MOSIS BƖRA WULLI WƖA WOMBIIŊ 13 - WƖA TENIŊ

Má sɩ́ vene kala to

¹ Dɩ nʋʋ nɛ hɛ ma tʋɔŋ a ŋaa Wɩa wʋlaabʋllʋ koo a wuo dɩdagɛ duosoo bʋbʋɔŋ, a bʋl arɩ wʋkpuŋkpere koo wʋmagɩl jaŋ ŋaa,

² dɩ wʋkpuŋkpere-la koo wʋmagɩl-la wɩaa ʋ sɩ bʋla nɛ sɛnɛ ŋaa, ka dɩ ʋ bʋl, “Má leŋ dɩ la to vesiŋ a pɛ La Tɩɩna lɛ a kpʋkpaarɛba (vesiŋ ma ha sɩ bɩ to aŋ ka),”

³ má sɩ́ jegile nɩɩ ʋ teeŋ. Ma Tɩɩna Wɩa to ŋɩɩ lɛ nɛ dɩ ʋ magɩsɛma a na arɩ ma chou arɩ ma tʋɔŋ arɩ ma wɩɩ-wɩɩkala nɛ.

⁴ La TƖƖNA Wɩa dʋndʋŋa nɛ maga dɩ ma tuto a zizilu. Má tuto ʋ niiŋ a tɩma pʋpʋ a kɛŋ ma tɩtɩa mɛrɛ ʋ lɛ woruŋ.

⁵ Wɩa wʋlaabʋllʋ-la koo nɩɩ-la sɩɩ dagɛ duosoo bʋbʋɔŋ maga dɩ ma kpʋʋ, bɛɛ wɩaa wɩalɩŋ ʋ sɩ bʋla lɩɩ wɩalɩŋ ma TƖƖNA Wɩa sɩ daga harɩŋ nɛ. Ʋ nɛ kɛmma kʋ lɩɩ Ijipiti tinteeŋ lɛ, a laama ta lee-la ma fa sɩ hɛ a ŋaa yosi. Nɩdoho deeŋ ka walɩmɛ dɩ ʋ lɩɩsɛma wombii-la ma TƖƖNA Wɩa sɩ dagɛma lɛ nɛ. Má kpʋ nɩɩ-la a giri wʋbɔŋ-la ta ma tʋɔŋ.

⁶ Dɩ ŋ naambie tɩtɩa koo ŋ bie koo ŋ tolo koo ŋ hachooluŋ koo ŋ nandɔŋ-fɩɛmɩŋ nɛ lʋara nyɩsɩŋ a bʋl, “Leŋ dɩ la mʋ a to vesiŋ a pɛ La Tɩɩna lɛ,” vesi-la ma dɩ ma nyɩmmaba kʋŋkala ha sɩ bɩ to aŋ ka,

⁷ nɩalɩŋ sɩ hɔnɔ gollima vesiŋ, dɩ ba kpagɛma koo dɩ ba hɛ dɩ-bolii nɛ,

⁸ sɩ́ jegile nɩɩ ʋ teeŋ, sɩ́ sɛɩ a pʋ, a sɩ́ ʋ nisusuŋ fá a gbaa tɔ wɩɩ-la.

⁹ Ʋ maga dɩ ŋ kpʋʋ nɛ. Ŋ nɛ maga dɩ ŋ laa sɩpaaŋ yagʋ arɩ tabɩɩŋ ka dɩ nɩaa na kʋʋ pɛ.

¹⁰ Má yagʋ kpʋ arɩ tabɩaa, bɛɛ wɩaa ʋʋ walɩmɛ dɩ ma vɩa ma TƖƖNA Wɩa niiŋ nɛ, ʋ nɛ kɛmma lɩɩ Ijipiti tinteeŋ lɛ, lee-la ma fa sɩ hɛ a ŋaa yosi.

¹¹ Dɩ ma nɛ kpʋ nɩɩ-la dɩ Iziral tɩŋŋaa kala nɩɩ, fawʋllʋŋ jaŋ kɛmba. Ba kʋŋkala maachie bɩra bɩ jaŋ ŋaa wʋbɔŋ-la doho.

¹² Dɩ ma nɛ hɔŋ tasɩ-la lɛ La TƖƖNA sɩ joŋo pɩma, a nɩɩ

¹³ dɩ nɩbɔŋŋɔɔ lɩɩ ma tʋɔŋ a nyɩsɛ nɩaa dɩ ba mʋ to vesiŋ, vesi-la ma ha sɩ bɩ to aŋ ka,

¹⁴ má hɛ doluŋ aŋ beŋ wɩɩ-la tʋɔŋ woruŋ a na, dɩ ma nɛ kʋ na dɩ wʋlɔrʋ-la sɛnɛ ŋaa wʋtɩtɩɩ,

¹⁵ má chei taŋ-la kala, a kpʋ ʋ nɩaa arɩ ba pʋsʋŋ kala.

¹⁶ Má paa taŋ-la tɩŋŋaa dʋa kala a kaa mʋ bil taŋ-la tʋtʋɔbaanɩŋ, a nyɩgɛ ba kala dɩ ba ŋaa kʋnyɩgaa Wɩɩsʋlʋŋ a pɩ ma TƖƖNA Wɩa. Taŋ-la maga dɩ ʋ pɩŋ jikpeeŋ nɛ a kaa mʋ wuu, ma bɩra sɩ́ ʋ paa saa.

¹⁷ Ma pʋpɔ má sɩ́ taŋ-la kɩalɩŋ kʋŋkala La TƖƖNA sɩ sɩ ma nyɩgɛ joŋ, ŋɩɩ nɛ ma TƖƖNA baaŋ-la ʋ sɩ faasa na ma nyuŋ jaŋ tuu tinteeŋ ka dɩ ʋ fá ma nenige. Ʋ jaŋ fá ma nenige a leŋ dɩ ma pʋŋ arɩ ʋ sɩ hɛ niiŋ a pɩ ma naabalɩmaba ŋɩɩ,

¹⁸ dɩ ma nɛ to ʋ niiŋ a ŋɩŋaa wɩalɩŋ kala mɩ sɩ dagɛma jɩnɩŋ, wɩalɩŋ sɩɩ tɔrɛ ʋ tʋɔŋ.