2 KUOROO 5 - WƖA TENIŊ

Ba vaarɛ Naamaŋ sɩ yalɩba

¹ Baal kʋbala nɛ fa hɛ nɩmɛ baa yɩrɛ Naamaŋ. Ʋ fa ŋaa Siiria tɩŋŋaa laalɩyuori-hɩaŋ nɛ. La TƖƖNA fa pɛ ʋ lɛ ʋ dɩ ʋ laalɩyuoroo yuo dii ba dʋndɔŋŋɔɔ. Siiria kuoro ma faa zilu nɛ woruŋ. Ʋ fa ŋaa laalɩyuori babiibal nɛ, ka dayalɩbɩŋ kɛnʋ.

² Tapʋlɩɩ kʋbala Siiria tɩŋŋaa laalɩyuoroo sii mʋ yuo Iziral tɩŋŋaa, a kɛŋ Iziral tɩŋŋaa hantolibie kʋbala kɔ ʋ tɩma pɩpɩ Naamaŋ haala.

³ Bʋa kʋbala lɛ, hantolibie-la bʋla pɩ ʋ dɩa-naaŋ, “Dɩ ŋ bala Naamaŋ nɛ fa wuo mʋ Samarɩa, Wɩa wʋlaabʋllʋ nɛ hɛ nɩmɛ, ʋ fa jaŋ wuo vaarʋ.”

⁴ Ŋɩɩ nɛ Naamaŋ haala bʋl wɩɩ-la hantolibie-la sɩ bʋla a pʋ.

⁵ Naamaŋ sii mʋ a bʋl wɩɩ-la pɩ Siiria kuoro. Kuoro bʋl, “Mʋ, mɩ jaŋ ŋmʋnsɛ teniŋ a pɩŋ dɩ ŋ kaa mʋ pɩ Iziral tinteeŋ kuoro.” Ŋɩɩ nɛ Naamaŋ sii joŋ warɩpʋla bʋɩ mara arɩ fii, sɛlɩmɛ chɛnfɛŋ daasɩŋ bʋɩ zɔɔ-balɩdʋ arɩ gɛrɩ-laalaa dabamba fii.

⁶ Teŋ-la ʋ sɩ kaa mʋ pɩ Iziral tinteeŋ kuoro, ŋ-la nɛ ʋ ŋmʋnsa hɛ: “Mɩ-na Siiria kuoro nɛ ŋmʋnsɛ teniŋ deeŋ a joŋo pɩ mɩ tɩntɩnna Naamaŋ dɩ ʋ kaa kʋ pɩŋ. Mɩɩ chɛ dɩ ŋ pɛ ʋ lɛ a vaarɛ ʋ dayalɩbɩŋ nɛ.”

⁷ Iziral tinteeŋ kuoro sɩ laa teŋ-la karɩmɛ, fawʋllʋŋ kɛnʋ ʋ tʋɔŋ chei. Ʋ kɛŋ ʋ gɛnnɩŋ kɩɛsɛ aŋ bʋl, “Siiria tɩŋŋaa kuoro sɩ sɩ dɩ mɩ vaarɛ baala deeŋ, ʋ bɩɩna mɩ ŋaa Wɩa nɛ sɩ jaŋ wuo kpʋ aŋ chɩsɛɛ? Ʋ nagɛ yuosuŋ nɛ ʋ chɩchɛ mɩ teeŋ ŋɩɩ.”

⁸ Wɩa wʋlaabʋlla Elaasa sɩ nɩa dɩ Iziral tinteeŋ kuoro ŋaa wɩɩ-la, ʋ tɩŋ nɩaa ba mʋ pɩɛsʋ: “Bɛɛ nɛ tɩɩ ŋ tʋɔŋ chei ŋ kɛŋ ŋ gɛnnɩŋ kɩɛsɛ? Leŋ dɩ baal-la kɔ mɩ teeŋ, ʋ jaŋ jɩŋ dɩ Wɩa wʋlaabʋlla hɛ Iziral tinteeŋ lɛ.”

⁹ Ŋɩɩ nɛ Naamaŋ arɩ ʋ janɩŋ arɩ ʋ janɩŋ torukoba kʋ chɩŋ Elaasa dɩa boiŋ niiŋ.

¹⁰ Elaasa tɩŋ ʋ tɩntɩnna ʋ kʋ lɩɩ bʋla pʋ, “Mʋ Jɔdaŋ fuo-la a kɛŋ ŋ tɩtɩa tuu yu lɩɩŋ naansɩɩŋ bʋlɩpɛ. Ŋ jaŋ duori, ŋ bɩra bɩ disiniŋ jaŋ kɛŋ.”

¹¹ Ŋɩɩ nɛ baanɩŋ kɛŋ Naamaŋ ʋ viviiri aŋ bʋl, “Mɩ fa bɩɩna ʋ jaŋ kʋ lɩɩ mɩ teeŋ a yɩrɛ ʋ Tɩɩna Wɩa, aŋ kɛŋ ʋ nɩsɩŋ zaarɛ mɩ yaraa lere-la sɩ pʋlla a vaarɛmɛ.

¹² Fuonu-la sɩ hɛ Damasɩkʋs lɛ baa yɩrɛ Abana arɩ Faapa bɩ zɔmɔ kɩɩ fuonu-la kala sɩ hɛ Iziral tinteeŋ lɛɛ? Mɩ fa jaŋ wuo tuu ba dɔŋɔ a kɛŋ mɩ tɩtɩa yu lɩɩ-la a duori a bɩra bɩ disiniŋ jaŋ kɛŋ.” Ŋɩɩ nɛ Naamaŋ faasa na baanɩŋ a viviiri.

¹³ Naamaŋ tɩntɩnnaa kɔ ʋ teeŋ a pɩɛsʋ, “La nyɩmma, dɩ Wɩa wʋlaabʋllʋ-la nɛ fa sɩ dɩ ŋ ŋaa wʋduo, ŋ fa bɩ jaŋ wuo ŋaa? Bɛɛ nɛ saa tɩɩ ŋ bɩ jaŋ kɛŋ ŋ tɩtɩa mʋ yu Jɔdaŋ fuo-la a duori arɩ ʋ sɩ bʋl ŋɩɩ?”

¹⁴ Ŋɩɩ nɛ Naamaŋ kɛŋ ʋ tɩtɩa tuu yu Jɔdaŋ fuo-la lɩɩŋ naasɩŋ bʋlɩpɛ, arɩ Wɩa wʋlaabʋlla Elaasa sɩ bʋl ŋɩɩ pʋ. Ʋ duori, ʋ yaraa kala ŋaa mʋla mʋla a nagɛ bii-mulo.

¹⁵ Ŋɩɩ nɛ Naamaŋ arɩ ʋ tɩntɩnnaa kala mɩɩra mʋ Wɩa wʋlaabʋllʋ-la teeŋ. Naamaŋ mʋ chɩŋ ʋ sɩpaaŋ aŋ bʋl, “Lɛɛlɛ mɩ jɩma arɩ Wɩa tuo dʋnɩa sɛmɛ na-kala see Iziral lɛ. Mɩɩ sʋlʋŋ, laa zile kɩaa deemba ŋ tɩntɩnna teeŋ.”

¹⁶ Elaasa bʋl, “La TƖƖNA sɩ weye wɩaa, Nɩɩ-la mɩ sɩ tɩma pɩpa, mɩ bɩ kʋŋkala jaŋ laa ŋ teeŋ.” Naamaŋ ha vɩa aŋ pɛsɛ, ka ʋ vɩa.

¹⁷ Naamaŋ bɩra bʋl, “Mɩɩ sʋlʋŋ, dɩ ŋ nɛ bɩ kʋŋkala jaŋ laa, leŋ dɩ mɩ-na ŋ tɩntɩnna ŋaa ma tinteeŋ hagɩla kakumo toruko sɩɩŋ bʋlɩa a kaa viiri. A chɩŋ lɛɛlɛ a kaa mʋ mɩ-na ŋ tɩntɩnna bɩra bɩ jaŋ kɔ dɩ mɩ nyɩgɛ kɩaa pɩ vene koo a kpaarɛ vene kala, see La TƖƖNA dʋndʋŋa.

¹⁸ Ama mɩɩ sʋl La TƖƖNA dɩ ʋ joŋ wɩɩŋ deeŋ chɛmɛ: Dɩ mɩ nɛ pɛ mɩ nɩhɩaŋ Siiria kuoro lɛ a kɛnʋ jʋʋ vene-la ba sɩɩ yɩrɛ Rimoŋ dɩ-kpaarɩŋ, dɩ ʋ kpirimi ʋ sɩpaaŋ a yelli mɩ vaaŋ lɛ dɩ mɩ ma ŋaa ŋɩɩ, dɩ La TƖƖNA joŋo chɛmɛ.”

¹⁹ Elaasa bʋl, “Ʋ zɔmɔ, ŋ jaŋ mʋ woruŋ.” Naamaŋ sɩ vɛnɛ mʋ magɛ ŋɩɩ,

²⁰ Wɩa wʋlaabʋlla Elaasa tɩntɩnna Gehazi bʋl ʋ tʋɔŋ lɛ, “Mɩ nɩhɩaŋ leŋe Naamaŋ nɩɩ sɩma nɛ, ʋ sɩ bɩ kɩalɩŋ ʋ sɩ kaa kɔ dɩ ʋ pʋ kʋŋkala laa, La TƖƖNA sɩ weye wɩaa, mɩ jaŋ kiri ʋ libe a laa kʋŋ ʋ teeŋ.”

²¹ Ŋɩɩ nɛ Gehazi kire to Naamaŋ harɩŋ. Ʋ sɩ na dɩ ʋ fá kʋkɔ ʋ teeŋ, ʋ tuu ʋ jaaba toruko lɛ a chemu a pɩɛsʋ, “Ba fɩɛlaa?”

²² Gehazi bʋl, “Ba fɩɛla nɛ. Mɩ nɩhɩaŋ nɛ tɩmmɛ dɩ mɩ bʋla pɩŋ, ‘Bapʋɔsɛ biisiŋ balɩa nɛ lɩɩ Wɩa wʋlaabʋllaa tʋɔŋ Efirem tintee-la peelee sɩ yʋga lɛ a kɔ. Ʋ sɩ dɩ ŋ pɩmɛ warɩpʋla bʋɩ batori arɩ gɛrɩ-laalaa tʋŋ bʋlɩa dɩ ʋ pɩba.’ ”

²³ Ŋɩɩ nɛ Naamaŋ bʋl, “Ŋ jaŋ wuo laa warɩpʋla magɛ ŋɩɩ ŋ sɩ daga naansɩɩŋ bʋlɩa a pɛ gɛrɩ-laalɩa-la lɛ.” Naamaŋ pɛsɛ Gehazi lɛ ŋɩɩ nɛ a vɔɔ warɩpʋla-la bɔtɔ balɩa a pɛ gɛrɩ-laalaa tʋŋ bʋlɩa lɛ a joŋo chʋŋ ʋ tɩntɩnnaa balɩa ba kaa laa Gehazi sɩpaaŋ.

²⁴ Gehazi sɩ kʋ yi dundolo-la nyuŋ Elaasa sɩ hɛ, ʋ laa kɩalɩŋ nɩalɩŋ teeŋ a joŋo bil dɩa lɛ, aŋ taba ba viiri.

²⁵ Ŋɩɩ nɛ ka Gehazi jʋʋ a chɩŋ ʋ nɩhɩaŋ Elaasa sɩpaaŋ. Ʋ pɩɛsʋ, “Nɩɩ nɛ ŋ lɩɩ Gehazi?” Ʋ bʋl, “Mɩ bɩ lee-kala mʋa.”

²⁶ Elaasa bɩra pɩɛsʋ, “Ŋ bɩ jɩŋ arɩ mɩ dɩma naŋ nɛɛ, bʋa-la lɛ Naamaŋ sɩ tuu ʋ jaaba toruko nyuŋ a kʋ chemiŋ? Bʋa deeŋ lɛ nɛ maga dɩ ŋ laa moribiee arɩ gɛnnɩŋ, Olif tɩɩsɩŋ bagɩsɩŋ arɩ girep tɩɩsɩŋ bagɩsɩŋ, piesee, arɩ nɛsɩŋ, koo tɩntɩnnaa?

²⁷ Ŋɩɩ wɩaa Naamaŋ dayalɩbɩɩ-la jaŋ mɩɩra jʋʋ ŋ dɩ ŋ doho nɩaa a kaa mʋ wuu.” Ŋɩɩ nɛ Gehazi leŋ Elaasa aŋ lɩɩ. Dayalɩbɩɩ-la kɛnʋ, ʋ yaraa kala pʋllɛ a nagɛ kuŋkunuŋ.