DANƖƐL 7 - WƖA TENIŊ

Danɩɛl duoso na baga kɩaa banɛsɛ

¹ Bɛlɩsaza sɩ dii Babɩlɔŋ kuoruŋ, ʋ jɩ-bumbuŋ lɛ nɛ tɩtaŋ kʋbala Danɩɛl pɩŋ a duoso na wɩaa, a ŋmʋnsɛ duoso-la bil.

² Danɩɛl sɩ, “Mɩ duosoo tʋɔŋ tɩtaŋ-la, mɩ na pel-duoŋ sɩ lɩɩ wɩa-nyuŋ kʋ tuu dʋnɩa loŋgorunuŋ banɛsɛ kala a kɛŋ mʋgʋ-balɩŋ vuugi.

³ Baga kɩaa kʋbalaa banɛsɛ sɩ bɩ dɔŋɔ naga, lɩɩ mʋgʋ-bal-la tʋɔŋ kʋ lɩɩ.

⁴ Bumbuŋ kʋa nagɛ naachigiŋ aŋ kɛŋ kachuuŋ kɩŋkɛnsɩŋ. Mɩɩ benu ka ʋ kɩŋkɛnsɩ-la kala churi, ka ba kɛnʋ chʋʋla kɩɩ ʋ hui-naasɩŋ balɩa nyuŋ a nagɛ nuhuobiine. Ba joŋ nuhuobiine tʋɔbɩɩnaa hɛ ʋ lɛ.

⁵ Mɩ bɩra na baga kʋlɩamɩŋ, ʋ nagɛ lʋgʋmʋŋ. Ʋ sii chɩŋ ʋ hui-naasɩŋ nyuŋ, aŋ ka ʋ chɛbɛ sɛnpɛrɩ-biee haŋgbelee batori ʋ niiŋ lɛ. Ba bʋla pʋ, ‘Sii chaŋ nammɩa a magɛ ŋɩɩ kala ŋ sɩɩ chɛ.’

⁶ Ʋ ŋɩɩ harɩŋ mɩ bɩra na baga kʋa dɔŋɔ mɩ sɩpaaŋ, ʋ ma nagɛ kpeye. Kɩŋkɛnsɩŋ banɛsɛ hɛ ʋ duguno lɛ a nagɛ diibie kɩaa. Baga kʋa deeŋ fa kɛŋ nyusuŋ banɛsɛ nɛ, ba joŋ doluŋ pʋ dɩ ʋ dii kuoruŋ.

⁷ Mɩ duoso-la tʋɔŋ tɩtaŋ-la mɩ bɩra na baga kʋnɛsɩmɩŋ mɩ sɩpaaŋ, sɩ kɛŋ fawʋllʋŋ a fufugisi nɩaa a kɛŋ doluŋ ma woruŋ. Ʋ nyɩlaa fa ŋaa hɔɔnʋŋ nɛ aŋ barɩmɛ, ʋ kaa dɩŋ ʋ dʋndɔŋŋɔɔ yɛrɛ liliŋ aŋ nʋɔsɛ kʋkaanaa bʋrɩgɛ. Ʋ dɩ bumbuŋ baga kɩalɩŋ kala fa bɩ dɔŋɔ naga. Ʋ fa kɛŋ nyilliŋ fii nɛ.

⁸ Mɩ fa sɩɩ beŋ nyilli-la, nyil-bie kʋbala kʋ lɩɩ ba tʋtʋɔbaanɩŋ, a churi nyilli-la batori sɩ laa sɩpaaŋ hɛ nɩmɛ. Nyile deeŋ fa kɛŋ sɩaa nɛ ba nagɛ nuhuobiine sɩaa a kɛŋ niiŋ a bʋbʋl babiibal wɩaa.

⁹ Mɩ sɩ bene, mɩ na dɩ ba bil kuoru kpasɩnɩŋ. Nɩɩ-la sɩ hɛ nɩmɛ faafaa kala hɔŋ ʋ kuoru kpasa nyuŋ. Ʋ gɛnnɩŋ fa pʋlla nɛ a nagɛ kuŋkunuŋ. Ʋ nyu-pʋnaa ma pʋllɛ a nagɛ pie-pʋnaa. Ʋ kuoru kpasa-la faa chol nyiniŋ nɛ, ʋ gɩrɩŋgɩrɩmba kala ŋaa nyiŋgeliŋ.

¹⁰ Ka nyiniŋ nagɛ fuoŋ a pɩpɛllɛ, a lɩlɩɩ ʋ sɩpaaŋ. Nɩaa bʋɩ-bʋɩba tɩma pʋpʋ, ka nɩaa bʋɩ-bʋɩba fii bʋbʋɔ-bugoo bʋɩ fii chɩŋ ʋ sɩpaaŋ. Ba suomi dɩ ba dii nɩaa sarɩya a suri tenniŋ.

¹¹ Ŋɩɩ nɛ mɩ ha bibeŋ a tɩŋ babiibal wɩalɩŋ nyil-bie-la fa sɩɩ bʋl wɩaa. Mɩ faa beŋ ŋɩɩ nɛ halɩɩ, ka ba kpʋ baga kʋnɛsɛ-la a chei ʋ kala a paa yuo hɛ nyiŋgeliŋ lɛ.

¹² (Ka ba kɛŋ baga kɩalɩŋ dɔnsʋŋ ma doluŋ laa, aŋ leŋ ba ha hɛ ba mɩɩsɩŋ lɛ a magɛ magɩna dɔŋ.)

¹³ Mɩ duoso-la tʋɔŋ tɩtaŋ-la, mɩ bɩra beŋ a na kʋŋ sɩ nagɛ nuhuobiine dɩ ʋ to duoŋ-bɩlɩmbaanaa tʋɔŋ kʋʋ tuu. Ʋ sɩ kʋ kpagɛ nɩɩ-la sɩ hɛ nɩmɛ faafaa kala, ba kɛnʋ kaa mʋ ʋ teeŋ.

¹⁴ Ʋ joŋ doluŋ, yɩrɩŋ arɩ kuoruŋ doluŋ pʋ. Nɩaa kala, tinteyee nɩaa arɩ yikoro na-kala nɩaa dɩdɛnnʋ. Ʋ doluŋ ŋaa dol-la sɩ bɩ dɛrɛ nɛ, ʋ bɩ lɛl. Ʋ kuoruŋ ma ŋaa kʋŋ nʋʋ sɩ bɩ jaŋ wuo chei.

Duoso-la bʋbʋɔŋ

¹⁵ Mɩ-na Danɩɛl sɩ duoso na wɩalɩŋ, ba chaasa walɩmɛmɛ nɛ woruŋ.

¹⁶ Mɩ mʋ nɩalɩŋ fa sɩ chɩŋ nɩmɛ dɔŋɔ teeŋ a pɩɛsʋ dɩ ʋ dagɛ wɩalɩŋ bʋbʋɔŋ tɩtɩa pɩmɛ.” Ŋɩɩ nɛ ʋ dagɛ wɩaa deemba bʋbʋɔŋ pɩmɛ.

¹⁷ Ʋ sɩ, “Baga kɩaa kʋbala-la banɛsɛ ŋaa kuoru-gentisiŋ banɛsɛ nɛ sɩ jaŋ hɛ dʋnɩa lɛ a kɛŋ doluŋ.

¹⁸ Ama Wɩa sɩ kɩɩ kʋŋkala nɩaa jaŋ laa kuorii-la a diiu a kaa mʋ wuu.”

¹⁹ Ŋɩɩ nɛ mɩ chɩchɛ dɩ mɩ jɩŋ baga kʋnɛsɛ-la bʋbʋɔŋ. Ʋ nɛ fa bɩ dɔnsʋ-la naga ŋɩɩ aŋ kɛŋ fawʋllʋŋ kɩŋkɛŋ. Ʋ nyɩlaa ŋaa hɔɔnʋŋ, ʋ naanii-fʋlaa nagɛ kɔlɩɩŋ. Ʋ nɛ dɩŋ ʋ dʋndɔŋŋɔɔ yɛrɛ liŋ aŋ nʋɔsɛ kʋkaanaa bʋrɩgɛ ŋɩɩ.

²⁰ Mɩ fa bɩra chɩchɛ dɩ mɩ jɩŋ nyilli-la fii sɩ hɛ ʋ nyuŋ lɛ arɩ nyile-la ma dɔŋɔ sɩ kʋ lɩɩ bʋbʋɔŋ, ka nyilli-la batori-na churo tel. Nyile-la nɛ kɛŋ sɩaa arɩ niiŋ a bʋbʋl babiibal wɩaa ŋɩɩ.

²¹ Mɩ fa sɩɩ beŋ, mɩ na dɩ nyile-la kɛŋ Wɩa nɩaa yuo laalɩŋ a yuo didiiba,

²² a kaa mʋ yi bʋa-la lɛ Nɩɩ-la sɩ hɛ nɩmɛ faafaa kala sɩ kʋ lɩɩ dii sarɩya a laa pɛ Wɩa sɩ kɩɩ kʋŋkala nɩaa lɛ. Bʋa-la yie nɛ dɩ ba laa kuorii-la dɩ ʋ ŋaa ba kʋŋ.

²³ Wɩɩ-la ʋ sɩ bʋla pɩmɛ nɛ ŋ-la, “Baga kʋnɛsɛ-la ŋaa kuori-gentiŋ-nɛsɛ nɛ sɩ jaŋ dii kuoruŋ dʋnɩa lɛ. Ʋ dɩ kuori-gentisi-la dɔnsʋŋ wɩaa bɩ jaŋ nagɛ dɔŋɔ, ʋ jaŋ kpʋ dʋnɩa nɩaa a nʋɔsɛba bʋrɩgɛ.

²⁴ Nyilli-la fii ŋaa kuoroo fii nɛ sɩ jaŋ lɩɩ kuori-gentine deeŋ lɛ a dii kuoruŋ deeŋ aŋ ka pɩpɩ dɔŋɔ. Ba harɩŋ lɛ kuoro dɔŋɔ ma jaŋ bɩra dii kuoruŋ, ʋ bɩ jaŋ nagɛ faafaa kuorie-la, ʋ jaŋ yuo dii kuoroo batori.

²⁵ Ʋ jaŋ bʋl wɩaa lɩɩ Wɩa sɩ kɩɩ kʋŋkala harɩŋ, aŋ nyagɛ Wɩa nɩaa bil, aŋ wʋwalɩmɛ dɩ ʋ kɛŋ wombii-la Wɩa sɩ bile dɩ ba tuto wɩaa bɩrɩmɛ. Ba jaŋ joŋ Wɩa nɩaa hɛ ʋ nɩsɩŋ lɛ jɩsɩŋ batori arɩ kpaa magɛ dɔŋɔ.

²⁶ Ama Wɩa jaŋ dii ʋ sarɩya, a laa ʋ doluŋ kala a cheyu a kaa mʋ wuu.

²⁷ Ba jaŋ joŋ doluŋ arɩ kuoruŋ yuŋuŋ kala sɩ hɛ dʋnɩa lɛ a pɩ Wɩa sɩ kɩɩ kʋŋkala nɩaa. Ba kuoruŋ doluŋ bɩ jaŋ dɛrɛ. Kuoroo kala sɩ hɛ dʋnɩa lɛ jaŋ to ba niiŋ a tɩma pɩpɩba.”

²⁸ Wɩɩ-la dɩdɛrɩŋ nɛ ŋ-la. Mɩ-na Danɩɛl tʋɔbɩɩnaa walɩmɛmɛ nɛ woruŋ, mɩ sɩaa biri, ka mɩ joŋ wɩɩ-la hɛ mɩ tʋɔŋ lɛ.