Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

DANƖƐL 2 - WƖA TENIŊ


Nebukadineza duoso

1 Nebukadineza sɩ dii kuoruŋ ʋ jɩ-lɩa lɛ, ʋ duosi duosoo, ba chaasa walɩmʋ woruŋ, ʋ bɩ doŋ wuo pɩŋ.

2 Ŋɩɩ nɛ kuoro yɩrɛ chichiribee, vʋgʋraa, nɩalɩŋ sɩ yie beŋ chɛnwʋlaa aŋ dɩdagɛ wɩaa, arɩ wʋjɩnnaa kala dɩ ba kʋ dagɛ ʋ duoso-la bʋbʋɔŋ. Ba kʋ chɩŋ ʋ sɩpaaŋ.

3 Ʋ bʋla pɩba, “Mɩ duoso nɛ ʋ wʋwalɩmɛmɛ, mɩ saa chɩchɛ dɩ mɩ jɩŋ ʋ bʋbʋɔŋ.”

4 Ŋɩɩ nɛ nɩalɩŋ sɩ yie beŋ chɛnwʋlaa aŋ dɩdagɛ wɩaa kɛŋ Aramek yikoro a bʋla pɩ kuoro, “A leŋ dɩ kuoro mɩɩsɩŋ duomi. La ŋaa ŋ tɩntɩnnaa nɛ, dagɛ ŋ duoso-la pɩla dɩ la dagɛ ʋ bʋbʋɔŋ.”

5 Kuoro bʋla pɩba, “Wɩɩ-la mɩ sɩ chaasa bɩɩna joŋ nɛ ŋ-la: Dɩ ma nɛ bɩ mɩ duoso-la daga aŋ dagɛ ʋ bʋbʋɔŋ ma, mɩ jaŋ leŋ dɩ ba kɛmma keri muno muno aŋ chei ma dɩɩsɩŋ dɩ ba pɩŋ jikpeeŋ.

6 Ama dɩ ma nɛ dagɛ duoso-la pɩmɛ a dagɛ ʋ bʋbʋɔŋ ma, mɩ jaŋ joŋ kɩaa siilima a zilma woruŋ. Ŋɩɩ wɩaa má dagɛ duoso-la aŋ dagɛ ʋ bʋbʋɔŋ ma pɩmɛ.”

7 Ŋɩɩ nɛ ba bɩra bʋl, “Kuoro, la ŋaa ŋ tɩntɩnnaa nɛ, dagɛ ŋ duoso-la pɩla, la jaŋ dagɛ ʋ bʋbʋɔŋ.”

8 Kuoro bɩra bʋl, “Mɩ jɩma ma vʋʋra nɛ dɩ ma kɛmmɛ dieni, bɛɛ wɩaa ma jɩma arɩ mɩ sɩɩŋ fɩɛsa nɛ.

9 Dɩ ma nɛ bɩ duoso-la bʋbʋɔŋ daga pɩmɛ, mɩ jaŋ joŋ wʋbala a dɔgɩsɛ ma kala. Ma kala vʋʋra nɛ dɩ ma nyɩɛ wɩaa a nyɩsɛmɛ a bɩɩnɛ arɩ mɩ jaŋ kɛŋ mɩ tʋɔbɩɩnaa bɩrɩmɛ. Ŋɩɩ wɩaa má dagɛmɛ duoso-la, ŋɩɩ nɛ mɩ jaŋ jɩŋ dɩ ma jaŋ wuo dagɛ ʋ bʋbʋɔŋ ma pɩmɛ.”

10 Nɩalɩŋ bʋla pɩ kuoro, “Nʋʋkala tuo dʋnɩa lɛ sɩ jaŋ wuo ŋaa wɩɩ-la ŋ-na kuoro sɩɩ chɛ. Kuoru kala tuo, ʋ doluŋ cho dɩ ʋ magɛ ŋɩɩ kala, ʋ ha bɩ wʋdoho deeŋ joŋo pɩɛsɛ chichiribu koo nɩalɩŋ sɩ yie beŋ chɛnwʋlaa aŋ dɩdagɛ wɩaa koo wʋjɩnnʋ.

11 Wɩɩ-la kuoro sɩ pɩɛsa chaasa ŋaa wʋhaa nɛ. Nʋʋkala bɩ jaŋ wuo dagɛ wɩɩ-la ŋ-na kuoro sɩɩ chɛ, see vesiŋ, ba ma saa bɩ nuhuobiinee tʋɔŋ guolo.”

12 Wɩɩŋ deeŋ leŋ kuoro baanɩŋ sii kɩŋkɛŋ. Ʋ pa wombiiŋ dɩ ba kpʋ wʋjɩnna-la kala sɩ hɛ Babɩlɔŋ lɛ.

13 Ŋɩɩ nɛ kuoro pa wombiiŋ dɩ ba kpʋ wʋjɩnnaa kala, aŋ hɛ nɩaa ba gɔllɔ chɩchɛ Danɩɛl arɩ ʋ nandɔnsʋŋ ma dɩ ba kpʋ.

14 Laalɩyuoro-la sɩɩ pɔ kuoro kʋhɩaŋ ba sɩɩ yɩrɛ Arɔk, lɩɩ dɩ ʋ kpʋ wʋjɩnna-la sɩ hɛ Babɩlɔŋ lɛ, Danɩɛl kɛŋ wʋjɩmɩŋ a fɩɛla bʋl wɩaa pʋ.

15 Ʋ pɩɛsɛ kuoro laalɩyuori-hɩaŋ-la, “Bɛɛ nɛ tɩɩ kuoro pa wombii duoŋ deeŋ?” Arɔk joŋ wɩɩkala a to pɩ Danɩɛl.

16 Ŋɩɩ lɛ nɛ, Danɩɛl sii a mʋ kuoro teeŋ a sʋlʋ dɩ ʋ pʋ wombiiŋ dɩ ʋ dieni mʋa ka ʋ wuo dagɛ duoso-la bʋbʋɔŋ pʋ.

17 Ŋɩɩ nɛ Danɩɛl mɩɩra mʋ dɩa a bʋl wɩɩ-la pɩ ʋ nandɔnsʋŋ Hananaaya, Mɩsɩɛl arɩ Azarɩa.

18 Ʋ bʋla pɩba dɩ ba sʋl Wɩa sɩ hɛ ʋ jaŋ lɛ a bibeŋ kʋŋkala dɩ ʋ fá ba nenige a dagɛba wʋkpuŋkpere-la bʋbʋɔŋ, dɩ ba sɩ́ ʋ dɩ ʋ nandɔnsʋŋ kpʋ a pɛ wʋjɩnna-la sɩ hɛ Babɩlɔŋ lɛ.

19 Tɩtaŋɩŋ, Wɩa joŋ wʋkpuŋkpere-la sɩ faa bʋbʋɔŋ a dagɛ Danɩɛl duosoo tʋɔŋ. Ŋɩɩ nɛ Danɩɛl dɛnnɛ Wɩa sɩ hɛ ʋ jaŋ lɛ

20 a bʋl, “Mɩɩ dɛnnɛ Wɩa a kaa mʋ wuu, wʋjɩmɩŋ arɩ doluŋ ŋaa ʋ kɩaa nɛ.

21 Ʋ nɛ kɛŋ bʋa bʋa kala kaa bɩrɩmɛ, ʋ nɩɩ bil kuoroo, ʋ nɩɩ kiri kuoroo. Ʋ nɩɩ pɩ wʋjɩnnaa wʋjɩmɩŋ a leŋ nɩalɩŋ ma sɩ kɛŋ dɩgɩlɩŋ jegilee jɩŋ wɩaa sɩaa.

22 Ʋ nɛ yie joŋ wɩalɩŋ sɩ kpere arɩ wɩalɩŋ sɩ faa a dagɛ nɩaa. Ʋ nɛ jɩŋ wɩalɩŋ sɩ hɛ birimiŋ tʋɔŋ, ʋ lɛ nɛ pʋlʋmʋŋ hɛ.

23 Mɩ nyɩmmaba Wɩa, mɩɩ lɔllʋŋ aa dɛnnɩŋ. Ŋ nɛ pɩmɛ wʋjɩmɩŋ arɩ doluŋ, ŋ nɛ leŋe mɩ jɩŋ wɩɩ-la la sɩ pɩɛsɩŋ chɩchɛ, ŋ nɛ leŋe la jɩŋ kuoro duoso.”


Danɩɛl dagɛ duoso-la bʋbʋɔŋ

24 Ŋɩɩ nɛ Danɩɛl sii mʋ Arɔk teeŋ, nɩɩ-la kuoro sɩ lɩɩsa dɩ ʋ kpʋ wʋjɩnna-la sɩ hɛ Babɩlɔŋ lɛ a bʋla pʋ, “Sɩ́ Babɩlɔŋ wʋjɩnnaa kpʋ, kɛmmɛ kaa mʋ kuoro teeŋ dɩ mɩ dagɛ ʋ duoso-la bʋbʋɔŋ pʋ.”

25 Arɔk kɛŋ Danɩɛl a mʋ kuoro teeŋ lɩma a bʋla pʋ, “Kuoro, mɩ na nʋʋ sɩ lɩɩ Juda nɩalɩŋ la sɩ yuo kɛsɛ tʋɔŋ, ʋ jaŋ wuo dagɛ ŋ duoso-la bʋbʋɔŋ.”

26 Ŋɩɩ nɛ kuoro pɩɛsɛ Danɩɛl (ʋ nɛ baa yɩrɛ Bɛlɩtɛsaza ma), “Ŋ jaŋ wuo dagɛ wɩɩ-la mɩ sɩ na duosoo tʋɔŋ aŋ dagɛ ʋ bʋbʋɔŋ maa?”

27 Danɩɛl bʋl, “Wʋjɩnnʋ, vʋgʋrʋ koo chichiribu koo nɩalɩŋ sɩ yie beŋ chɛnwʋlaa a dɩdagɛ wɩaa kʋŋ tuo sɩ jaŋ wuo dagɛ ŋ-na kuoro wʋkpuŋkpere-la ŋ sɩɩ chɛ,

28 ama Wɩa sɩ hɛ ʋ jaŋ lɛ nɩɩ dagɛ wʋkpuŋkperisiŋ bʋbʋɔŋ. Ʋ nɛ joŋ wɩalɩŋ maachie sɩ jaŋ ŋaa a dagɛ ŋ-na kuoro Nebukadineza. Ŋ duoso-la arɩ wɩalɩŋ kala ŋ sɩ pɩna na ŋ bɔsɔ lɛ nɛ ŋ-la:

29 Kuoro, ŋ sɩ pɩŋ bɔsɔ lɛ, ŋ tʋɔbɩɩnaa mʋ wɩalɩŋ sɩ jaŋ ŋaa maachie lɛ nɛ. Wɩa sɩ joŋ wʋkpuŋkperisiŋ dɩdagɛ nɩaa, dagɩŋ wɩalɩŋ maachie sɩ jaŋ ŋaa nɛ.

30 Lɛɛlɛ, wʋkpuŋkpere deeŋ Wɩa sɩ joŋo dagɛ mɩ-na, ʋ bɩ naga mɩ sɩ kɛŋ wʋjɩmɩŋ yʋgɛ a kɩɩ nɩalɩŋ dɔnsʋŋ wɩaa nɛ tɩɩ, ama dɩ ŋ-na kuoro wuo jɩŋ ŋ duosoo arɩ wɩalɩŋ ŋ sɩ pɩna na bʋbʋɔŋ.

31 Kuoro, wɩɩ-la ŋ sɩ na ŋ duosoo tʋɔŋ nɛ ŋ-la: Ŋ na kʋŋ ba sɩ mɛ dɩ ʋ chɩŋ ŋ sɩpaaŋ a yʋgɛ zuu a tʋtʋl aŋ kɛŋ fawʋllʋŋ.

32 Sɛlɩmɛ nɛ ba kaa mɛ kʋ-la nyuŋ, a kɛŋ hɔpʋla mɛ ʋ bɔyɛ arɩ ʋ vaasɩŋ, aŋ kɛŋ kɔlɩɩŋ ma mɛ ʋ luoruŋ arɩ ʋ naapuyee.

33 Ʋ naasɩŋ ŋaa hɔɔŋ nɛ, ʋ naachɛyɛɛ sɛmɛ dɔŋɔ ŋaa hɔɔŋ, sɛmɛ dɔŋɔ ma ŋaa chʋrʋŋ ba sɩ nyɩgɛ.

34 Ŋ sɩɩ beŋ ŋɩɩ, ŋ na dɩ bʋŋ yɛrɛ lɩɩ ʋ tɩtɩa lɛ peeliŋ nyuŋ, ka nuhuobiine dee bɩ yɛrɛ, ʋ kʋ tuu ŋmoo kʋ-la ba sɩ mɛ naachɛyɛ-la ba sɩ kɛŋ hɔɔŋ arɩ chʋrʋŋ mɛ a yɛrɛ muno muno.

35 Ŋɩɩ nɛ hɔɔ-la, chʋrʋ-la, kɔlɩɩ-la, hɔpʋla-la arɩ sɛlɩmɛ-la kala yɛrɛ muno muno bʋa-la tɩtɩa lɛ a nagɛ mɩɩ-jɔrʋŋ sɩ hɛ taha lɛ. Peliŋ tii paa viiri ba bɩ jɩŋ lee-la kala ba sɩ to. Ama bʋŋ-la sɩ ŋmoo kʋ-la ba sɩ mɛ yɛrɛ mɩɩra bɩrɩmɛ peel-bal a su dʋnɩa kala.

36 Duoso-la nɛ ŋɩɩ, lɛɛlɛ la jaŋ dagɛ ʋ bʋbʋɔŋ a pɩ ŋ-na kuoro.

37 Kuoro, ŋ nɛ ŋaa kuoroo kala kuoro. Wɩa sɩ hɛ ʋ jaŋ lɛ a bibeŋ kʋŋkala joŋ kuoruŋ, doluŋ arɩ yɩrɩŋ pɩŋ nɛ.

38 Ŋ nɩsɩŋ lɛ nɛ ʋ joŋ nuhuobiinee, bagɩlaa arɩ fillee sɩɩ zaarɛ wɩa-nyuŋ a hɛ. Lee na-kala ba sɩ hɛ, ʋ nɛ leŋe ŋ bibeŋ ba kala. Ŋ nɛ ŋaa sɛlɩmɛ nyuŋ-la ŋ sɩ na.

39 Ŋ harɩŋ lɛ, kuoru dɔŋ jaŋ bɩra kɔ, ʋ bɩ jaŋ kɛŋ doluŋ a nagɩŋ. Ʋ ŋɩɩ harɩŋ kuori-tori jaŋ kɔ. Ʋ nɛ ŋaa kɔlɩɩ-la, ʋ jaŋ beŋ dʋnɩa kala.

40 Ʋ dɩdɛrɩŋ kuori-nɛsɛ jaŋ kɔ. Ʋ jaŋ kɛŋ doluŋ a nagɛ hɔɔŋ, bɛɛ wɩaa hɔɔŋ nɛ ŋmoo kʋŋkala yɩyɛrɛ muno muno, ŋɩɩ wɩaa ʋ jaŋ ŋmoo kʋŋkala yɛrɛ.

41 Ŋ sɩ na dɩ naasɩŋ arɩ naaniee sɛsɩŋ dɔnsʋŋ ŋaa chʋrʋŋ ba sɩ nyɩga ŋɩɩ, ka sɛsɩŋ dɔnsʋŋ ma ŋaa hɔɔŋ. Ŋɩɩ daga arɩ kuoruŋ deeŋ jaŋ kpaa, ama ʋ sɛmɛ dɔŋɔ ha jaŋ kɛŋ doluŋ a nagɛ hɔɔŋ, arɩ ŋ sɩ na hɔɔŋ arɩ chʋrʋŋ sɩ guoli dɔŋɔ lɛ ŋɩɩ.

42 Naanie-la ŋ sɩ na dɩ sɛmɛ dɔŋɔ ŋaa hɔɔŋ, ka sɛmɛ dɔŋɔ ma ŋaa chʋrʋŋ, ŋɩɩ daga arɩ ʋ kuorii-la sɛmɛ dɔŋɔ jaŋ kɛŋ doluŋ, ka sɛmɛ dɔŋɔ ma bɩ jaŋ kɛŋ doluŋ.

43 Ŋ sɩ na hɔɔŋ dɩ ʋ guoli chʋrʋŋ ba sɩ nyɩga lɛ ŋɩɩ, ŋɩɩ nɛ nɩalɩŋ ma jaŋ guoli dɔŋɔ lɛ, aŋ bɩ jaŋ kɛŋ nii-bala a nagɛ hɔɔŋ arɩ chʋrʋŋ sɩ bɩ dɔŋɔ lɛ mɛrɛ ŋɩɩ.

44 Kuoroo deemba kuoruŋ bʋa lɛ Wɩa sɩ hɛ ʋ jaŋ lɛ a bibeŋ kʋŋkala jaŋ bil kuoro ba sɩ bɩ jaŋ wuo giru, koo ba bɩ jaŋ laa a pɩ nɩa dɔsɛ. Ʋ jaŋ yuo dii kuorusu-la kala a leŋ dɩ ba kuoruŋ dɛrɛ, ama ʋ-na jaŋ hɛ nɩmɛ a kaa mʋ wuu.

45 Duoso-la ŋ sɩ na dɩ bʋŋ yɛrɛ lɩɩ peeliŋ nyuŋ, ka nuhuobiine dee bɩ yɛrɛ, ʋ bʋbʋɔŋ nɛ ŋɩɩ. Bʋŋ-la sɩ yɛrɛ hɔɔ-la, kɔlɩɩ-la, chʋrʋ-la, hɔpʋla-la arɩ sɛlɩmɛ-la muno muno ŋɩɩ, Wɩa sɩ yʋga joŋ wɩɩ-la maachie sɩ jaŋ ŋaa nɛ a dagɛ ŋ-na kuoro ŋɩɩ. Ŋ duoso-la ŋaa wʋtɩtɩɩ nɛ, ʋ bʋbʋɔŋ ma ŋaa wʋtɩtɩɩ.”

46 Ŋɩɩ nɛ kuoro Nebukadineza tuu kpirimi Danɩɛl sɩpaaŋ a zilu, aŋ ŋaa ba kɛŋ mɩaa ba sɩ kaa ŋaa Wɩɩsʋlʋŋ arɩ kʋsʋɔrʋsʋŋ sʋɔra sɩ sɩma a kʋ pɩ Danɩɛl.

47 Kuoro bʋla pɩ Danɩɛl, “Wʋtɩtɩɩ, ŋ Wɩa nɛ Wɩa sɩ kɩɩ vesiŋ kala, a ŋaa kuoroo kala kuoro a kɛŋ wʋkpuŋkperisiŋ dɩdagɛ nɩaa, ŋɩɩ nɛ tɩɩ ŋ wuo dagɛ wʋkpuŋkpere deeŋ bʋbʋɔŋ ŋɩɩ.”

48 Ŋɩɩ nɛ kuoro leŋ Danɩɛl dɩchɩnɩŋ yuŋ woruŋ a joŋ kɩaa ma yʋgɛ a dii zile ʋ lɛ. Ʋ leŋ ʋ bibeŋ Babɩlɔŋ tinteeŋ kala aŋ ŋaa ʋ wʋjɩnnaa ma kala nɩhɩaŋ.

49 Danɩɛl sʋl kuoro ʋ leŋ Sadɩrak, Mɛsak arɩ Abedinego ma ŋaa nɩhɩasɩŋ Babɩlɔŋ tinteeŋ sɛsɩŋ dɔnsʋŋ, ka Danɩɛl tɩtɩa ha hɛ kuoro dɩa lɛ a tɩtɩŋ.

©Ghana Institute of Linguistics Literacy and Bible Translation 1984, 2014

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ