2 KUOROO 7 - WƖA TENIŊ

¹ Ŋɩɩ nɛ Elaasa bʋl, “Má jegile nɩɩ wɩɩ-la La TƖƖNA sɩ bʋla: La TƖƖNA sɩ chie bʋa deeŋ tɩtɩa lɛ, ŋ jaŋ wuo joŋ warɩpʋla kʋbala a yɔɔ munuŋ sɩ bɩɩ nʋgʋgʋ gbaŋa arɩ kpaa magɛ dɔŋɔ, koo a joŋ warɩpʋla balɩa a yɔɔ mɩaa gbansɩŋ batori Samarɩa lɛ.”

² Kuoro nanzɔɔ bʋla pɩ Elaasa, “Mɩ-na bɩ laa dii, dɩ La TƖƖNA nɛ paala suri wɩa-nyuŋ a leŋ dɩ mɩaa chuchuri ma, wɩɩŋ deeŋ bɩ jaŋ wuo ŋaa.” Elaasa bʋl, “Wɩɩ-la jaŋ ŋaa dɩ ŋ na kʋdiile-la arɩ ŋ sɩɩŋ, ama ŋ bɩ jaŋ dii ba kʋŋkala.”

Ba giri laalɩŋ

³ Bʋa-la lɛ dɩ dayalɩmaa banɛsɛ fa hɔŋ Samarɩa boi-baalɩŋ lɛ. Ŋɩɩ nɛ dayalɩma-la pɩɛsɛ dɔŋɔ, “Bɛɛ nɛ tɩɩ la jaŋ hɔŋ daha deeŋ deeŋ a mʋ sʋʋ?

⁴ Dɩ la nɛ jʋʋ taŋ-la tʋɔŋ, la bɩ jaŋ na kʋŋkala a dii, losuŋ jaŋ kpʋla. Dɩ la nɛ bɩra hɔŋ daha ma, la jaŋ sʋʋ. Má leŋ dɩ la kɛŋ la tɩtɩa a mʋ hɛ Siiria tɩmma-la laalɩyuoroo nɩsɩŋ lɛ. Dɩ ba nɛ kpʋla, ʋ kala nɛ ŋɩɩ, dɩ ba nɛ bɩra lenla ma, ʋ kala nɛ ŋɩɩ.”

⁵ Ba sii sɩɩ-dɩsaa, a mʋmʋ Siiria tɩmma-la laalɩyuoroo buguŋ. Ba mʋ yi nɩmɛ, dɩ nʋʋkala tuo.

⁶ Ba fa sɩɩ mʋ ŋɩɩ bʋa-la lɛ, La TƖƖNA leŋe Siiria tɩŋŋaa laalɩyuoro-la nɩɩ dɔmɔ nɛ a nagɛ laalɩyuoroo sɩ yʋga arɩ laalɩŋ janɩŋ torukoba arɩ janɩŋ. Ŋɩɩ nɛ ba bʋla pɩ dɔŋɔ, “Má bee na, Iziral tinteeŋ kuoro mʋ yɔɔ Hiti tɩŋŋaa kuoro arɩ Ijipiti tɩŋŋaa kuoro arɩ ba laalɩyuoroo nɛ dɩ ba kʋ yuola.”

⁷ Ŋɩɩ nɛ ba sii fá sɩɩ-dɩsa-la, dɩ ba laa ba mɩɩsɩŋ a kagɛ ba lɛŋŋɛɛ arɩ ba janɩŋ arɩ ba kakusuŋ lɛ. Ka ba bugu-la ha pɩŋ a nagɛ ʋ nagɩsɩŋ.

⁸ Dayalɩma-la banɛsɛ mʋ yi Siiria tɩŋŋaa buguŋ niiŋ dɩ nʋʋkala tuo. Ŋɩɩ nɛ ba jʋʋ ba lɛbɩŋ dɔŋɔ a paa kɩaa dii aŋ nyʋa kʋnyʋalaa a vɔgɛ, aŋ paa warɩpʋla, sɛlɩmɛ arɩ gɛnnɩŋ a kaa mʋ faa, aŋ bɩra mɩɩra mʋ jʋʋ lɛbɩŋ dɔŋɔ ma a paa kɩaa dɔnsʋŋ ma a bɩra kaa mʋ faa.

⁹ Ŋɩɩ nɛ ba bʋla pɩ dɔŋɔ, “La bɩ woruŋ ka ŋaa. Jɩnɩŋ ŋaa tapʋl zɔŋ nɛ. Ʋ bɩ maga dɩ wɩɩŋ deeŋ magɛ la dʋndʋŋ. Dɩ la nɛ bɩ bʋla pɩ nʋʋkala ka dɩ taŋ pʋl, ba jaŋ dɔgɩsɛla. Má leŋ dɩ la mʋ kuoro dɩa a bʋl wɩɩ-la pɩ ʋ tɩntɩnnɩ-hɩasɩŋ.”

¹⁰ Ba mɩɩra kɔ Samarɩa a yɩrɛ nɩalɩŋ sɩɩ pɔ jaŋ-la boi-baalɩŋ a bʋla pɩba, “La mʋ Siiria tɩŋŋaa laalɩyuoroo buguŋ, la bɩ nʋʋkala na, la bɩ nʋʋ dɔmɔ ma nɩa nɩmɛ. Ba janɩŋ arɩ ba kakusuŋ dʋndʋŋa nɛ vɔɔ nɩmɛ, ka ba lɛŋŋɛɛ kala ha chɩŋ ba chɩnɩŋ.”

¹¹ Ŋɩɩ nɛ nɩalɩŋ sɩɩ pɔ boi-baal-la ma kɛŋ wɩɩ-la mʋ bʋla pɩ nɩalɩŋ sɩ hɛ kuoro dɩa lɛ.

¹² Tɩtaŋ-la tɩtɩa, kuoro sii a bʋla pɩ ʋ tɩntɩnnɩ-hɩasɩŋ, “Mɩ jaŋ dagɛma wɩɩ-la Siiria tɩmma-la sɩ ŋaa bʋbʋɔŋ. Ba jɩma losuŋ jʋʋla nɛ, ŋɩɩ nɛ tɩɩ ba leŋ ba buguŋ aŋ lɩɩ faa pɔkɔŋ nyuŋ, a bɩɩnɛ arɩ la jaŋ lɩɩ la taŋ lɛ a gɔllɔ chɩchɛ kʋdiilee, dɩ ba mɩɩra kʋ tɔ la hɛ a yuo kɛsɛla a laa la tabalɩŋ.”

¹³ Ʋ tɩntɩnnɩ hɩasɩ-la dɔŋɔ bʋl, “Leŋ dɩ la tɩŋ nɩaa dɩ ba lɩɩsɛ janɩ-la sɩ ka, kɩaa banɔŋ, a kaa mʋ Siiria tɩŋŋaa laalɩyuoro-la buguŋ a na wɩɩ-la sɩ hɛ nɩmɛ, bɛɛ wɩaa la ma nɩalɩŋ sɩ ka jaŋ lɛ sʋʋŋ puula nɛ a nagɛ nɩalɩŋ sɩ laa sɩpaaŋ sʋʋ.”

¹⁴ Ŋɩɩ nɛ ba lɩɩsɛ nɩaa a pɩba janɩŋ torukoba balɩa arɩ janɩŋ, kuoro tɩmba a bʋl, “Má mʋ na wɩɩ-la sɩ ŋaa Siiria tɩŋŋaa laalɩyuoro-la lɛ.”

¹⁵ Nɩalɩŋ vɛŋ ŋɩɩ deeŋ deeŋ a mʋ yi Jɔdaŋ fuo-la, a na Siiria tɩŋŋaa laalɩyuoro-la fá a gaarɛ ba gɛnnɩŋ arɩ ba kɩaa dɔnsʋŋ ta wombiiŋ lɛ. Tɩndaara-la mɩɩra kʋ bʋl wɩalɩŋ ba sɩ na a pɩ kuoro.

¹⁶ Ŋɩɩ nɛ Samarɩa tɩŋŋaa mʋ paa Siiria tɩŋŋaa laalɩyuoroo buguŋ kɩaa kala. Ba yallɛ munuŋ gbaŋa arɩ kpaa magɛ dɔŋɔ warɩpʋla kʋbala, a yallɛ mɩaa gbansɩŋ batori ma warɩpʋla kʋbala, arɩ La TƖƖNA fa sɩ bʋl ŋɩɩ.

¹⁷ Ŋɩɩ nɛ kuoro joŋ ʋ nanzɔɔ-la hɛ dɩ ʋ pʋpɔ boi-baal-la. Nɩaa girige lɩɩ a nʋɔsʋ kpʋ boi-la niiŋ, arɩ Wɩa wʋlaabʋlla Elaasa fa sɩ bʋl ŋɩɩ bʋa-la lɛ kuoro sɩ kɔ ʋ dɩa.

¹⁸ Kuoru-la fa sɩ laa sɩpaaŋ kɔ Elaasa dɩa, ʋ fa bʋla pʋ, “Chie bʋa deeŋ lɛ ŋ jaŋ wuo joŋ warɩpʋla kʋbala a yɔɔ munuŋ sɩ bɩɩ nʋgʋgʋ gbaŋa arɩ kpaa magɛ dɔŋɔ, a bɩra wuo joŋ warɩpʋla kʋbala a yɔɔ mɩaa gbansɩŋ batori Samarɩa lɛ.”

¹⁹ Kuoro nanzɔɔ fa bʋla pɩ Wɩa wʋlaabʋlla Elaasa, “Mɩ-na bɩ laa dii, dɩ La TƖƖNA nɛ paala suri wɩa-nyuŋ a leŋ dɩ mɩaa chuchuuri ma, wɩɩŋ deeŋ bɩ jaŋ wuo ŋaa.” Ŋɩɩ nɛ Elaasa ma fa bʋla pʋ, “Ŋ jaŋ na kʋdiile-la arɩ ŋ sɩɩŋ, ama ŋ bɩ jaŋ diiba.”

²⁰ Ŋɩɩ tɩtɩa nɛ sɛnɛ ŋaa baal-la lɛ. Nɩaa nʋɔsʋ kpʋ Samarɩa boi-baalɩŋ lɛ.