MOSIS BƖRA WULLI WƖA WOMBIIŊ 15 - WƖA TENIŊ

Jɩna-la ba sɩ jaŋ joŋ chɩŋ diiree chɩŋŋaa chɛba

¹ Dɩ nʋʋkala nɛ joŋ kɩaa chɩŋ ʋ dɔŋɔ, dɩ jɩ-pɛɩ nɛ kʋ dɛrɛ, ʋ maga dɩ ʋ giri chɩŋ-la ta.

² Ŋ-la nɛ maga ma ŋɩŋaa: Dɩ Iziral tɩɩna nɛ joŋ kɩaa a chɩŋ ʋ dɔŋɔ, ʋ bɩra sɩ́ pɩɛsa laa, bɛɛ wɩaa bʋa-la lɛ La TƖƖNA sɩ sɩ ba giri chɩŋŋaa ta yie nɛ.

³ Ma jaŋ wuo pɩɛsa laa ma chɩŋŋaa nɩwogusuŋ teeŋ, ama ma naambiiriŋ-na teeŋ, má gire ta.

⁴ Nʋʋkala bɩ maga dɩ ʋ ŋaa summu ma tʋɔŋ, bɛɛ wɩaa tintee-la ma TƖƖNA Wɩa sɩ jaŋ joŋo pɩma dɩ ʋ ŋaa ma kʋŋ, ʋ lɛ, ʋ jaŋ pɛ ma lɛ woruŋ,

⁵ dɩ ma nɛ sɛɩ ma TƖƖNA Wɩa niiŋ, a to wɩalɩŋ kala mɩ sɩɩ dagɛma jɩnɩŋ.

⁶ Ma TƖƖNA Wɩa jaŋ chaasa pɛ ma lɛ arɩ ʋ sɩ hɛ niiŋ pɩma ŋɩɩ. Tinteyee jaŋ yʋgɛ a chɩŋ kɩaa ma teeŋ, ama ma-na bɩ jaŋ chɩŋ kʋŋ nʋʋkala teeŋ. Tintee kala nɩaa bɩ jaŋ bibemma, ama ma-na jaŋ bibeŋ tintee daŋ.

⁷ Dɩ ma nɛ mʋ tintee-la ma TƖƖNA Wɩa sɩ jaŋ joŋo pɩma, dɩ summoo hɛ ma naambiiri-la tʋɔŋ tasɩ-la kʋŋkala lɛ, má sɩ́ tʋɔhɛɛŋ kɛŋ a vɩaba ta.

⁸ Má kɛŋ zile a joŋ kɩalɩŋ kala ba sɩɩ chɛ a chɩmba.

⁹ Dɩ jɩ-pɛɩ-la lɛ ma sɩ jaŋ giri chɩŋŋaa ta nɛ kpaga ma, ka dɩ ma naambiiri-la kʋŋ nɩsɩŋ buo, dɩ ʋ chɩchɛ ʋ chɩŋ kʋŋ ma teeŋ, má sɩ́ tʋɔhɛɛŋ kɛŋ a vɔmʋ. Dɩ ma nɛ vɔmʋ dɩ ʋ yele pɩ La TƖƖNA, ma jaŋ laa cheeriŋ La TƖƖNA teeŋ.

¹⁰ Má sɩ́ wɩaa gʋrʋmʋ aŋ-na pɛ ʋ lɛ, má pɛ ʋ lɛ arɩ tʋɔtɔrʋŋ. Dɩ ma nɛ ŋaa ŋɩɩ, ma TƖƖNA Wɩa jaŋ pɛ ma lɛ tɩntɩmɩɩ kala ma sɩɩ tɩŋ lɛ, ma nɩsɩŋ jaŋ su.

¹¹ Bʋa na-kala lɛ nyaabaa jaŋ hɛ ma Iziral tɩŋŋaa tʋɔŋ, ŋɩɩ wɩaa, mɩ bʋlaa pɩma, má kɛŋ zile ma naambiiriŋ arɩ nyaaba-la sɩ hɛ ma tʋɔŋ teeŋ.

Yosuŋ joŋo tanɩŋ wɩaa

¹² Dɩ ma Iziral tɩŋŋaa baal koo haal nɛ joŋ ʋ tɩtɩa a yalla pɩ ma dɔŋɔ a ŋaa yoŋ, dɩ ʋ nɛ tɩŋ tɩntɩŋŋaa pɩŋ jɩsɩŋ balɩdʋ, jɩ-pɛɩ lɛ, ʋ maga dɩ ŋ joŋu ta nɛ.

¹³ Dɩ ŋ nɛ taʋ, sɩ́ leŋe dɩ ʋ mʋ arɩ na-hɩllɩŋ.

¹⁴ Lɩɩsɛ kɩalɩŋ dɔnsʋŋ ma TƖƖNA Wɩa sɩ pɛ ŋ lɛ ŋ dʋa a pʋ, piesee, mɩaa arɩ tɩɩnɛnɛɛ sɩnɩŋ.

¹⁵ Ma jɩŋ arɩ ma ma fa ŋaa yosi nɛ Ijipiti tinteeŋ lɛ, ma TƖƖNA Wɩa laama ta, ŋɩɩ nɛ tɩɩ mɩ joŋ wɩɩŋ deeŋ aa dagɛma jɩnɩŋ.

¹⁶ Dɩ ŋ yomo-la nɛ bʋla pɩŋ arɩ ʋ bɩ jaŋ viiri, a tɩŋ ʋ sɩ cho ŋ dɩ ŋ dɩa nɩaa wɩaa, ka ʋ nɩsɩŋ ma jʋjʋʋ,

¹⁷ ŋɩɩ-na kɛŋ ʋ dɩgɩlɩŋ mʋ mɛrɛ boro lɛ a tɔɔ luri arɩ luro. Ʋ jaŋ ŋaa ŋ yoŋ a kaa mʋ wuu. Dɩ yomo-la nɛ ŋaa haal, ŋɩɩ tɩtɩa nɛ ŋ jaŋ ŋaa ʋ lɛ.

¹⁸ Sɩ́ leŋe dɩ ŋ tʋɔŋ wɩɩ dɩ ŋ nɩɩ chɛ ŋ joŋ ŋ yomo ta, a tɩŋ ʋ sɩ tɩŋ jɩsɩŋ deemba balɩdʋ a pɩŋ, ʋ tɩntɩŋŋaa sɩ yʋga kɩɩ nʋʋ ŋ fa sɩ jaŋ joŋ dɩ ʋ tɩŋ, ka dɩ ŋ timu naansɩɩŋ bʋlɩa wɩaa. Dɩ ŋ nɛ bɩ leŋe ŋ tʋɔŋ wɩɩ, ma TƖƖNA Wɩa jaŋ pɛ ŋ lɛ wɩɩ na-kala ŋ sɩɩ ŋaa lɛ.

Pʋsʋŋ bii-bumbumba

¹⁹ Má joŋ ma pʋsʋŋ bii-bumbumba sɩ ŋaa belliŋ a pɩ ma TƖƖNA Wɩa. Ma pɔ má sɩ́ ma nɛsɩŋ bii-bumbumba-la kaa tɩŋ tɩntɩŋŋaa, a pʋpɔ má sɩ́ ma piesee ma bii-bumbumba pʋnaa kɛ.

²⁰ Jɩna na-kala ma dɩ ma dɩa nɩaa jaŋ kɛŋ pʋsʋ-la mʋ ma TƖƖNA Wɩa sɩpaaŋ, lee-la ʋ sɩ jaŋ dagɛ, a kpʋ chaŋ.

²¹ Ama dɩ pʋsʋ-la kʋŋ nɛ kɛŋ nyɔɔ, dɩ ʋ nyʋlɩma nɛ koo dɩ ʋ gbɛrɩgɛ nɛ koo dɩ ʋ kɛŋ nyanyal-bɔŋ dɔŋ nɛ, ma bɩ jaŋ wuo kɛnʋ kʋ kpʋ a ŋaa Wɩɩsʋlʋŋ pɩ ma TƖƖNA Wɩa.

²² Ma nɩalɩŋ sɩ kɛŋ disiniŋ La TƖƖNA teeŋ arɩ nɩalɩŋ sɩ bɩ disiniŋ kɛnɛ ʋ teeŋ, ma kala jaŋ wuo chamba ma tasɩŋ lɛ a nagɛ ma sɩ yie chaŋ tɛhɩɩ koo aamɩŋ ŋɩɩ.

²³ Má sɩ́ ba chalɩŋ dii, má joŋo bɩsa ta.