AZAAYA 3 - WƖA TENIŊ

La TƖƖNA jaŋ dii Jerusalɛm arɩ Juda nɩaa sarɩya

¹ Má bee na, La TƖƖNA doluŋ kala Tɩɩna sɩɩ pɩ Juda doho nɩaa arɩ Jerusalɛm tɩŋŋaa kʋdiilee arɩ lɩɩŋ jaŋ leŋ dɩ ma bɩra sɩ́ kɩaa deemba na.

² Ba bɩra bɩ jaŋ kɛŋ laalɩyuori-wajɩaba arɩ laalɩyuoroo arɩ sarɩya diiree, Wɩa wʋlaabʋllaa, vʋgʋraa arɩ nɩhɩasɩŋ.

³ Laalɩyuori-hɩasɩ-la sɩɩ beŋ laalɩyuoroo mahɩŋ balɩa arɩ fiiba, arɩ nɩalɩŋ nɩaa sɩɩ zil woruŋ, arɩ nɩalɩŋ sɩ bʋl wɩaa chɩchagɩlɛ kuoroo arɩ nɩalɩŋ sɩ kɛŋ wʋjɩmɩŋ a kaa tɩtɩŋ tɩntɩŋ doho kala arɩ nɩalɩŋ sɩɩ ŋaa chichiribi wɩaa, nɩaa deemba kʋŋkala bɩra bɩ jaŋ hɛ ma tʋɔŋ.

⁴ La TƖƖNA jaŋ ŋaa dɩ hambiisiŋ nɛ bibemba.

⁵ Nɩaa jaŋ nyagɛ dɔŋɔ bibil. Nɩaa jaŋ sii chɩŋ dɔŋɔba lɛ, nandɔsʋŋ jaŋ yʋ dɔŋɔba wɩaa. Hambiisiŋ bɩ jaŋ zizil nɩhɩasɩŋ. Nɩalɩŋ sɩ bɩ lee kɛnɛ ma paala bɩ jaŋ zizil nɩalɩŋ sɩ kɛŋ lee.

⁶ Ʋ jaŋ kʋ yi bʋa kʋbala lɛ dɩ dɩa nɩaa lɩɩsɛ ba naambiiriŋ dɔŋɔ a bʋla pʋ, “Ŋaa la kuoro, bɛɛ wɩaa ŋ-na ha paala kɛŋ gɛrɩŋ nɛ ŋ sɩ jaŋ laalɛ, ŋɩɩ wɩaa ŋaa la sɩpaalaara bʋa deeŋ lɛ la sɩɩ na hɛɛŋ.”

⁷ Ama nɩɩ-la ba sɩ lɩɩsa jaŋ bʋl, “Aɩ, mɩ bɩ jaŋ wuo pɛ ma lɛ, mɩ bɩ jaŋ wuo laa ma sɩpaaŋ, bɛɛ wɩaa mɩ bɩ kʋdiilee koo gɛnnɩŋ kɛnɛ.”

⁸ Jerusalɛm tinteeŋ bɩ chɩna, Juda ma titel, bɛɛ wɩaa ba wʋbʋlaa arɩ ba wʋŋaalaa kala bɩ La TƖƖNA tʋɔŋ ka tɔrɛ, ba vɩaʋ nɛ, ba bɩ kaa faʋ arɩ ʋ sɩ kɛŋ tʋla ma kala.

⁹ Dɩ ŋ nɛ beŋ ba sɩaa lɛ, ŋ jaŋ jɩŋ arɩ ba ŋaa wʋbɔŋ ŋaara nɛ. Ba yie ŋaa wʋbɔmʋŋ pʋlʋmʋŋ tʋɔŋ a nagɛ Sodom tɩŋŋaa fa sɩɩ ŋaa ŋɩɩ nɛ, ba bɩ kaa fɩfaa. Ba jaŋ na hɛɛŋ, ba tɩtɩa nɛ lɛrɛ wʋlɔrʋŋ deeŋ kʋʋ hɛ ba tɩtɩa lɛ.

¹⁰ Bʋla pɩ nɩalɩŋ sɩ kɛŋ tʋɔpʋla dɩ ba jaŋ kɛŋ tʋɔtɔrʋŋ, wɩaa jaŋ vɛŋ woruŋ pɩba. Ba jaŋ dii ba wʋzɔmɔ-la ba sɩɩ ŋaa nyʋʋrʋŋ.

¹¹ Wɩɩŋ puu nɩbɔŋŋɔɔ, wʋlɔrʋŋ jʋʋba nɛ. Wʋbɔmɔ-la ba sɩ ŋaa nɩaa lɛ chɩmɩŋ jaŋ tiŋ ba tɩtɩa lɛ.

¹² Má bee na mɩ nɩaa, hambiisiŋ nɩɩ dɔgɩsɛba, haalaa ma bibemba. Ou mɩ nɩaa, ma sɩpaalaaraa leŋe ma yeŋŋi nɛ a joŋ wombiiŋ ta.

¹³ La TƖƖNA kɛŋ ʋ tɩtɩa hɛ dɔŋɔ nɛ dɩ ʋ dii ʋ nɩaa sarɩya.

¹⁴ La TƖƖNA jaŋ dii ʋ nɩaa nɩhɩasɩŋ arɩ ba sɩpaalaaraa sarɩya. Ʋ sɩ, “Ma dii mɩ tinteeŋ kala kpʋ nɛ, a gɩrɩma laa summoo kɩaa a kaa mʋ su ma dɩɩsɩŋ.”

¹⁵ La TƖƖNA doluŋ kala Tɩɩna sɩ, “Ma bɩ wombiiŋ kɛnɛ dɩ ma nʋɔsɛ mɩ nɩaa bil tinteeŋ a kɛŋ summoo jɩla tutuu.”

¹⁶ La TƖƖNA bɩra sɩ, “Ma bee na Jerusalɛm haalaa sɩɩ dagɛ ba tɩtɩa ŋɩɩ, ba yie kpɩɛrɛ ba tɩtɩa nɛ a fɩɛla vɩvɛŋ, ka ba naahɔɔnʋŋ dʋdɔŋ aŋ kɛŋ nyuŋ je a gɔllɔ kɛŋ ba sɩaa kukosi baalaa.”

¹⁷ Ŋɩɩ wɩaa, La TƖƖNA jaŋ leŋ naawɩɩlaa ŋaa Jerusalɛm haalaa nyusoo lɛ dɩ ba puori.

¹⁸ Dɩ tapʋlɩɩ-la nɛ yie, La TƖƖNA jaŋ kɛŋ kɩalɩŋ kala Jerusalɛm haala-la sɩ kaa dɩdagɛ ba tɩtɩa laa, ba naahɔɔnʋŋ, banzɔlɔba arɩ nyu-kpallɩŋ.

¹⁹ Ba dɩgɩlɩŋ kpɛnsɩŋ, na-hɔɔnʋŋ arɩ nyu-kpal duduosu-la ba sɩ kaa tɔ ba tɩtɩa,

²⁰ ba naahɔɔnʋŋ arɩ nyu-chuuluŋ arɩ ba tʋlaalɩɩ kɔlɩbɔba arɩ kɩalɩŋ ba sɩ kaa ŋɩŋaa chichiribi wɩaa,

²¹ kuori-nenii-pɩraa arɩ nenii-pɩra-la ba sɩ yie joŋo hɛ mɩɩsɩŋ lɛ,

²² ba gɛrɩ-zɔŋŋɔɔ arɩ kɩalɩŋ dɔnsʋŋ ba sɩɩ laalɛ putimaaniba,

²³ beenantɩrɛba arɩ gɛrɩ-zɔŋŋɔɔ.

²⁴ Bʋa kʋbala jaŋ yi, ba sɩɩ chɛ dɩ ba yaraa sʋɔra sɩŋ ŋɩɩ, ba jaŋ mɩɩra sʋsʋɔrɛ kʋpʋɔŋ. Ba sɩ cho dɩ baa vɔɔ gɛrɩpɛlɩɛɛ-bii-zɔŋŋɔɔ ŋɩɩ, ba jaŋ mɩɩra vʋvɔɔ ŋmɛsɩŋ. Ba sɩ cho dɩ ba nyu-pʋnaa mɩɛla ŋɩɩ, ba nyusoo jaŋ mɩɩra puori. Ba sɩ cho baa vɔɔ gɛrɩ-zɔŋŋɔɔ ŋɩɩ, gɛrɛ-kɔsʋmɔɔ nɛ ba jaŋ mɩɩra vʋvɔɔ. Ba zɔmʋŋ kala jaŋ lɛl ka dɩ ba yaraa kala ŋaa fʋfʋʋnʋŋ.

²⁵ Ma baalaa arɩ ma laalɩyuori-wajɩaba kala jaŋ sʋʋ laalɩŋ lɛ.

²⁶ Jerusalɛm kala jaŋ ŋaa yele dɩ ba tɩta jembiee. Ʋ jaŋ wuoli a nagɛ summo sɩ hɔnɔ a bɩ kʋŋkala kɛnɛ.