2 Pɩɩta 3 - WƖA TENIŊ

Tapʋlɩɩ-la La Tɩɩna Yesu sɩ jaŋ mɩɩra kɔ

¹ Mɩ nandɔŋ-kpɩanaba, mɩ teŋ-lɩamɩŋ nɛ ŋ-la mɩ sɩ ŋmʋnsa pɩpɩma. Mɩ tenni-la balɩamɩŋ tʋɔŋ, mɩ bʋl wɩaa liliisima dɩ ma wuo to Wɩa arɩ tʋɔbɩɩŋ zɔŋŋɔɔ.

² Mɩ bʋl wɩaa deemba dɩ ma liliisi wɩalɩŋ Wɩa wʋlaabʋlla-la fa sɩ bʋla faafaa, dɩ ma sɩ́ ba yʋ. Má pɛ liliisi wɩalɩŋ La Tɩɩna Yesu fa sɩ to ma nanzɔɔba lɛ a bʋla pɩma. Ʋ nɛ la Laataara.

³ Mɩɩ chɛ dɩ ma laa sɩpaaŋ jɩŋ arɩ bʋa-la lɛ dʋnɩa sɩ jaŋ kʋ kpagɛ dɩdɛrɩŋ, nɩsieree jaŋ to ba tʋɔtɔrɛ wʋŋaalaa lɛ a sisierima lɛ.

⁴ Ba jaŋ pɩɛsɛma, “Yesu fa sɩ hɛ niiŋ arɩ ʋ jaŋ mɩɩra kɔ, nɩɩ nɛ ʋ hɛ? Chɛ bɛɛ nɛ saa ʋ jaŋ bɩra kɔ?” Ba jaŋ bɩra bʋl dɩ bʋa-la lɛ nɩalɩŋ sɩ laa sɩpaaŋ laa Yesu wɩaa dii sɩ sʋba a kaa kʋkɔ bʋa deeŋ lɛ, kʋŋkala bɩ bɩrɩma, ba kala ha nagɛ ŋɩɩ Wɩa sɩ ŋaaba nɛ dʋnɩa dɩ-suomuŋ.

⁵ Nɩalɩŋ sɩɩ bʋl wɩaa deemba chaasa jɩŋ wɩalɩŋ kala Wɩa sɩ ŋaa nɛ, ama ba bɩ chɛ dɩ ba sɛɩ arɩ faafaa kala dʋnɩa fa tuo a kaa mʋ yi bʋa-la lɛ Wɩa sɩ bʋl wɩaa, ka wɩa-nyuŋ arɩ tinteeŋ kala-na kʋ hɛ nɩmɛ. Tinteeŋ fa hɛ lɩɩŋ tʋɔŋ nɛ, ka Wɩa kaa pɔrɛ ʋ pɩŋ ʋ dʋndʋŋa, ka lɩɩŋ ma pɩŋ ʋ dʋndʋŋa.

⁶ Lɩɩ-la tɩtɩa nɛ Wɩa joŋo tɔ bumbuŋ dʋnɩa-la, ʋ kala chei.

⁷ Wɩa bɩra bʋla arɩ ʋ jaŋ leŋ dɩ nyiniŋ dii tinteeŋ arɩ wɩa-nyuŋ kala sɩ hɛ nɩmɛ lɛɛlɛ ŋ-la. Ama ba jaŋ hɛ nɩmɛ halɩɩ, dɩ tapʋlɩɩ-la Wɩa sɩ jaŋ dii dʋnɩa nɩaa sarɩya kʋ yi. Nɩalɩŋ sɩ bɩ ʋ niiŋ wɩaa ka to, Wɩa jaŋ joŋ cheeriŋ pɩba a cheiba.

⁸ Ama mɩ nandɔŋ-kpɩanaba, má sɩ́ yʋ, arɩ Wɩa teeŋ tapʋl-bala nagɛ jɩsɩŋ bʋɩ nɛ, ka jɩsɩŋ bʋɩ ma nagɛ tapʋl-bala.

⁹ Nɩaa dɔnsʋŋ bɩɩna arɩ Wɩa fɩɛla nɛ arɩ wɩalɩŋ ʋ sɩ sɩ ʋ jaŋ ŋaa lɛ. Ʋ bɩ fɩɛlɛ, ama ʋ kɛŋ kenyiri nɛ a tɩŋ ma wɩaa, bɛɛ wɩaa ʋ bɩ chɛ dɩ ma kʋŋkala lɛl. Ʋʋ chɛ dɩ nʋʋkala bɩrɩma lɩɩ ʋ wʋbɔŋŋɔɔ lɛ nɛ.

¹⁰ Ama tapʋlɩɩ-la La Tɩɩna Yesu jaŋ sɩ kɔ, ʋ jaŋ nagɛ gaara sɩ kʋ dɩ nɩaa lɛ. Bʋa-la lɛ nʋʋkala jaŋ nɩɩ huuri-bal kʋbala wɩa-nyuŋ. Wɩa-nyuŋ jaŋ lɛl, ka kʋŋkala sɩ hɛ wɩa-nyuŋ ma jaŋ ŋmɩɛrɛ nyiniŋ tʋɔŋ a nyɩɩgɛ, ka dɩ tinteeŋ kʋŋkala ma dii nyiniŋ.

¹¹ Ma sɩ jɩma arɩ dʋnɩa kala jaŋ lɛl ŋɩɩ, ɛɛ nɛ ma bɩɩna arɩ ʋ maga dɩ ma mɛlɛ nagɛ? Ʋ maga dɩ ma joŋ ma tɩtɩa kala a pɩ Wɩa nɛ, a sɩ́ disiŋ kala kɛŋ, a tuto ʋ wombii-la.

¹² Ma sɩɩ gbɛrɛ tapʋlɩɩ-la La Tɩɩna Yesu sɩ jaŋ kɔ ŋɩɩ, má pɛ pipesi, dɩ ma ŋaa wɩɩ na-kala ma sɩ jaŋ wuo ŋaa dɩ tapʋlɩɩ-la yima lɩma. Tapʋlɩɩ-la nɛ wɩa-nyuŋ jaŋ ŋmɩɛrɛ nyiniŋ tʋɔŋ a nyɩɩgɛ. Ka kʋŋkala sɩ hɛ wɩa-nyuŋ ma jaŋ ŋmɩɛrɛ nyiniŋ lɛ a lɛl.

¹³ Faafaa-la Wɩa bʋla arɩ ʋ jaŋ ŋaa wɩa-nyu-falɩɩ arɩ tintee-falɩɩ. Lee-la ʋ nɩaa jaŋ ŋɩŋaa tʋɔpʋl wɩaa. Wɩaa deemba nɛ laa gbɛrɛ.

¹⁴ Ŋɩɩ wɩaa mɩ nandɔŋ-kpɩanaba, ma sɩɩ gbɛrɛ dɩ ma na wɩaa deemba ŋɩɩ, má fɩɛsɛ sɩɩŋ a leŋ dɩ ma mɛlɛ zɔŋ, dɩ tapʋlɩɩ-la nɛ yie, dɩ Wɩa sɩ́ cheeriŋ joŋo pɩma, ka dɩ ma dɩ Wɩa sɩŋ.

¹⁵ Mɩ naambiiriŋ, ʋ maga dɩ ma jɩŋ arɩ La Tɩɩna Yesu kɛŋ kenyiri nɛ. Ʋ ŋaa ŋɩɩ dɩ ʋ wuo laama ta nɛ. Wɩaa deemba tɩtɩa nɛ la naambii-chooluŋ Pɔɔl ma ŋmʋnsa pɩma. Wɩa nɛ pʋ wʋjɩmɩŋ deeŋ ʋ kaa bʋl wɩalɩŋ.

¹⁶ Wɩaa deemba nɛ ʋ bʋl ʋ tenni-la kala lɛ. Wɩalɩŋ ʋ sɩ bʋla ʋ tenni-la lɛ, ba dɔnsʋŋ hɛyɛ. Nɩaa bɩ ba bʋbʋɔŋ jɩŋ. Nɩalɩŋ ma sɩ bɩ wɩaa jɩŋ arɩ nɩalɩŋ sɩ bɩ wɩalɩŋ ba sɩ laa dii lɛ chɩna kpaŋ kpaŋ yie kɛŋ wɩalɩŋ kaa bɩrɩmɛ wʋwogusu, arɩ ba sɩ yie kɛŋ Wɩa teniŋ wɩaa sɛmɛ dɔnsʋŋ kaa bɩrɩmɛ ŋɩɩ. Ba sɩɩ ŋaa ŋɩɩ, Wɩa jaŋ cheiba.

¹⁷ Ma-na mɩ naambii-kpɩanaba, ma paala jɩŋ arɩ wʋnyɩɛraa deemba jaŋ kɔ. Ŋɩɩ wɩaa, má pɔ ma tɩtɩa lɛ dɩ nɩalɩŋ sɩ bɩ Wɩa niiŋ ka to sɩ́ wuo nyɩsɛma dɩ ma to ba wʋnyɩɛrɩɩ-la harɩŋ, aŋ joŋ wɩalɩŋ ma sɩ laa dii a chɩŋ ba lɛ ta.

¹⁸ Má leŋ dɩ ma wʋjɩmɩŋ pʋŋa pɛ La Tɩɩna Yesu Kirisito wɩaa, Nɩɩ-la sɩ ŋaa la Laataara. Dɩ ma nɛ ŋaa ŋɩɩ, ʋ jaŋ pɛ ma lɛ. Ʋ yɩrɩŋ nɛ nɩaa jaŋ yɩrɛ lɛɛlɛ a kaa mʋ wuu. Amɩɩ.