2 KUOROO 4 - WƖA TENIŊ

Elaasa leŋe yo-haala nʋʋŋ pʋŋ

¹ Tapʋlɩɩ kʋbala Wɩa wʋlaabʋllaa dɔŋɔ yo-haala mʋ Elaasa teeŋ, a yele pʋ, “Ŋ jɩma mɩ bala fa ŋaa ŋ harɩ-tooru nɛ a to La TƖƖNA woruŋ aŋ sʋʋ. Ama ʋ dii nʋʋ chɩŋ nɛ. Nɩɩ-la kɔ dɩ ʋ kɛsɛ mɩ hambolibiisiŋ balɩa a kaa mʋ dɩ ba ŋaa ʋ yosi.”

² Wɩa wʋlaabʋlla Elaasa pɩɛsʋ, “Bɛɛ nɛ ŋ chɛ dɩ mɩ ŋaa pɩŋ? Ŋ dɩa lɛ, bɛɛ kʋŋ nɛ ŋ kɛŋ? Bʋla pɩmɛ.” Yo-haal-la bʋl, “Mɩ-na ŋ tɩntɩnna bɩ kʋŋkala kɛnɛ, see nʋʋŋ mʋapɩlɩɩ a hɛ loŋ lɛ.”

³ Elaasa bɩra bʋl, “Mʋ gɔllɔ sʋl nʋʋŋ-loŋ wuoloo ŋ dɩ nɩalɩŋ sɩ jʋʋ kpagɛ dɔŋɔ teeŋ. Laa yʋgɛ,

⁴ dɩ ŋ dɩ ŋ hambolibiisiŋ kaa jʋʋ dɩa aŋ kɛŋ boiŋ tɔ. Má wansɛ nʋʋ-la a hɩhɛ loŋ-wuolo-la kala lɛ. Dɩ ba kʋŋkala nɛ suo, má kaa gɩɩga bil.”

⁵ Ŋɩɩ nɛ haal-la ta Elaasa aŋ mʋ gɔllɔ sʋl loŋ wuolo-la. Ʋ dɩ ʋ hambolibiisiŋ jʋʋ dɩa aŋ kɛŋ boiŋ tɔ. Ʋ biiri-la paa loŋ-wuolo-la pʋ, ʋ wansɛ nʋʋ-la a hɩhɛ.

⁶ Lonnu-la kala ʋ biiriŋ sɩ joŋo pʋ sɩ suo, ʋ yɩrɛ ʋ hambolibiisi-la dɔŋɔ a bʋl, “Bɩra joŋ loŋ-la dɔŋɔ a kaa kɔ.” Bile bʋl, “Loŋ kala bɩra tuo.” Ŋɩɩ nɛ nʋʋ-la ma fa sɩɩ lɩɩ loŋ-la lɛ ʋ sɩɩ wansʋ kɛrɛ a bɩra bɩ lɩɩ.

⁷ Haal-la mʋ bʋl wɩɩ-la sɩ ŋaa a pɩ Elaasa. Elaasa bʋla pʋ, “Mʋ joŋ nʋʋ-la yallɛ tiŋ ŋ chɩŋ-la, aŋ ka ŋ dɩ ŋ hambolibiisiŋ ma kɛŋ kʋkaanaa a kaa beŋ ma tɩtɩa.”

Elaasa chɩsɛ Sunem tɩŋŋaa bie sʋʋŋ lɛ

⁸ Tapʋlɩɩ kʋbala Elaasa sii mʋ taŋ-la ba sɩɩ yɩrɛ Sunem. Haal kʋbala fa hɛ nɩmɛ a kɛŋ kɩaa woruŋ. Ŋɩɩ nɛ haal-la yɩrʋ dɩ ʋ kʋ dii kɩaa ʋ dɩa lɛ. A lɩɩ ŋɩɩ harɩŋ, dɩ Elaasa nɛ kɔ taŋ-la na-kala, ʋ yie kɔ haal-la arɩ ʋ bala dɩa nɛ a dii kɩaa.

⁹ Ŋɩɩ nɛ bʋa kʋbala lɛ haal-la bʋla pɩ ʋ bala, “Mɩ laa dii arɩ baal-la sɩ yie vɛnɛ kʋkɔ daha ŋaa Wɩa nʋʋ nɛ.

¹⁰ Leŋ dɩ la saa dɩɩ-bie a sugili la dɩa nyuŋ, a chɛ kʋpɩnɩŋ, kpasa, teebʋl arɩ chaanɩŋ a bil nɩmɛ. Bʋa na-kala dɩ ʋ nɛ kɔ la teeŋ, dɩ ʋ chʋa nɩmɛ.” Ŋɩɩ nɛ ba ŋaa ŋɩɩ.

¹¹ Tapʋlɩɩ kʋbala Elaasa bɩra kɔ, a jʋʋ pɩŋ dɩa-la ba sɩ saa bil ʋ lɛ dɩ ʋ wiesi.

¹² Ʋ fa bʋla pɩ ʋ tɩntɩnna ba sɩɩ yɩrɛ Gehazi, “Yɩrɛ Sunem tɩŋŋaa haal-la pɩmɛ.” Ŋɩɩ nɛ ʋ yɩrɛ haal-la, ʋ kʋ jʋʋ chɩŋ Elaasa sɩpaaŋ.

¹³ Elaasa bɩra bʋla pɩ Gehazi, “Bʋla pɩ haal-la arɩ ʋʋ lɔl la wɩaa kɩŋkɛŋ. Wʋbɛɛ nɛ ʋ jaŋ cho dɩ la ŋaa pʋ? Ʋ kɛŋ wɩɩ, ʋ sɩ jaŋ cho dɩ mɩ mʋ bʋla pɩ kuoro koo laalɩyuori-hɩaŋ dɩ ba ŋaa pʋʋ?” Ʋ sɩ bʋl ŋɩɩ, haal-la ma bʋl, “Mɩ hɛ mɩ nɩaa tʋɔŋ nɛ, aa na kʋŋkala mɩ sɩɩ chɛ.”

¹⁴ Ŋɩɩ nɛ Elaasa pɩɛsɛ Gehazi, “Wʋbɛɛ nɛ maga dɩ la ŋaa pʋ?” Ʋ bʋl, “Mɩ jɩma arɩ ʋ bɩ bii kɛnɛ, ka ʋ bala ma hɩɛsɛ.”

¹⁵ Elaasa bɩra bʋl, “Bɩra yɩrʋ.” Gehazi sɩ yɩrɛ haal-la, ʋ kʋ jʋʋ a chɩŋ boiŋ niiŋ.

¹⁶ Elaasa bʋla pɩ haal-la, “Harɩŋ jɩna bʋa deeŋ tɩtɩa lɛ, ŋ jaŋ kori hambolibie.” Haal-la bʋl, “Aɩ, mɩ nɩhɩaŋ, sɩ́ mɩ-na ŋ tɩntɩnna nyɩsʋ, ŋ ŋaa Wɩa nʋʋ nɛ.”

¹⁷ Ʋ ŋɩɩ harɩŋ lɛ nɛ haal-la kɛŋ luoruŋ, a lʋl hambolibie harɩŋ jɩna bʋa-la tɩtɩa lɛ arɩ Elaasa sɩ bʋl ŋɩɩ pʋ.

¹⁸ Bile sɩ kʋ waa mʋa, tapʋlɩɩ kʋbala ʋ sii a mʋ ʋ nyɩmma teeŋ, dɩ baa ŋaa baga kɩaa.

¹⁹ Bile ŋmoo niiŋ a bʋla pɩ ʋ nyɩmma, “Mɩ nyuŋ nɩɩ wɩɩ, mɩ nyuŋ nɩɩ wɩɩ.” Ʋ nyɩmma bʋla pɩ ʋ tɩntɩnnaa dɔŋɔ, “Kɛnʋ kaa mʋ pɩ ʋ naaŋ.”

²⁰ Tɩntɩnnʋ-la sɩ kɛnʋ kaa mʋ pɩ ʋ naaŋ, ʋ laaʋ bil ʋ naasɩŋ nyuŋ chʋchʋɔŋ kala a kaa mʋ wɩɩhɛyɛ bile sʋʋ.

²¹ Ŋɩɩ nɛ ʋ kɛnʋ a kaa jɩla bil Elaasa dɩa-la lɛ, ʋ kʋpɩnɩŋ nyuŋ, aŋ kʋ lɩɩ a kɛŋ boiŋ tɔ hɛ bile lɛ.

²² Ŋɩɩ nɛ haal-la yɩrɛ ʋ bala a bʋla pʋ, “Leŋ dɩ tɩntɩnna-la dɔŋɔ kɛŋ kakusu-la dɔŋɔ kʋ pɩmɛ dɩ mɩ fá mʋ Wɩa tɩntɩnnʋ-la teeŋ aŋ mɩɩra kɔ.”

²³ Ʋ bala pɩɛsʋ, “Bɛɛ nɛ tɩɩ ŋ chɩchɛ dɩ ŋ mʋ ʋ teeŋ jɩnɩŋ? Jɩnɩŋ bɩ chɛŋ-falɩɩ ŋaa a bɩra bɩ chɛ-wiesii-la chɛɛŋ ma ŋaa.” Haal-la bʋl, “Wɩɩkala tuo.”

²⁴ Ŋɩɩ nɛ aŋ kpɩɛrɛ ʋ kakumo a jɩl aŋ bʋla pɩ ʋ tɩntɩnna, “Laa sɩpaaŋ dɩ la fá mʋ, sɩ́ chɩŋ, see dɩ mɩ sɩ ŋ chɩŋ.”

²⁵ Ʋ sii a mʋmʋ. Ʋ mʋa dɩ Wɩa tɩntɩnnʋ-la hɔŋ peel-la ba sɩɩ yɩrɛ Kamɛl nyuŋ. Elaasa sɩ na haal-la dɩ-bolii dɩ ʋʋ kɔ, ʋ bʋla pɩ ʋ tɩntɩnna Gehazi, “Bee na, Sunem tɩŋŋaa haal-la nɩɩ kɔ.

²⁶ Sii fá mʋ chemu lɩma a pɩɛsʋ na ba fɩɛla nɛɛ? Ʋ dɩ ʋ bie arɩ ʋ bala kala doliee?” Ʋ mʋ bʋl ŋɩɩ, haal-la ma bʋl, “Wɩɩkala tuo.”

²⁷ Ama haal-la sɩ kʋ jɩl Elaasa teeŋ peel-la nyuŋ, ʋ mʋ kpirime kɛŋ ʋ naaŋ lɛ. Ŋɩɩ nɛ Gehazi kɔ dɩ ʋ yigi haal-la ta. Elaasa bʋla pʋ, “Leŋu, ʋ tʋɔŋ chaasa chei nɛ, ama La TƖƖNA kaa faamɛ nɛ, ʋ bɩ leŋe mɩ jɩŋ wɩɩ-la sɩ tɩɩ wɩɩŋ deeŋ ŋaa.”

²⁸ Ŋɩɩ nɛ haal-la pɩɛsɛ Elaasa, “Mɩ nɩhɩaŋ, mɩ pɩɛsɩŋ bii wɩaa? Mɩ bɩ sɩ ŋ sɩ́ mɩ nyɩsʋʋ?”

²⁹ Elaasa bʋla pɩ Gehazi, “Kɛŋ ŋ tembiiŋ vɔɔ ŋ gɛrɩŋ kpɛrɛ a kɛŋ ŋ tɩtɩa hɛ dɔŋɔ, a laa mɩ dantɩga a kaa fá mʋ haal-la dɩa. Dɩ ŋ nɩɩ mʋ, sɩ́ chɩna chʋɔlɛ nʋʋkala. Dɩ nʋʋ chʋɔlʋŋ ma, sɩ́ laa. Dɩ ŋ nɛ mʋa, joŋ mɩ dantɩga-la a daŋ bile sɩaa lɛ.”

³⁰ Bile naaŋ bʋl, “La TƖƖNA sɩ weye, arɩ ŋ ma sɩ weye wɩaa, mɩ bɩ jaŋ mʋ dɩ ŋ nɛ bɩ mɩ harɩŋ to.” Ŋɩɩ nɛ Elaasa sii to haal-la harɩŋ ba mʋ.

³¹ Gehazi laa sɩpaaŋ fá a kɛŋ dantɩga-la a mʋ daŋ bile sɩaa lɛ, ka bile bɩ jigise koo a ŋaa wɩɩ a nagɛ arɩ ʋ weye. Ŋɩɩ nɛ Gehazi mɩɩra fá mʋ cheŋ Elaasa a bʋla pʋ, “Bile bɩ sie.”

³² Elaasa mʋ jʋʋ dɩa-la, a na bile dɩ ʋ sʋba a pɩŋ ʋ-na Elaasa kʋpɩnɩŋ nyuŋ.

³³ Ʋ kɛŋ boro tɔ hɛ ʋ dɩ bile lɛ aŋ sʋl La TƖƖNA.

³⁴ Ŋɩɩ nɛ ʋ jɩla pɩŋ bile nyuŋ, a kɛŋ ʋ niiŋ chu bile niiŋ lɛ, a kɛŋ ʋ sɩaa ma chu mɛrɛ bile sɩaa lɛ, a kɛŋ ʋ nɩsaa ma daŋ bile nɩsaa lɛ, aŋ saa tɩɛna chu bile kala lɛ. Ʋ sɩ ŋaa ŋɩɩ, bile yaraa kala lɩŋ.

³⁵ Ŋɩɩ nɛ aŋ sii gʋgɔllɛ dɩa-la tʋɔŋ, a mʋ sɩpaaŋ aŋ mɩɩra kɔ harɩŋ, a mʋ sɩpaaŋ aŋ mɩɩra kɔ harɩŋ, aŋ bɩra mʋ tɩɛna chu tɔ bile lɛ. Bile chɩmɩsɛ naansɩɩŋ bʋlɩpɛ, aŋ kɛŋ ʋ sɩaa suri.

³⁶ Elaasa yɩrɛ Gehazi a bʋla pʋ, “Yɩrɛ Sunem tɩŋŋaa haal-la.” Ŋɩɩ nɛ ʋ yɩrʋ. Haal-la sɩ kɔ Elaasa teeŋ, ʋ bʋla pʋ, “Joŋ ŋ nanʋala.”

³⁷ Haal-la kʋ jʋʋ kpirimi Elaasa sɩpaaŋ, aŋ sii joŋ ʋ bie a kaa lɩɩ.

Elaasa bɩra ŋaa wʋkpuŋkperisiŋ balɩa

³⁸ Ŋɩɩ harɩŋ lɛ nɛ Elaasa mɩɩra kɔ Gɩlɩgal tinteeŋ, dɩ losuŋ jʋʋ nɩmɛ. Tapʋlɩɩ kʋbala ʋ dɩdagɛ Wɩa wʋlaabʋlla-la sɩ kɔ ʋ teeŋ. Ŋɩɩ nɛ ʋ bʋla pɩ ʋ tɩntɩnna, “Hɛ nyiniŋ a joŋ pupoi-balɩŋ a chɔ dɩsɩŋ pɩ Wɩa wʋlaabʋllaa deemba.”

³⁹ Ba dɔŋɔ lɩɩ jɩl pɔkɔŋ nyuŋ dɩ ʋ jaa pɩpaarɩ-la ba sɩɩ dii, a na pɩpaa-kpuŋkpere ba sɩɩ bɩ ʋ jɩŋ. Ʋ tɔrɛ ʋ nɛnɛɛ su ʋ gɛrɩŋ a kaa jʋʋ kere hɛ dɩsɩ-la ba sɩ chɔ lɛ.

⁴⁰ Ba ŋaa dɩsɩ-la a pɩ nɩalɩŋ dɩ ba dii. Ba die dɩ ba hɛyɛ, ba ŋmoo niiŋ a bʋla pɩ Elaasa, “Wɩa wʋlaabʋllʋ, dɩsɩ-la hɛyɛ nɛ.” Ŋɩɩ nɛ ba bɩ wuo dii.

⁴¹ Elaasa bʋl, “Má kɛŋ munuŋ mʋa kɔ.” Ba kaa kɔ ʋ joŋo hɛ dɩsɩ-la arɩ pupoi-la tʋɔŋ, aŋ bʋl, “Má ŋaa dɩsɩ-la pɩba dɩ ba dii.” Ba die dɩ ba sɩma.

⁴² Ŋɩɩ nɛ baal kʋbala lɩɩ taŋ-la ba sɩɩ yɩrɛ Baal Salɩsa, a kɛŋ jɩna-la mɩɩ-bumbumba ba sɩ kaa wasɛ boroboroba kɩaa mara arɩ kuori-mɩɩ-falaa koŋŋoo baŋmɛnɛ a kaa kʋ pɩ Elaasa. Elaasa bʋla pɩ ʋ tɩntɩnna, “Joŋo pɩ nɩalɩŋ dɩ ba dii.”

⁴³ Ʋ tɩntɩnnʋ-la pɩɛsʋ, “Ɛɛ nɛ mɩ jaŋ wuo joŋ kʋbiisiŋ deemba a pɩ nɩaa zɔlɔ dɩ ba dii?” Ŋɩɩ nɛ Elaasa bɩra bʋl, “Ŋ-na joŋo pɩba. La TƖƖNA sɩ, ‘Ba jaŋ dii aŋ ka.’ ”

⁴⁴ Ŋɩɩ nɛ tɩntɩnnʋ-la joŋ kɩalɩŋ a bil nɩalɩŋ sɩpaaŋ. Ba dii aŋ ka, arɩ La TƖƖNA sɩ bʋl ŋɩɩ.