2 Pɩɩta 1 - WƖA TENIŊ

¹ Mɩ-na Saamɔŋ Pɩɩta nɛ ŋmʋnsɛ teniŋ deeŋ pɩpɩma. Mɩ ŋaa Yesu Kirisito tɩntɩnnʋ nɛ a ŋaa ʋ nanzɔɔ ma. Mɩ ŋmʋnsɛ teniŋ deeŋ pɩpɩ ma nɩalɩŋ ma sɩ laa Yesu Kirisito wɩaa dii arɩ la ma sɩ laa ʋ wɩaa dii ŋɩɩ. La dɩ ma kala ŋaa tʋɔpʋl tɩmma nɛ a tɩŋ Wɩa arɩ la Laataara Yesu Kirisito wɩaa.

² Wɩa lahɔrɩmɔ lɛ fɩɛlɩŋ jaŋ yʋgɛ ma teeŋ, a tɩŋ wʋjɩmɩɩ-la ma sɩ kɛnɛ a mʋ tɩgɛ Wɩa arɩ La Tɩɩna Yesu lɛ.

Má leŋ dɩ ma mɛlɛ zɔŋ dɩ Wɩa wuo timma

³ Wɩa doluŋ lɛ, ʋ pɩla kʋŋkala la sɩɩ chɛ la mɩɩsɩŋ lɛ, dɩ la wuo kaa ŋaa wɩalɩŋ kala sɩɩ to ʋ wombiiŋ, dɩ la wuo jɩŋ ʋ-na Wɩa, Nɩɩ-la sɩ yɩrɛla dɩ la wuo na ʋ tʋla arɩ ʋ zɔmʋŋ kala.

⁴ Wɩaa deemba kala lɛ nɛ Wɩa to a ŋaa wʋbal-la ʋ fa sɩ sɩ ʋ jaŋ ŋaa pɩla. Wɩalɩŋ zɔmɔ kɩŋkɛŋ la teeŋ. Ʋ joŋ wɩaa deemba pɩla dɩ la wuo lɩɩsɛ la tɩtɩa wʋbɔmɔ-la dʋnɩa nɩaa sɩɩ to ba tʋɔtɔrɛ wʋŋaalaa lɛ a ŋɩŋaa, ka dɩ la kʋ nagɛ ŋɩɩ Wɩa sɩ naga.

⁵ A tɩŋ ma sɩ laa Yesu wɩaa dii ŋɩɩ, má hɛ doluŋ dɩ ma mɛlɛ zɔŋ. Má leŋ dɩ ma wʋjɩmɩŋ pʋŋa pɩpɛ ma mɛl-zɔŋ-la lɛ.

⁶ Má to ma wʋjɩmɩɩ-la lɛ a kɛŋ ma tɩtɩa woruŋ. Ma sɩ kɛŋ ma tɩtɩa woruŋ ŋɩɩ, má kɛŋ nyalɩma. Ma sɩ kɛŋ nyalɩma ŋɩɩ, má ŋɩŋaa wɩalɩŋ sɩɩ to Wɩa wombiiŋ,

⁷ ma sɩɩ ŋaa wɩalɩŋ sɩɩ to Wɩa wombiiŋ ŋɩɩ, ma kɛŋ zile ma naambiiri-la kala teeŋ, aŋ pɛ choba maa.

⁸ Dɩ wʋzɔŋŋɔɔ deemba nɛ hɛ ma lɛ, ba jaŋ pɛ ma lɛ dɩ ma ŋaa sɩɩfɩaŋ tɩmma a ŋɩŋaa wɩalɩŋ ma sɩ jɩma a mʋ tɩgɛ La Tɩɩna Yesu Kirisito lɛ.

⁹ Nɩɩ-la kala sɩ bɩ wɩaa deemba ka ŋaa, ʋ tɩɩna ŋaa nyʋlʋŋ nɛ, a nagɛ nɩɩ-la sɩɩ na ʋ naasɩŋ bʋbʋɔŋ dʋndʋŋa aŋ bɩ dɩ-bolii ka na, bɛɛ wɩaa ʋ tɩɩna paala yʋ arɩ Yesu chɛsɛ ʋ wʋbɔŋŋɔɔ ta nɛ.

¹⁰ Ŋɩɩ wɩaa mɩ naambiiriŋ, mɩɩ sʋlma arɩ Wɩa sɩ yɩrɛma a lɩɩsɛma ŋɩɩ, má hɛ doluŋ a chɩŋ wɩaa deemba lɛ woruŋ. Dɩ ma nɩɩ ŋaaba, ma bɩ jaŋ yeŋŋi Wɩa wombiiŋ lɛ.

¹¹ Dɩ ma chɩŋ wɩalɩŋ lɛ woruŋ, ma jaŋ na wombiiŋ a jʋʋ La Tɩɩna arɩ la Laataara Yesu Kirisito kuorii-la sɩ jaŋ hɛ nɩmɛ deeŋ deeŋ tʋɔŋ.

¹² Ŋɩɩ wɩaa, mɩ jaŋ liliisima bʋa na-kala lɛ a mʋ tɩgɛ wɩaa deemba lɛ. Ma paala jɩŋ wʋtɩtɩɩ-la nɛ a chɩŋ ʋ lɛ woruŋ.

¹³ Mɩ ha sɩ hɛ mɩ mɩɩsɩŋ deeŋ lɛ, ʋ ŋaa wʋzɔŋ nɛ dɩ mɩ liliisima wɩaa deemba dɩ ma sɩ́ ba yʋ,

¹⁴ bɛɛ wɩaa mɩ jɩma arɩ mɩ bɩ jaŋ dieni dʋnɩa deeŋ lɛ. La Tɩɩna Yesu Kirisito tɩtɩa bʋl wɩɩŋ deeŋ pɩmɛ nɛ.

¹⁵ Mɩ jaŋ hɛ doluŋ a dagɛma wɩaa deemba, dɩ mɩ nɛ sʋba ma, dɩ ma ha wuo liliisiba bʋa na-kala lɛ.

Pɩɩta sɩ dɩ ʋ tɩtɩa nɛ na Yesu ʋ mɩɩsɩŋ lɛ

¹⁶ La bʋla pɩma ŋɩɩ La Tɩɩna Yesu Kirisito sɩ kɔ dʋnɩa arɩ doluŋ. Wɩɩ-la la sɩ bʋla pɩma bɩ nagɛ sʋnsɔgʋlɔɔ wʋjɩnnaa sɩ sɔgʋlɔ. La tɩtɩa sɩɩŋ nɛ na Yesu Kirisito tʋla.

¹⁷ Bʋa-la lɛ la Nyɩmma Wɩa sɩ joŋ doluŋ arɩ tʋla pʋ, la nɩɩ yikoro dɩ ʋ lɩɩ Wɩa-jaŋ, Wɩɩjarɩbakɔ yikoro nɛ. Ʋ fa sɩ, “Mɩ Bii-chooluŋ nɛ ŋ-la, mɩ tʋɔŋ tɔrɛ ʋ nyuŋ.”

¹⁸ La ma tɩtɩa fa nɩɩ yikoro-la sɩ lɩɩ Wɩa-jaŋ nɛ, bʋa-la lɛ dɩ la dɩ Yesu kala nɛ fa hɛ peel-la sɩ bɩ disiniŋ kɛnɛ nyuŋ.

¹⁹ Wɩaa deemba leŋe la wasa laa wɩalɩŋ Wɩa wʋlaabʋllaa ma fa sɩ bʋla dii nɛ. Má jegile nɩɩba, bɛɛ wɩaa wɩalɩŋ ba sɩ bʋla nagɛ chaanɩŋ nɛ a chaanɛ birimiŋ tʋɔŋ. Ʋ jaŋ chaanɛ ŋɩɩ halɩɩ a mʋ yi bʋa-la lɛ Yesu Kirisito pʋlʋmʋŋ sɩ jaŋ chaanɛ ma tʋɔŋ lɛ, a nagɛ nanyʋɔlʋŋ sɩ yie chaanɛ ŋɩɩ.

²⁰ Wɩaa deemba kala lɛ, sɩɩfɩaŋ wɩɩŋ nɛ ŋ-la. Ʋ maga dɩ ma jɩŋ arɩ wɩalɩŋ ba sɩ ŋmʋnsa bil Wɩa teniŋ tʋɔŋ, Wɩa wʋlaabʋlla-la tɩtɩa doluŋ lɛ dee ba bʋl wɩalɩŋ.

²¹ Wɩalɩŋ ba sɩ bʋla bɩ ba tɩtɩa tʋɔbɩɩnaa lɛ lɩa. Ama Wɩa Dɩŋ-zɔmʋŋ nɛ kʋ hɛ ba tʋɔŋ a leŋ ba bʋl wɩalɩŋ Wɩa sɩ joŋo pɩba.