2 KUOROO 9 - WƖA TENIŊ

Ba lɩɩsɛ Jehu ʋ dii kuoruŋ Iziral tinteeŋ lɛ

¹ Tapʋlɩɩ kʋbala Elaasa yɩrɛ Wɩa wʋlaabʋlla-la sɩ hɛ ʋ teeŋ dɔŋɔ a bʋla pʋ, “Kɛŋ ŋ tembiiŋ vɔɔ ŋ gɛrɩŋ kpɛrɛ a kɛŋ ŋ tɩtɩa hɛ dɔŋɔ a joŋ nʋʋŋ arɩ loŋ deeŋ a mʋ taŋ-la ba sɩɩ yɩrɛ Ramɔf Gɩlɩad.

² Dɩ ŋ nɛ mʋa, chɛ na Jehu sɩ ŋaa Jehosafat bie, Nimisi nihiŋ. Kɛnʋ dɩ ma balɩa jʋʋ dɩa sɩpaaŋ.

³ Dɩ ma nɛ jʋa, joŋ nʋʋ-la a wansɛ hɛ ʋ nyuŋ lɛ aŋ bʋl, ‘Ŋ-la nɛ La TƖƖNA bʋl: Mɩ lɩɩsɩŋ nɛ dɩ ŋ ŋaa Iziral tinteeŋ kuoro.’ Dɩ ŋ nɛ ŋaa ŋɩɩ dɛrɛ, kɛŋ boiŋ suri a lɩɩ a chaasa fá woruŋ a viiri.”

⁴ Ŋɩɩ nɛ Wɩa wʋlaabʋllʋ-la sii a mʋ Ramɔf Gɩlɩad.

⁵ Ʋ sɩ mʋa, ʋ na laalɩyuori-hɩasɩŋ dɩ ba hilime hɔŋ. Ʋ bʋl, “Laalɩyuori-hɩaŋ, mɩ kɛŋ wɩɩ nɛ dɩ mɩ bʋla pɩŋ.” Jehu pɩɛsʋ, “La tʋɔŋ kʋbɛɛ?” Wɩa wʋlaabʋllʋ-la sɩ, “Mɩ nɩhɩaŋ, ŋ nɛ.”

⁶ Ŋɩɩ nɛ Jehu sii ba jʋʋ dɩa. Ba sɩ jʋa, Wɩa wʋlaabʋllʋ-la joŋ nʋʋŋ a wansɛ hɛ Jehu nyuŋ lɛ aŋ bʋl, “Wɩɩ-la La TƖƖNA Iziral tɩŋŋaa Wɩa sɩ bʋla nɛ ŋ-la: ‘Mɩ lɩɩsɩŋ nɛ dɩ ŋ ŋaa mɩ nɩaa Iziral tɩŋŋaa kuoro.

⁷ Mɩɩ chɛ dɩ ŋ kpʋ ŋ nɩhɩaŋ Ahab doho nɩaa kala nɛ, dɩ mɩ to ŋɩɩ lɛ a joŋ mɩ baanɩŋ a fɩɩsɛ Jɛzɛbɛl lɛ, a tɩŋ ʋ sɩ kpʋ mɩ wʋlaabʋllaa arɩ mɩ tɩntɩnnaa wɩaa.

⁸ Ʋ maga dɩ Ahab doho nɩaa baalaa kala sʋʋ nɛ, nɩhɩasɩŋ arɩ hambiisiŋ kala, yosuŋ arɩ nɩalɩŋ sɩ tɩɩ ba tɩtɩa.

⁹ Mɩ jaŋ kpʋ Ahab dɩa nɩaa kala, ka dɩ ʋ dɩa nagɛ Nɛbat nanʋala Jerobuam dɩa arɩ Ahija nanʋala Baasa dɩa.

¹⁰ Ba bɩ jaŋ hugi Jɛzɛbɛl, vasɩŋ nɛ jaŋ diiu Jɛzɩrɛl tinteeŋ lɛ.’ ” Ʋ sɩ bʋl ŋɩɩ dɛrɛ, ʋ kɛŋ boiŋ suri a lɩɩ fá.

¹¹ Jehu sɩ mɩɩra mʋ ʋ nɩhɩa-dɔnsʋ-la teeŋ, ba dɔŋɔ pɩɛsʋ, “Ba fɩɛla nɛɛ? Bɛɛ kʋŋ nɛ nyɩnyɛ tɩɩna deeŋ chɩchɛ ŋ teeŋ?” Jehu bʋl, “Ma jɩŋ baala deeŋ arɩ ʋ wʋbʋl dosunuŋ nɛ.”

¹² Ba bʋl, “Aɩ, la bɩ ʋ wʋbʋlaa jɩŋ, bʋl wɩɩ-la ʋ sɩ bʋla pɩŋ a pɩla.” Ŋɩɩ nɛ ʋ bʋl, “Ʋ sɩ La TƖƖNA sɩ ʋ lɩɩsɛmɛ nɛ dɩ mɩ ŋaa Iziral tɩŋŋaa kuoro.”

¹³ Ba guu wuri ba gɛnnɩŋ a jɛrɛ lusuŋ chol-sɩɩ-la nyuŋ Jehu sɩ chɩna, aŋ ŋmʋʋ banyile, a bʋl, “Jehu nɛ ŋaa kuoro.”

Jehu kpʋ Joram arɩ Ahazɩa

¹⁴ Ŋɩɩ nɛ Jehu sɩ ŋaa Jehosafat nanʋala, Nimisi nihiŋ bɩrɩmɛ Iziral tɩŋŋaa kuoro Joram dʋndɔŋ a chɩŋ ʋ lɛ. (Bʋa deeŋ lɛ dɩ kuoro Joram arɩ Iziral tɩŋŋaa kala faa yuo dɩ ba laa Ramɔf Gɩlɩad Siiria tɩŋŋaa kuoro Hazɛɛl teeŋ.

¹⁵ Ama kuoro Joram fa sɩɩ yuo ŋɩɩ, Siiria tɩŋŋaa bolimu, ʋ mɩɩra mʋ Jɛzɩrɛl dɩ ʋ vaarɛ ʋ tɩtɩa.) Jehu bʋl, “Dɩ ma nɛ cho dɩ mɩ ŋaa ma kuoro, má sɩ́ leŋe dɩ nʋʋkala wuo lʋara lɩɩ a tuu Jɛzɩrɛl jaŋ tʋɔŋ a bʋl wɩɩŋ deeŋ.”

¹⁶ Ŋɩɩ nɛ Jehu jʋʋ ʋ laalɩŋ jaaba toruko a mʋ Jɛzɩrɛl. Bʋa-la lɛ dɩ Joram ha bɩ duoro, dɩ Juda tinteeŋ kuoro Ahazɩa ma sɩ mʋa dɩ ʋ na ʋ nyanyalaa ŋɩɩ, ʋ ha hɛ nɩmɛ.

¹⁷ Nɩɩ-la sɩ chɩŋ dɩɩ-leŋii-la nyuŋ aa pɔ Jɛzɩrɛl na Jehu arɩ ʋ laalɩyuoroo dɩ baa kɔ. Ʋ bʋl, “Mɩ na nɩaa nɛ dɩ baa kɔ.” Joram bʋl, “Má lɩɩsɛ ja-jɩllʋ dɩ ʋ mʋ cheme a pɩɛsɛba naa, ba fɩɛla nɛɛ?”

¹⁸ Ja-jɩllʋ-la jɩl jaaba a mʋ cheŋ Jehu a bʋl, “Kuoro sɩ dɩ mɩ kʋ pɩɛsɩŋ naa: ‘Ba fɩɛla nɛ ma kʋkɔ?’ ” Jehu ma pɩɛsʋ, “Bɛɛ nɛ ŋ chɛ fɩɛlɩŋ dɩ ŋ ŋaa? Kʋ bala to mɩ dɩ mɩ nɩaa harɩŋ.” Nɩɩ-la sɩ pɔ jaŋ-la bʋl, “Tɩndaarʋ-la yi ba nɛ, ama ʋ bɩra bɩ mɩɩraa kɔ.”

¹⁹ Ŋɩɩ nɛ kuoro bɩra tɩŋ nɩ-lɩa ʋ jɩl jaaba mʋ. Ʋ sɩ mʋ chemba, ʋ bʋl, “Kuoro sɩ dɩ mɩ kʋ pɩɛsɩŋ naa: ‘Ba fɩɛla nɛ ma kʋkɔ?’ ” Jehu ma pɩɛsɛ, “Bɛɛ nɛ ŋ chɛ fɩɛlɩŋ dɩ ŋ ŋaa? Kʋ bala to mɩ dɩ mɩ nɩaa harɩŋ.”

²⁰ Nɩɩ-la sɩ pɔ ba jaŋ-la bɩra bʋl, “Tɩndaarʋ-la ma yiba nɛ, ama ʋ ma bɩ mɩɩraa kɔ. Gbɛrɛ yei! Nʋʋ nɛ jʋʋ jaaba toruko a faasa fá kʋkɔ a nagɛ nyɩnyɛ tɩɩna. Ʋ nagɛ Jehu nɛ.”

²¹ Joram bʋl, “Má ŋaa mɩ jaaba toruko siri.” Ba sɩ ŋaa jaaba toruko-la siri, Iziral tɩŋŋaa kuoro Joram arɩ Juda tinteeŋ kuoro Ahazɩa kala jʋʋ ba janɩŋ torukoba a lɩɩ mʋ cheŋ Jehu. Ba mʋ chemu Jɛzɩrɛl tɩŋŋaa baal kʋbala ba sɩɩ yɩrɛ Nabɔf ŋmaŋkaaŋ lɛ nɛ.

²² Joram sɩ na Jehu ʋ pɩɛsʋ, “Jehu, ba fɩɛlaa nɛ ŋ kʋkɔ?” Jehu ma pɩɛsɛ, “Ɛɛ nɛ yarɩfɩɛlaa jaŋ wuo ŋaa hɛ nɩmɛ, ma sɩ́ bɩ ma naaŋ Jɛzɛbɛl vʋɩyaa arɩ ʋ hɩl-wɩalɩŋ leŋe?”

²³ Joram mɩɩra fá, aŋ yɩrɛ Ahazɩa a bʋl, “Nɩbɔŋ nɛ.”

²⁴ Ŋɩɩ nɛ Jehu yuo ʋ toŋ a yagɛ Joram sɛmɛ lɛ a jʋʋ kɛŋ ʋ chʋbagɩlɩŋ-buguluŋ ʋ tel ʋ jaaba toruko tʋɔŋ a sʋʋ.

²⁵ Jehu bʋla pɩ ʋ laalɩyuori nɩhɩaŋ-la sɩɩ tɩgɛ ʋ lɛ baa yɩrɛ Bidikaa, “Joŋ ʋ kʋsʋʋŋ yuo hɛ Nabɔf Jɛzɩrɛl tɩɩna-la ŋmaŋkaaŋ lɛ. Liise yi bʋa-la lɛ mɩ dɩ ŋ fa sɩ jɩl janɩŋ toruko a tuto Joram nyɩmma kuoro Ahab harɩŋ. La TƖƖNA fa bʋl wɩɩŋ deeŋ nɛ a tɩgɛ ʋ lɛ.

²⁶ Ŋ-la nɛ La TƖƖNA fa bʋl, ‘Mɩ dɩa na dɩ ba kpʋ Nabɔf arɩ ʋ biiriŋ ŋmaŋkaaŋ deeŋ lɛ. Mɩ saa jaŋ leŋ dɩ ba kpʋ ŋ ma ŋmaŋkaaŋ deeŋ tɩtɩa lɛ.’ Ŋɩɩ wɩaa, joŋ Joram kʋsʋʋŋ yuo hɛ ŋmaŋkaa-la lɛ, arɩ La TƖƖNA fa sɩ bʋl ŋɩɩ.”

²⁷ Juda tinteeŋ kuoro Ahazɩa sɩ na wɩɩ-la sɩ ŋaa, ʋ fá to taŋ-la ba sɩɩ yɩrɛ Bɛf Hagaŋ dɩɩrɩŋ mʋ. Ŋɩɩ nɛ Jehu kire to ʋ harɩŋ aŋ kpɩa, “Má kire kpʋʋ ma.” Ba bolimu hɛ ʋ jaaba toruko tʋɔŋ wombii-la sɩɩ mʋ Guu sɩ kpagɛ taŋ-la ba sɩɩ yɩrɛ Ɩbɩlɩam lɛ. Ama ʋ wuo kaa fá jʋʋ taŋ-la ba sɩɩ yɩrɛ Mɛgɩdɔ a sʋʋ nɩmɛ.

²⁸ Ʋ tɩntɩnnaa joŋ ʋ kʋsʋʋŋ hɛ ʋ jaaba toruko tʋɔŋ a kaa mʋ Jerusalɛm a joŋu hugi ʋ nyɩmmaba dɩ-huguŋ, Devit taŋ-la lɛ.

²⁹ (Ahab nanʋala Joram sɩ dii kuoruŋ Iziral tinteeŋ lɛ, ʋ jɩsɩŋ fii arɩ kʋbala lɛ nɛ Ahazɩa ma dii kuoruŋ Juda tinteeŋ lɛ.)

Ba kpʋ Jɛzɛbɛl

³⁰ Ŋɩɩ nɛ Jehu mʋ Jɛzɩrɛl. Jɛzɛbɛl sɩ nɩɩ ʋ wɩaa, ʋ ŋaa kɩaa taa ʋ sɩɩ-pʋnaa aŋ vɔɔ ʋ nyuŋ, aŋ to tokoro a nyinyilimi.

³¹ Jehu sɩ mʋ jʋjʋʋ taŋ-la boi-baalɩŋ, Jɛzɛbɛl pɩɛsɛ, “Ba fɩɛla nɛ ŋ nɩkpʋʋra deeŋ kɔ dahaa? Zimiri nɛ ŋ ŋaa, a kpʋkpʋ ŋ nɩhɩaŋ?”

³² Ŋɩɩ nɛ Jehu beŋ tokoro-la leriŋ aŋ pɩɛsɛ, “Kʋbɛɛ nɛ chɩŋ mɩ harɩŋ? Kʋbɛɛ nɛ?” Ba-ferisiŋ balɩa koo batori kʋ nyilimi.

³³ Jehu bʋl, “Má joŋu yuo ta dɩ ʋ kʋ tuu.” Ŋɩɩ nɛ ba joŋu yuo ta ʋ kʋ tuu tele sʋʋ. Jehu kɛŋ ʋ janɩŋ arɩ toruko a nʋɔsɛ Jɛzɛbɛl bal. Ʋ chalɩŋ jaasɛ a hɛ jeeŋ arɩ janɩŋ lɛ.

³⁴ Jehu kʋ jʋʋ ʋ kuoru dɩa a dii kʋdiilee aŋ nyʋa kɩaa. Ŋɩɩ nɛ ʋ bʋla pɩ ʋ tɩntɩnnaa, “Má mʋ joŋ ha-bɔŋ-la hugi woruŋ, bɛɛ wɩaa ʋ ŋaa kuoro tolo nɛ.”

³⁵ Ba sɩ mʋa dɩ ba joŋu hugi, ba bɩ ʋ jesiŋ kala na, see ʋ nyu-kuŋkogulo, ʋ naasɩŋ arɩ ʋ na-chɩgɩsɩŋ haŋgbelee.

³⁶ Ŋɩɩ nɛ ba mɩɩra kʋ bʋla pɩ Jehu, “La TƖƖNA to ʋ tɩntɩnna Ɩlaaja Tisibi tɩɩna-la lɛ nɛ a bʋl arɩ vasɩŋ nɛ jaŋ dii Jɛzɛbɛl kʋsʋʋŋ Jɛzɩrɛl tinteeŋ lɛ.

³⁷ Jɛzɛbɛl kʋsʋʋŋ jaŋ pɩsɛ Jɛzɩrɛl tinteeŋ kala a nagɛ nɩsʋrʋŋ, dɩ nʋʋkala sɩ́ wuo jɩŋ arɩ Jɛzɛbɛl nɛ ŋɩɩ.”