2 Pɩɩta 2 - WƖA TENIŊ

Wʋnyɩɛrɩ kerichiba sɩ nagɛ ŋɩɩ

¹ Bumbuŋ wʋnyɩɛraa fa hɛ nɩalɩŋ sɩ laa Wɩa wɩaa dii tʋɔŋ, aa fugi arɩ ba ŋaa Wɩa wʋlaabʋllaa nɛ. Ŋɩɩ tɩtɩa nɛ wʋnyɩɛrɩ kerichiba jaŋ kʋ hɛ ma tʋɔŋ a lʋara dɩdagɛma wɩalɩŋ sɩ jaŋ cheima a paala bʋl arɩ ba bɩ La Tɩɩna Kirisito jɩŋ, Nɩɩ-la sɩ laaba ta. Ŋɩɩ jaŋ leŋ dɩ Wɩa guu cheiba.

² Nɩaa jaŋ yʋgɛ a to ba harɩŋ a ŋɩŋaa wʋlɩɩlɩ-la ba sɩɩ ŋaa. Ba wʋŋaalaa jaŋ leŋ dɩ nɩaa bʋl wɩaa a chichei Wɩa wombii-tɩtɩɩ-la la sɩɩ to.

³ Wʋnyɩɛrɩ kerichi deemba jaŋ kɛŋ tʋɔ-luŋuŋ. Ba jaŋ kɛŋ nii-sɩma a nyɩnyɩsɛma a lɩlaa ma kɩaa ma. Faafaa kala nɛ Wɩa dagɛ arɩ ʋ jaŋ dii nɩaa deemba doho sarɩya. Nɩɩ-la sɩ jaŋ cheiba bɩ doŋ pɩna.

⁴ Bumbuŋ kala nɛ Wɩa tɩndaaraa dɔnsʋŋ fa ŋaa wʋbɔŋŋɔɔ. Ba sɩ ŋaa ŋɩɩ, Wɩa bɩ ba leŋe pɛɩ. Ʋ kɛsɛba a jomba yuo hɛ Wɩa-nyiniŋ tʋɔŋ. Ba kɛŋ chɔrʋmɔɔ vɔɔba a leŋ ba pɩŋ birimiŋ tʋɔŋ. Ba jaŋ hɛ nɩmɛ a kaa mʋ yi tapʋlɩɩ-la Wɩa sɩ jaŋ dii dʋnɩa nɩaa sarɩya.

⁵ Bʋa-la lɛ Nowa fa sɩ hɛ ʋ mɩɩsɩŋ lɛ, nɩalɩŋ kala fa sɩɩ ŋaa wʋbɔŋŋɔɔ, Wɩa fa bɩ ba leŋe pɛɩ. Ʋ leŋe lɩɩŋ pɛllɛ paa nɩbɔŋŋɔɔ deemba kala nɛ, aŋ leŋ Nowa arɩ ʋ nɩaa balɩpɛ dʋndʋŋ. Nowa fa bʋla pɩ nɩalɩŋ dɩ baa ŋaa wɩalɩŋ sɩɩ to Wɩa wombiiŋ.

⁶ Bʋa-la lɛ tasɩŋ balɩa ma fa hɛ nɩmɛ. Ba yɩraa nɛ Sodom arɩ Gomora. Ba nɩaa fa sɩɩ ŋaa wʋbɔŋŋɔɔ, Wɩa fa dɔgɩsɛba nɛ. Ʋ fa joŋ nyiniŋ nɛ a nyɩgɛba, ba kala dii buru aŋ ka tʋɔrʋŋ dʋndʋŋa. Wɩa dagɛ ŋɩɩ arɩ ʋ jaŋ dɔgɩsɛ nɩalɩŋ kala sɩ bɩ ʋ wombiiŋ ka to.

⁷ Baal kʋbala ba faa yɩrɛ Lɔt ma fa hɔŋ Sodom arɩ Gomora tinteeŋ nɛ a ŋaa tʋɔpʋl tɩɩna. Ʋ dʋndʋŋa nɛ Wɩa kaa lɩɩsɛ tasɩ-la tʋɔŋ. Nɩbɔmɔ-la wʋŋaalaa fa chei ʋ tʋɔŋ woruŋ.

⁸ Lɔt fa sɩ hɔŋ nɩbɔmɔ-la tʋɔŋ, ʋ yie na aŋ pɛ nɩɩ wʋbɔmɔ-la kala ba fa sɩɩ ŋaa tasɩ-la tʋɔŋ tapʋlɩɩ na-kala. Wɩaa deemba nɛ leŋe ʋ tʋɔŋ viisi, bɛɛ wɩaa ʋ-na fa ŋaa tʋɔpʋl tɩɩna nɛ.

⁹ Wɩaa deemba kala dagɛla arɩ Wɩa jɩŋ wombii-la ʋ sɩ jaŋ to a laa tʋɔpʋl tɩŋŋaa ta nɛ, dɩ Sɩtaanɩ sɩ́ wuo magɩsɛba dɩ ba ŋaa wʋbɔŋ. Ba bɩra dagɛla ŋɩɩ Wɩa sɩ jaŋ ŋaa a dɔgɩsɛ nɩbɔŋŋɔɔ ma a kaa mʋ yi tapʋlɩɩ-la ʋ sɩ jaŋ dii dʋnɩa nɩaa sarɩya.

¹⁰ Ba tʋɔŋ, Wɩa jaŋ faasa dɔgɩsɛ nɩalɩŋ sɩɩ ŋaa wʋlɩɩlɩŋ arɩ nɩalɩŋ sɩ bɩ chɛ dɩ ba joŋ ba tɩtɩa a hɛ Wɩa nɩsɩŋ lɛ. Wʋnyɩɛrɩ kerichi deemba bɩ nʋʋkala ka fá, aŋ pɛ kɛŋ nyuduoŋ ma a ŋɩŋaa ba tʋɔtɔrɛ wɩaa. Ŋɩɩ nɛ tɩɩ ba yie tʋʋsɛ Wɩa tɩndaara-la sɩ kɛŋ yɩrɩŋ a hɛ Wɩa-jaŋ lɛ.

¹¹ Wɩa tɩndaara-la nɛ kɛŋ doluŋ a kɩɩ wʋnyɩɛrɩ kerichi deemba. Ama Wɩa tɩndaara-la bɩ ba ka tʋʋsɛ, a bɩ cheeriŋ ma joŋo pɩ nɩaa deemba Wɩa sɩpaaŋ.

¹² Wʋnyɩɛrɩ kerichi deemba yie ŋɩŋaa wɩaa arɩ pʋsʋŋ sɩ bɩ wʋjɩmɩŋ kɛnɛ sɩɩ ŋaa ŋɩɩ nɛ. Ba yie nagɛ pʋsʋŋ nɩaa sɩ yie dɩɛsɛ dɩ ba kɛsɛ kpʋ nɛ. Ba yie bʋbʋl wʋbɔŋŋɔɔ nɛ aa tɩgɛ wɩalɩŋ ba sɩ bɩ jɩŋ lɛ. Ba sɩ joŋ cheeriŋ pɩ nɩaa dɔnsʋŋ ŋɩɩ, ŋɩɩ tɩtɩa nɛ Wɩa jaŋ joŋ cheeriŋ pɩba dɩ ba sʋʋ.

¹³ Wʋbɔmɔ-la ba sɩɩ ŋaa nɩaa lɛ, Wɩa jaŋ joŋ wʋbɔmɔ-la chɩmɩŋ a tiŋ ba lɛ. Ba tʋɔtɔrʋŋ kala nɛ dɩ ba gɔllɔɔ ŋaa wʋlɩɩlɩŋ deemba ba bɩ kaa fɩfaa. Ba sɩɩ ŋaa ŋɩɩ, nɩaa yie chichei ma yɩrɩŋ a joŋ hɩɩsɩŋ aa hɛ ma lɛ. Ba yie guoli ma tʋɔŋ nɛ ma kala didii kɩaa, ama ba yie lɩɩ ma harɩŋ a ŋɩŋaa ba wʋlɩɩlɩŋ.

¹⁴ Bʋa na-kala lɛ dɩ ba nɛ na haal, ba yie chɛʋ nɛ ba tʋɔŋ lɛ. Ba-na bɩ lɔl arɩ wʋbɔŋŋɔɔ ŋaanɩŋ. Ba yie nyɩnyɩsɛ nɩalɩŋ sɩ bɩ Wɩa wɩaa lɛ chɩna kpaŋ kpaŋ dɩ ba ŋaa wʋbɔŋ. Ba ŋaa tʋɔ-luŋ tɩmma nɛ. Wɩa kalɩba hɛ ba lɛ nɛ.

¹⁵ Nɩaa deemba vɩa Wɩa wombiiŋ nɛ a yeŋŋi. Baa to bumbuŋ baal kʋbala harɩŋ nɛ baa yɩrɛ Balam. Ʋ nyɩmma yɩrɩŋ nɛ fa Bioo. A tɩŋ moribiee wɩaa Balam fa vɩa Wɩa wɩaa aŋ tuto wʋbɔŋŋɔɔ harɩŋ.

¹⁶ Ʋ sɩ vɩa ŋɩɩ, Wɩa dagʋ a leŋ Balam kakumo bʋl wɩaa a nagɛ nuhuobiine, a kɛrʋ dɩ ʋ sɩ́ wʋyaayasɩŋ ŋaa.

¹⁷ Wʋnyɩɛrɩ kerichi deemba nagɛ lɩɩ-bulo sɩ hɩla nɛ. Ba bɩra nagɛ duonuŋ sɩ tɩna, aŋ ka peliŋ ŋaa kiri ʋ bɩ nɩa nɛ. Nɩaa deemba, Wɩa jaŋ jomba hɛ biriŋ lim tʋɔŋ.

¹⁸ Ba yie bʋbʋl babiibal wɩaa sɩ bɩ bʋbʋɔŋ kɛnɛ. Ba yie kɛŋ nii-sɩma a nyɩnyɩsɛ nɩalɩŋ sɩ bumo lɩɩsɛ ba tɩtɩa nɩalɩŋ sɩ bɩ wʋtɩtɩɩ jɩŋ lɛ.

¹⁹ Ba yie nyɩnyɩsɛba a bʋl dɩ ba nɛ to ba harɩŋ, ba jaŋ tɩɩ ba tɩtɩa. Ama wʋnyɩɛraa deemba paala bɩ ba tɩtɩa tɩɩ. Ba nɛ wʋbɔŋŋɔɔ yosuŋ, bɛɛ wɩaa dɩ nʋʋkala nɛ leŋe dɩ wɩɩ malʋ, dɩ ʋ nɛ bɩ wɩɩ-la wuo leŋ, ʋ yie kʋ ŋaa wɩɩ-la yoŋ nɛ.

²⁰ Dɩ nɩaa nɛ kʋ jɩŋ La Tɩɩna Yesu Kirisito, a lɩɩsɛ ba tɩtɩa dʋnɩa wɩalɩŋ sɩ bɩ zɔŋ lɛ, aŋ bɩra leŋ dɩ wɩaa deemba malba a kɛŋ doluŋ ba lɛ, nɩaa deemba dɩdɛrɩŋ nɛ jaŋ bɔmɔ kɩɩ bʋa-la lɛ ba ha sɩ bɩ wʋtɩtɩɩ-la jɩŋ.

²¹ Ʋ fa jaŋ kpɩa dɩ ba nɛ fa bɩ tʋɔpʋla wombiiŋ jɩŋ, ama ba jɩmʋ nɛ aŋ joŋ harɩŋ yɩa wɩalɩŋ Wɩa fa sɩ bʋla pɩba dɩ baa ŋaa. Wɩaa deemba bɩ disiniŋ kɛnɛ.

²² Wɩɩŋ deeŋ sɩ ŋaa nɩaa deemba lɛ daga arɩ namaga-la nɩaa sɩɩ magʋ ŋaa wʋtɩtɩɩ nɛ. Ba sɩ, “Vaha yie gbu kɩaa nɛ aŋ gʋra paa dii. Ba yie fo tooŋ ma lɩɩŋ, ka ʋ bɩra mʋ ŋmoo vʋchɔɔŋ.”