DANƖƐL 8 - WƖA TENIŊ

Danɩɛl duoso na pie-bele arɩ bʋʋna

¹ Bɛlɩsaza sɩ dii kuoruŋ, ʋ jɩ-tori lɛ nɛ, mɩ-na Danɩɛl bɩra na wɩaa a nagɛ duosoo tʋɔŋ, bumbuŋ duoso-la harɩŋ lɛ.

² Wɩalɩŋ tʋɔŋ, mɩ na mɩ tɩtɩa dɩ mɩ hɛ tabal-la ba sɩ saa kɛrɛ golli ba sɩɩ yɩrɛ Susa sɩ hɛ Ɛlam tinteeŋ lɛ. Mɩ na dɩ mɩ chɩŋ fuo-la ba sɩɩ yɩrɛ Ʋlaɩ sɛmɛ nɛ.

³ Ŋɩɩ nɛ mɩ beŋ a na pie-bele mɩ sɩpaaŋ dɩ ʋ chɩŋ fuo-la sɛmɛ a kɛŋ nyil-duduosuŋ balɩa, nyile-la sɩ to harɩŋ nyʋ waa kɩɩ bumbuŋ kʋa.

⁴ Mɩɩ beŋ ŋɩɩ nɛ ka pie-bele-la tʋɔra mʋ wɩɩjʋʋlʋŋ dɩɩrɩŋ, wɩɩpɔsʋŋ nagʋa dɩɩrɩŋ arɩ wɩɩpɔsʋŋ nadiiŋ dɩɩrɩŋ. Pʋna kala tuo a wuo chemu, kʋŋ ma bɩ ba wuo laa ta ʋ nɩsɩŋ lɛ. Ʋ ŋaa ʋ tʋɔtɔrʋŋ nɛ, a bɩrɩmɛ geriwoŋŋu.

⁵ Mɩ sɩ kɛŋ wɩɩŋ deeŋ a bɩbɩɩnɛ, dɩ gbuŋgbogo guu lɩɩ wɩɩjʋʋlʋŋ dɩɩrɩŋ. Nyil-duo kʋbala hɛ ʋ sɩaa pɛgɛ, a tʋɔra golli dʋnɩa kala, ka ʋ naasɩŋ bɩ tinteeŋ dige.

⁶ Ʋ na baanɩŋ kɩŋkɛŋ a tʋɔrɛ chaasɛ pie-bele-la mɩ fa sɩ na dɩ ʋ chɩŋ fuo-la sɛmɛ a kɛŋ nyilliŋ balɩa.

⁷ Mɩ na dɩ ʋ chaga kɛŋ pie-bele-la arɩ baanɩŋ a yɩ ʋ nyilli-la balɩa bori. Pie-bele-la bɩra bɩ doluŋ kɛnɛ dɩ ʋ chɩna chagʋ. Gbuŋgbogo-la yɩʋ a lo tinteeŋ, a nʋɔsʋ woruŋ, ka kʋŋkala tuo dɩ ʋ laa pie-bele-la ta bʋʋŋ-la nɩsɩŋ lɛ.

⁸ Gbuŋgbogo-la bɩrɩmɛ geriwoŋŋu, arɩ ʋ doluŋ sɩ yʋga ma kala, ama ba ha yɩ ʋ ma nyil-duo-la bori nɛ. Ka nyil-duoruŋ banɛsɛ mɩɩra nyʋ nyile-la leriŋ. Ba kʋŋkala chaasɛ dʋnɩa loŋgorunu-la banɛsɛ dɔŋɔ.

⁹ Nyilli-la banɛsɛ dɔŋɔ lɛ nyil-bie nyʋ a waa a kɛŋ doluŋ a chaasɛ wɩɩpɔsʋŋ nadiiŋ dɩɩrɩŋ, wɩɩpɔsʋŋ arɩ Iziral tɩŋŋaa tintee-zɔŋ-la.

¹⁰ Nyil-bie-la waa ŋɩɩ nɛ halɩɩ a jɩla yi wɩa-nyuŋ a yigi wɩa-nyuŋ kɩaa arɩ chɛnwʋlaa dɔnsʋŋ lo tinteeŋ a nʋɔsɛba.

¹¹ Ʋ paala kɛŋ ʋ tɩtɩa yʋgɛ arɩ ʋ nɛ Wɩa, a leŋ ba bɩra bɩ tapʋlɩɩ kala Wɩɩsʋlʋŋ pʋsʋŋ kpʋa a ŋɩŋaa Wɩɩsʋlʋŋ. Ʋ ŋaa ŋɩɩ nɛ a leŋ Wɩa dɩɩ-bal-la kɛŋ disiniŋ.

¹² Nyil-bie-la sɩ bɩ sɛyɛ ŋɩɩ, Wɩa nɩaa bɩra bɩ tapʋlɩɩ kala Wɩɩsʋlʋŋ pʋsʋŋ wuo kpʋ a ŋɩŋaa Wɩɩsʋlʋŋ. Wɩɩkala nyil-bie-la sɩɩ ŋaa wasɛ woruŋ, ʋ leŋ ba joŋ wʋtɩtɩɩ yuo ta tinteeŋ lɛ.

¹³ Ŋɩɩ nɛ mɩ nɩɩ dɩ Wɩa tɩndaaraa ka bʋl wɩaa, dɔŋɔ pɩɛsɛ ʋ dɔŋɔ, “Ɛɛ nɛ wɩaa deemba mɩ sɩ na a nagɛ duosoo tʋɔŋ jaŋ diene magɛ aŋ na ŋaa? Ɛɛ nɛ wʋbɔŋ-la sɩ leŋe ba bɩra bɩ pʋsʋŋ kpʋ ŋaa Wɩɩsʋlʋŋ tapʋlɩɩ kala jaŋ ŋaa a diene magɛ? Ɛɛ nɛ ba jaŋ ŋaa disiniŋ hɛ Wɩa dɩɩ-balɩŋ lɛ aŋ nʋɔsɛ Wɩa nɩaa a diene magɛ?”

¹⁴ Mɩ nɩa dɩ Wɩa tɩndaara-la dɔŋɔ ma bʋla, “Ʋ jaŋ giri pʋsʋŋ kpʋ ŋaa Wɩɩsʋlʋŋ Wɩa dɩɩ-balɩŋ lɛ ŋɩɩ chʋchʋɔŋ arɩ dɩdaanɩŋ naansɩɩŋ bʋɩ balɩa arɩ zɔɔ-batori. Ʋ ŋɩɩ harɩŋ nɛ, ba jaŋ pɩɩsɛ Wɩa dɩɩ-bal-la disiniŋ ta aŋ-na joŋo hɛ Wɩa nɩsɩŋ lɛ.”

Duoso-la bʋbʋɔŋ

¹⁵ Mɩ-na Danɩɛl fa sɩ na wɩalɩŋ a nagɛ duosoo tʋɔŋ a wʋwalɩmɛ dɩ mɩ jɩŋ ʋ bʋbʋɔŋ, kʋŋ guu kʋ chɩŋ mɩ sɩpaaŋ a nagɛ nuhuobiine.

¹⁶ Ka mɩ nɩɩ yikoro dɩ ʋ nagɛ nuhuobiine yikoro a lɩɩ Ʋlaɩ fuo-la lɛ aa yɩrɛ, “Gebiral, dagɛ baala deeŋ wɩalɩŋ ʋ sɩ na a nagɛ duosoo tʋɔŋ bʋbʋɔŋ.”

¹⁷ Gebiral sɩ kʋ kpagɛ lee-la mɩ fa sɩ chɩna, fawʋllʋŋ faasa kɛmmɛ mɩ tele chu. Ʋ bʋl, “Nuhuobiiŋ, jɩŋ arɩ wɩalɩŋ ŋ sɩ na a nagɛ duosoo tʋɔŋ ka dagɛ dʋnɩa dɩdɛrɩŋ wɩaa nɛ.”

¹⁸ Ʋ fa sɩɩ bʋl wɩaa mɩ teeŋ ŋɩɩ, mɩ kpaŋa pɩŋ nɛ mɩ sɩaa chu tinteeŋ. Ŋɩɩ nɛ ʋ kɛmmɛ chʋʋlɛ mɩ sii chɩŋ.

¹⁹ Ʋ bʋl, “Mɩɩ chɛ mɩ bʋl wɩɩ-la sɩ jaŋ ŋaa nɛ pɩŋ bʋa-la lɛ Wɩa sɩ jaŋ na baanɩŋ. Wɩalɩŋ ŋ sɩ na a nagɛ duosoo tʋɔŋ ka dagɛ dʋnɩa dɩdɛrɩŋ wɩaa nɛ.

²⁰ Pie-bele-la ŋ fa sɩ na dɩ ʋ kɛŋ nyilliŋ balɩa nɛ ŋaa Midia arɩ Pɛsɩa kuoroo.

²¹ Gbuŋgbogo-la ma nɛ ŋaa Giriisi tinteeŋ kuoro. Nyil-duo-la ma sɩ chɩŋ ʋ sɩaa pɛgɛ nɛ ŋaa ba kuoru-bumbuŋ.

²² Nyilli-la banɛsɛ sɩ nyʋ nyile-la sɩ boro leriŋ ŋaa kuori-gentisiŋ banɛsɛ nɛ sɩ jaŋ sii dii kuoruŋ a kɛŋ tintee-la kpaa, ama ba bɩ jaŋ kɛŋ doluŋ a magɛ bumbuŋ kuoru-la.

²³ Dɩ ba kuoruŋ nɛ kʋ kpagɛ dɩdɛrɩŋ, dɩ ba wʋbɔŋŋɔɔ ma yʋgɛ kɩŋkɛŋ, kuoru sɩɩ-duo tɩɩna kʋbala wɩaa sɩ hɛyɛ a ŋaa wʋhɛɛrʋ woruŋ jaŋ dii kuoruŋ.

²⁴ Ʋ jaŋ kɛŋ doluŋ woruŋ, ama ʋ tɩtɩa kʋlʋŋ doluŋ dee. Ʋ jaŋ chaasa chei leriŋ, dɩ wɩɩ na-kala ʋ sɩɩ ŋaa vɛŋ woruŋ. Ʋ jaŋ chei nɩduoruŋ arɩ Wɩa nɩaa.

²⁵ Ʋ jaŋ nyɩsɛ nɩaa a dʋa. Ʋ jaŋ kɛŋ ʋ tɩtɩa arɩ ʋ nɛ kɩɩ kʋŋkala. Dɩ nɩaa nɛ hɔnɔ ta jɩa a bɩɩnɛ wɩɩ bɩbaa jʋʋ, kuoru-la jaŋ cheiba yʋgɛ. Ʋ jaŋ kɛŋ kuoroo kala kuoro yuo yuosuŋ, ama Wɩa jaŋ cheyu dɩ nuhuobiiŋ bɩ pɛ.

²⁶ Wɩalɩŋ ŋ sɩ na a nagɛ duosoo tʋɔŋ tɩgɛ dɩdaanɩŋ arɩ chʋchʋɔŋ Wɩɩsʋlʋŋ kɩalɩŋ lɛ sɛnɛ jaŋ kʋ ŋaa wʋtɩtɩɩ, ama pɔ ŋ sɩ́ bʋla pɩ nʋʋkala, bɛɛ wɩaa ba ŋaa maachie wɩaa nɛ.”

²⁷ Wɩɩŋ deeŋ harɩŋ, mɩ-na Danɩɛl bɛsɩmɛ nɛ a pɩŋ nyanyalaa a yi tapʋlɩa. Ŋɩɩ nɛ mɩ bɩra sii a tɩtɩŋ kuoro tɩntɩŋŋaa. Wɩalɩŋ mɩ sɩ na a nagɛ duosoo tʋɔŋ fa kperimi nɛ. Mɩ fa bɩ ba bʋbʋɔŋ jɩŋ.