AMƆS 6 - WƖA TENIŊ

Wɩɩŋ puu Iziral tɩmma-la sɩ hɔnɔ ta jɩa

¹ Wɩɩŋ puu ma nɩalɩŋ sɩ hɛ Zaayɔŋ lɛ a hɔnɔ ta jɩa arɩ ma nɩalɩŋ sɩ hɛ Samarɩa peel-la lɛ, wɩɩkala bɩ maa walɩmɛ. Ma Iziral tintee balɩŋ deeŋ sɩpaalaarɩ-duoruŋ nɩaa sɩ yie kɔ ma teeŋ a chɩchɛ dɩ ma pɛ ba lɛ, ma jaŋ na hɛɛŋ.

² Má mʋ tabal-la ba sɩɩ yɩrɛ Kalɩnɛ a na, aŋ kiele mʋ na tabal-la ma ba sɩɩ yɩrɛ Hamaf, a joŋo tuu beŋ tabal-la ma sɩ hɛ Fɩlɩsɩtɩa tinteeŋ lɛ baa yɩrɛ Gaf. Ba kpɩa ma Juda arɩ Iziral tinteyee nɛɛ? Ba tinteeŋ jalɩa kɩɩ ma kʋa nɛɛ?

³ Ma yʋ tapʋlɩɩ-la La TƖƖNA sɩ jaŋ dii nɩaa sarɩya wɩaa nɛ, aŋ leŋ ma wʋŋaalaa lɛrɛ tapʋlɩɩ-la kʋʋ kpagɛ.

⁴ Wɩɩŋ puu ma nɩalɩŋ sɩ kɛŋ kɩaa aa pɩŋ moribii-balaa kʋpɩnaa nyuŋ, a hɔŋ ma kumpuŋŋuba nyuŋ a kpʋ pie-nɛrɛɛ arɩ nɛ-nɛrɛɛ chɩchaŋ.

⁵ Ma yie yɩɩ yɩɩl-tɔɔnʋŋ a du chenniŋ hɛ, a yɩɩ yɩɩl-falaa a nagɛ Devit fa sɩɩ ŋaa ŋɩɩ.

⁶ Ma yie nyʋnyʋa sɩ-gbaŋ-balaa a tɩtɩsɛ tʋlaalɩɩ-zɔŋŋɔɔ, aŋ bɩ Iziral sɩ pɩŋ jikpeeŋ wɩaa ka yel.

⁷ Ŋɩɩ wɩaa, ma nɛ ba jaŋ laa sɩpaaŋ kɛsɛ kaa mʋ yoŋ-baga dɩ ma ŋaa yosi. Sɩma-la ma sɩɩ nɩɩ jaŋ dɛrɛ.

La TƖƖNA bɛrɛ Iziral tɩŋŋaa babii-ballɩŋ nɛ

⁸ La Tɩɩna Wɩɩjarɩbakɔ ŋmɩɛsɛ ʋ tɩtɩa nɛ. La TƖƖNA doluŋ kala Tɩɩna sɩ: “Ma Jekɔb doho nɩaa, mɩ bɛrɛ ma babii-ballɩɩ-la nɛ, a bɛrɛ ma moribiee dɩɩ-bala-la ma. Mɩ jaŋ joŋ ma tabal-la arɩ ʋ kɩaa kala pɩ ma dʋndɔŋŋɔɔ.”

⁹ Ŋɩɩ nɛ Amɔs bʋl, “Dɩ ma nɩaa fii nɛ ka a faa dɩa lɛ, ba ma ha jaŋ sʋʋ.

¹⁰ Dɩ ba naambii nɛ paa sʋʋnʋ-la kaa lɩɩ dɩ ʋ nyɩgɛ koo dɩ ʋ hugi, ʋ jaŋ pɩɛsɛ nɩɩ-la kala sɩ ka, ‘Nʋʋ dɔŋ ha hɛ dɩa lɛ a pɛ ŋ lɛɛ?’ Nɩɩ-la jaŋ bʋl, ‘Aɩ,’ Ʋ jaŋ bɩra bʋl, ‘Tɔrɛ ŋ niiŋ, pʋpɔ dɩ ŋ sɩ́ La Tɩɩna yɩrɩŋ yɩrʋ.’

¹¹ Dɩ La Tɩɩna nɛ suri ʋ niiŋ, dɩɩ-balaa arɩ dɩɩ-biisiŋ kala jaŋ tele yɛrɛ muno muno.

¹² Janɩŋ ka fá bʋŋ nyuŋ nɛɛ? Ba kɛŋ nɛsɩŋ pɩpɛrɛ mʋgʋ-balɩŋ tʋɔŋ nɛɛ? Ama ma-na kɛŋ wʋtɩtɩɩ bɩrɩmɛ wʋnyɩɛrɩŋ nɛ, aŋ kɛŋ wʋnyɩɛrɩŋ ma bɩrɩmɛ wʋtɩtɩɩ.

¹³ Maa jʋɔsʋ nɛ arɩ ma sɩ yuo dii tasɩ-la ba sɩɩ yɩrɛ Lo-Dɛba arɩ Kaanem aŋ ŋmoo ma bɔyɛ lɛ a bʋl, ‘La tɩtɩa doluŋ nɛ la kaa yuo diiba.’ ”

¹⁴ La Tɩɩna Wɩa doluŋ kala Tɩɩna sɩ, “Mɩ jaŋ yigi tintee kʋbala ma hɛ Iziral tɩŋŋaa lɛ. Ba jaŋ dɔgɩsɛma a chɩŋ Lebo Hamaf sɩ hɛ wɩɩpɔsʋŋ nagʋa dɩɩrɩŋ a kaa mʋ Araba fuonaaŋ sɩ hɛ wɩɩpɔsʋŋ nadiiŋ dɩɩrɩŋ.”