2 KUOROO 22 - WƖA TENIŊ

Ba gbille a na Wɩa wombiee teniŋ

¹ Josaaya fa ŋaa jɩsɩŋ chori nɛ aŋ dii kuoruŋ Juda tinteeŋ lɛ. Ʋ hɔŋ Jerusalɛm lɛ a bemba jɩsɩŋ mara arɩ fii arɩ kʋbala nɛ. Ʋ naaŋ yɩrɩŋ nɛ fa Jedida. Jedida ma naaŋ yɩrɩŋ nɛ fa Adaaya a lɩɩ taŋ-la ba sɩɩ yɩrɛ Bozikaf.

² Josaaya fa ŋaa wɩalɩŋ sɩɩ tɔrɛ La TƖƖNA tʋɔŋ nɛ. Ʋ fa to wɩalɩŋ kala ʋ naabalɩma Devit sɩ to nɛ, ʋ bɩ begile mʋ nadiiŋ koo nagʋa.

³ Ʋ sɩ dii kuoruŋ ʋ jɩsɩŋ fii arɩ chori lɛ, ʋ tɩŋ nɩɩ-la sɩɩ ŋmʋnsɛ ʋ tenniŋ baa yɩrɛ Safaŋ, sɩ ŋaa Azalɩa nanʋala, a ŋaa Mesulam ma nihiŋ dɩ ʋ mʋ La TƖƖNA dɩɩ-bal-la. Ʋ sɩ,

⁴ “Mʋ Hɩlɩkaaya teeŋ, Wɩɩsʋllɩ sɩpaalaaraa nɩhɩaŋ, a bʋla pʋ dɩ ʋ laa moribie-la ba sɩ kaa kʋ jʋʋ Wɩa dɩɩ-bal-la, kɩalɩŋ nɩalɩŋ sɩɩ pɔ dɩa-la sɩ laa nɩaa teeŋ.

⁵ Bʋla pɩ Hɩlɩkaaya dɩ ʋ joŋ moribie-la pɩ nɩalɩŋ sɩɩ beŋ Wɩa dɩɩ-bal-la tɩntɩŋŋaa dɩ ba tiŋ nɩalɩŋ sɩɩ wasɛ Wɩa dɩɩ-bal-la.

⁶ Ba tiŋ kapɩntaba arɩ meesimba arɩ dɩɩ-saara-la sɩ pɛ, aŋ yɔɔ daasɩŋ arɩ tabɩɩ-yɛrɛɛ dɩ ba kaa wasɛ Wɩa dɩɩ-bal-la.

⁷ Ama ʋ bɩ maga dɩ ba ŋmʋnsɛ moribie-la ba sɩ die niiŋ a bibil, bɛɛ wɩaa ba ŋaa nɩtɩtɩɩba nɛ.”

⁸ Ŋɩɩ nɛ Hɩlɩkaaya, Wɩɩsʋllɩ sɩpaalaaraa nɩhɩaŋ bʋla pɩ Safaŋ, nɩɩ-la sɩɩ ŋmʋnsɛ kuoro teniŋ, “Mɩ na teŋ-la lɛ ba sɩ ŋmʋnsɛ Wɩa wombiee hɛ nɛ Wɩa dɩɩ-bal-la lɛ.” Hɩlɩkaaya joŋ teŋ-la a pɩ Safaŋ ʋ laa karɩmɛ.

⁹ Ŋɩɩ nɛ Safaŋ mɩɩra mʋ kuoro teeŋ a bʋla pʋ, “Ŋ tɩntɩnnɩ-hɩasɩŋ laa moribie-la sɩ hɛ Wɩa dɩɩ-bal-la lɛ nɛ a joŋo pɩ tɩntɩnnaa arɩ nɩalɩŋ sɩɩ beŋ Wɩa dɩa-la tɩntɩŋŋaa.

¹⁰ Ama kuoru, wɩɩ dɔŋ ma nɛ ha hɛ nɩmɛ. Hɩlɩkaaya, Wɩɩsʋllɩ sɩpaalaaraa nɩhɩaŋ nɛ joŋ teniŋ deeŋ a pɩmɛ.” Ŋɩɩ nɛ Safaŋ faasa suri yikoro a karɩmɛ teŋ-la kuoro sɩpaaŋ.

¹¹ Kuoro Josaaya sɩ nɩɩ wɩalɩŋ sɩ hɛ Wɩa wombiee teŋ-la tʋɔŋ, ʋ kɛŋ ʋ gɛnnɩŋ kɩɛsɛ aa dagɛ tʋɔ-cheeŋ.

¹² Ŋɩɩ nɛ ʋ bʋla pɩ Hɩlɩkaaya sɩ ŋaa Wɩɩsʋllɩ sɩpaalaara arɩ Safaŋ nanʋala Ahɩkam arɩ Mɩkaaya nanʋala Akɩbɔ arɩ Safaŋ, nɩɩ-la sɩɩ ŋmʋnsɛ ba tenniŋ arɩ kuoro nanzɔɔ Asaaya,

¹³ “Má mʋ chɛ na La TƖƖNA teeŋ a mʋ tɩgɛ wɩalɩŋ sɩ hɛ teŋ-la tʋɔŋ a pɩ mɩ dɩ Juda nɩaa kala. La TƖƖNA chaasa na baanɩŋ nɛ la nyuŋ, a tɩŋ la naabalɩmaba sɩ bɩ wɩalɩŋ sɩ hɛ teŋ-la tʋɔŋ to, a bɩ wɩalɩŋ kala ba sɩ ŋmʋnsa a mʋ tɩgɛ la lɛ ŋaa.”

¹⁴ Ŋɩɩ nɛ Hɩlɩkaaya sɩ ŋaa Wɩɩsʋllɩ sɩpaalaarʋ, Ahɩkam, Akɩbɔ, Safaŋ arɩ Asaaya mʋ haal kʋbala sɩ ŋaa Wɩa wʋlaabʋllʋ teeŋ baa yɩrɛ Hulida, dɩ ba chɛ na. Haal-la bala nɛ fa Salum, sɩ ŋaa Tɩkɩva nanʋala. Tɩkɩva ma nyɩmma nɛ fa Hahas. Salum nɛ faa beŋ gɛnnɩ-la ba sɩɩ bil Wɩa dɩɩ-balɩŋ lɛ. Hulida ma fa hɛ Jerusalɛm lɛ nɛ aa jʋʋ jechigi falɩɩ-la.

¹⁵ Ŋɩɩ nɛ ʋ bʋla pɩba, “Wɩɩ-la La TƖƖNA Iziral tɩŋŋaa Wɩa sɩ bʋla nɛ ŋ-la: Má mʋ bʋla pɩ nɩɩ-la sɩ tɩmma mɩ teeŋ,

¹⁶ arɩ La TƖƖNA sɩ, ‘Mɩ jaŋ joŋ wʋlɔrʋnʋŋ hɛ Jerusalɛm arɩ ʋ nɩaa kala lɛ, arɩ teŋ-la Juda tinteeŋ kuoro sɩ karɩma sɩ dagɛ ŋɩɩ,

¹⁷ bɛɛ wɩaa ba vɩamɛ nɛ aŋ nyɩgɛ kʋsʋɔrʋsʋŋ pɩpɩ vesiŋ, a leŋ mɩ baanɩŋ sii tɔmɔ-la ba tɩtɩa sɩ mɛ lɛ. Mɩ baanɩŋ chaasa sii ba nyuŋ nɛ, ʋ bɩ jaŋ fɩɛlɛ.’

¹⁸ Má mʋ bʋla pɩ Juda tinteeŋ kuoro Josaaya, nɩɩ-la sɩ tɩmma dɩ ma kʋ chɛ na wɩaa La TƖƖNA teeŋ, ‘Wɩɩ-la La TƖƖNA Iziral tɩŋŋaa Wɩa sɩ bʋla a mʋ tɩgɛ wɩalɩŋ ŋ sɩ nɩa lɛ nɛ ŋ-la:

¹⁹ A tɩŋ ŋ tʋɔŋ sɩ cheye ŋ kɛŋ ŋ tɩtɩa muuri mɩ-na ma TƖƖNA sɩpaaŋ, ŋ sɩ nɩa arɩ mɩ jaŋ chei Jerusalɛm arɩ ʋ nɩaa, ka dɩ lee-la pɩŋ jikpeeŋ, ŋ kɛŋ ŋ gɛnnɩŋ kɩɛsɛ a yel mɩ sɩpaaŋ, ŋɩɩ wɩaa mɩ jegile nɩɩ ŋ sʋla nɛ. Mɩ-na ma TƖƖNA nɛ bʋla.

²⁰ Mɩ jaŋ leŋ dɩ ŋ sʋʋ arɩ yarɩfɩɛlaa. Ŋ sɩɩŋ bɩ jaŋ na wʋlɔrʋnʋ-la mɩ sɩ jaŋ joŋo ŋaa Jerusalɛm arɩ ʋ nɩaa lɛ.’ ” Ŋɩɩ nɛ nɩalɩŋ mɩɩra mʋ bʋl wɩɩ-la Hulida sɩ bʋla a pɩ kuoro.