DANƖƐL 11 - WƖA TENIŊ

¹ Medi tɩŋŋaa Daarus sɩ dii kuoruŋ ʋ jɩ-bumbuŋ lɛ, mɩ nɛ chɩŋ ʋ harɩŋ kpaŋkpaŋ a pɔʋ.”

Ijipiti tinteeŋ kuoro arɩ Siiria kuoro

² “Lɛɛlɛ mɩ jaŋ bʋl wɩɩ-la sɩ jaŋ sɛnɛ ŋaa pɩŋ. Kuoroo batori jaŋ dii kuoruŋ Pɛɛsɩa tinteeŋ lɛ aŋ ka pɩ dɔŋɔ. Ka dɩ kuoru-nɛsɛ kʋ dii a kɛŋ kɩaa kɩɩ ba kala. Ʋ dʋa-la nɛ ʋ jaŋ kaa laa doluŋ. Ʋ jaŋ yigi nʋʋkala hɛ dɩ ba sii chɩŋ Giriisi tinteeŋ nɩaa lɛ.

³ Ŋɩɩ lɛ nɛ kuoru-duo kʋbala jaŋ dii kuoruŋ nɩmɛ a kɛŋ ʋ doluŋ ŋaa wɩɩ-la kala ʋ sɩ cho.

⁴ Ʋ ŋɩɩ harɩŋ ʋ kuoruŋ jaŋ tel dɩ ba kaa kpaa dʋnɩa sɛsɩŋ banɛsɛ-la. Ʋ doho nʋʋ bɩra bɩ jaŋ dii kuoruŋ ʋ nyuŋ lɛ koo a kɛŋ ʋ dol-la ŋaa wɩɩ, bɛɛ wɩaa ba jaŋ laa ʋ kuoruŋ a pɩ nɩwogusuŋ.

⁵ Ijipiti tinteeŋ kuoro jaŋ kɛŋ doluŋ, ama ʋ laalɩyuori-hɩasɩŋ dɔŋɔ jaŋ kɛŋ ʋ kuoruŋ laa, ʋ jaŋ kɛŋ doluŋ yʋgɛ woruŋ a beŋ ʋ tinteeŋ.

⁶ Jɩsɩŋ baŋmɛnɛ harɩŋ, Ijipiti tinteeŋ kuoro arɩ Siiria kuoro jaŋ pɛ niiŋ, dɩ Ijipiti tinteeŋ kuoro joŋ ʋ tolo pɩ Siiria kuoro dɩ ʋ jaa, a chɩchɛ dɩ ba nii-la chɩŋ woruŋ, ama ba nii-la bɩ jaŋ chɩŋ. Ba jaŋ joŋ haal-la arɩ ʋ bala, ʋ nyɩmma arɩ ʋ tɩntɩnna-la sɩ to ʋ harɩŋ mʋ pa dɩ ba kpʋ.

⁷ Ʋ ŋɩɩ harɩŋ lɛ tolo-la nyɩmma dɩa nɩaa dɔŋɔ jaŋ sii laa ʋ nyuŋ a dii kuoruŋ. Ʋ jaŋ yuo Siiria kuoru-la laalɩyuoroo aŋ jʋʋ ba dɩɩ-duoruŋ, a yuo diiba.

⁸ Ʋ jaŋ paa ba vesiŋ arɩ ba tɔmɔ-la ba sɩ kɛŋ hɔɔŋ libi, arɩ ba kʋ-yuŋŋie-la kala ba sɩ kɛŋ hɔpʋla arɩ sɛlɩmɛ ŋaa a kaa mʋ Ijipiti tinteeŋ. Ʋ jaŋ leŋ Siiria kuoru-la yuonuŋ jɩsɩŋ baŋmɛnɛ.

⁹ Ŋɩɩ lɛ nɛ Siiria kuoru-la ma jaŋ sii mʋ dɩ ʋ yuo Ijipiti tinteeŋ kuoro, ama ba jaŋ kiru dɩ ʋ mɩɩra mʋ ʋ tinteeŋ.

¹⁰ Siiria kuoro biiriŋ ma jaŋ kɛŋ ba tɩtɩa hɛ dɔŋɔ dɩ ba yuo laalɩŋ a kɛŋ laalɩyuori-daŋ hɛ dɔŋɔ. Ba jaŋ tii paa leriŋ, a nagɛ lɩɩ-balɩŋ sɩɩ pɛllʋ, dɩ ba yuo laalɩŋ ŋɩɩ halɩɩ, a mʋ jʋʋ Ijipiti tinteeŋ kuoro dɩɩ-duoruŋ.

¹¹ Ijipiti kuoro jaŋ na baanɩŋ a kɛŋ laalɩyuoroo mʋ yuo Siiria tinteeŋ kuoru-la sɩ kɛŋ laalɩyuori-daŋ, a yuo diiu.

¹² Dɩ ba nɛ yuo dii laalɩyuoru-daŋ-la, Ijipiti kuoru-la nyuŋ jaŋ nyaasɛ dɩ ʋ kpʋ laalɩyuoroo bʋɩ-bʋɩba, ama ʋ ha bɩ jaŋ yuo didii deeŋ deeŋ.

¹³ Siiria kuoru-la ha jaŋ bɩra chɛ laalɩyuoru-daŋ sɩ nyɩgɩla woruŋ aŋ yʋga kɩɩ bumbuŋ nɩalɩŋ. Dɩ jɩsɩŋ baŋmɛnɛ nɛ bala, dɩ ʋ bɩra mʋ yuo Ijipiti tinteeŋ kuoro.

¹⁴ Bʋa-la lɛ nɩ-daŋ jaŋ sii chɩŋ Ijipiti tinteeŋ kuoru-la lɛ. Yuo-hɛɛrɛ-la sɩ hɛ ŋ tɩtɩa nɩaa tʋɔŋ jaŋ lɩɩ ŋ harɩŋ dɩ wɩɩ-la ŋ sɩ na a nagɛ duoso tʋɔŋ kʋ ŋaa wʋtɩtɩɩ. Ama ba jaŋ walɩma ka.

¹⁵ Ŋɩɩ nɛ Siiria kuoro jaŋ kɔ a saa vaŋkumba dɩ ba to ba lɛ a jʋʋ yuo dii tabal-la ba sɩ saa kɛrɛ golli. Ijipiti tinteeŋ kuoro laalɩyuoroo bɩ jaŋ kɛŋ doluŋ a wuo chemba. Ba nɩalɩŋ ma sɩ paala jɩŋ laalɩŋ yuonuŋ woruŋ bɩ jaŋ wuo yuoba.

¹⁶ Siiria kuoru-la sɩ kɔ dɩ ʋ yuoba jaŋ ŋaa wɩɩ-la kala ʋ sɩ cho. Nʋʋkala bɩ ʋ sɩpaaŋ jaŋ wuo chɩŋ. Ʋ dɩ laalɩyuoroo jaŋ chɩŋ Iziral tɩŋŋaa tintee-zɔŋ-la lɛ a yuo laa ʋ kala a cheyu.

¹⁷ Siiria kuoru-la jaŋ chɩchɛ ʋ kɛŋ ʋ laalɩyuoroo kala mʋ Ijipiti tinteeŋ kuoro leriŋ dɩ ba pɛ niiŋ. Ʋ jaŋ joŋ ʋ tolo pʋ dɩ ʋ jaa, dɩ ʋ wuo to ŋɩɩ lɛ a yuo dii ʋ tinteeŋ kala, ama ʋ tʋɔbɩɩna-la bɩ jaŋ chɩŋ.

¹⁸ Ŋɩɩ nɛ ʋ jaŋ mʋ yuo dii tinteyee yʋgɛ sɩ hɛ mʋgʋ-balɩŋ niiŋ, ama laalɩyuori-hɩaŋ kʋbala jaŋ kʋ yuo dii Siiria kuoru-la, dɩ hɩɩsɩŋ kɛnʋ dɩ ʋ babii-ballɩŋ dɛrɛ.

¹⁹ Wɩɩŋ deeŋ harɩŋ lɛ ʋ jaŋ mɩɩra joŋ ʋ sɩaa chaasɛ ʋ tinteeŋ dɩɩ-duoruŋ dɩ ʋ yuo paa kɩaa, ama ŋɩɩ lɛ nɛ ba jaŋ kpʋʋ, dɩ ʋ wɩaa dɛrɛ.

²⁰ Nɩɩ-la sɩ jaŋ dii kuoruŋ ʋ nyuŋ lɛ jaŋ hɛ nʋʋ dɩ ʋ gɔllɔ laa lampoo ʋ tinteeŋ lɛ dɩ ŋɩɩ leŋ dɩ ʋ tinteeŋ kuoruŋ ha kɛŋ yɩrɩŋ. Jɩsɩŋ baŋmɛnɛ lɛ ba jaŋ kpʋ kuoru-la, ama nɩaa tʋɔŋ koo laalɩŋ lɛ dee.

²¹ Nɩɩ-la sɩ jaŋ laa Siiria kuoro deeŋ nyuŋ a dii kuoruŋ, jaŋ ŋaa nʋʋ sɩ bɩ maga dɩ ʋ dii kuorii-la. Ba bɩ jaŋ zil ʋ kuoruŋ. Ʋ jaŋ yuo tintee-la nɩaa bʋa-la lɛ ba sɩ hɔnɔ ta jɩa a bɩɩnɛ wɩɩ bɩbaa jʋʋ. Ʋ jaŋ kɛŋ badɛ wɩaa laaʋ.

²² Ʋ jaŋ yuo dii laalɩyuori-daŋ, a pɛ Wɩɩsʋllɩ sɩpaalaaraa nɩhɩaŋ lɛ a cheiba.

²³ Ʋ dɩ nɩaa niiŋ nɛ kʋ ŋaa kʋbala, ʋ jaŋ kɛŋ wʋjɩmɩŋ a nyɩsɛba aŋ kɛŋ ʋ nɩaa baŋmɛnɛ dɩ ba laa doluŋ.

²⁴ Ʋ jaŋ yuo tintee-la sɩ kɛŋ kɩaa kɩŋkɛŋ nɩaa sɩ hɔnɔ ta jɩa a bɩɩnɛ wɩɩ bɩbaa jʋʋ. Ʋ jaŋ ŋaa wɩalɩŋ ʋ nyɩmmaba arɩ ʋ naabalɩmaba ha sɩ bɩ ŋaa aŋ ka. Ʋ jaŋ joŋ kɩalɩŋ ʋ sɩ yuo paa arɩ kɩalɩŋ ʋ sɩ yuo laa arɩ ba dʋa kala a kpaa ʋ harɩ-tooroo. Ʋ dɩ ʋ nɩaa jaŋ vʋʋrɛ dɩ ba mʋ yuo dii dɩɩ-duoruŋ, ama wɩaa deemba bɩ jaŋ dieni.

²⁵ Ʋ jaŋ kɛŋ doluŋ aŋ nyɩrɛ ʋ bɔyɛ a kɛŋ laalɩyuori-daŋ mʋ yuo Ijipiti tinteeŋ kuoro. Ijipiti tinteeŋ kuoru-la ma jaŋ kɛŋ laalɩyuori-daŋ sɩ kɛŋ doluŋ kɩŋkɛŋ a lɩɩ chemu dɩ ba yuo dɔŋɔ. Ama ʋ bɩ jaŋ wuo yuo diiu, bɛɛ wɩaa ba vʋʋra nɛ a chɩŋ ʋ lɛ.

²⁶ Kuoro sɩŋŋaa tɩtɩa nɛ jaŋ kɛŋ ʋ naaŋ je. Ba jaŋ yuo dii ʋ laalɩyuoroo dɩ ba nɩ-daŋ sʋʋ laalɩŋ lɛ.

²⁷ Kuoro-la balɩa sɩ kɛŋ tʋɔbɩɩŋ bɔŋŋɔɔ jaŋ hɔŋ dɩ-bala dɩ ba dii kɩaa a nyɩɛ wɩaa pɩ dɔŋɔ, ama ba bɩ jaŋ na wɩɩ-la ba sɩɩ chɛ, bɛɛ wɩaa Wɩa laa sɩpaaŋ dagɛ bʋa-la lɛ ba wɩaa sɩ jaŋ dɛrɛ nɛ.

²⁸ Siiria kuoru-la jaŋ mɩɩra kɛŋ dʋa yʋgɛ a mʋ ʋ tinteeŋ, ama ʋ jaŋ kɛŋ tʋɔ-lɔrʋŋ Wɩa nɩaa wombiee lɛ a ŋaa wɩɩ-la kala ʋ sɩɩ chɛ ba lɛ, aŋ-na mɩɩra mʋ ʋ tinteeŋ.

²⁹ Wɩa sɩ dagɛ bʋa-la nɛ yie, Siiria kuoro jaŋ bɩra mʋ yuo Ijipiti tinteeŋ kuoro, ama bʋa deeŋ lɛ ʋ bɩ jaŋ yuo diiu a nagɛ bumbuŋ-la ʋ sɩ ŋaa ŋɩɩ.

³⁰ Nɩalɩŋ sɩ kɛŋ lɩɩŋ daborusuŋ vɩvɛŋ a hɛ wɩɩjʋʋlʋŋ dɩɩrɩŋ mʋgʋ-balɩŋ niiŋ jaŋ kʋ yuou dɩ fawʋllʋŋ kɛnʋ. Ŋɩɩ lɛ nɛ ʋ jaŋ mɩɩra mʋ Wɩa nɩaa tinteeŋ a joŋ ʋ baanɩŋ sɩ faasa sii ŋɩɩ a fɩɩsɛ ba lɛ, aŋ kɛŋ ʋ tɩtɩa mʋ mɛrɛ nɩalɩŋ sɩ vɩa dɩ ba to Wɩa lɛ.

³¹ Ʋ laalɩyuoroo jaŋ sii chei Wɩa dɩɩ-bal-la dɩ-duoŋ dɩ ʋ kɛŋ disiniŋ a pɔ dɩ ba bɩra sɩ́ tapʋlɩɩ kala pʋsʋŋ kpʋ ŋaa Wɩɩsʋlʋŋ. Ba jaŋ joŋ disiŋ kʋŋ sɩɩ chei leriŋ a bil Wɩa dɩɩ-bal-la dɩ-balɩŋ.

³² Kuoru-la jaŋ kɛŋ nii-sɩma a nyɩsa chei nɩalɩŋ sɩ vɩa dɩ ba to Wɩa. Ama nɩalɩŋ sɩɩ to Wɩa jaŋ chɩŋ kpaŋkpaŋ a yuou.

³³ Ba tʋɔŋ nɩalɩŋ sɩ kɛŋ wʋjɩmɩŋ jaŋ dagɛ nɩ-daŋ. Ama bʋa dɔŋ jaŋ yi dɩ ba kpʋba laalɩŋ lɛ koo a nyɩgɛba koo a yuo kɛsɛba koo a paa ba kɩaa.

³⁴ Dɩ ba nɩɩ kpʋ Wɩa nɩaa, nɩaa mʋa nɛ jaŋ pɛ ba lɛ a laaba ta. Nɩaa jaŋ yʋgɛ a dɩdɛ sɩaa arɩ ba ma pɛ ba lɛ nɛ.

³⁵ Nɩalɩŋ dɔnsʋŋ sɩ kɛŋ wʋjɩmɩŋ jaŋ na hɛɛŋ, dɩ ŋɩɩ ŋaa wɩɩ sɩ jaŋ chɛsɛba a pɩɩsɛ ba disiniŋ ta ka dɩ ba zɔŋ a kaa mʋ yi dɩdɛrɩ-la Wɩa sɩ daga.

³⁶ Siiria kuoru-la jaŋ ŋaa wɩɩ-la kala ʋ sɩ cho, a kɛŋ ʋ tɩtɩa yʋga kɩɩ vene kala a bʋl wɩalɩŋ sɩ bɩ maga a tʋʋsɛ Wɩa sɩ kɩɩ kʋŋkala joŋŋoo. Wɩaa jaŋ vɛŋ woruŋ pʋ a kaa mʋ yi bʋa-la lɛ Wɩa sɩ dɔgʋsʋ arɩ baanɩŋ, bɛɛ wɩaa Wɩa jaŋ ŋaa wɩɩ-la ʋ sɩ bɩɩna dɩ ʋ ŋaa.

³⁷ Kuoru-la sɩpaa jaŋ tuo ʋ naabalɩmaba vesiŋ lɛ koo vene-la haalaa sɩ cho koo vene dɔŋ kala lɛ. Ʋ jaŋ bee gʋʋnɛ ba kala aŋ kɛŋ ʋ tɩtɩa yʋga kɩɩ ba kala.

³⁸ Ʋ jaŋ vɩaba aŋ mɩɩra to vene-la sɩɩ pɔ dɩ-duoruŋ, kʋ-la ʋ naabalɩmaba sɩ bɩ jɩŋ aŋ ka, a joŋ sɛlɩmɛ arɩ hɔpʋla arɩ tabɩɩ-tʋlaa arɩ kɩaa yallɩŋ sɩ hɛyɛ a pʋpʋ.

³⁹ Veŋ wogo-la jaŋ pɛ ʋ lɛ dɩ ʋ yuo dii dɩɩ-duoruŋ. Ʋ jaŋ faasa zil nɩalɩŋ sɩɩ tou. Ʋ jaŋ leŋ dɩ ba bibeŋ nɩ-dandaŋ ka dɩ ʋ kɛŋ tinteeŋ kpaa a siiliba.

⁴⁰ Dʋnɩa dɩdɛrɩ-la Wɩa sɩ daga nɛ yie, Ijipiti tinteeŋ kuoro jaŋ sii mʋ dɩ ʋ yuo Siiria kuoro. Siiria kuoru-la jaŋ kɛŋ ʋ laalɩŋ janɩŋ torukoba arɩ ja-jɩllaa a pɛ lɩɩŋ daboru-dandaŋ lɛ a lɩɩ chemu. Ʋ jaŋ mʋ tɔ tinteyee yʋgɛ hɛ a yuoba a nagɛ lɩɩŋ sɩ tɔ leriŋ.

⁴¹ Ʋ jaŋ yuo tintee-zɔŋ-la ma nɩaa. Ʋ jaŋ kpʋ nɩ-daŋ, ama ba jaŋ laa Ɛdɔm tinteeŋ nɩaa arɩ Mʋab tinteeŋ nɩaa a pɛ Amɔŋ tinteeŋ sɩpaalaaraa lɛ a ta ʋ nɩsɩŋ lɛ.

⁴² Ʋ jaŋ dii doluŋ tinteyee lɛ woruŋ, Ijipiti tinteeŋ nɩaa ma bɩ jaŋ fori.

⁴³ Ʋ jaŋ laa Ijipiti tɩŋŋaa sɛlɩmɛ arɩ hɔpʋla arɩ kɩalɩŋ kala sɩ kɛŋ yuŋuŋ. Libiya tɩŋŋaa arɩ Nubia tɩŋŋaa ma jaŋ sɛɩ a tɩma pʋ.

⁴⁴ Duoso jaŋ lɩɩ wɩɩpɔsʋŋ arɩ wɩɩpɔsʋŋ nagʋa dɩɩrɩŋ a kʋ leŋ dɩ ʋ yaraa hosi, dɩ ʋ kɛŋ baanɩŋ kɩŋkɛŋ a lɩɩ yuo laalɩŋ a kpʋ nɩ-daŋ.

⁴⁵ Ʋ jaŋ hɛ ʋ kuoru-lɛŋŋɛɛ Mediterenia mʋgʋ-balɩŋ arɩ peel-la nyuŋ Wɩa dɩɩ-balɩŋ sɩ chɩna pɛgɛ. Ŋɩɩ bʋa lɛ nɛ ʋ jaŋ sʋʋ, nʋʋ bɩ jaŋ pɛ ʋ lɛ.”