2 KUOROO 6 - WƖA TENIŊ

Saa-biiŋ daŋ lɩɩŋ nyuŋ

¹ Tapʋlɩɩ kʋbala Wɩa wʋlaabʋlla-la sɩ hɛ Elaasa teeŋ bʋla pʋ, “Lee-la la sɩɩ hilimu muuro nɛ a pɩla.

² Leŋ dɩ la mʋ Jɔdaŋ fuo-la leriŋ dɩ la kʋŋkala keri doluŋ a kaa kʋ saa la dɩ-hilimii-la dɩ ʋ jal.” Elaasa bʋl, “Ʋ zɔmɔ, má mʋ.”

³ Ŋɩɩ nɛ ba dɔŋɔ pɩɛsɛ, “Ŋ bɩ jaŋ to dɩ la mʋʋ?” Elaasa bʋl, “Mɩ jaŋ mʋ.”

⁴ Ʋ to mʋ. Ba sɩ mʋ yi Jɔdaŋ a suomo kikeri daasɩŋ,

⁵ Wɩa wʋlaabʋlla-la dɔŋɔ sɩɩ keri doluŋ, saa-biiŋ fogi a tuu lɩɩŋ. Ʋ ŋmoo niiŋ a bʋl, “Mɩ nɩhɩaŋ, ʋ ŋaa saa sʋlɩɩ nɛ.”

⁶ Ŋɩɩ nɛ Elaasa pɩɛsʋ, “Nɩɩ nɛ ʋ tel?” Ʋ dagʋ lee-la, Elaasa keri daaŋ a yuo hɛ nɩmɛ. Saa-bii-la kʋ lɩɩ daŋ lɩɩŋ nyuŋ.

⁷ Ʋ bʋla pʋ, “Lɩɩsɛ.” Ŋɩɩ nɛ baal-la mʋ a lɩɩsɛ saa-la.

Elaasa leŋe Siiria tɩŋŋaa nyʋlɩmɛ

⁸ Bʋa kʋbala lɛ Siiria kuoro chɩchɛ dɩ ʋ yuo Iziral tɩŋŋaa. Ʋ dɩ ʋ laalɩyuori-hɩasɩŋ hɔnɔ vʋʋrɛ. Ʋ dagɛba lee-la ʋ sɩ jaŋ ŋmoo buguŋ.

⁹ Elaasa tɩŋ ba bʋla pɩ Iziral tinteeŋ kuoro: “Pʋpɔ dɩ ŋ sɩ́ lee-la mʋ, bɛɛ wɩaa nɩmɛ nɛ Siiria tɩŋŋaa pɔ.”

¹⁰ Ŋɩɩ nɛ Iziral tinteeŋ kuoro tɩŋ ba mʋ bʋla pɩ nɩalɩŋ sɩ hɛ lee-la Wɩa wʋlaabʋlla sɩ daga, dɩ ba pɔ ba tɩtɩa lɛ. Elaasa vɛnɛ kpʋrɩsɛ kuoro dɩgɩlaa a yʋgɛ nɛ.

¹¹ Siiria kuoro sɩ kʋ jɩŋ wɩɩ-la sɩ ŋaa lɛ, ʋ baanɩŋ chaasa sii. Ʋ yɩrɛ ʋ laalɩyuori-hɩasɩŋ a pɩɛsɛba, “Ma jaŋ wuo dagɛmɛ la tʋɔŋ nɩɩ-la sɩ joŋ la bʋbʋɔŋ ta a pɩ Iziral tinteeŋ kuoro?”

¹² Ʋ laalɩyuori-hɩasɩ-la dɔŋɔ bʋl, “Kuoro, la kʋŋkala dee, Elaasa nɛ, Wɩa wʋlaabʋllʋ-la sɩ hɛ Iziral tinteeŋ lɛ. Ʋ nɛ yie wuo bʋl wɩalɩŋ kala ŋ sɩ paala bʋl ŋ dɩpɩnɩŋ ma lɛ a pɩ Iziral tinteeŋ kuoro.”

¹³ Siiria kuoro bʋl, “Má mʋ chɛ na lee-la ʋ sɩ hɛ, dɩ mɩ leŋ dɩ ba mʋ kɛnʋ.” Ba mʋ aŋ mɩɩra kʋ bʋla pʋ, “Ʋ hɛ taŋ-la ba sɩɩ yɩrɛ Dotaŋ lɛ nɛ.”

¹⁴ Ŋɩɩ nɛ ʋ hɛ laalɩyuori-duoruŋ, ba paa janɩŋ arɩ laalɩŋ janɩŋ torukoba mʋ. Ba mʋ tɩtaŋɩŋ a golli taŋ-la kala chu.

¹⁵ Elaasa tɩntɩnna sɩ sii chʋchʋɔ-fɩɛla, ʋ na dɩ laalɩyuoroo golli taŋ-la kala chu arɩ janɩŋ arɩ laalɩŋ janɩŋ torukoba. Ʋ tɩntɩnnʋ-la ŋmoo niiŋ a pɩɛsʋ, “Mɩ nɩhɩaŋ, bɛɛ nɛ la jaŋ ŋaa?”

¹⁶ Elaasa bʋl, “Sɩ́ leŋe dɩ fawʋllʋŋ kɛnɩŋ, la laalɩyuoroo nɛ yʋga a kɩɩ ba laalɩyuoroo.”

¹⁷ Elaasa sʋl La TƖƖNA a bʋl, “La TƖƖNA, suri mɩ tɩntɩnnʋ-la sɩaa dɩ ʋ wuo na.” Ŋɩɩ nɛ La TƖƖNA suri ʋ sɩaa. Ʋ beŋ dundolo nyuŋ a na dɩ janɩŋ arɩ janɩŋ torukoba sɩ kɛŋ nyiniŋ golli Elaasa chu.

¹⁸ Siiria tɩŋŋaa laalɩyuoroo sɩ kʋ kpagʋ, Elaasa bɩra sʋl La TƖƖNA a bʋl, “Mɩɩ sʋlʋŋ, leŋ dɩ nɩaa deemba nyʋlɩmɛ.” Ŋɩɩ nɛ La TƖƖNA leŋ ba nyʋlɩmɛ, arɩ Elaasa sɩ bʋl ŋɩɩ.

¹⁹ Elaasa bʋla pɩba, “Wombii-la dee ŋ-la, taŋ-la ma ma sɩɩ chɛ dee ŋ-la. Má to mɩ harɩŋ, mɩ jaŋ kɛmma mʋ dagɛ nɩɩ-la ma sɩɩ chɛ.” Ŋɩɩ nɛ aŋ mɩɩra kɛmba mʋ tabal-la ba sɩɩ yɩrɛ Samarɩa.

²⁰ Laalɩyuoro-la kala sɩ kʋ jʋʋ Samarɩa, Elaasa bɩra bʋl, “La TƖƖNA, suri nɩaa deemba sɩaa dɩ ba wuo nɩna.” Ŋɩɩ nɛ La TƖƖNA suri ba sɩaa, ba na dɩ ba hɛ Samarɩa tʋtʋɔbaanɩŋ.

²¹ Iziral tinteeŋ kuoro sɩ naba, ʋ pɩɛsɛ Elaasa, “Mɩ nyɩmma, mɩ kpʋbaa?”

²² Elaasa bʋl, “Sɩ́ ba kpʋ, ʋ bɩ maga dɩ ŋ kpʋ nɩalɩŋ ŋ sɩ bɩ tokobiiŋ koo toŋ kaa yuo kɛsɛ laal-baga lɛ. Pɩba kʋdiilee dɩ ba dii a pɩba kɩaa ma dɩ ba nyʋa aŋ mɩɩra mʋ ba nɩhɩaŋ teeŋ.”

²³ Iziral tinteeŋ kuoro leŋ ba ŋaa kʋdiilee yʋgɛ ʋ pɩ Siiria laalɩyuoro-la ba dii aŋ nyʋa, ka ʋ taba ba mɩɩra mʋ ba nɩhɩaŋ teeŋ. Ba sɩ mʋa, Siiria tɩŋŋaa laalɩyuoroo naaŋ bɩra bɩ Iziral tinteeŋ lɛ nʋɔsa.

Laalɩŋ golli Samarɩa tinteeŋ, losuŋ jʋʋ

²⁴ Ʋ ŋɩɩ harɩŋ bʋa kʋbala lɛ, Siiria kuoro ba sɩɩ yɩrɛ Beŋ-Hadad yɩrɛ ʋ laalɩyuoroo kala hɛ dɔŋɔ dɩ ba mʋ yuo Iziral tɩŋŋaa a gollo chu Samarɩa.

²⁵ Ba gollo chu taŋ-la a dieni nɛ, ŋɩɩ nɛ losuŋ jʋʋ. Ba yallɛ kakumo nyuŋ warɩpʋla mahɩŋ banɛsɛ, a yallɛ suonoo nɩsɩŋ sɩɩŋ ma warɩpʋla banɔŋ.

²⁶ Tapʋlɩɩ kʋbala Iziral tinteeŋ kuoro to ba taŋ jebiiŋ nyuŋ bɩbal, ŋɩɩ nɛ haal kʋbala ŋmoo niiŋ ʋ teeŋ a bʋl, “Mɩɩ sʋlʋŋ, kuoro mɩ nɩhɩaŋ, pɛ mɩ lɛ.”

²⁷ Ʋ bʋla pɩ haal-la, “Dɩ La TƖƖNA nɛ bɩ ŋ lɛ pɛ, ɛɛ nɛ mɩ jaŋ wuo ŋaa a pɛ ŋ lɛ? Mɩ bɩ kʋdiilii koo sɩnɩŋ kɛnɛ dɩ mɩ pɩŋ.”

²⁸ Ŋɩɩ nɛ kuoro pɩɛsɛ haal-la, “Bɛɛ nɩɩ walɩmɩŋ?” Haal-la bʋl, “Mɩ dɩ mɩ ha-dɔŋ nɛ losuŋ kɛŋ, la sɛɩ dɩ la chaŋ la biiriŋ. Ʋ sɩ dɩ mɩ joŋ mɩ bie dɩ la chaŋ jɩnɩŋ, ka dɩ taŋ pʋl dɩ la chaŋ ʋ ma bie.

²⁹ Ŋɩɩ nɛ mɩ joŋ mɩ bie chɔ la chaŋ. Ka taŋ pʋl mɩ mʋ ʋ dɩa dɩ la chaŋ ʋ ma bie, ʋ kɛŋ ʋ bie faa.”

³⁰ Kuoro sɩ nɩɩ wɩɩŋ deeŋ, ʋ tʋɔŋ chei ʋ kɛŋ ʋ gɛrɩŋ kɩɛsɛ. Ʋ fa sɩɩ vɛŋ jebiiŋ nyuŋ ŋɩɩ, nɩaa na dɩ tʋɔ-chei gɛrɩŋ nɛ ʋ fa laalɛ aŋ laalɛ gɛrɩŋ daŋ.

³¹ Kuoro bʋl, “A leŋ dɩ La TƖƖNA dɔgɩsɛmɛ kɩŋkɛŋ, dɩ mɩ nɛ bɩ Safat nanʋala Elaasa nyuŋ kere jɩnɩŋ.”

³² Ŋɩɩ nɛ kuoro tɩŋ nʋʋ dɩ ʋ mʋ Elaasa teeŋ. Ʋ mʋa dɩ ʋ dɩ Iziral tɩŋŋaa nɩhɩasɩŋ hɔŋ ʋ dɩa lɛ. Elaasa bʋla pɩ nɩhɩasɩ-la, “Má bee na, nɩkpʋʋra tɩŋ nʋʋ nɛ ʋ kʋkɔ dɩ ʋ keri mɩ nyuŋ. Dɩ tɩndaarʋ-la nɛ kɔ, má kɛŋ boiŋ yagɛ dɩ ʋ sɩ́ jʋʋ. Kuoro ma tɩtɩa jaŋ kiri tɩɩna harɩŋ kɔ.”

³³ Elaasa fa ha sɩ bʋl wɩaa pɩpɩba ŋɩɩ, dɩ tɩndaarʋ-la kɔ ʋ teeŋ. Kuoru-la ma kɔ a bʋl, “La TƖƖNA sɩ leŋe wʋlɔrʋnʋŋ deemba kala ŋaa la lɛ, bɛɛ nɛ saa tɩɩ la jaŋ bɩra gbɛrʋ dɩ ʋ pɛ la lɛ?”