Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

MOSIS BƖRA WULLI WƖA WOMBIIŊ 12 - WƖA TENIŊ


Dɩ-bala nɛ maga dɩ ma chʋɔlɛ Wɩa

1 Wombiee deemba arɩ niiriŋ deemba nɛ maga dɩ ma fɩɛlɛ ma sɩaa a tuto, bʋa-la kala lɛ ma sɩ jaŋ hɔŋ tintee-la lɛ La TƖƖNA sɩ ŋaa ma naabalɩmaba Wɩa sɩ joŋo pɩma.

2 Tinteye-la kala ma sɩ yuo dii, má chei ba vʋɩyaa dɩ-kpaaraa kala, kɩalɩŋ sɩ hɛ peelee nyuŋ arɩ dundolluŋ arɩ tɩɩsɩŋ bʋbʋɔŋ.

3 Má yɛrɛ ba vʋɩyaa korunuŋ arɩ ba vesiŋ tabɩaa, aŋ nyɩgɛ ba vene-la ba sɩɩ yɩrɛ Asɩra daasɩŋ. Má chei ba tɔŋŋɔɔ kala, dɩ ba yɩraa lɛl lere-la.

4 Ma pɔ má sɩ́ ŋɩɩ nɩalɩŋ sɩ to aa kpaarɛ ba vesiŋ to a zil ma TƖƖNA Wɩa.

5 Ama ʋ maga dɩ ma-na mʋ lee-la ma TƖƖNA Wɩa sɩ jaŋ lɩɩsɛ ma doho doho kala tʋɔŋ, dɩ ma zizilu nɩmɛ.

6 Nɩmɛ nɛ ma jaŋ kɛŋ ma kʋnyɩgaa Wɩɩsʋlʋŋ kɩaa kaa mʋ arɩ Wɩɩsʋlʋŋ kɩaa dɔnsʋŋ, kpaalɩŋ fii-la sɩ ŋaa La TƖƖNA kʋa arɩ Wɩɩsʋlʋŋ-la ma sɩ yie kaa je a zaarɛ La TƖƖNA sɩpaaŋ, ma Wɩɩsʋlʋŋ kɩalɩŋ ma sɩ yie hɛ niiŋ dɩ ma joŋo pɩ La TƖƖNA, arɩ ma tʋɔtɔrɛ Wɩɩsʋlʋŋ kɩaa a pɛ ma pʋsʋŋ bii-bumbumba lɛ.

7 Nɩmɛ nɛ ma dɩ ma dɩa nɩaa jaŋ dii kɩalɩŋ ma TƖƖNA Wɩa sɩpaaŋ, aŋ jʋɔsɛ kɩalɩŋ kala ma sɩ kɛnɛ lɛ, bɛɛ wɩaa ma TƖƖNA Wɩa nɛ pɛ ma lɛ ma naba.

8 Ma bɩ maga dɩ ma ŋɩŋaa wɩaa arɩ la sɩɩ ŋaa ŋɩɩ jɩnɩŋ. Nʋʋkala ka ŋaa wɩɩ-la ʋ sɩ bene dɩ ʋ zɔmɔ nɛ,

9 a tɩŋ ma ha sɩ bɩ tintee-la yie, lee-la ma sɩ jaŋ jʋʋ a na wiese aŋ laa dʋa-la ma TƖƖNA Wɩa sɩ jaŋ joŋo pɩma.

10 Dɩ ma nɛ chol Jɔdaŋ fuo-la, ma TƖƖNA Wɩa jaŋ leŋ dɩ ma jʋʋ tintee-la a hɔŋ nɩmɛ. Ʋ jaŋ lɩɩsɛma ma dʋndɔŋŋɔɔ nɩsɩŋ lɛ, dɩ ma hɔŋ nɩmɛ sɔm.

11 Dɩ ma nɛ jʋʋ tintee-la dɩ ma TƖƖNA Wɩa lɩɩsɛ lee-la ʋ sɩɩ chɛ dɩ ma zizilu, nɩmɛ nɛ ma jaŋ kɛŋ Wɩɩsʋlʋŋ kɩalɩŋ kala mɩ sɩ dagɛma kaa mʋ. Ma kʋnyɩgaa Wɩɩsʋlʋŋ arɩ ma Wɩɩsʋlʋŋ kɩaa dɔnsʋŋ arɩ ma kpaalɩŋ fii-la sɩ ŋaa La TƖƖNA kʋa arɩ Wɩɩsʋlɩɩ-la ma sɩ yie kaa je a zaarɛ La TƖƖNA sɩpaaŋ arɩ ma Wɩɩsʋlʋŋ kɩalɩŋ ma sɩ yie hɛ niiŋ dɩ ma joŋo pɩ La TƖƖNA.

12 Nɩmɛ nɛ ma jaŋ gbieli ma TƖƖNA Wɩa sɩpaaŋ. Ma dɩ ma biiriŋ arɩ ma dɩa tɩntɩnnaa arɩ Levi doho nɩalɩŋ sɩ hɛ ma tasɩŋ lɛ. Ma jɩma, ba bɩ tinteeŋ kpaalɩŋ kɛnɛ ma tʋɔŋ.

13 Ma pɔ má sɩ́ ma kʋnyɩgaa Wɩɩsʋlʋŋ ŋaa lee na-kala ma sɩ cho.

14 Má ŋaa ma Wɩɩsʋlɩɩ kala dɩ-bala, lee-la La TƖƖNA sɩ jaŋ lɩɩsɛ ma doho kala tʋɔŋ. Nɩmɛ nɛ maga ma ŋɩŋaa wɩalɩŋ kala mɩ sɩ dagɛma.

15 Ama lee na-kala ma sɩ hɛ, ma jaŋ wuo kpʋ pʋsʋ-la La TƖƖNA sɩ pɛ ma lɛ ma na a chaŋ nammɩa magɛ ŋɩɩ kala ma sɩɩ chɛ. Nɩalɩŋ sɩ kɛŋ disiniŋ arɩ nɩalɩŋ sɩ bɩ disiniŋ kɛnɛ Wɩa teeŋ kala jaŋ wuo chaŋ, a nagɛ ma sɩ yie chaŋ tɛhɩɩ arɩ aamaa ŋɩɩ.

16 Ama má sɩ́ pʋsʋ-la chalɩŋ dii, ma chagɛ ʋ kala ta tinteeŋ.

17 Ma sɩ yie kɛŋ ma kɩaa kpaa leree fii a joŋ kʋbala-la a pɩ La TƖƖNA, a lɩɩ ma mɩaa lɛ koo ma tɩɩnɛnɛɛ sɩnɩŋ lɛ, koo ma nʋʋŋ lɛ koo ma pʋsʋŋ bii-bumbumba lɛ, koo ma tʋɔtɔrɛ Wɩɩsʋlʋŋ lɛ koo kɩalɩŋ ma sɩ kaa lɩɩsɛ niiri-la ma sɩ hɛ La TƖƖNA teeŋ koo Wɩɩsʋlɩɩ-la ma sɩ yie kaa je a zaarɛ La TƖƖNA sɩpaaŋ, ma bɩ maga dɩ ma diiba ma tasɩŋ lɛ.

18 Ʋ maga dɩ má kɛmba mʋ lee-la ma TƖƖNA Wɩa sɩ jaŋ lɩɩsɛ dɩ ma mʋ a zizilu nɛ, a diiba ʋ sɩpaaŋ, ma dɩ ma biiriŋ ma tɩntɩnnaa arɩ Levi doho nɩalɩŋ sɩ hɛ ma tasɩŋ lɛ. Ʋ maga dɩ má gbieli ma TƖƖNA Wɩa sɩpaaŋ a tɩŋ ʋ sɩ pɛ ma lɛ ma tɩntɩmɩɩ-kala lɛ.

19 Má fɩɛlɛ ma sɩaa, a sɩ́ Levi doho nɩalɩŋ sɩ hɛ ma tasɩŋ lɛ vɩa ta bʋa-la kala lɛ ma sɩ jaŋ hɔŋ tintee-la lɛ.

20 Dɩ ma TƖƖNA Wɩa nɛ kɛŋ ma tinteeŋ jallɛ arɩ ʋ sɩ hɛ niiŋ ŋɩɩ pɩma, dɩ nammɩa hɩɛnɩŋ kɛmma, ma jaŋ wuo chaŋ a magɛ ŋɩɩ kala ma sɩɩ chɛ.

21 Dɩ lee-la ma TƖƖNA Wɩa sɩ lɩɩsa dɩ ma zizilu nɛ faasa bol arɩ ma dɩɩsɩŋ, ma jaŋ wuo kpʋ pʋsʋ-la La TƖƖNA sɩ joŋo pɩma ma tasɩŋ lɛ a chaŋ a magɛ ŋɩɩ kala ma sɩɩ chɛ arɩ mɩ sɩ dagɛma ŋɩɩ.

22 Ma jaŋ wuo chamba arɩ ma sɩɩ chaŋ tɛhɩɩ koo aamɩŋ ŋɩɩ. Nɩalɩŋ sɩ kɛŋ disiniŋ Wɩa teeŋ arɩ nɩalɩŋ sɩ bɩ disiniŋ kɛnɛ Wɩa teeŋ kala jaŋ wuo chaŋ.

23 Ama ma pʋpɔ má sɩ́ pʋsʋ-la chalɩŋ dii, bɛɛ wɩaa chalɩŋ nɛ ŋaa pʋsʋ-la mɩɩsɩŋ. Ma saa bɩ maga dɩ ma chaŋ ba nammɩa arɩ ba mɩɩsɩŋ kala.

24 Ʋ bɩ maga dɩ ma dii chal-la. Má joŋo bɩsa ta.

25 Dɩ ma nɛ bɩ chalɩŋ ka dii, La TƖƖNA tʋɔŋ jaŋ tɔrɛ ma nyuŋ, dɩ wɩaa vɛŋ woruŋ a pɩ ma dɩ ma doho nɩaa kala.

26 Ama ʋ maga dɩ má kɛŋ kɩalɩŋ kala sɩ ŋaa La TƖƖNA kɩaa, arɩ kɩalɩŋ kala ma sɩ hɛ niiŋ dɩ ma joŋo pʋ a mʋ lee-la ʋ sɩ jaŋ lɩɩsɛ dɩ ma zizilu nɛ.

27 Má kɛŋ ma kʋnyɩgaa Wɩɩsʋlʋŋ pʋna nammɩa arɩ ʋ chalɩŋ kaa mʋ ma TƖƖNA Wɩa koru-la teeŋ. Ma Wɩɩsʋlʋŋ pʋsʋŋ kala chalɩŋ maga dɩ má joŋo bɩsa wurisi La TƖƖNA koru-la nɛ. Ama, ma jaŋ wuo chaŋ ba nammɩa-na.

28 Má fɩɛlɛ ma sɩaa a tuto wɩalɩŋ kala mɩ sɩ dagɛma, dɩ wɩaa vɛŋ woruŋ a pɩ ma dɩ ma doho bʋa na-kala lɛ, bɛɛ wɩaa maa ŋaa wɩalɩŋ sɩ zɔmɔ a tʋtɔrɛ ma TƖƖNA Wɩa tʋɔŋ nɛ.

29 Ma Tɩɩna Wɩa jaŋ chei tinteye-la kala nɩaa sɩ hɛ tintee-la lɛ ma sɩɩ mʋ dɩ ma tɩɩ. Ama dɩ ma nɛ kiriba ta ba tintee-la lɛ aŋ hɔŋ nɩmɛ,

30 ma pʋpɔ dɩ má sɩ́ chɩchɛ dɩ ma jɩŋ ŋɩɩ nɩalɩŋ sɩ to a kpʋkpaarɛ ba vesiŋ, a bʋl ma ma jaŋ to ŋɩɩ tɩtɩa a zil ma Wɩa.

31 Má bɩ maga dɩ má zil ma TƖƖNA Wɩa ŋɩɩ nɩalɩŋ sɩɩ zil ba vesiŋ. Dɩ ba nɩɩ kpaarɛ ba vesiŋ, ba yie ŋaa wɩalɩŋ sɩ bɩ bana kɛnɛ a kɩkɩsɛ nɛ La TƖƖNA teeŋ. Ba yie wuo joŋ ba biiriŋ a nyɩga pɩ ba vesiŋ.

32 Má hɛ doluŋ aŋ to wɩalɩŋ kala mɩ sɩ dagɛma, ma pʋpɔ má sɩ́ wɩɩ lɩɩsa ta a sɩ́ wɩɩ ma kaa pɛ.

©Ghana Institute of Linguistics Literacy and Bible Translation 1984, 2014

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ