DANƖƐL 6 - WƖA TENIŊ

Ba joŋ Danɩɛl hɛ naachigee dɩjʋʋlʋŋ

¹ Daarus beŋ woruŋ aŋ lɩɩsɛ sɩpaalaaraa zɔlɔ arɩ mara ba bibeŋ ʋ tinteeŋ,

² aŋ bɩra lɩɩsɛ nɩhɩasɩŋ batori ba ma bibeŋ sɩpaalaara-la. Danɩɛl nɛ fa ŋaa ba nɩhɩasɩ-la dɔŋɔ. Dɩ sɩpaalaara-la nɛ kɛŋ wɩɩkala, ba yie kaa kʋ bʋla pɩba nɛ, dɩ kuoro wɩaa vɛŋ woruŋ.

³ Danɩɛl tɩntɩŋŋaa nɛ fa lɩɩ sɩɩŋ a kɩɩ ʋ nɩhɩa-dɔsʋ-la arɩ sɩpaalaara-la kala. Ʋ sɩ wuo wɩaa ŋɩŋaa ŋɩɩ, kuoro bɩbɩɩnɛ dɩ ʋ leŋ dɩ ʋ nɛ bibeŋ ʋ tinteeŋ kala.

⁴ Ŋɩɩ nɛ nɩhɩasɩ-la arɩ sɩpaalaara-la tɩŋ ŋɩɩ wɩaa a wʋwalɩmɛ dɩ ba na dɩ Danɩɛl chei wɩɩ ʋ tɩntɩŋŋaa lɛ, ama ba bɩ wuo na wɩɩ. Ba bɩ ʋ wʋcheeli kala na, bɛɛ wɩaa ʋ fa kɛŋ wʋtɩtɩɩ, a bɩ nɩaa ka gɩrɩmɛ a kɛŋ sɩɩfɩɛsɩŋ ʋ tɩntɩŋŋaa lɛ.

⁵ Ŋɩɩ nɛ nɩalɩŋ bʋla pɩ dɔŋɔ, “La bɩ jaŋ wuo na wɩɩkala a tɩgɛ Danɩɛl deeŋ lɛ, see ʋ Wɩɩ-chʋɔlʋŋ wombiiŋ lɛ.”

⁶ Ŋɩɩ nɛ nɩhɩasɩ-la arɩ sɩpaalaara-la sii hɛ dɔŋɔ lɛ a mʋ kuoro Daarus teeŋ a bʋl, “Kuoro, a leŋ dɩ ŋ mɩɩsɩŋ duomi.

⁷ La-na ŋ tinteeŋ nɩhɩasɩŋ, sɩpaalaaraa, nɩalɩŋ sɩɩ chagɩlɩŋ arɩ ŋ tɩntɩnnɩ-hɩasɩŋ sɛyɛ nɛ, dɩ ŋ tɔ boŋ a leŋ dɩ ʋ chɩŋ, dɩ nʋʋkala jɩŋ arɩ tapʋlaa mara arɩ fii pɛgɛ, nɩɩ-la kala nɛ chʋɔlɛ vene kala koo nuhuobiiŋ dɩ ŋ-na kuoro dʋndʋŋa dee, dɩ ba joŋ tɩɩna yuo hɛ naachigee dɩjʋʋlʋŋ.

⁸ Kuoro, pɩ wombiiŋ dɩ ba tɔ boŋ-la aŋ ŋmʋnsa bil dɩ nʋʋ sɩ wuo kaa bɩrɩmɛ, a nagɛ Medis arɩ Pɛsɩa tɩŋŋaa wombiee ba sɩ bile dɩ ba tuto sɩ dagɛ ŋɩɩ.”

⁹ Ŋɩɩ nɛ kuoro Daarus tɔ boŋ a leŋ ba ŋmʋnsa bil.

¹⁰ Danɩɛl sɩ nɩa dɩ ba tɔ boŋ-la nɛ a ŋmʋnsa bil nʋʋkala jɩŋ, ʋ mɩɩra mʋ dɩa a jɩl ʋ lusuŋ nyuŋ dɩa, lee-la tokoroba sɩ suroo chaasɛ Jerusalɛm dɩɩrɩŋ. Nɩmɛ nɛ ʋ yie kpirime chʋɔlɛ Wɩa naansɩɩŋ butori tapʋlɩɩ kala, a lɔllʋ arɩ ʋ fa sɩ vɛnɛɛ ŋaa ŋɩɩ.

¹¹ Ŋɩɩ nɛ nɩalɩŋ sii hɛ dɔŋɔ a mʋ, a na Danɩɛl dɩ ʋ chʋɔlɛ Wɩa a sʋsʋlʋ dɩ ʋ pɛ ʋ lɛ.

¹² Ŋɩɩ nɛ ba mʋ kuoro teeŋ a pɩɛsʋ wɩaa a mʋ tɩgɛ boŋ-la ʋ sɩ tɔ lɛ. Ba sɩ, “Ŋ bɩ boŋ tɔ a leŋ nʋʋkala jɩŋ arɩ tapʋlaa mara arɩ fii pɛgɛ nʋʋkala nɛ chʋɔlɛ vene koo nuhuobiiŋ kala dɩ ŋ-na kuoro dʋndʋŋa dee, dɩ ba joŋu yuo hɛ naachigee dɩjʋʋlʋŋ?” Kuoro bʋl, “Boŋ-la chaasa chɩŋ nɛ a nagɛ Medis arɩ Pɛsɩa tɩŋŋaa wombiee ba sɩ bile dɩ la tuto, nʋʋ bɩ jaŋ wuo kɛmba bɩrɩmɛ sɩ dagɛ ŋɩɩ.”

¹³ Ŋɩɩ nɛ ba bʋla pɩ kuoro, “Danɩɛl, Juda nɩalɩŋ ba sɩ yuo kɛsɛ dɔŋɔ vɩa ŋ-na kuoro niiŋ nɛ, a bɩ boŋ-la ŋ sɩ tɔ a leŋ ba ŋmʋnsa bil kaa tɩtɩŋ. Ʋ ha yie chʋɔlɛ Wɩa naansɩɩŋ butori nɛ tapʋlɩɩ kala.”

¹⁴ Kuoro sɩ nɩɩ wɩɩŋ deeŋ, ʋ tʋɔŋ faasa chei, ʋ kɛŋ ʋ tʋɔŋ dɩ ʋ laa Danɩɛl ta. Ʋ chɛ wombiiŋ ʋ sɩ jaŋ to laa Danɩɛl ta halɩɩ, wɩa tuu jʋʋ.

¹⁵ Ŋɩɩ nɛ nɩalɩŋ bɩra sii hɛ dɔŋɔ a mʋ kuoro teeŋ a bʋla pʋ, “Kuoro, ŋ jɩma Medis arɩ Pɛsɩa tɩŋŋaa wombiiŋ lɛ, dɩ kuoro nɛ tɔ boŋ koo a bʋl wɩɩ bil, nʋʋkala bɩ jaŋ wuo kɛnʋ bɩrɩmɛ.”

¹⁶ Kuoro pa wombiiŋ ba kɛŋ Danɩɛl kɔ a joŋu yuo hɛ naachigee dɩjʋʋlʋŋ. Ŋɩɩ nɛ kuoro bʋla pʋ, “Danɩɛl, a leŋ dɩ ŋ Wɩa-la ŋ sɩ tɩma pɩpa bʋa kala laaŋ ta.”

¹⁷ Ba sɩ ŋaa ŋɩɩ, ba bilimi tabɩɩŋ kʋ tɔ naachigee dɩ-jʋʋlɩɩ-la niiŋ. Ka kuoro joŋ ʋ nenii-pɩrɩŋ arɩ ʋ nɩhɩasɩŋ nenii-pɩraa a magɩlɛ, dɩ nʋʋkala sɩ́ wuo kʋ pɛ Danɩɛl lɛ a lɩɩsʋ.

¹⁸ Ŋɩɩ nɛ kuoro mɩɩra mʋ dɩa. Tɩtaŋ-la kala ʋ bɩ kɩaa die a bɩ leŋe nʋʋ kʋ gbieli ʋ sɩpaaŋ. Ʋ bɩ doŋ ma wuo pɩŋ.

¹⁹ Sɩɩpʋʋraa kuoro sii fá mʋmʋ naachigee dɩ-jʋʋlɩɩ-la.

²⁰ Ʋ sɩ kʋ kpagɛ naachigee dɩ-jʋʋlɩɩ-la, ʋ chele yɩrɛ, “Danɩɛl, Wɩa sɩ weye tɩntɩnnʋ, ŋ Wɩa-la ŋ sɩɩ chʋɔlʋ bʋa na-kala wuo laaŋ ta nɛ naachigee deemba niiŋ lɛɛ?”

²¹ Ŋɩɩ nɛ Danɩɛl bʋl, “Kuoro, a leŋ dɩ ŋ mɩɩsɩŋ duomi.

²² Mɩ Wɩa tɩŋ ʋ tɩndaara nɛ, ʋ kʋ tɔ naachige-la niiŋ. Ba bɩ mɩ chaŋa, bɛɛ wɩaa ʋ na dɩ mɩ bɩ wɩɩ cheye, a bɩ wɩɩ cheye ŋ-ma Kuoro lɛ.”

²³ Kuoro tʋɔŋ faasa tɔrɛ, ʋ ŋaa ba lɩɩsɛ Danɩɛl naachigee dɩ-jʋʋlɩɩ-la. Ba sɩ lɩɩsʋ, ba bɩ naawɩɩl kala na ʋ lɛ, bɛɛ wɩaa ʋ fa laa ʋ Wɩa dii nɛ.

²⁴ Kuoro ŋaa ba kɛsɛ nɩalɩŋ sɩ nyɩɛ wɩaa pɩ Danɩɛl, a kɛsɛ ba haalaa arɩ ba biiriŋ kala kɔ a jomba yuo hɛ naachigee dɩ-jʋʋlɩɩ-la lɛ. Ba paala bɩ tinteeŋ tele, ka naachige-la fɩla jɩlba a kɛmba pʋɔsɛ a chamba, a yɛrɛ ba haŋgbelee kala.

²⁵ Ŋɩɩ nɛ kuoro Daarus ŋmʋnsɛ teniŋ a pɩ nɩaa kala, tinteyee nɩaa arɩ yikoro na-kala nɩaa sɩ hɛ dʋnɩa lɛ a bʋl ŋ-la: Wɩa jaŋ leŋ dɩ ma na ma wʋchɛɛlɛɛ kala.

²⁶ Mɩ hɛ niiŋ nɛ aa pɩ nʋʋ na-kala sɩ hɛ mɩ tinteeŋ sɛmɛ kala lɛ, arɩ ʋ maga dɩ ma fá Danɩɛl Wɩa nɛ a zizilu. Ʋ nɛ Wɩa sɩ weye. Ʋ nɛ hɛ nɩmɛ a kaa mʋ deeŋ deeŋ. Ʋ kuoruŋ bɩ jaŋ kɔ dɩ ʋ tele, ʋ doluŋ bɩ jaŋ dɛrɛ.

²⁷ Ʋ yie lɩɩsɛ nɩaa wɩaa lɛ nɛ, a laaba ta. Ʋ ŋaa wʋmagɩlaa arɩ wʋkpuŋkperisiŋ nɛ Wɩa-jaŋ arɩ tinteeŋ kala lɛ. Ʋ nɛ laa Danɩɛl ta naachigee niiŋ lɛ.

²⁸ Ŋɩɩ nɛ Danɩɛl wɩɩkala vɛŋ woruŋ Daarus arɩ Siirus, Pɛsɩa tɩmma-la kuoruŋ bʋa lɛ.