2 KUOROO 8 - WƖA TENIŊ

Ba mɩɩra joŋ Sunem tɩŋŋaa haal-la tinteeŋ pʋ

¹ Elaasa fa bʋla pɩ haal-la nɩɩ-la bie ʋ sɩ chɩsa sʋʋŋ lɛ, “Ŋ dɩ ŋ dɩa nɩaa, má lɩɩ tinteeŋ deeŋ lɛ a mʋ hɔŋ lee dɔŋ. La TƖƖNA sɩ losuŋ jaŋ jʋʋ tinteeŋ deeŋ jɩsɩŋ balɩpɛ.”

² Haal-la ŋaa ŋɩɩ Elaasa sɩ bʋla. Ʋ kɛŋ ʋ dɩa nɩaa ba lɩɩ a mʋ hɔŋ Fɩlɩsɩtɩa tɩŋŋaa tinteeŋ lɛ jɩsɩŋ balɩpɛ.

³ Jɩ-pɛɩ-la dɩdɛrɩŋ, haal-la mɩɩra kɔ Iziral tinteeŋ a mʋ sʋl kuoro dɩ ʋ joŋ ʋ dɩa arɩ ʋ tinteeŋ pʋ.

⁴ Bʋa-la lɛ dɩ kuoro ka pɩɛsɛ Elaasa tɩntɩnna Gehazi wɩaa a mʋʋ tɩgɛ wʋduoru-la kala Elaasa sɩɩ ŋaa lɛ.

⁵ Gehazi sɩ bʋla pɩpɩ kuoro ŋɩɩ Elaasa sɩ chɩsɛ bie sʋʋŋ lɛ, dɩ haal-la tɩtɩa, nɩɩ-la bie Elaasa sɩ chɩsa nɛ kʋ jʋʋ ŋɩɩ, dɩ ʋ sʋl kuoro a laa ʋ dɩa arɩ ʋ tinteeŋ. Gehazi bʋla pɩ kuoro, “Kuoro mɩ nɩhɩaŋ, na haal-la nɛ ŋ-la nɩɩ-la bie Elaasa sɩ chɩsa sʋʋŋ lɛ, na ʋ bile ma nɛ ŋ-la.”

⁶ Kuoro pɩɛsɛ haal-la wɩɩ-la. Ʋ wasa to ʋ kala a pʋ. Ŋɩɩ nɛ kuoro lɩɩsɛ ʋ tɩntɩnnɩ-hɩasɩŋ dɔŋɔ pɩ haal-la aŋ bʋla pʋ, “To naasɩŋ a laa haala deeŋ kʋŋ-kʋŋkala a pʋ, kɩalɩŋ ʋ sɩ leŋe ta Iziral tinteeŋ lɛ aŋ lɩɩ, a pɛ moribie-la kala ba sɩ pɛrɛ na ʋ tinteeŋ lɛ a chɩŋ tapʋlɩɩ-la ʋ sɩ lɩa lɛ a kaa kɔ jɩnɩŋ.”

Hazɛɛl kpʋ Bɛŋ-Hadad

⁷ Harɩŋ, bʋa kʋbala lɛ Elaasa mʋ Damasɩkʋs dɩ Siiria kuoro Bɛŋ-Hadad ka wɩɩlʋ. Ŋɩɩ nɛ ba bʋla pɩ kuoro, “Wɩa wʋlaabʋllʋ-la kɔ daha nɛ.”

⁸ Kuoro bʋla pɩ ʋ tɩntɩnnɩ-hɩasɩŋ dɔŋɔ ba sɩɩ yɩrɛ Hazɛɛl, “Joŋ kʋŋ kaa mʋ dii zile pɩ Wɩa wʋlaabʋllʋ-la, aŋ bʋla pʋ dɩ ʋ pɩɛsɛ La TƖƖNA naa, mɩ jaŋ duori mɩ nyanyalaa deemba lɛ koo mɩ bɩ jaŋ duori?”

⁹ Ŋɩɩ nɛ Hazɛɛl sii paa Damasɩkʋs kʋzɔŋŋɔɔ a chʋŋ bʋntaŋŋaba mahɩŋ balɩa a kaa mʋ dɩ ʋ ŋaa chɔgɩta pɩ Elaasa. Ʋ sɩ mʋ naʋ, ʋ bʋla pʋ, “Ŋ tɩntɩnna kuoro Bɛŋ-Hadad nɛ tɩmmɛ dɩ mɩ kʋ pɩɛsɩŋ na arɩ ʋ sɩɩ wɩɩlʋ ŋɩɩ, ʋ jaŋ duorii?”

¹⁰ Elaasa bʋla pɩ Hazɛɛl, “La TƖƖNA bʋla pɩmɛ arɩ ʋ jaŋ sʋʋ, ama ŋ-na mʋ bʋla pʋ arɩ ʋ jaŋ duori.”

¹¹ Ŋɩɩ nɛ Elaasa beŋ Hazɛɛl ŋɩɩ jim, hɩɩsɩŋ kɛŋ Hazɛɛl. Ŋɩɩ nɛ Elaasa suomo yiyel.

¹² Hazɛɛl pɩɛsɛ Elaasa, “Mɩ nɩhɩaŋ, bɛɛ nɛ tɩɩ ŋ yiyel?” Elaasa bʋl, “Mɩ jɩŋ wʋbɔŋ-la ŋ sɩ jaŋ joŋo ŋaa Iziral tɩŋŋaa lɛ nɛ. Ŋ jaŋ nyɩgɛ ba tasɩ-la kala ba sɩ saa kɛrɩsɩŋ golli, aŋ kpʋ ba bapʋɔsaa, a paa ba hambiisiŋ vɩɩra yɛrɛ, aŋ kpɛrɛ ba hapuugoo.”

¹³ Ŋɩɩ nɛ Hazɛɛl bʋl, “Mɩ-na ŋ tɩntɩnna, mɩ bɩ dol kala kɛnɛ mɩ sɩ jaŋ wuo ŋaa wɩɩŋ deeŋ.” Elaasa bɩra bʋl, “La TƖƖNA bʋla pɩmɛ arɩ ŋ nɛ jaŋ dii Siiria tinteeŋ kuoruŋ.”

¹⁴ Hazɛɛl ta Elaasa aŋ mɩɩra kɔ Bɛŋ-Hadad teeŋ. Bɛŋ-Hadad pɩɛsʋ, “Wʋbɛɛ nɛ Elaasa bʋla pɩŋ?” Hazɛɛl bʋl, “Ʋ sɩ ŋ jaŋ duori.”

¹⁵ Ama taŋ sɩ pʋla, Hazɛɛl joŋ kuntuŋ a yu lɩɩŋ lɛ, a joŋo chu tɔ Bɛŋ-Hadad sɩaa lɛ, a nyaga kpɛrɛ ŋɩɩ deeŋ deeŋ ʋ sʋʋ. Ka ʋ dii kuoruŋ ʋ nyuŋ lɛ.

Jehoram dii kuoruŋ Juda tinteeŋ lɛ

¹⁶ Ahab nanʋala Joram sɩ dii kuoruŋ Iziral tinteeŋ lɛ, ʋ jɩ-pɛɩ lɛ nɛ Jehosafat nanʋala Jehoram ma dii kuoruŋ Juda tinteeŋ lɛ, dɩ Jehosafat nɛ fa ha ŋaa Juda tinteeŋ kuoro.

¹⁷ Jehoram fa ŋaa jɩsɩŋ mara arɩ fii arɩ balɩa nɛ aŋ dii kuoruŋ. Ʋ hɔŋ Jerusalɛm lɛ a beŋ Juda tinteeŋ jɩsɩŋ chori nɛ.

¹⁸ Jehoram fa ŋaa wʋbɔŋŋɔɔ nɛ La TƖƖNA teeŋ. Ʋ ŋaa wʋbɔmɔ-la tɩtɩa Iziral kuoroo sɩ ŋaa nɛ ʋ jaa Ahab tolo nɛ. Ŋɩɩ leŋ ʋ ŋaa wʋbɔmɔ-la tɩtɩa Ahab dɩa nɩaa fa sɩ ŋaa.

¹⁹ Ama La TƖƖNA fa tɩŋ ʋ tɩntɩnna Devit wɩaa nɛ a bɩ Juda tinteeŋ cheye, bɛɛ wɩaa ʋ fa hɛ niiŋ pʋ arɩ ʋ jaŋ leŋ dɩ ʋ doho nɩaa nɛ didii kuoruŋ Juda tinteeŋ lɛ a kaa mʋ wuu.

²⁰ Jehoram kuoruŋ bʋa lɛ, Ɛdɔm tɩŋŋaa fa vɩa dɩ ba to Juda tinteeŋ kuoro nɛ, aŋ ma bil ba kuoro.

²¹ Ŋɩɩ nɛ Jehoram sii kɛŋ ʋ laalɩŋ janɩŋ torukoba ba mʋ taŋ-la ba sɩɩ yɩrɛ Zayi. Nɩmɛ nɛ Ɛdɔm tɩŋŋaa tɔ ʋ dɩ nɩhɩasɩ-la sɩɩ beŋ ʋ laalɩŋ janɩŋ torukoba-la hɛ. Ama tɩtaŋɩŋ ʋ dɩ ʋ laalɩŋ janɩŋ torukoba nɩhɩasɩ-la foro fá. Ʋ laalɩyuoroo kala fá pɩsɛ a mʋ ba dɩɩsɩŋ.

²² Ɛdɔm tɩŋŋaa ha vɩa dɩ ba to Juda nɩaa nɛ arɩ jɩnɩŋ kala. Bʋa-la tɩtɩa lɛ nɛ taŋ-la ba sɩɩ yɩrɛ Lɩbɩna nɩaa ma vɩa dɩ ba to Juda kuoro.

²³ Wɩalɩŋ dɔnsʋŋ Jehoram sɩ dii kuoruŋ a ŋaa, ba kala nɛ ba ŋmʋnsa hɛ Juda tinteeŋ kuoroo wʋŋaalaa teniŋ tʋɔŋ.

²⁴ Ŋɩɩ nɛ Jehoram sʋʋ ba joŋu hugi ʋ nyɩmmaba dɩ-huguŋ Devit tabal-la lɛ. Ka ʋ nanʋala Ahazɩa dii kuoruŋ ʋ nyuŋ lɛ.

Ahazɩa dii kuoruŋ Juda tinteeŋ lɛ

²⁵ Ahab nanʋala Joram sɩ dii kuoruŋ Iziral tinteeŋ lɛ, ʋ jɩsɩŋ fii arɩ balɩa lɛ nɛ Jehoram nanʋala Ahazɩa ma dii kuoruŋ Juda tinteeŋ lɛ.

²⁶ Ahazɩa fa ŋaa jɩsɩŋ mara arɩ balɩa nɛ aŋ dii kuoruŋ, a hɔŋ Jerusalɛm lɛ a bemba jɩna. Ʋ naaŋ yɩrɩŋ nɛ fa Atalɩa, a ŋaa Iziral kuoro Omiri nihiŋ.

²⁷ Ahazɩa naaŋ fa ŋaa Ahab tolo nɛ, ŋɩɩ leŋ ʋ ma ŋaa wʋbɔmɔ-la tɩtɩa Ahab dɩa nɩaa fa sɩ ŋaa La TƖƖNA teeŋ.

²⁸ Ahazɩa fa to Ahab nanʋala Joram harɩŋ nɛ ba mʋ taŋ-la ba sɩɩ yɩrɛ Ramɔf Gɩlɩad dɩ ba yuo Siiria tɩŋŋaa kuoro Hazɛɛl. Nɩmɛ nɛ Siiria tɩŋŋaa bolimi Joram.

²⁹ Ŋɩɩ nɛ ʋ mɩɩra mʋ ʋ jaŋ Jɛzɩrɛl dɩ ʋ vaarɛ ʋ tɩtɩa. Jehoram nanʋala Ahazɩa sɩ ŋaa Juda kuoro mʋ nɩmɛ dɩ ʋ na ʋ nyanyalaa.