DANƖƐL 12 - WƖA TENIŊ

Ba bʋl dʋnɩa dɩdɛrɩŋ wɩaa

¹ Ŋɩɩ nɛ kʋ-la sɩ nagɛ nuhuobiine a laalɛ gɛrɩpɛ fʋfʋlʋŋ gɛrɩŋ bɩra bʋl, “Bʋa-la lɛ Wɩa tɩndaarɩ-hɩaŋ-la ba sɩɩ yɩrɛ Maakɩl, nɩɩ-la sɩɩ pɔ ŋ nɩaa jaŋ kʋ lɩɩ. Bʋa-la lɛ hɛɛŋ jaŋ hɛ nɩmɛ. Wɩa sɩ ŋaa dʋnɩa a kaa kɔ bʋa-la lɛ hɛɛ-la doho ha bɩ jʋa aŋ ka. Ama ŋ nɩalɩŋ kala yɩraa sɩ hɛ mɩɩsɩŋ teŋ-la tʋɔŋ, ba jaŋ laaba ta.

² Nɩ-dandaŋ-la sɩ sʋba jaŋ sii, dɩ dɔnsʋŋ kɛŋ mɩɩsɩ-la sɩ bɩ dɛrɛ, ka dɩ dɔnsʋŋ ma dii hɩɩsɩŋ a na hɛɛ-la sɩ bɩ dɛrɛ.

³ Nɩalɩŋ sɩ kɛŋ wʋjɩmɩŋ jaŋ tʋtʋl a nagɛ wɩa-nyuŋ kɩaa. Nɩalɩŋ ma sɩ dagɛ nɩaa ba joŋ tʋɔpʋla wombiiŋ jaŋ nagɛ chɛnwʋlaa a kaa mʋ wuu.

⁴ Ŋ-na Danɩɛl, sɩ́ wɩaa deemba bʋla pɩ nʋʋkala. Kɛŋ teŋ-la tɔ a joŋ kʋa magɩlɛ a kaa mʋ yi dʋnɩa dɩdɛrɩŋ. Nɩaa jaŋ yʋgɛ a lɩɩ daha a mʋ daha a chɩchɛ dɩ ba wʋjɩmɩŋ pʋŋa pɛ.”

⁵ Ŋɩɩ nɛ mɩ-na Danɩɛl beŋ a na nɩaa balɩa ma dɩ ba chɩŋ mɩ sɩpaaŋ, dɔŋɔ chɩŋ fuo-la niiŋ cholo sɛmɛ dɔŋɔ, dɔŋɔ ma chɩŋ niiŋ cholo sɛmɛ dɔŋɔ.

⁶ Ba dɔŋɔ pɩɛsɛ baal-la fa sɩ laalɛ gɛrɩpɛ fʋfʋlʋŋ gɛrɩŋ a chugili fuo-la nyuŋ, “Ɛɛ nɛ ʋ jaŋ diene magɛ ka dɩ wʋkpuŋkperisiŋ deemba na ŋaa?”

⁷ Baal-la sɩ laalɛ gɛrɩpɛ fʋfʋlʋŋ gɛrɩŋ a chugili fuo-la nyuŋ, kɛŋ ʋ nɩsaa balɩa kala je wɩa-nyuŋ, ka mɩ nɩɩ dɩ ʋ ŋmɩɛsɛ Wɩa sɩ hɛ nɩmɛ deeŋ deeŋ a bʋl, “Ʋ jaŋ ŋaa jɩsɩŋ batori arɩ kpaa magɛ dɔŋɔ. Dɩ ba nɛ to naasɩŋ a dɔgɩsɛ Wɩa nɩaa dɛrɛ, wɩaa deemba ma kala jaŋ ŋaa dɛrɛ.”

⁸ Mɩ nɩɩ wɩalɩŋ ʋ sɩ bʋla, aŋ bɩ ba bʋbʋɔŋ wuo jɩŋ. Ŋɩɩ nɛ mɩ pɩɛsɛ, “Mɩ nɩhɩaŋ, ɛɛ nɛ wɩalɩŋ kala dɩdɛrɩŋ jaŋ nagɛ?”

⁹ Ʋ bʋla pɩmɛ, “Danɩɛl, ŋ-na mʋ ŋ dɩ-mʋʋlʋŋ, wɩalɩŋ faa nɛ ba tɔ bil see dʋnɩa dɩdɛrɩŋ yie.

¹⁰ Wɩa jaŋ chɛsɛ nɩ-daŋ a pɩɩsɛ ba disiniŋ ta, dɩ ba zɔŋ. Ama nɩbɔŋŋɔɔ ha jaŋ ŋɩŋaa wʋbɔŋŋɔɔ. Nɩbɔmɔ-la kʋŋkala bɩ jaŋ jɩŋ wɩaa sɩaa, ama nɩalɩŋ sɩ kɛŋ wʋjɩmɩŋ jaŋ jɩŋ ba sɩaa.

¹¹ A chɩŋ bʋa-la lɛ ba sɩ giri tapʋlɩɩ kala pʋsʋŋ kpʋ ŋaa Wɩɩsʋlʋŋ ta, aŋ joŋ disiŋ kʋ-la sɩɩ chei leriŋ bil, jaŋ ŋaa tapʋlaa bʋɩ arɩ zɔɔ-balɩa arɩ mahɩŋ banɛsɛ arɩ fii.

¹² Nɩɩ-la kala sɩ gbɛrɛ a yi tapʋlaa bʋɩ arɩ zɔɔ-batori arɩ mara arɩ fii arɩ banɔŋ dɩdɛrɩŋ, ʋ tʋɔŋ jaŋ tɔrɛ.

¹³ Ŋ-na Danɩɛl, mʋ ŋ dɩ-mʋʋlʋŋ ka dɩ dʋnɩa dɩdɛrɩŋ yi. Dʋnɩa dɩdɛrɩ-la nɛ yie, ŋ jaŋ na wiese, aŋ sii laa ŋ time.”