2 KUOROO 23 - WƖA TENIŊ

Josaaya wasa wulli Wɩa wombiee

¹ Ŋɩɩ nɛ kuoro Josaaya yɩrɛ Juda tinteeŋ arɩ Jerusalɛm taŋ-la nɩhɩasɩŋ kala hɛ dɔŋɔ.

² Ba mʋ La TƖƖNA dɩɩ-bal-la, a pɛ Wɩɩsʋllɩ sɩpaalaaraa arɩ Wɩa wʋlaabʋllaa lɛ, Jerusalɛm arɩ Juda tinteeŋ nɩbalaa arɩ nɩbiisiŋ kala. Nɩmɛ nɛ Josaaya karɩmɛ Wɩa wombiee teŋ-la kala ba sɩ na La TƖƖNA dɩɩ-bal-la lɛ, nʋʋkala nɩɩ.

³ Kuoro Josaaya sii chɩŋ ʋ dɩchɩnɩŋ, jebii-la sɛmɛ a hɛ niiŋ pɩ La TƖƖNA arɩ ʋ jaŋ to ʋ wombiee arɩ wɩalɩŋ kala ʋ sɩ daga arɩ ʋ tʋɔŋ arɩ ʋ wɩɩ wɩɩkala, a ŋaa wɩalɩŋ kala ba sɩ ŋmʋnsa hɛ teŋ-la tʋɔŋ. Ŋɩɩ nɛ nɩalɩŋ ma kala sɛɩ arɩ ba jaŋ to nii-la sɩ hɛ Wɩa wombiee teŋ-la tʋɔŋ.

⁴ Ŋɩɩ nɛ kuoro bʋla pɩ Hɩlɩkaaya, Wɩɩsʋllɩ sɩpaalaaraa nɩhɩaŋ-la arɩ nɩalɩŋ sɩɩ tɩgɛ ʋ lɛ arɩ nɩalɩŋ sɩɩ pɔ Wɩa dɩa boiŋ niiŋ dɩ ba paa kɩalɩŋ kala sɩ hɛ Wɩa dɩɩ-bal-la lɛ ba kaa kpʋkpaarɛ vesi-la ba sɩɩ yɩrɛ Baal arɩ Asɩra arɩ chɛnwʋlaa a kaa kʋ lɩɩ. Ba paa kʋ lɩɩ, ʋ kɛmba kaa lɩɩ Jerusalɛm lɛ a kaa mʋ Kɩdɩrɔŋ fuonaaŋ sɩ hɛ ʋ harɩŋ, a nyɩgɛba nɩmɛ, a paa ba tʋɔrʋŋ kaa mʋ taŋ-la ba sɩɩ yɩrɛ Bɛtɛl.

⁵ Kuoro Josaaya bɩra kiri nɩalɩŋ Juda tinteeŋ kuoroo fa sɩ lɩɩsa vesiŋ dɩ-kpaaraa ba kpʋkpaarɛ vesi-la sɩ hɛ Juda tinteeŋ tasɩŋ arɩ tasɩ-la kala sɩ golli Jerusalɛm, nɩalɩŋ sɩɩ kpaarɛ vene-la ba sɩɩ yɩrɛ Baal, chɛnɛ, chɛnwʋlaa, arɩ wɩa-nyuŋ kɩaa.

⁶ Ʋ jʋʋ joŋ veŋ-haal-la ba sɩɩ yɩrɛ Asɩra daaŋ sɩ hɛ Wɩa dɩɩ-bal-la lɛ a kaa mʋ Kɩdɩrɔŋ fuonaa-la sɩ hɛ Jerusalɛm harɩŋ a nyɩgɛ, a paa nɔŋ ba bɩɩ ʋ joŋo mɩsɛ ba sʋʋnʋŋ dɩ-huguŋ.

⁷ Ʋ bɩra ŋmoo dɩɩsɩ-la sɩ hɛ Wɩa dɩɩ-bal-la lɛ baalaa jʋʋ a ŋɩŋaa wʋlɩɩlɩŋ a lo. Dɩɩsɩ-la lɛ nɛ haalaa ma fa sʋsʋa gɛnnɩ-la ba sɩ laala kpʋkpaarɛ Asɩra vene-la.

⁸ Ŋɩɩ nɛ Josaaya kɛsɛ veŋ-kpaarɛ hɩasɩ-la kala sɩ hɛ Juda tinteeŋ tasɩŋ lɛ a kaa kɔ Jerusalɛm, aŋ chei korunu-la kala lɛ ba fa sɩɩ kpaarɛ vesi-la, a chɩŋ taŋ-la ba sɩɩ yɩrɛ Geba lɛ a kaa mʋ taŋ-la ba sɩɩ yɩrɛ Bɛɛsɩba. Josaaya fa bɩra chei vesi-la sɩ chɩŋ ba taŋ-la nagʋa boi-baalɩŋ ba sɩɩ yɩrɛ Josua boiŋ niiŋ nɛ.

⁹ Veŋ-kpaara-la fa bɩ La TƖƖNA koruŋ lɛ ka tɩŋ Jerusalɛm lɛ, ama ba pɛ ba naambiiri-la sɩ ŋaa Wɩɩsʋllɩ sɩpaalaaraa nɛ a didii boroboro-la sɩ bɩ sɩbʋrʋŋ kɛnɛ.

¹⁰ Josaaya fa bɩra chei vesiŋ dɩ-kpaara-la ba sɩɩ yɩrɛ Tɔfɛf a hɛ Bɛŋ Hɩnɔm fuonaaŋ lɛ, dɩ nɩaa bɩra sɩ́ ba biiriŋ kaa mʋ kpʋ a nyɩga pɩ vene-la ba sɩɩ yɩrɛ Mɔlɛk.

¹¹ Kɩalɩŋ Juda tinteeŋ kuoroo fa sɩ mɛ ba nagɛ janɩŋ ba kaa chʋchʋɔlɛ wɩɩpɔsʋŋ, ʋ kiri. Janɩ-la fa hɛ Wɩa dɩɩ-bal-la kaala tʋɔŋ nɛ a kpagɛ tɩntɩnnɩ-hɩaŋ kʋbala baa yɩrɛ Netaŋ-Mɛlɛk dɩa. Ŋɩɩ nɛ Josaaya nyɩgɛ janɩŋ torukoba-la ma ba fa sɩ kaa chʋchʋɔlɛ wɩɩpɔsʋŋ.

¹² Josaaya ŋmoo vʋɩyaa korunu-la Juda tinteeŋ kuoroo sɩ saa lo, kɩalɩŋ sɩ hɛ lusuŋ nyuŋ a kpagɛ Ahas lusuŋ-nyuŋ dɩa. Ʋ bɩra ŋmoo korunu-la Manasɛ fa sɩ saa bil Wɩa dɩa kaalɩsɩŋ balɩa-la lɛ. Ʋ ŋmoo ba kala yɛrɛ muno muno a paa yuo hɛ Kɩdɩrɔŋ fuonaaŋ lɛ.

¹³ Kuoro Josaaya fa bɩra chei vesiŋ dɩ-kpaarɩa-la sɩ hɛ Jerusalɛm wɩɩpɔsʋŋ, a hɛ dundolo-la ba sɩɩ yɩrɛ Cheeriŋ Dundolo wɩɩpɔsʋŋ nadiiŋ, lere-la Iziral tinteeŋ kuoro Solomoŋ fa sɩ saa a pɩ Sɩdɔŋ tɩŋŋaa veŋ-bɔŋ-la ba sɩɩ yɩrɛ Asɩtɔrɛf, arɩ Mʋab tɩŋŋaa veŋ-bɔŋ-la ba sɩɩ yɩrɛ Chɛmɔs arɩ Amɔŋ tɩŋŋaa veŋ-bɔŋ-la ba sɩɩ yɩrɛ Mɔlɛk.

¹⁴ Ʋ ŋmoo tabɩa-la ba sɩ bile a kpʋkpaarɛ yɛrɛ aŋ keri Asɩra daa-la ma lo, aŋ chʋŋ nuhuobiine haŋgbelee kʋ su lee-la kala.

¹⁵ Kuoro Josaaya fa bɩra chei koru-la sɩ hɛ Bɛtɛl lɛ arɩ vesiŋ dɩ-kpaarɩ-la Nɛbat nanʋala Jerobuam sɩ saa, nɩɩ-la sɩ leŋe Iziral tɩŋŋaa jʋʋ wʋbɔmʋŋ. Koru-la arɩ vesi-la dɩ-kpaarɩŋ kala nɛ ʋ ŋmoo lo aŋ nyɩgɛ vʋɩyaa dɩ-kpaarɩŋ a nɔŋ ba kala ba nagɛ munuŋ aŋ nyɩgɛ Asɩra daa-la ma.

¹⁶ Ŋɩɩ nɛ kuoro Josaaya bene golli a na vaamaa dundolo nyuŋ. Ʋ mʋ chaarɛ haŋgbelee a kaa mʋ nyɩgɛ koru-la nyuŋ a ŋaa koru-la kɛŋ disiniŋ arɩ La TƖƖNA wʋlaabʋlla fa sɩ bʋl ŋɩɩ.

¹⁷ Ŋɩɩ nɛ kuoro bɩra na vaamɩŋ dɔŋɔ ma a pɩɛsɛ, “Kʋbɛɛ vaamɩŋ nɛ ŋ-la?” Ŋɩɩ nɛ taŋ-la nɩaa bʋla pʋ, “Wɩa wʋlaabʋllʋ-la fa sɩ lɩɩ Juda, ʋ vaamɩŋ nɛ ŋɩɩ, ʋ nɛ fa bʋl wɩalɩŋ kala ŋ sɩ ŋaa a tɩgɛ Bɛtɛl koru-la lɛ.”

¹⁸ Kuoro Josaaya bʋl, “Má leŋ vaaŋ-la-na. Má sɩ́ ʋ haŋgbelee chaarʋ.” Ŋɩɩ nɛ ba leŋ ʋ haŋgbelee a pɛ Wɩa wʋlaabʋllʋ-la fa sɩ lɩɩ Samarɩa kɔ haŋgbelee lɛ.

¹⁹ Vesiŋ dɩ-kpaarɩa-la kala Iziral tinteeŋ kuoro fa sɩ saa Iziral tinteeŋ lɛ, Josaaya fa chei ba kala nɛ arɩ ʋ fa sɩ ŋaa ŋɩɩ taŋ-la ba sɩɩ yɩrɛ Bɛtɛl lɛ.

²⁰ Josaaya fa kpʋ veŋ-kpaara-la kala ba veŋ-kpaarɛ korunu-la nyuŋ nɛ, a nyɩgɛ nuhuobiine haŋgbelee korunu-la kʋŋkala nyuŋ, aŋ mɩɩra mʋ Jerusalɛm.

²¹ Ŋɩɩ nɛ kuoro Josaaya bʋla pɩ Juda tinteeŋ nɩaa, “Má gbieli La TƖƖNA dɩɩsɩŋ kiele bal gbiele-la arɩ ŋɩɩ ba sɩ ŋmʋnsa hɛ Wɩa wombiee teŋ-la tʋɔŋ.”

²² Iziral tinteeŋ koo Juda tinteeŋ kuoroo kʋŋkala ha bɩ gbiele deeŋ gbiele a chɩŋ bʋa-la lɛ wajɩaba fa sɩɩ beŋ Iziral tinteeŋ a kaa kɔ tapʋlɩɩ-la.

²³ Ama kuoro Josaaya fa sɩ dii kuoruŋ Juda tinteeŋ, ʋ jɩsɩŋ fii arɩ chori lɛ nɛ, ba gbieli La TƖƖNA dɩɩsɩŋ kiele bal gbiele deeŋ Jerusalɛm lɛ.

²⁴ Josaaya fa paala kiri vʋgʋraa arɩ nɩalɩŋ sɩɩ yɩrɛ kantɔŋŋɔɔ nɛ, a chei vesiŋ arɩ tɔŋŋɔɔ kala Juda arɩ Jerusalɛm tinteeŋ kala lɛ, ka dɩ ba wuo kɛŋ Wɩa wombie-la ba sɩ ŋmʋnsa hɛ teŋ-la lɛ kaa tɩŋ, teŋ-la Hɩlɩkaaya, nɩɩ-la fa sɩ ŋaa Wɩɩsʋllɩ sɩpaalaarʋ sɩ gbille na Wɩa dɩɩ-bal-la lɛ.

²⁵ Kuoro-la kala sɩ laa sɩpaaŋ dii kuoruŋ Josaaya lɛ arɩ nɩalɩŋ fa sɩ to ʋ harɩŋ a dii, ba kʋŋkala fa bɩ Josaaya naga. Ʋ fa to La TƖƖNA nɛ arɩ ʋ tʋɔŋ arɩ ʋ doluŋ arɩ ʋ wɩɩ wɩɩkala, a to wɩalɩŋ kala Mosis fa sɩ ŋmʋnsa bil dɩ ba tuto.

²⁶ Ama La TƖƖNA fa ha na baanɩŋ nɛ woruŋ Juda nɩaa nyuŋ, a tɩŋ wɩɩ-la Manasɛ sɩ ŋaa a leŋ ʋ baanɩŋ sii.

²⁷ Ŋɩɩ nɛ La TƖƖNA bʋl, “Mɩ jaŋ kiri Juda tɩŋŋaa ta mɩ sɩpaaŋ arɩ mɩ fa sɩ laa sɩpaaŋ kiri Iziral tɩŋŋaa ta ŋɩɩ. Mɩ jaŋ vɩa Jerusalɛm, taŋ-la mɩ sɩ lɩɩsa arɩ mɩ dɩɩ-bal-la mɩ sɩ sɩ ba chʋchʋɔlɛmɛ nɩmɛ.”

²⁸ Wɩalɩŋ dɔnsʋŋ Josaaya sɩ dii kuoruŋ a ŋaa, ba kala nɛ ba ŋmʋnsa hɛ Juda tinteeŋ kuoroo wʋŋaalaa teniŋ tʋɔŋ.

²⁹ Bʋa-la lɛ Josaaya fa sɩ ŋaa kuoro, Ijipiti tinteeŋ kuoro Neko fa kɛŋ ʋ laalɩyuoroo mʋ Yufireti fuo-la dɩ ʋ pɛ Asiiria kuoro lɛ. Ŋɩɩ nɛ Josaaya arɩ laalɩyuoroo ma mʋ chemba ba yuo laalɩŋ, ama ba kpʋ Josaaya Mɛgɩdɔ lɛ.

³⁰ Ŋɩɩ nɛ Josaaya tɩntɩnnaa joŋ ʋ kʋsʋʋŋ hɛ laalɩŋ jaaba toruko lɛ a lɩɩ Mɛgɩdɔ a kaa kɔ Jerusalɛm. Ba joŋu hugi ʋ tɩtɩa bʋa lɛ. Aŋ ka Juda taŋ-la nɩaa lɩɩsɛ ʋ nanʋala Jehuahas a ŋaa nʋʋŋ tɩsʋ ʋ dii kuoruŋ ʋ nyɩmma nyuŋ lɛ.

Jehuahas dii kuoruŋ Juda tinteeŋ lɛ

³¹ Jehuahas fa ŋaa jɩsɩŋ mara arɩ batori nɛ aŋ dii kuoruŋ Juda tinteeŋ lɛ. Ʋ hɔŋ Jerusalɛm lɛ a bemba chɛnsɩŋ batori nɛ. Ʋ naaŋ yɩrɛ nɛ fa Hamʋtal, Jɛrɩmaaya tolo. Ʋ fa lɩɩ taŋ-la ba sɩɩ yɩrɛ Lɩbɩna nɛ.

³² Jehuahas ma fa ŋaa wʋbɔŋŋɔɔ nɛ La TƖƖNA teeŋ arɩ ʋ naabalɩmaba fa sɩ ŋaa ŋɩɩ.

³³ Ŋɩɩ nɛ kuoro Neko kɛŋ kuoro Jehuahas kaa tɔɔ bɩnɩŋ dɩa taŋ-la ba sɩɩ yɩrɛ Hamaf a hɛ Siiria tinteeŋ lɛ dɩ ʋ sɩ́ wuo beŋ Jerusalɛm. Ʋ keri chɩmɩŋ warɩpʋla bʋɩ batori arɩ zɔɔ-banɛsɛ arɩ sɛlɩmɛ ma yuŋuŋ sɩ ŋaa kilo mara arɩ fii arɩ banɛsɛ nɛ a pɩ Juda tinteeŋ nɩaa.

³⁴ Ŋɩɩ nɛ Ijipiti tinteeŋ kuoro Neko leŋ Josaaya nanʋala Ɛlɩakɩm dii kuoruŋ ʋ nyɩmma nyuŋ lɛ, aŋ kɛŋ ʋ yɩrɩŋ bɩrɩmɛ a yɩyɩrʋ Jehoyakim. Ŋɩɩ nɛ Ijipiti tinteeŋ kuoro kɛŋ Jehuahas kaa mʋ Ijipiti tinteeŋ ʋ sʋʋ nɩmɛ.

³⁵ Jehoyakim ŋaa nɩalɩŋ chɛ warɩpʋla-la arɩ sɛlɩmɛ-la ʋ laa tiŋ chɩŋ-la Neko fa sɩ keri pɩba. Ʋ fa laa kɩalɩŋ a magɛ nʋʋkala dʋa sɩ maga ŋɩɩ nɛ.

Jehoyakim dii Juda tinteeŋ kuoruŋ

³⁶ Jehoyakim fa ŋaa jɩsɩŋ mara arɩ banɔŋ nɛ aŋ dii Juda tinteeŋ kuoruŋ. Ʋ hɔŋ Jerusalɛm lɛ a bemba jɩsɩŋ fii arɩ kʋbala nɛ. Ʋ naaŋ yɩrɩŋ nɛ fa Zebida, Pedaaya tolo. Ʋ lɩɩ taŋ-la ba sɩɩ yɩrɛ Ruma nɛ.

³⁷ Ʋ fa ŋaa wʋbɔŋŋɔɔ nɛ La TƖƖNA teeŋ, arɩ ʋ naabalɩmaba fa sɩ ŋaa ŋɩɩ.