DANƖƐL 4 - WƖA TENIŊ

Nebukadineza duosi duosoo a tɩgɛ tɩa lɛ

¹ Kuoro Nebukadineza tɩŋ tɩndaarɩŋ a pɩ nɩaa kala, tinteyee nɩaa arɩ yikori doho na-kala nɩaa sɩ hɛ dʋnɩa lɛ a bʋl, “Wɩa jaŋ leŋ dɩ ma na ma wʋchɛɛlɛɛ kala.

² Ʋ ŋaa mɩ nɛ dɩ mɩ bʋl wʋkpuŋkperisi-la arɩ wʋmagɩla-la Wɩa sɩ kɩɩ kʋŋkala sɩ ŋaa pɩmɛ a pɩma.

³ Ʋ wʋmagɩlaa ŋaa wʋbala nɛ, ʋ wʋkpuŋkperisiŋ ma ŋaa wʋduoru. Ʋ kuoruŋ bɩ dɩdɛrɩŋ kɛnɛ, ʋ nɛ kuoro sɩ hɛ nɩmɛ a kaa mʋ wuu.

⁴ Mɩ-na Nebukadineza fa hɛ mɩ kuoru dɩa lɛ nɛ a kɛŋ kɩaa aa nɩɩ sɩma.

⁵ Tɩtaŋ kʋbala mɩ duosi, duoso-la leŋ fawʋllʋŋ kɛmmɛ. Mɩ sɩ pɩŋ mɩ bɔsɔ lɛ, mɩ na wɩaa nɛ sɩ leŋe fawʋllʋŋ kɛmmɛ.

⁶ Ŋɩɩ nɛ mɩ ŋaa ba kɛŋ Babɩlɔŋ wʋjɩnnaa kala kɔ mɩ sɩpaaŋ dɩ ba dagɛ duoso-la bʋbʋɔŋ a pɩmɛ.

⁷ Ba sɩ kɛŋ chichiribee, nɩalɩŋ sɩ yie beŋ chɛnwʋlaa aŋ dɩdagɛ wɩaa, vʋgʋraa arɩ wʋjɩnna-la kɔ, mɩ bʋl duoso-la pɩba, ama ba bɩ wuo dagɛ ʋ bʋbʋɔŋ pɩmɛ.

⁸ Ʋ ŋɩɩ harɩŋ, Danɩɛl kɔ mɩ teeŋ, mɩ bʋl duoso-la pʋ. (Ʋ nɛ ba haa yɩrɛ Bɛlɩtɛsaza, mɩ vene yɩrɩŋ nɛ ba joŋo hɛ pʋ. Vesiŋ doluŋ fa hɛ ʋ lɛ nɛ.)

⁹ Mɩ bʋla pɩ Bɛlɩtɛsaza, chichiribee kuoro, mɩ jɩma vesiŋ doluŋ hɛ ŋ lɛ nɛ, wʋkpuŋkpere kala tuo a hɛɩ pɩŋ. Mɩ duoso nɛ ŋ-la, dagɛ ʋ bʋbʋɔŋ pɩmɛ.

¹⁰ Wɩalɩŋ mɩ sɩ pɩna na arɩ duosoo tʋɔŋ nɛ ŋ-la: Mɩ na tɩa mɩ sɩpaaŋ dɩ ʋ chɩŋ tinteeŋ tʋtʋɔbaanɩŋ. Ʋ fa duomo nɛ woruŋ.

¹¹ Tɩa-la fa waa barɩmɛ nɛ woruŋ aŋ kɛŋ doluŋ ma. Ʋ nyu-gbaŋa jɩla yagɛ wɩa-nyuŋ, dɩ ŋ hɛ dʋnɩa sɛmɛ kala, ŋ jaŋ naʋ.

¹² Ʋ pɩpaarɩŋ fa zɔmɔ, ʋ nɛnɛɛ yʋga magɛ kʋŋkala diiniŋ. Baga kɩaa pɩpɩŋ ʋ fɩɛlɩŋ lɛ, diibiisiŋ sɩsagɛ ʋ naakelee lɛ a saa ba dɛllɩŋ, kʋŋkala na kɩaa didii ʋ lɛ.

¹³ Mɩ sɩ pɩna a duduosi duoso deeŋ ŋɩɩ, mɩ bɩra beŋ a na Wɩa tɩndaara dɩ ʋ lɩɩ Wɩa-jaŋ a kʋʋ tuu.

¹⁴ Ʋ faasa kpɩa goŋ a bʋl, ‘Má keri tɩa-la a kuosi ʋ naakelee, a chɩrɛ ʋ pɩpaarɩŋ a kɛŋ ʋ nɛnɛ-la kala pɩsɛ, dɩ baga kɩalɩŋ sɩ pɩŋ ʋ bʋbʋɔŋ arɩ diibiisi-la sɩ sagɛ ʋ naakelee lɛ viiri.

¹⁵ Má leŋ dɩ ʋ gentine arɩ ʋ naapoloo ha chɩŋ yaŋ tʋɔŋ, dɩ ma kɛŋ chɔrʋmɔɔ ba sɩ kɛŋ hɔɔŋ ŋaa arɩ chɔrʋmɔ-la ba sɩ kɛŋ kɔlɩɩŋ ŋaa a vɔɔ. Má leŋ dɩ kuoro deeŋ guoli baga kɩaa tʋɔŋ dʋnɩa lɛ dɩ nyalɩŋ nyala hɛ ʋ lɛ,

¹⁶ dɩ ʋ tʋɔbɩɩnaa bɩrɩmɛ a nagɛ pʋna kɩaa jɩsɩŋ balɩpɛ a sɩ́ nuhuobiine kɩaa nagʋ.

¹⁷ Wɩɩ-la Wɩa tɩndaaraa sɩ heele bʋl nɛ ŋɩɩ, dɩ nɩalɩŋ sɩ kɛŋ mɩɩsɩŋ jɩŋ arɩ Wɩa sɩ kɩɩ kʋŋkala nɛ kɛŋ doluŋ a bibeŋ nuhuobiinee kuoruŋ, a jaŋ wuo jomba pɩ nɩɩ-la kala ʋ sɩ cho dɩ ʋ bibeŋ. Ʋ jaŋ wuo paala jomba pɩ nɩbiisiŋ dɩ ba bibeŋ.’

¹⁸ Duoso-la mɩ-na kuoro Nebukadineza sɩ duoso nɛ ŋɩɩ. Lɛɛlɛ Bɛlɩtɛsaza, dagɛ ʋ bʋbʋɔŋ pɩmɛ, bɛɛ wɩaa wʋjɩnna-la kala sɩ hɛ mɩ tinteeŋ lɛ kʋŋ bɩ wuo dagɛ ʋ bʋbʋɔŋ pɩmɛ. Ama ŋ-na jaŋ wuo, bɛɛ wɩaa vesiŋ doluŋ hɛ ŋ lɛ nɛ.”

Danɩɛl dagɛ duoso-la bʋbʋɔŋ

¹⁹ Ŋɩɩ nɛ Danɩɛl (ba sɩ kaa yɩrɛ Bɛlɩtɛsaza) tʋɔŋ faasa chei a dieni mʋa. Ʋ tʋɔbɩɩnaa leŋ fawʋllʋŋ kɛnʋ. Kuoro bʋl, “Bɛlɩtɛsaza, sɩ́ leŋe dɩ duoso-la koo ʋ bʋbʋɔŋ leŋ dɩ fawʋllʋŋ kɛnɩŋ.” Bɛlɩtɛsaza ma bʋl, “Mɩ nɩhɩaŋ, mɩ fa cho dɩ duoso-la ŋaa nɩalɩŋ sɩ bɛrɩŋ wɩɩ nɛ, dɩ wɩɩ-la duoso-la sɩɩ dagʋ ma ŋaa ŋ dʋndɔŋŋɔɔ lɛ.

²⁰ Tɩa-la ŋ sɩ na dɩ ʋ chaasa waa a barɩmɛ aŋ dol woruŋ, ʋ nyu-gbaŋa jɩla yagɛ wɩa-nyuŋ, dɩ nʋʋ nɛ chɩŋ dʋnɩa sɛmɛ-kala dɩ ʋ naʋ,

²¹ a kɛŋ pɩpaa-zɔŋŋɔɔ, a nɛnɛ yʋga magɛ kʋŋkala diiniŋ. Baga kɩaa pɩpɩŋ ʋ fɩɛlɩŋ lɛ, diibiisiŋ sagɛ ʋ naakelee lɛ a sɩsaa ba dɛllɩŋ.

²² Ŋ-na kuoro nɛ tɩa-la. Ŋ ŋaa nɩbal nɛ aŋ kɛŋ doluŋ ma. Ŋ ballɩŋ jɩla tɩtɩgɛ wɩa-nyuŋ, ŋ doluŋ cheŋ dʋnɩa sɛmɛ kala.

²³ Kuoro, ŋ na Wɩa tɩndaara dɩ ʋ lɩɩ Wɩa-jaŋ kʋʋ tuu aŋ bʋbʋl, ‘Má keri tɩa-la a cheyu, ama má leŋ ʋ gentine arɩ naapoloo sɩ tuu tinteeŋ chɩŋ yaŋ tʋɔŋ dɩ ma kɛŋ chɔrʋmɔɔ ba sɩ kɛŋ hɔɔŋ ŋaa arɩ chɔrʋmɔ ba sɩ kɛŋ kɔlɩɩŋ ŋaa a vɔɔ. Má leŋ dɩ ʋ guoli baga kɩaa tʋɔŋ dɩ nyalɩŋ nyala hɛ ʋ lɛ. Má leŋ dɩ ʋ hɛ nɩmɛ a nagɛ baga kʋŋ halɩɩ jɩsɩŋ balɩpɛ.’

²⁴ Kuoro, duoso-la bʋbʋɔŋ nɛ ŋ-la, wɩɩ-la Wɩa sɩ kɩɩ kʋŋkala sɩ sɩ ʋ jaŋ joŋo ŋaa ŋ-na kuoro sɩ ŋaa mɩ nɩhɩaŋ lɛ nɛ ŋ-la:

²⁵ Ba jaŋ kiriŋ dɩ ŋ lɩɩ nɩaa tʋɔŋ a mʋ guoli baga kɩaa tʋɔŋ. Ŋ jaŋ dii yaŋ a nagɛ nɛŋ, dɩ nyalɩŋ nyala hɛ ŋ lɛ jɩsɩŋ balɩpɛ. Ŋɩɩ nɛ ŋ jaŋ jɩŋ arɩ Wɩa sɩ kɩɩ kʋŋkala nɛ kɛŋ doluŋ a bibeŋ nuhuobiinee kuoruŋ, ʋ jaŋ wuo joŋo pɩ nɩɩ-la kala ʋ sɩ cho.

²⁶ Wɩa tɩndaara sɩ sɩ dɩ ba leŋ tɩa-la gentine arɩ ʋ naapoloo ŋɩɩ, ʋ bʋbʋɔŋ nɛ, Wɩa jaŋ bɩra joŋ ŋ kuoruŋ pɩŋ dɩ ŋ nɛ kʋ jɩŋ arɩ Wɩa sɩ hɛ ʋ jaŋ lɛ nɩɩ beŋ kʋŋkala.

²⁷ Ŋɩɩ wɩaa, kuoro, mɩɩ sʋlʋŋ, sɛɩ wɩɩ-la mɩ sɩ jaŋ dagɛ: Leŋ ŋ wʋbɔmɔ-la ŋaanɩŋ aŋ ŋɩŋaa wɩaa ba bʋa lɛ, a leŋ ŋ nɩbɔŋ wɩalɩŋ aŋ kɛŋ zile nɩalɩŋ ba sɩ nyaga bil lɛ. Ʋ ŋɩɩ nɛ jaŋ leŋ dɩ wɩaa vɛŋ woruŋ pɩŋ.”

Duoso-la kʋ ŋaa wʋtɩtɩɩ

²⁸ Wɩaa deemba kala kʋ ŋaa kuoro Nebukadineza lɛ.

²⁹ Chɛnsɩŋ fii arɩ balɩa harɩŋ, kuoro Nebukadineza gʋgɔllɛ ʋ kuoru dɩa lusuŋ nyuŋ Babɩlɔŋ lɛ,

³⁰ aŋ bʋl, “Bee na taŋ deeŋ ba sɩɩ yɩrɛ Babɩlɔŋ sɩ yʋga magɛ ŋɩɩ, mɩ nɛ kɛŋ mɩ doluŋ saaʋ, ʋ ŋaa mɩ tinteeŋ tabalɩŋ a laa yɩrɩŋ pɩmɛ mɩ gigenni.”

³¹ Ʋ ha bɩ wɩalɩŋ bʋla dɛrɛ dɩ yikoro lɩɩ wɩa-nyuŋ a bʋl, “Kuoro Nebukadineza, wɩɩ-la sɩ jaŋ ŋaa ŋ lɛ nɛ ŋ-la: Mɩ laa ŋ kuoruŋ doluŋ nɛ.

³² Mɩ jaŋ kiriŋ dɩ ŋ lɩɩ nɩaa tʋɔŋ a mʋ guoli baga kɩaa tʋɔŋ. Ŋ jaŋ dii yaŋ a nagɛ nɛŋ jɩsɩŋ balɩpɛ. Ŋɩɩ nɛ ŋ jaŋ jɩŋ arɩ Wɩa sɩ kɩɩ kʋŋkala nɛ kɛŋ doluŋ a bibeŋ nuhuobiinee kuoruŋ. Ʋ jaŋ wuo joŋo pɩ nɩɩ-la kala ʋ sɩ cho.”

³³ Bʋa-la tɩtɩa lɛ nɛ wɩalɩŋ ba sɩ bʋla tɩgɛ Nebukadineza lɛ kʋ ŋaa. Ba kiru ta, ʋ lɩɩ nɩaa tʋɔŋ, a dii yaŋ a nagɛ nɛŋ. Nyalɩŋ nyala hɛ ʋ lɛ halɩɩ, ʋ nyu-pʋnaa waa a nagɛ kachuuŋ pʋnaa, ʋ nenii-fʋlaa ma nagɛ diibie kɩaa.

³⁴ Jɩsɩ-la balɩpɛ harɩŋ, mɩ-na Nebukadineza kɛŋ mɩ nyuŋ je wɩa-nyuŋ, mɩ wʋjɩmɩŋ mɩɩra kɔ mɩ nyuŋ. Ŋɩɩ nɛ mɩ dɛnnɛ Wɩa sɩ kɩɩ kʋŋkala. Mɩ zilu a leŋ ʋ yɩrɩŋ yɩrɛ, ʋ nɛ sɩ hɛ nɩmɛ a kaa mʋ wuu. Ʋ doluŋ bɩ dɩdɛrɩŋ kɛnɛ, ʋ nɛ kuoro sɩ hɛ nɩmɛ a kaa mʋ wuu.

³⁵ Dʋnɩa nɩaa kala bɩ kɩa ŋaa ʋ sɩpaaŋ. Ʋ nɛ kɛŋ doluŋ dɩ ʋ ŋaa wɩɩ-la kala ʋ sɩɩ chɛ Wɩa tɩndaaraa arɩ nuhuobiinee kala lɛ. Nʋʋkala bɩ jaŋ wuo pɔ dɩ ʋ sɩ́ wɩɩ ŋaa koo a pɩɛsʋ: Wʋbɛɛ nɛ ŋ ŋaa ŋ-la?

³⁶ Bʋa-la tɩtɩa lɛ mɩ wʋjɩmɩŋ sɩ mɩɩra kɔ mɩ nyuŋ nɛ, nɩaa ma bɩra zilmi a yɩyɩrɛ mɩ yɩrɩŋ a tɩŋ mɩ kuoruŋ wɩaa. Nɩalɩŋ sɩɩ chagɩlɛmɛ arɩ mɩ nɩhɩasɩŋ chɛ kɛmmɛ, a hollimi mɩ kuoru kpasa nyuŋ. Ŋɩɩ nɛ mɩ yʋga kɩɩ faafaa-la.

³⁷ Lɛɛlɛ mɩ-na Nebukadineza ka dɛnnɛ Wɩa sɩ ŋaa kuoro a hɛ ʋ jaŋ lɛ a yɩyɩrɛ ʋ yɩrɩŋ, bɛɛ wɩaa ʋ ŋaa wɩɩkala ʋ bʋa lɛ nɛ, ʋ wʋŋaalaa kɛŋ wʋtɩtɩɩ. Nɩalɩŋ sɩɩ bigisi ba tɩtɩa lɛ, ʋ yie kɛmba muuri nɛ.