MOSIS BƖRA WULLI WƖA WOMBIIŊ 14 - WƖA TENIŊKʋdiile-la sɩɩ kɩsʋ arɩ kɩalɩŋ sɩ bɩ kɩsɛ 1 Ma ŋaa La TƖƖNA Wɩa biiriŋ nɛ. Dɩ nʋʋ nɛ sʋba dɩ ma yiyel ʋ yoho, má sɩ́ ma yaraa kpɛrʋ, a sɩ́ ma tilliŋ ma fʋŋ arɩ nɩaa dɔnsʋŋ sɩɩ ŋaa ŋɩɩ, 2 bɛɛ wɩaa ma ŋaa ma TƖƖNA Wɩa nɩaa sɩ bɩ disiniŋ kɛnɛ nɛ. Dʋnɩa kala tʋɔŋ, ma TƖƖNA lɩɩsɛma nɛ dɩ ma ŋaa nɩa ʋ sɩ chaasa cho. 3 Má sɩ́ kɩalɩŋ La TƖƖNA sɩ sɩ baa kɩsʋ kʋŋkala dii. 4 Pʋsʋ-la arɩ bagɩla-la ma sɩ jaŋ wuo chaŋ nɛ ŋ-la: nɛsɩŋ, piesee, bʋʋnaa, 5 aamaa, bʋrʋŋ, tɛhɩɩ, tabʋmbʋŋ koo komo. 6 Ma jaŋ wuo chaŋ pʋna koo bagɩl na-kala sɩ kɛŋ naachɛŋŋɛɛ aŋ gbu kɩaa chɩchaŋ. 7 Ama pʋsʋ-la arɩ bagɩla-la sɩ bɩ naachɛŋŋɛɛ kɛnɛ aŋ gbu kɩaa chɩchaŋ tʋɔŋ, má sɩ́ bʋntaŋŋa, chuomo arɩ bʋŋ-nyuŋ gbuŋgbogo chaŋ, ba kɛŋ disiniŋ nɛ ma teeŋ. 8 Tooŋ ma kɛŋ disiniŋ nɛ ma teeŋ, ʋ ma kɛŋ naachɛŋŋɛɛ nɛ aŋ bɩ kɩaa gbu chɩchaŋ, má sɩ́ ʋ nammɩa chaŋ a sɩ́ ʋ kʋsʋʋŋ ma digu. 9 Kɩalɩŋ kala sɩ hɛ lɩɩŋ tʋɔŋ a kɛŋ kerikee arɩ horuŋ ma jaŋ wuo chamba. 10 Ama kɩalɩŋ sɩ bɩ horuŋ arɩ kerikee kɛnɛ, ba kɛŋ disiniŋ nɛ ma teeŋ má sɩ́ ba chaŋ. 11 Ma jaŋ wuo chaŋ diibiisi-la sɩ bɩ disiniŋ kɛnɛ. 12 Má sɩ́ diibiisiŋ deemba chaŋ: kachuuŋ, duuŋ arɩ duuŋ-bine, 13 habal-joŋ doho na-kala, 14 gɩlɩŋgaaŋ doho na-kala, 15 hajaaŋkuŋkuŋ-la sɩ kɛŋ dɩgɩlaa, gʋra nyilimi arɩ kɩl doho na-kala, 16 hajaaŋkuŋkuŋ-pʋla, hajaaŋkuŋkuŋ-bine arɩ hajaaŋkuŋkuŋ-bie, 17 hajaaŋkuŋkuŋ-la sɩ hɛ tintee-hɩlɩŋ lɛ, kachuunaa-fɩaŋ arɩ kamege, 18 naliiribommie, kʋlʋŋkʋɔl doho na-kala, diibii-kantɔmʋŋ arɩ jɩŋ. 19 Filli-biisi-la kala sɩ yie hɛ dɔŋɔ a fifil, ba kɛŋ disiniŋ nɛ ma teeŋ, má sɩ́ ba chaŋ. 20 Ma jaŋ wuo chaŋ filli na-kala sɩ kɛŋ kɩŋkɛnsɩŋ aŋ bɩ disiniŋ kɛnɛ. 21 Má sɩ́ kʋŋ na-kala sɩ sʋʋ pimee dii. Ma jaŋ wuo joŋo pɩ nɩwogusu-la sɩ hɛ ma tʋɔŋ dɩ ba dii koo ma yalla pɩ nɩwogusu-la dɔnsʋŋ sɩ hɔnɔ kpagɛma. Ma ŋaa ma TƖƖNA nɩaa sɩ bɩ disiniŋ kɛnɛ nɛ. Má sɩ́ bʋʋ-bie koo pie-bie chɔ ʋ naaŋ yɩlɩŋ lɛ. Kpaalɩŋ fii-la sɩ ŋaa La TƖƖNA kʋa 22 Dɩ ma nɛ ŋaa ma baga kɩaa jɩna na-kala, ma kaa kpaa leree fii a joŋ dɔŋɔ bil. 23 Ma sɩ jaŋ kɛŋ ma mɩaa, ma tɩɩnɛnɛɛ sɩnɩŋ arɩ nʋʋŋ a kpaa leree fii-la a joŋ kɩalɩŋ pɩ La TƖƖNA, a pɛ ma pʋsʋŋ bii-bumbumba lɛ, má kaa mʋ lee-la ma TƖƖNA Wɩa sɩ jaŋ dagɛma dɩ ma mʋ a zizilu nɩmɛ a dii kɩalɩŋ ʋ sɩpaaŋ. Má ŋaa wɩɩŋ deeŋ a zizil ma TƖƖNA Wɩa bʋa na-kala lɛ. 24 Dɩ lee-la La TƖƖNA sɩ daga nɛ bolie arɩ ma dɩɩsɩŋ, ma sɩ bɩ jaŋ wuo chʋŋ kpaalɩŋ fii time-la kaa mʋ, kɩalɩŋ ma TƖƖNA sɩ pɛ ma lɛ ma na, 25 má joŋo yallɛ a kɛŋ moribie-la mʋ lee-la ʋ sɩ jaŋ dagɛ dɩ ma zizilu nɩmɛ. 26 Ma joŋ moribie-la a yɔɔ kʋŋ na-kala ma sɩɩ chɛ: Nɛsɩŋ, piesee, tɩɩnɛnɛɛ sɩnɩŋ koo sɩ-yele. Ma dɩ ma dɩa nɩaa jaŋ dii kɩalɩŋ ma TƖƖNA Wɩa sɩpaaŋ aŋ gbieli. 27 Ma pɔ má sɩ́ Levi doho nɩalɩŋ sɩ hɛ ma tʋɔŋ wɩaa yʋ, bɛɛ wɩaa ba-na bɩ tinteeŋ kpaalɩŋ kɛnɛ ma tʋɔŋ. 28 Jɩ-tori na-kala dɩdɛrɩŋ, ma sɩ yie kɛŋ ma baga kɩaa kpaa lere fii a joŋ kʋbala-la a pɩ La TƖƖNA, má joŋ ba kala bil ma tasɩŋ lɛ. 29 Kʋdiile-la nɛ jaŋ ŋaa Levi doho nɩalɩŋ sɩ bɩ kpaal kɛnɛ ma Iziral tɩŋŋaa tʋɔŋ kʋdiilee, ba dɩ nɩwogusuŋ, biisinsiŋ arɩ yo-haala-la sɩ hɛ ma tasɩŋ lɛ, dɩ ba dii a vɔgɛ. Dɩ ma nɛ ŋaa ŋɩɩ, ma TƖƖNA Wɩa jaŋ pɛ ma lɛ wɩɩkala ma sɩɩ ŋaa lɛ. |
©Ghana Institute of Linguistics Literacy and Bible Translation 1984, 2014
Wycliffe Bible Translators, Inc.