DANƖƐL 1 - WƖA TENIŊ

Danɩɛl arɩ ʋ nandɔnsʋŋ gʋnnɛ wɩaa Babɩlɔŋ lɛ

¹ Jehoyakim sɩ dii Juda tinteeŋ kuoruŋ ʋ jɩ-tori lɛ nɛ, Babɩlɔŋ kuoro Nebukadineza kʋ golli Jerusalɛm kala chu a yuou.

² La Tɩɩna joŋ Juda kuoro Jehoyakim hɛ ʋ nɩsɩŋ lɛ, ʋ pɛ paa tɩntɩnnɩ kɩalɩŋ dɔnsʋŋ sɩ hɛ Wɩa dɩɩ-balɩŋ lɛ. Ʋ paa kɩaa deemba a kaa mʋ Babɩlɔŋ nɛ a bil ʋ vene dɩa lɛ, lee-la ʋ sɩɩ bil ʋ sɩɩfɩaŋ kɩaa.

³ Ŋɩɩ nɛ kuoro Nebukadineza pɩ ʋ tɩntɩnnɩ-hɩaŋ ba sɩɩ yɩrɛ Asɩpɛnas wombiiŋ, dɩ ʋ kɛŋ Iziral tɩmma-la dɔnsʋŋ sɩ lɩɩ kuoru dɩa arɩ nɩalɩŋ ma dɩchɩnɩŋ sɩ yuŋŋie kaa kɔ ʋ teeŋ.

⁴ Ba maga ba ŋaa bapʋɔsɛ biisiŋ sɩ́ bɩ nyɔɔ kala kɛnɛ nɛ, a ŋaa nɩzɔmɔ sɩ kɛŋ ba tɩtɩa hɛ dɔŋɔ dɩ ba gʋnnɛ wɩɩkala, a kɛŋ dɩgɩlɩŋ jegilee, a ŋaa nɩaa ba sɩ daga ba kɛŋ wʋjɩmɩŋ a jaŋ wuo guu jɩŋ wɩaa sɩaa woruŋ, a magɛ dɩ ba tɩtɩŋ kuoru dɩa lɛ. Ʋʋ chɛ dɩ Asɩpɛnas dagɛba Babɩlɔŋ tɩŋŋaa yikoro karɩmɩŋ arɩ ʋ ŋmʋnsʋŋ nɛ.

⁵ Kuoro bɩra bʋla pɩba dɩ ba ŋaa ʋ dɩa kʋdiilee arɩ sɩŋ-la ʋ dɩ ʋ dɩa nɩaa sɩ yie dii kɩaa aŋ nyʋnyʋa a pɩpɩba tapʋlɩɩ kala. Ba jaŋ dagɛba jɩsɩŋ batori ka dɩ ba-na tɩma pɩpɩ kuoro.

⁶ Ba tʋɔŋ nɩalɩŋ sɩ lɩɩ Juda nɛ ŋaa Danɩɛl, Hananaaya, Mɩsɩɛl arɩ Azarɩa.

⁷ Tɩntɩnnɩ-hɩaŋ-la fa hɛ yɩrɩ-falaa nɛ a pɩba. Ʋ hɛ Danɩɛl yɩrɩŋ Bɛlɩtɛsaza, Hananaaya ma yɩrɩŋ Sadɩrak, a hɛ Mɩsal yɩrɩŋ Mɛsak, ka Azarɩa ma yɩrɩŋ ŋaa Abedinego.

⁸ Ama Danɩɛl fa kɛŋ ʋ tʋɔŋ arɩ ʋ bɩ jaŋ dii kuoro dɩa kʋdiilee koo a nyʋa ʋ sɩnɩŋ dɩ ŋɩɩ leŋ dɩ ʋ kɛŋ disiniŋ. Ŋɩɩ nɛ ʋ sʋl tɩntɩnnɩ-hɩaŋ-la dɩ ʋ pɛ ʋ lɛ dɩ ʋ sɩ́ kɩalɩŋ dii a kɛŋ disiniŋ.

⁹ Wɩa leŋ tɩntɩnnɩ-hɩaŋ-la cho Danɩɛl wɩaa a fá ʋ nenige.

¹⁰ Ama tɩntɩnnɩ-hɩaŋ-la bʋla pɩ Danɩɛl, “Mɩɩ fá mɩ kʋhɩaŋ kuoro nɛ. Ʋ nɛ dagɛ ma kʋdiilee arɩ ma kʋnyʋalaa. Dɩ mɩ nɛ leŋe dɩ ma dii kʋŋ dɔŋ dɩ ma yaraa bɩ ma bapʋɔsɛ dɔsɛ-la naga, ʋ jaŋ wuo kpʋmɛ a tɩŋ ma wɩaa.”

¹¹ Ŋɩɩ nɛ Danɩɛl bʋla pɩ nɩɩ-la tɩntɩnnɩ-hɩaŋ-la sɩ lɩɩsa ʋ bibeŋ ʋ-na Danɩɛl, Hananaaya, Mɩsal arɩ Azarɩa,

¹² “Mɩɩ sʋlʋŋ, joŋ tapʋlaa fii a kaa magɩsɛla-na ŋ tɩntɩnnaa a na, sɩ́ la nammɩa pa, aŋ pɩpɩla dɩ-pɩpaarɩŋ arɩ lɩɩŋ dʋndʋŋa dɩ la dii aŋ nyʋnyʋa.

¹³ Ʋ ŋɩɩ harɩŋ lɛ dɩ ŋ beŋ la yaraa aŋ beŋ bapʋɔsɛ biisi-la dɔnsʋŋ sɩɩ dii kuoro dɩa kʋdiilee yaraa a na, a jɩŋ wɩɩ-la ŋ sɩ jaŋ ŋaa la-na ŋ tɩntɩnnaa lɛ.”

¹⁴ Nɩɩ-la sɩɩ bemba sɛɩ a magɩsɛba tapʋlaa fii.

¹⁵ Tapʋlɩa fii sɩ dɛrɛ, dɩ Danɩɛl arɩ ʋ dɔnsʋŋ tɩmma-la kɛŋ yarɩfɩɛlaa, ba yaraa zɔmɔ kɩɩ bapʋɔsɛ biisi-la fa sɩɩ dii kuoro dɩa kʋdiilee kʋŋkala.

¹⁶ Ŋɩɩ wɩaa nɩɩ-la sɩɩ bemba bɩra bɩ ba kʋdiile-la ba fa sɩ jaŋ dii arɩ sɩŋ-la ba fa sɩ jaŋ nyʋa ka pa, aŋ mɩɩra pɩpɩba dɩ-pɩpaarɩŋ.

¹⁷ Wɩa pɩ bapʋɔsɛ biisiŋ deemba banɛsɛ wʋjɩmɩŋ arɩ jɩma dɩ ba wuo jɩŋ teniŋ arɩ wɩɩkala. Danɩɛl-na paala wuo jɩŋ wɩalɩŋ ba sɩ yie na arɩ duosoo tʋɔŋ arɩ duosi dosunuŋ kala bʋbʋɔŋ nɛ.

¹⁸ Jɩsɩ-la batori Nebukadineza sɩ daga sɩ yie, tɩntɩnnɩ-hɩaŋ-la kɛmba kaa mʋ ʋ sɩpaaŋ.

¹⁹ Kuoro bʋl wɩaa ba teeŋ, a na dɩ nʋʋkala tuo a magɛ Danɩɛl, Hananaaya, Mɩsɩɛl arɩ Azarɩa. Ŋɩɩ nɛ kuoro leŋ ba tɩma pʋpʋ.

²⁰ Wɩɩ na-kala kuoro sɩ pɩɛsa a mʋ tɩgɛ wʋjɩmɩŋ arɩ wɩaa sɩaa jɩmɩŋ lɛ, ʋ na dɩ ba nɛ kpɩa ʋ tinteeŋ chichiribee arɩ vʋgʋraa kala naansɩɩŋ fii.

²¹ Ŋɩɩ nɛ Danɩɛl ha tɩma pɩpɩ kuoro ŋɩɩ halɩɩ a kʋ yi Siirus sɩ dii Pɛsɩa tinteeŋ kuoruŋ ʋ jɩ-bumbuŋ lɛ.