩpɛ,

¹⁰ aŋ gbieli ma baga kɩaa ŋaanɩŋ gbiele a pɩ ma TƖƖNA Wɩa. Nʋʋkala jaŋ kɛŋ Wɩa sɩ pɛ ʋ lɛ magɛ ŋɩɩ tʋɔtɔrɛ Wɩɩsʋlʋŋ kɩaa a kaa kʋ ŋaa Wɩɩsʋlʋŋ pɩ ma TƖƖNA Wɩa.

¹¹ Ma dɩ ma biiriŋ, ma tɩntɩnnaa, baalaa arɩ haalaa, Levi doho nɩalɩŋ arɩ nɩwogusuŋ, biisinsiŋ arɩ yo-haala-la sɩ hɛ ma tʋɔŋ, ma kala maga dɩ má mʋ lee-la ma TƖƖNA sɩ jaŋ lɩɩsɛ dɩ ma zilu nɩmɛ a gbieli ʋ sɩpaaŋ.

¹² Má jɩŋ arɩ ma fa ŋaa yosi nɛ Ijipiti tinteeŋ lɛ, ŋɩɩ wɩaa má fɩɛlɛ ma sɩaa a to wɩaa deemba mɩ sɩɩ dagɛma.

Lɛŋŋɛɛ gbiele

¹³ Dɩ ma nɛ ŋaa ma baga kɩaa dɛrɛ, a tɔrɛ ma tɩɩnɛnɛɛ, má gbieli lɛŋŋɛɛ gbiele tapʋlaa balɩpɛ.

¹⁴ Ma dɩ ma biiriŋ, ma tɩntɩnnaa, baalaa arɩ haalaa, Levi doho nɩalɩŋ arɩ nɩwogusu-la, biisinsiŋ arɩ yo-haala-la kala sɩ hɛ ma tʋɔŋ, ma kala maga dɩ má gbieli gbiele-la arɩ tʋɔtɔrʋŋ.

¹⁵ Má mʋ lee-la ma TƖƖNA Wɩa sɩ jaŋ dagɛma dɩ ma zizilu a gbieli gbiele-la tapʋlaa balɩpɛ. Má leŋ dɩ ma tʋɔŋ tɔrɛ, bɛɛ wɩaa ma TƖƖNA pɛ ma lɛ nɛ ma baga kɩaa wasɛ, a pɛ ma lɛ ma nɩsɩŋ tɩntɩŋŋaa ma kala lɛ.

¹⁶ Jɩna na-kala tʋɔŋ Iziral tɩŋŋaa baalaa kala maga má mʋ ma TƖƖNA sɩpaaŋ naansɩɩŋ butori nɛ, lee-la ʋ sɩ jaŋ dagɛma dɩ ma zizilu, a gbieli gbielee deemba: La TƖƖNA dɩɩsɩŋ kiele bal gbiele, baga kɩaa ŋaanɩŋ gbiele arɩ lɛŋŋɛɛ gbiele. Nʋʋkala bɩ maga dɩ ʋ mʋ La TƖƖNA sɩpaaŋ arɩ na-hɩllɩŋ.

¹⁷ Nʋʋkala maga dɩ ʋ kɛŋ kʋŋ nɛ a mʋ dii zile pɩ ma TƖƖNA Wɩa a magɛ ŋɩɩ ʋ sɩ pɛ ʋ lɛ.

Sarɩya diiree

¹⁸ Tasɩ-la kala ma TƖƖNA Wɩa sɩ jaŋ joŋo pɩma lɛ, doho kala maga dɩ ʋ lɩɩsɛ sarɩya diiree arɩ tɩntɩnnɩ-hɩasɩŋ. Ba maga ba kɛŋ wʋtɩtɩɩ a laa nɩalɩŋ wɩaa jɩjɩŋ.

¹⁹ Nɩaa deemba bɩ maga dɩ ba joŋ wʋtɩtɩɩ faa, a sɩ laa pɛ nʋʋ lɛ dɩ ʋ kɩaa nɛ bɩ sɩŋ, a sɩ́ kpalaa laa. Kpalaa nɛ yie leŋ nɩaa joŋ wʋtɩtɩɩ faa aŋ kɛŋ wʋtɩtɩɩ bɩrɩmɛ wʋnyɩɛrɩŋ.

²⁰ Má leŋ dɩ wʋtɩtɩɩ dʋndʋŋa nɛ laa ma wɩɩkala sɩpaaŋ, dɩ ŋɩɩ leŋ dɩ ma hɔŋ tintee-la lɛ ma TƖƖNA Wɩa sɩ jaŋ joŋo pɩma a tɩɩʋ.

Má sɩ́ vesiŋ to

²¹ Dɩ ma nɛ saa Wɩɩsʋllɩ koruŋ dɩ ma pɩ ma TƖƖNA Wɩa, má pɔ dɩ vene-la ba sɩɩ yɩrɛ Asɩra daa kala sɩ́ nɩmɛ pɛ.

²² Má sɩ́ tabɩɩ kala joŋo bil aa kpaarɛ, ma TƖƖNA Wɩa bɛrɛ ŋɩɩ nɛ.