AMƆS 2 - WƖA TENIŊ

¹ Wɩɩ-la La TƖƖNA sɩ bʋla nɛ ŋ-la: “Mɩ bɩ jaŋ leŋ dɩ mɩ baanɩŋ fɩɛlɛ, mɩ jaŋ dɔgɩsɛ Mʋab nɩaa a tɩŋ ba wʋbɔŋ dandaŋ-la wɩaa. Ba nɛ nyɩgɛ Ɛdɔm kuoro haŋgbelee ba bɩrɩmɛ tʋɔrʋŋ.”

² Wɩɩ-la La Tɩɩna sɩ bʋla nɛ ŋ-la: “Mɩ jaŋ joŋ nyiniŋ a hɛ Mʋab tinteeŋ lɛ dɩ ʋ dii taŋ-la ba sɩɩ yɩrɛ Kɛrɩɔf dɩɩ-duoruŋ. Laalɩyuoroo jaŋ ŋmʋʋ banyilliŋ aŋ ŋɩŋaa laalɩyuori goŋ, ka dɩ nɩalɩŋ sɩ hɛ Mʋab lɛ sʋsʋʋ.”

³ La Tɩɩna bɩra sɩ, “Mɩ jaŋ chei Mʋab tinteeŋ kuoro aŋ kpʋ ʋ nɩhɩasɩŋ kala.”

⁴ Wɩɩ-la La Tɩɩna sɩ bʋla nɛ ŋ-la: “Mɩ bɩ jaŋ leŋ dɩ mɩ baanɩŋ fɩɛlɛ, mɩ jaŋ dɔgɩsɛ Juda nɩaa a tɩŋ ba wʋbɔŋ dandaŋ-la wɩaa. Ba vɩa wɩalɩŋ mɩ-na ba TƖƖNA sɩ dagɛba nɛ, ba bɩ mɩ niiŋ sɛyɛ. Ba leŋe wʋnyɩɛrɩ vesi-la ba naabalɩmaba fa sɩɩ kpaarʋ kɛmba yeŋŋi nɛ.

⁵ Mɩ jaŋ joŋ nyiniŋ hɛ Juda lɛ dɩ ʋ dii Jerusalɛm dɩɩ-duoruŋ.”

La Tɩɩna jaŋ dii Iziral tɩŋŋaa sarɩya

⁶ Wɩɩ-la La Tɩɩna sɩ bʋla nɛ ŋ-la: “Mɩ bɩ jaŋ leŋ dɩ mɩ baanɩŋ fɩɛlɛ, mɩ jaŋ dɔgɩsɛ Iziral nɩaa a tɩŋ ba wʋbɔŋ dandaŋ-la wɩaa. Ba kɛsɛ tʋɔpʋl tɩŋŋaa yallɛ moribiee nɛ, aŋ kɛsɛ nɩalɩŋ ma sɩ bɩ ba tɩtɩa lɛ wuo pɛ a yallɛ nɛntɛŋŋɛɛ yalɩŋ.

⁷ Ba kɛŋ summoo jɩla tutuu nɛ aŋ kɛŋ nɩalɩŋ ma sɩ bɩ ba tɩtɩa lɛ wuo pɛ gɩɩgaa ta. Ba chei mɩ yɩrɩ-zɔŋ-la nɛ, bɛɛ wɩaa nyɩmmaba arɩ biiriŋ pɛ ha-bala nɛ a kaa pɩpɩŋ.

⁸ Gɛnnɩ-la ma nɩaa sɩ joŋo bil chɩŋŋaa bʋa lɛ nɛ ba kaa jɛrɛ pɩpɩŋ Wɩɩsʋllɩ koru na-kala bʋbʋɔŋ, aŋ kɛŋ ba sɩ keri chɩŋŋaa pɩ nɩaa ba tiŋ moribie-la, a yɔɔ tɩɩnɛnɛɛ sɩnɩŋ nyʋnyʋa ba vene dɩa lɛ.

⁹ Iziral tɩmma, Amɔrɩ tɩŋŋaa fa hɛ Kɛnaŋ tinteeŋ lɛ nɛ ka ma-na jʋʋ nɩmɛ. Ba fa duomo nɛ woruŋ a nagɛ kuolu tɩɩsɩŋ a kɛŋ doluŋ ma a nagɛ piine tɩɩsɩŋ, ka mɩ chei ba nɛnɛɛ arɩ ba naapoloo kala.

¹⁰ Mɩ nɛ kɛmma kaa kʋ lɩɩ Ijipiti tinteeŋ lɛ, a kɛmma gɔllɛ tintee-hɩlɩŋ lɛ jɩsɩŋ mahɩŋ balɩa a joŋ Amɔrɩ tɩŋŋaa tinteeŋ pɩma.

¹¹ Mɩ nɛ lɩɩsɛ ma dɔnsʋŋ ma ŋaa mɩ wʋlaabʋllaa, ma dɔnsʋŋ ŋaa nɩalɩŋ sɩ joŋ ma tɩtɩa pɩmɛ baa yɩrɛ Nazarɩ tɩŋŋaa. Iziral tɩmma, wɩɩŋ deeŋ bɩ wʋtɩtɩɩ ŋaa? Mɩ-na ma TƖƖNA nɛ bʋla.

¹² Ama ma pɔ dɩ mɩ wʋlaabʋllaa sɩ́ mɩ wɩaa bʋl nɛ, aŋ fʋgɛ Nazarɩ tɩŋŋaa hɛ ba nyʋnyʋa sɩnɩŋ.

¹³ Mɩ jaŋ nyagɛma bil tinteeŋ dɩ ma ŋmʋʋrɛ, a nagɛ mɩaa sɩ su toruko a nyagʋ ŋmʋʋrɛ ŋɩɩ.

¹⁴ Dɩ ma nɛ kɛŋ naaduoruŋ, ma bɩ jaŋ wuo fá lɛl. Dɩ ma kɛŋ doluŋ ma, ʋ jaŋ dɛrɛ, laalɩyuoru ma bɩ ʋ mɩɩsɩŋ wuo yuo laa.

¹⁵ Dɩ ma paala cho ma jɩŋ toŋ yuonuŋ a magɛ ŋɩɩ ma kala, ma jaŋ mɩɩra fá. Laalɩyuoro naaŋ sɩ lɩma bɩ jaŋ wuo fá laa ʋ tɩtɩa, ma paala cho ma jɩŋ jaaba jɩlɩŋ a magɛ ŋɩɩ ma kala, ma bɩ jaŋ wuo fá laa ma mɩɩsɩŋ.

¹⁶ Tapʋlɩɩ-la ma laalɩyuori bɔɩ-duo tɩŋŋaa jaŋ joŋ ba kɩaa ta aŋ fá arɩ yarɩ-biree. Mɩ-na ma TƖƖNA nɛ bʋla.”