2 KUOROO 3 - WƖA TENIŊ

Iziral tɩŋŋaa arɩ Mʋab tɩŋŋaa yuo laalɩŋ

¹ Jehosafat sɩ dii Juda tinteeŋ kuoruŋ, ʋ jɩsɩŋ fii arɩ chori lɛ nɛ Ahab nanʋala Joram ma dii kuoruŋ Iziral tinteeŋ lɛ. Ʋ hɔŋ Samarɩa lɛ a bemba jɩsɩŋ fii arɩ balɩa.

² Ʋ ma ŋaa wʋbɔŋŋɔɔ nɛ La TƖƖNA teeŋ, ama ʋ wʋbɔŋŋɔɔ bɩ ʋ nyɩmma arɩ ʋ naaŋ Jɛzɛbɛl wʋbɔŋŋɔɔ maga. Joram fa ŋmoo vene-la ba sɩɩ yɩrɛ Baal tabɩɩ-la ʋ nyɩmma fa sɩ bile a yɛrɛ nɛ.

³ Ama wʋbɔmɔ-la Nɛbat nanʋala Jerobuam fa sɩ ŋaa, a leŋ Iziral tɩŋŋaa ŋaa ba tɩtɩa, Joram ma fa ŋaa ba tɩtɩa nɛ.

⁴ Mʋab kuoro ba sɩɩ yɩrɛ Mɛsa faa dɩɛsɛ piesee nɛ. Jɩna na-kala ʋ yie joŋ pie-pɔrɔɔ bʋɩ zɔlɔ nɛ a pɛ pie-belliŋ bʋɩ zɔlɔ pʋnaa lɛ a tiŋ lampoo a pɩ Iziral tinteeŋ kuoro.

⁵ Ama Kuoro Ahab sʋʋŋ harɩŋ lɛ, Mʋab kuoro Mɛsa vɩa Iziral tinteeŋ kuoro niiŋ.

⁶ Tapʋlɩɩ kʋbala kuoro Joram lɩɩ Samarɩa lɛ a yɩrɛ Iziral laalɩyuoroo kala ba kʋ hɛ dɔŋɔ lɛ,

⁷ aŋ tɩma pɩ Juda tinteeŋ kuoro Jehosafat a bʋl: “Mʋab kuoro vɩa mɩ niiŋ nɛ. Ŋ jaŋ pɛ mɩ lɛ dɩ la mʋ yuou?” Jehosafat bʋl, “Oo, mɩ jaŋ mʋ. Mɩ dɩ mɩ nɩaa arɩ mɩ janɩŋ kɛŋ la tɩtɩa hɛ dɔŋɔ nɛ, arɩ ŋɩɩ ŋ dɩ ŋ nɩaa arɩ ma janɩŋ sɩ kɛŋ ma tɩtɩa hɛ dɔŋɔ.”

⁸ Jehosafat pɩɛsɛ, “Wombii bɛɛ nɛ la jaŋ to a mʋ yuoba?” Joram bʋl, “La to Ɛdɔm tintee-hɩlɩŋ.”

⁹ Ŋɩɩ nɛ Iziral tinteeŋ kuoro Joram arɩ Juda tinteeŋ kuoro Jehosafat a pɛ Ɛdɔm tinteeŋ kuoro lɛ sii a mʋmʋ dɩ ba yuo Mʋab tɩŋŋaa. Ba sɩ gɔllɛ tapʋlaa balɩpɛ, ba lɩɩŋ dɛrɛ. Laalɩyuoro-la bɩra bɩ lɩɩŋ kɛnɛ dɩ ba dɩ ba pʋsʋŋ nyʋa.

¹⁰ Iziral tinteeŋ kuoro Joram ŋmoo niiŋ a bʋl, “Bɛɛ ba! La TƖƖNA yɩrɛ la kuoroo deemba batori kala kʋ lɩɩ dɩ ʋ jonla hɛ Mʋab tinteeŋ kuoro nɩsɩŋ lɛ nɛ koo?”

¹¹ Ŋɩɩ nɛ Jehosafat pɩɛsɛ, “La TƖƖNA wʋlaabʋllʋ kala tuo daha dɩ la to ʋ lɛ a pɩɛsɛ La TƖƖNA a naa?” Iziral tinteeŋ kuoro Joram tɩntɩnnɩ-hɩaŋ dɔŋɔ bʋl, “Safat nanʋala Elaasa hɛ daha. Ʋ nɛ fa pɛ Ɩlaaja lɛ ba tɩtɩŋ.”

¹² Kuoro Jehosafat bʋl, “Ʋ sɛnɛ ŋaa Wɩa wʋlaabʋllʋ nɛ.” Ŋɩɩ nɛ kuorusu-la batori kala to dɔŋɔ a mʋ Elaasa teeŋ.

¹³ Elaasa pɩɛsɛ kuoro Joram, “Bɛɛ kʋŋ wɩɩ nɛ ŋ chɛ mɩ teeŋ? Mʋ pɩɛsɛ ŋ nyɩmma arɩ ŋ naaŋ veŋ-vʋgʋra-la.” Joram bʋl, “Aɩ, La TƖƖNA nɛ yɩrɛ la kuoroo deemba batori kʋ lɩɩ dɩ ʋ joŋ la hɛ Mʋab tɩŋŋaa nɩsɩŋ lɛ.”

¹⁴ Elaasa bʋl, “La TƖƖNA Wɩɩjarɩbakɔ sɩ weye, Nɩɩ-la mɩ sɩ tɩma pɩpa wɩaa, dɩ Juda tinteeŋ kuoro Jehosafat wɩaa dee, mɩ fa paala bɩ jaŋ bee naŋ.”

¹⁵ Elaasa bɩra bʋl, “Má yɩrɛ cheŋ-duuro pɩmɛ.” Cheŋ-duuru-la sɩ kɔ a du, La TƖƖNA doluŋ kʋ jʋʋ Elaasa.

¹⁶ Ʋ sɩ, “Wɩɩ-la La TƖƖNA sɩ bʋla nɛ ŋ-la: Má lu buotuonuŋ fuonaaŋ deeŋ lɛ.

¹⁷ Ma bɩ jaŋ na peliŋ koo duonuŋ daha, ama fuonaa-la kala jaŋ su arɩ lɩɩŋ dɩ ma dɩ ma pʋsʋŋ kala nyʋa.

¹⁸ Wɩɩŋ deeŋ ŋaa wʋbie nɛ La TƖƖNA teeŋ. Ʋ jaŋ joŋ Mʋab tɩmma-la ma a hɛ ma nɩsɩŋ lɛ.

¹⁹ Ma jaŋ yuo dii tabala-la kala ba sɩ saa kɛrɛ golli arɩ tasɩŋ dɔnsʋŋ. Ma jaŋ keri tɩɩ-zɔŋŋɔɔ kala a lo, aŋ tɔ lɩɩ-bul-sɩaa kala, aŋ paa tabɩaa tɔ ba tinteeŋ lee na-kala sɩ sɩma.”

²⁰ Taŋ sɩ pʋla chʋchʋɔŋ, bʋa-la sɩ maga dɩ ba kpʋ pʋsʋŋ a sʋl Wɩɩsʋlʋŋ, lɩɩŋ pɛllɛ a lɩɩ Ɛdɔm tinteeŋ dɩɩrɩŋ, a kʋ su tintee-la kala.

²¹ Mʋab tɩŋŋaa sɩ nɩa arɩ kuorusu-la batori kɔ dɩ ba yuoba nɛ, ba yɩrɛ nʋʋ na-kala sɩ magɛ laalɩŋ yuonuŋ, nɩhɩasɩŋ arɩ bapʋɔsɛ biisiŋ kala nyɩgɩlɛ, a kɛŋ ba tɩtɩa hɛ dɔŋɔ a mʋ chɩŋ ba tinteeŋ bʋa.

²² Mʋab tɩmma-la sɩ sie chʋchʋɔ-fɩɛla, ba na dɩ wɩa pɔsɔ hɛ lɩɩ-la lɛ, ʋ fɩɛsɛ a nagɛ chalɩŋ.

²³ Ba sɩ na ŋɩɩ, ba bʋl, “Chalɩŋ nɛ, kuorusu-la naga ba gʋra yuo dɔŋɔ nɛ a kpʋ dɔŋɔ. Má leŋ dɩ la mʋ ba buguŋ a paa ba kɩaa.”

²⁴ Ama Mʋab tɩmma-la fa sɩ kʋ yi Iziral tɩŋŋaa buguŋ, ba sii yuoba ba fá. Ba kire to ba harɩŋ jʋʋ ba tinteeŋ a kpʋba.

²⁵ Ŋɩɩ nɛ Iziral tɩŋŋaa chei Mʋab tasɩŋ kala, aŋ paa tabɩaa tɔ ba tinteeŋ lee na-kala sɩ sɩma, a tɔ ba lɩɩ-bul-sɩaa ma kala, aŋ keri ba tɩɩ-zɔŋŋɔɔ kala a lo. Taŋ-la ba sɩɩ yɩrɛ Kɛɛ-Harɛsɛf dʋndʋŋa nɛ fa ka. Ama kpal-yuoroo ma nɛ mʋ golli taŋ-la a yuou.

²⁶ Mʋab tinteeŋ kuoro Mɛsa sɩ na dɩ ba yuo diiu, ʋ kɛŋ ʋ laalɩyuoroo zɔɔ-balɩpɛ, baa nɛrɩgɛ dɩ ba luuro to Ɛdɔm kuoro laalɩyuoroo tʋɔŋ lɩɩ, a walɩma lɔl.

²⁷ Ŋɩɩ nɛ ʋ kɛŋ ʋ hambolibii-hɩaŋ-la sɩ jaŋ laa ʋ nyuŋ dii kuoruŋ a kpʋʋ ba taŋ jebiiŋ nyuŋ a kpaarɛ ba vene. Fawʋllʋŋ faasa kɛŋ Iziral tɩŋŋaa, ba mɩɩra mʋ ba tinteeŋ.