DANƖƐL 10 - WƖA TENIŊ

Danɩɛl duoso na nuhuobiine

¹ Siirus sɩ dii Pɛsɩa tinteeŋ kuoruŋ, ʋ jɩ-tori lɛ nɛ Wɩa joŋ wɩaa dagɛ Danɩɛl (ba sɩ kaa yɩrɛ Bɛlɩtɛsaza ma). Wɩalɩŋ sɛnɛ ŋaa wʋtɩtɩɩba nɛ, a ŋaa wɩaa sɩ mʋ tɩgɛ laal-bal kʋbala lɛ. Ba dagɛ wɩalɩŋ bʋbʋɔŋ pʋ a nagɛ duosoo tʋɔŋ nɛ.

² Bʋa-la lɛ, mɩ-na Danɩɛl yele yɔɔsʋŋ batori nɛ.

³ Mɩ bɩ kʋdii-fɩaŋ kala die a bɩ nammɩa ma chaŋa koo a kɛŋ girep nɛnɛɛ sɩnɩŋ jɩl mɩ niiŋ. Yɔɔsʋ-la batori kala lɛ, mɩ bɩ nʋʋŋ ma tɩsa.

⁴ Jɩna tʋɔŋ chɛŋ bumbuŋ tapʋlaa mara arɩ banɛsɛ chɛɛŋ mɩ chɩŋ fuo-bal kʋbala ba sɩɩ yɩrɛ Tɩgɩrɩs niiŋ,

⁵ aŋ beŋ a na nʋʋ mɩ sɩpaaŋ dɩ ʋ laalɛ gɛrɩpɛ fʋfʋlʋŋ gɛrɩŋ a vɔɔ sɛlɩmɛ tembiiŋ ʋ tɩŋa lɛ.

⁶ Ka ʋ yaraa tʋtʋl a nagɛ tabɩɩ-la ba sɩɩ yɩrɛ kirisola, ʋ sɩaa nagɛ taŋ sɩɩ lɩgɩsʋ, sɩɩ-biee ma nagɛ kapɩlɩŋ nyiniŋ, ʋ nɩsaa arɩ ʋ naasɩŋ tʋtʋl a nagɛ kɔlɩɩŋ ba sɩ kɛŋ nʋʋŋ laarɛ, ka ʋ yikoro ma nagɛ nɩ-daŋ sɩɩ ŋaa goŋ.

⁷ Mɩ-na Danɩɛl dʋndʋŋa nɛ fa na wɩɩŋ deeŋ, mɩ dɩ nɩalɩŋ fa sɩ hɛ lee-la bɩ wɩɩkala na, ama fawʋllʋŋ fa faasa kɛmba nɛ, ba fá mʋ faa.

⁸ Mɩ dʋndʋŋa nɛ fa ka a bibeŋ wʋbalɩŋ deeŋ. Mɩ fa bɩ mɩ nandaa kala wuo, ka mɩ sɩaa faasa biri, mɩ bɩra bɩ dol kala kɛnɛ.

⁹ Ŋɩɩ nɛ mɩ nɩɩ dɩ ʋ bʋl wɩaa. Mɩ sɩ nɩɩ ʋ yikoro ŋɩɩ, mɩ tele chu tinteeŋ a kpaŋa pɩŋ.

¹⁰ Ʋ kɛmmɛ chʋʋla kɩɩ, mɩ kpirimi mɩ nɩsaa arɩ mɩ naadʋsʋŋ nyuŋ a chichel.

¹¹ Ʋ yɩrɛmɛ, “Danɩɛl, Wɩa choŋ nɛ woruŋ a tɩmmɛ ŋ teeŋ. Sii chɩŋ a fɩɛlɛ ŋ sɩaa a jegile nɩɩ wɩalɩŋ mɩ sɩɩ chɛ dɩ mɩ bʋla pɩŋ.” Ʋ sɩ bʋl ŋɩɩ pɩmɛ, mɩ sii chɩŋ a chichel.

¹² Ŋɩɩ nɛ ʋ bɩra bʋl, “Danɩɛl, sɩ́ fawʋllʋŋ fá. Tapʋl-bumbuŋ-la ŋ sɩ joŋ ŋ nyuŋ hɛ dɩ ŋ jɩŋ wɩalɩŋ sɩaa a kɛŋ ŋ tɩtɩa muuri Wɩa sɩpaaŋ ŋɩɩ, ʋ laa ŋ sʋla nɛ a tɩmmɛ dɩ mɩ kʋ bʋl wɩalɩŋ ŋ sɩɩ chɛ a pɩŋ.

¹³ Ama Sɩtaanɩ tɩndaarʋ-la sɩɩ beŋ Pɛsɩa tinteeŋ tɔ mɩ wombiiŋ tapʋlaa mara arɩ kʋbala nɛ. Ŋɩɩ nɛ Maakɩl sɩ ŋaa Wɩa tɩndaaraa nɩhɩaŋ dɔŋɔ kʋ pɛ mɩ lɛ, a tɩŋ Sɩtaanɩ tɩndaarʋ-la sɩɩ beŋ Pɛsɩa tinteeŋ fa sɩ tɔ mɩ wombiiŋ wɩaa.

¹⁴ Lɛɛlɛ mɩ kɔ dɩ mɩ bʋl wɩɩ-la maachie sɩ jaŋ ŋaa ŋ nɩaa lɛ nɛ a pɩŋ. Wɩɩ-la ŋ sɩ na a nagɛ duosoo tʋɔŋ tɩgɛ maachie wɩalɩŋ sɩ jaŋ ŋaa lɛ nɛ.”

¹⁵ Ʋ fa ha sɩɩ bʋl wɩɩŋ deeŋ mɩ teeŋ ŋɩɩ, mɩ kɛŋ mɩ sɩaa chu tinteeŋ a bɩ wɩaa wuo bʋl.

¹⁶ Ŋɩɩ nɛ kʋ-la sɩ nagɛ nuhuobiine bɩra digi mɩ niipinee lɛ, mɩ bɩra wuo bʋl wɩaa. Mɩ bʋla pɩ nɩɩ-la sɩ chɩŋ mɩ sɩpaaŋ, “Mɩ nɩhɩaŋ, wɩɩ-la mɩ sɩ na a nagɛ duosoo tʋɔŋ leŋe mɩ na hɛɛŋ kɩŋkɛŋ nɛ a bɩ mɩ nandaa kala wuo.

¹⁷ Mɩ nɩhɩaŋ, ɛɛ nɛ mɩ-na ŋ tɩntɩnna jaŋ ŋaa a wuo bʋl wɩaa ŋ teeŋ? Mɩ doluŋ dɛrɛ nɛ, mɩ bɩra bɩ wuo wiesi.”

¹⁸ Kʋ-la sɩ nagɛ nuhuobiine bɩra digimi, a pɩmɛ doluŋ.

¹⁹ Ʋ bʋla pɩmɛ, “Wɩa choŋ nɛ woruŋ, sɩ́ fawʋllʋŋ fá, kɛŋ yarɩfɩɛlaa a faasa dol.” Ʋ sɩ bʋl ŋɩɩ, mɩ bɩra kɛŋ doluŋ a bʋl, “Mɩ nɩhɩaŋ, bʋl wɩaa pɩmɛ, ŋ sɩ folo pɩmɛ doluŋ.”

²⁰ Ŋɩɩ nɛ ʋ pɩɛsɛmɛ, “Ŋ jɩŋ wɩɩ-la sɩ tɩɩ mɩ kɔ ŋ teeŋ nɛɛ? Ʋ bɩ jaŋ dieni ka dɩ mɩ mɩɩra mʋ yuo Sɩtaanɩ tɩndaarʋ-la sɩɩ beŋ Pɛsɩa tinteeŋ. Dɩ mɩ nɛ mʋa, Sɩtaanɩ tɩndaarʋ-la sɩɩ beŋ Giriisi tinteeŋ ma jaŋ kʋ pɛ dɩ ba yuomi.

²¹ Ama mɩ jaŋ laa sɩpaaŋ bʋl wɩɩ-la ba sɩ ŋmʋnsa hɛ Wʋtɩtɩɩ Teŋ-la lɛ. Nʋʋkala bɩ mɩ lɛ pɛ yuoba, see Wɩa tɩndaara Maakɩl. Ʋ nɩɩ pɔ ma Iziral tɩŋŋaa.